Te Anɔkwale lɛ Jara Wa Kɛha Bo Ha Tɛŋŋ?
Te Anɔkwale lɛ Jara Wa Kɛha Bo Ha Tɛŋŋ?
“Nyɛaale anɔkwale lɛ, ni anɔkwale lɛ aaaha nyɛye nyɛhe.”—YOHANE 8:32.
1. Yɛ mɛɛ gbɛ nɔ bɔ ni Pilato kɛ wiemɔ, “anɔkwale” tsu nii eha lɛ yɔɔ srɔto yɛ bɔ ni Yesu kɛtsu nii lɛ he lɛ?
“MƐNI ji anɔkwale?” Beni Pilato bi nɛkɛ sane nɛɛ, no mli lɛ nɔ ni enyaa he, taakɛ eji lɛ tamɔ nɔ ni ekɔɔ anɔkwale kɛkɛ he. Shi Yesu ewie nɔ ko bianɛ, akɛ: “Mi lɛ, enɛ hewɔ afɔ́ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.” (Yohane 18:37, 38) Ákɛ mɔ ni tamɔɔɔ Pilato lɛ, Yesu kɛ wiemɔ ni maa sane nɔ mi, ‘anɔkwale lɛ’ tsu nii. Eewie ŋwɛi anɔkwale lɛ he.
Su ni Je lɛ Hiɛ yɛ Anɔkwale lɛ He
2. Mɛɛ Yesu wiemɔ tsɔɔ bɔ ni anɔkwale lɛ jara wa waa ha?
2 Paulo kɛɛ akɛ: “Jeee mɛi fɛɛ yɔɔ hemɔkɛyeli.” (2 Tesalonikabii 3:2) Abaanyɛ awie nakai nɔŋŋ yɛ anɔkwale lɛ he. Kɛji akɛ akɛ anɔkwale ni damɔ Biblia lɛ nɔ lɛ he hegbɛ ha po lɛ, mɛi babaoo jeɔ gbɛ amɛkuɔ amɛhiɛ amɛshwieɔ nɔ. Ni kɛlɛ kwɛ bɔ ni ejara wa waa ha! Yesu kɛɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:32.
3. Mɛɛ kɔkɔbɔɔ ni kɔɔ tsɔɔmɔi ni lakaa mɔ lɛ ahe esa akɛ wɔbo toi?
3 Bɔfo Paulo kɛɛ akɛ anaŋ anɔkwale lɛ yɛ adesa jeŋ nileei kɛ blemasaji amli. (Kolosebii 2:8) Yɛ anɔkwale mli lɛ, nɛkɛ tsɔɔmɔi nɛɛ lakaa mɔ. Paulo bɔ Efeso Kristofoi lɛ kɔkɔ akɛ kɛji akɛ amɛhe enɛɛmɛi amɛye lɛ, amɛbaatsɔmɔ tamɔ mumɔŋ abifabii ni “tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ amɛ, ni ekpalaa amɛ kɛyaa kɛbaa yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa.” (Efesobii 4:14) Ŋmɛnɛ, mɛi ni teɔ shi woɔ Biblia mli anɔkwale lɛ alakamɔ wiemɔi lɛ haa “gbɔmɛi aŋaa fɔŋ too” lɛ shwereɔ. The New Encyclopædia Britannica lɛ tsɔɔ “lakamɔ wiemɔ” mli akɛ eji “gbɛ ni ato he gbɛjianɔ ni atsɔɔ nɔ akudɔɔ mɛi krokomɛi ahemɔkɛyelii, subaŋi, loo nifeemɔi be fɛɛ be.” Nɛkɛ lakamɔ wiemɔ nɛɛ kɛ ŋaa tsɔmɔɔ anɔkwale efeɔ lɛ apasa ni ehaa amale shwereɔ oookɛɛ eji anɔkwale. Bɔni afee ni ana anɔkwale lɛ yɛ nɔnyɛɛ ni yaa nɔ efiteɔ nii yɛ gbɛ ni yɔɔ nigii nɔ nɛɛ mli lɛ, esa akɛ wɔkɛ hiɛdɔɔ abote Ŋmalɛi lɛ amli.
Kristofoi kɛ Je Lɛ
4. Namɛi akɛ anɔkwale lɛ haa amɛ, ni mɛɛ gbɛnaa nii ka mɛi ni amɛnine shɛɔ nɔ lɛ anɔ?
4 Beni Yesu Kristo wieɔ mɛi ni ebatsɔmɔ ekaselɔi lɛ ahe lɛ, esɔle eha Yehowa akɛ: “Feemɔ amɛ krɔŋkrɔŋ yɛ onɔkwale lɛ mli; owiemɔ lɛ anɔkwaleŋ.” (Yohane 17:17) Abaafee mɛnɛɛmɛi krɔŋkrɔŋ, aloo abaatuu amɛ ama afa, kɛ yiŋtoo akɛ koni amɛsɔmɔ Yehowa ni amɛha ale egbɛi lɛ kɛ e-Maŋtsɛyeli lɛ. (Mateo 6:9, 10; 24:14) Eyɛ mli akɛ jeee mɛi fɛɛ yɔɔ Yehowa anɔkwale lɛ eko moŋ, shi eyɛ akɛ nikeenii ni akɛhaa mɛi fɛɛ ni taoɔ lɛ yaka, ni maŋ nɔ ni amɛjɛ, weku, loo hiŋmɛigbelemɔ kɔɔɔ he eko. Bɔfo Petro kɛɛ akɛ: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.
5. Mɛni hewɔ afɔɔ Kristofoi ayiwaa lɛ?
5 Kristofoi kɛ Biblia mli anɔkwale lɛ haa mɛi krokomɛi, shi jeee he fɛɛ he ahereɔ amɛ yɛ. Yesu bɔ kɔkɔ akɛ: “Amɛaajie nyɛ amɛwo amanehulu mli, ní agbe nyɛ; ni migbɛi lɛ hewɔ lɛ jeŋmaji fɛɛ aaanyɛ nyɛ.” (Mateo 24:9) Beni Irish osɔfo John R. Cotter wieɔ nɛkɛ kuku nɛɛ he lɛ, eŋma yɛ afi 1817 mli akɛ: “[Kristofoi] bɔɔ mɔdɛŋ ni amɛtsɔ amɛshiɛmɔ lɛ nɔ amɛtsake adesai ashihilɛi, ni yɛ nɔ najiaŋ ni gbɔmɛi lɛ aaanu he akɛ esa akɛ amɛda shi moŋ lɛ, yɛ anɔkwale mli lɛ, ehaa amɛnyɛ̃ɔ amɛ ni amɛwaa amɛyi yɛ amɛ nɔ fɔŋ feemɔi lɛ he mama ni amɛkpaa lɛ hewɔ.” Mɛi ni waa mɛi ayi nɛɛ “ekpɛlɛɛɛ anɔkwale lɛ suɔmɔ lɛ nɔ koni ahere amɛyiwala.” Yɛ enɛ hewɔ lɛ, “Nyɔŋmɔ aaatsu shishiumɔ ni mli wa kɛaaba amɛŋɔɔ, ni amɛhe amale amɛye, koni akojo mɛi fɛɛ ni heee anɔkwale lɛ amɛyeee, shi amɛnáa nii ni ejaaa gbɛ lɛ moŋ ahe tsui lɛ.”—2 Tesalonikabii 2:10-12.
6. Mɛɛ nibii ni ashweɔ esaaa akɛ Kristofonyo ko atao?
6 Bɔfo Yohane wo Kristofoi ni yɔɔ jeŋ ni sumɔɔɔ amɛsane nɛɛ mli lɛ ŋaa akɛ: “Nyɛkasumɔa je lɛ aloo nibii hu ni yɔɔ je lɛŋ. . . . ; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ tsɛ lɛ mli, shi moŋ je lɛ mli ejɛ.” (1 Yohane 2:15, 16) Yɛ kɛɛmɔ ni Yohane kɛɛ akɛ, “nɔ fɛɛ nɔ” lɛ hewɔ lɛ, ejieee nɔ ko kɛjɛɛɛ mli. Yɛ yiŋtoo nɛɛ hewɔ lɛ, wɔkaná shwelɛ kɛmiiha nɔ fɛɛ nɔ ni je nɛɛ yɔɔ ni ekɛaaha ni aaagbala wɔ kɛjɛ anɔkwale lɛ he lɛ. Yohane ŋaawoo lɛ toiboo baaná wɔshihilɛi anɔ hewalɛ waa. Yɛ mɛɛ gbɛ nɔ?
7. Te anɔkwale lɛ he nilee kanyaa mɛi ni yɔɔ tsuijurɔ lɛ ehaa tɛŋŋ?
7 Yɛ afi 2001 mli lɛ, Yehowa Odasefoi ni yɔɔ jeŋ fɛɛ lɛ fee shia Biblia mli nikasemɔi fe akpekpei ejwɛ kɛ fã daa nyɔŋ nɔ, ni amɛkɛtsɔɔ aŋkroaŋkroi kɛ kui anii yɛ Nyɔŋmɔ taomɔ nii kɛha wala lɛ he. Nɔ ni jɛ mli ba ji akɛ, abaptisi mɛi 263,431. Anɔkwale lɛ la lɛ bafee nɔ ni jara wa kɛha nɛkɛ kaselɔi heei nɛɛ, ni amɛkpoo naanyobɔi fɔŋ lɛ kɛ jeŋba shara lɛ, ni ji gbɛ̀i ni gbeɔ Nyɔŋmɔ he guɔ ni egbɛ eshwã je nɛɛ mli lɛ. Kɛjɛ be mli ni abaptisi amɛ lɛ kɛbaa nɛɛ, amɛ́tee nɔ amɛhi shi yɛ tɛi ni Yehowa efolɔ eshwie shi kɛha Kristofoi fɛɛ lɛ anaa. (Efesobii 5:5) Ani anɔkwale lɛ jara wa nakai kɛha bo?
Yehowa Jwɛŋɔ Wɔhe
8. Te Yehowa tsuɔ wɔhenɔjɔɔmɔ lɛ he nii ehaa tɛŋŋ, ni mɛni hewɔ eji nilee gbɛ akɛ ‘wɔɔtao maŋtsɛyeli lɛ tsutsu’ lɛ?
8 Yɛ emuu ni wɔyeee lɛ fɛɛ sɛɛ lɛ, Yehowa kɛ mɔbɔnalɛ kpɛlɛɔ wɔhenɔjɔɔmɔ lɛ nɔ, emaa ehiɛ shi, kɛ wɔɔkɛɛ nakai lɛ, koni egbala wɔ kɛba emasɛi. No hewɔ lɛ, etsɔɔ wɔ nii koni wɔhole otii kɛ nibii ni wɔshweɔ ni wɔkɛmamɔ wɔhiɛ lɛ anɔ. (Lala 113:6-8) Yɛ nakai beaŋ nɔŋŋ lɛ, Yehowa ŋmɛɔ wɔkɛ lɛ teŋ naanyobɔɔ gbɛ, ni ewoɔ shi akɛ ebaajwɛŋ wɔhe kɛji akɛ ‘wɔtee nɔ wɔtao maŋtsɛyeli lɛ kɛ ejalɛ lɛ tsutsu.’ Kɛji akɛ wɔfee enɛ, ni wɔbaa wɔ diɛŋtsɛ wɔhe yi yɛ mumɔŋ lɛ, ewoɔ shi akɛ: “Akɛ nii nɛɛ fɛɛ aaafata he aha nyɛ.”—Mateo 6:33.
9. Namɔ ji “tsulɔ anɔkwafo kɛ nilelɔ” lɛ, ni mɛɛ gbɛ nɔ Yehowa jwɛŋɔ wɔhe yɛ, yɛ “tsulɔ” nɛɛ ni ekɛ lɛ tsuɔ nii lɛ hewɔ?
9 Yesu Kristo hala ebɔfoi 12 lɛ ni eto Kristofoi ni afɔ amɛ mu lɛ asafo ni abatsɛ lɛ akɛ “Nyɔŋmɔ Israel” lɛ shishi. (Galatabii 6:16; Kpojiemɔ 21:9, 14) Yɛ sɛɛ mli lɛ abatsɔɔ enɛ mli akɛ eji “Nyɔŋmɔ hiɛkalɔ lɛ asafo lɛ, anɔkwale lɛ akulashiŋ kɛ enɔdaamɔnɔ lɛ.” (1 Timoteo 3:15) Yesu tsɔɔ akɛ nakai asafo lɛ mli bii lɛ ji “tsulɔ anɔkwafo kɛ nilelɔ,” kɛ “tsulɔnukpa anɔkwafo kɛ nilelɔ.” Yesu kɛɛ nakai tsulɔ anɔkwafo lɛ baafee mɔ ni gbɛnaa nii kã enɔ akɛ eha Kristofoi “amɛniyenii yɛ be ni sa mli.” (Mateo 24:3, 45-47; Luka 12:42) Kɛji akɛ niyenii bɛ lɛ, hɔmɔ baagbe wɔ. Nakai nɔŋŋ hu kɛji akɛ wɔyeee mumɔŋ niyenii lɛ, wɔgbɔjɔɔ ni wɔgboiɔ yɛ mumɔŋ. No hewɔ lɛ, shihilɛ mli ni “tsulɔ anɔkwafo kɛ nilelɔ lɛ” yɔɔ lɛ ji odaseyeli kroko ni tsɔɔ akɛ Yehowa jwɛŋɔ wɔhe. Eba akɛ wɔɔjie hiɛsɔɔ ni mli kwɔ kpo wɔha mumɔŋ niyenii ni jara wa ni atsɔɔ nakai “tsulɔ” lɛ nɔ akɛhaa wɔ lɛ.—Mateo 5:3.
10. Mɛni hewɔ ehe hiaa waa akɛ wɔya kpeei be fɛɛ be lɛ?
10 Mumɔŋ niyenii ni ayeɔ lɛ kɔɔ teemɔŋ nikasemɔ he. Ekɔɔ Kristofoi krokomɛi ni akɛ amɛ aaabɔ kɛ asafoŋ kpeei ni aaaya hu he. Ani okaiɔ niyenii diɛŋtsɛ ni oye nyɔji ekpaa ni eho nɛ, aloo po otsii ekpaa ni eho nɛ lɛ? Ekolɛ okaiii. Ni kɛlɛ, nɔ fɛɛ nɔ ni oye lɛ ha oná niyenii mli nibii kpakpai ni he hiaa ni baanyɛ awaje bo ni ohi wala mli lɛ. Ni ekolɛ oye niyenii ni tamɔ nakai kɛjɛ nakai be lɛ mli kɛbaa. Nakai nɔŋŋ eji yɛ mumɔŋ niyenii ni akɛhaa wɔ yɛ wɔ Kristofoi akpeei ashishi lɛ gbɛfaŋ. Ekolɛ wɔnyɛɛɛ wɔkai saji ni wɔnu yɛ kpeei ashishi lɛ fɛɛ pɛpɛɛpɛ. Ni akɛ saji ni tamɔ nakai nɔŋŋ eha shii abɔ. Ni kɛlɛ, eji mumɔŋ niyenii, ni ehe hiaa kɛha wɔhilɛ-kɛhamɔ. Wɔkpeei lɛ kɛ mumɔŋ niyenii kpakpa ni wajeɔ mɔ haa be fɛɛ be, ni akɛhaa yɛ be ni sa hu mli.
11. Mɛɛ gbɛnaa nii ka wɔnɔ beni wɔyaa Kristofoi akpeei lɛ?
11 Kristofoi akpeei ni wɔyaa lɛ hu kɛ gbɛnaa nii bafɔɔ wɔnɔ. Awoɔ Kristofoi aŋaa ni ‘amɛwowoo amɛhe hewalɛ,’ amɛkanya nanemɛi ni ji asafo lɛ mli bii lɛ kɛya “suɔmɔ kɛ nitsumɔi kpakpai ahe.” Kristofoi akpeei fɛɛ ni wɔsaa wɔhe kɛhaa, wɔyaa, ni wɔkɛ wɔhe woɔ nifeemɔi lɛ amli lɛ wajeɔ wɔ aŋkroaŋkro hemɔkɛyeli ni ewoɔ mɛi krokomɛi hewalɛ. (Hebribii 10:23-25) Taakɛ gbekɛbii ni baanyɛ ahala niyenii amli ji lɛ, ehe baahia ni awo amɛteŋ mɛi komɛi hewalɛ be fɛɛ be koni amɛye mumɔŋ niyenii. (Efesobii 4:13) Eji suɔmɔ nifeemɔ akɛ, akɛ nakai hewalɛwoo lɛ aaaha yɛ be mli ni ehe hiaa lɛ koni mɛi ni tamɔ nɛkɛ lɛ aya amɛhiɛ kɛtsɔmɔ Kristofoi ni amɛdara yɛ mumɔŋ, mɛi ni bɔfo Paulo wie amɛhe akɛ: “Mɛi ni edara lɛ anɔ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ” lɛ.—Hebribii 5:14.
Wɔ Diɛŋtsɛ Wɔhe ni Wɔɔkwɛ yɛ Mumɔŋ
12. Namɔ anɔkwale lɛ mli ni wɔɔya nɔ wɔhi lɛ he naagbee gbɛnaa nii ka enɔ? Tsɔɔmɔ mli.
12 Wɔ gbalashihilɛ mli hefatalɔ loo wɔfɔlɔi baanyɛ awo wɔ hewalɛ yɛ anɔkwale gbɛ lɛ nɔ. Nakai nɔŋŋ hu wɔ asafoŋ onukpai lɛ baanyɛ akwɛ wɔ nɔ akɛ asafoku ni yɔɔ amɛkwɛmɔ shishi lɛ fã. (Bɔfoi lɛ Asaji 20:28) Shi nɛgbɛ gbɛnaa nii ni fe fɛɛ lɛ kã, kɛji akɛ wɔɔya nɔ wɔŋmɛ wɔtsui shi yɛ wɔshihilɛ gbɛ ni damɔ anɔkwale lɛ nɔ lɛ mli? Yɛ anɔkwale mli lɛ, gbɛnaa nii lɛ kã wɔteŋ mɔ fɛɛ mɔ nɔ. Ni eji anɔkwale yɛ daa gbi shihilɛi kɛ jaramɔ bei fɛɛ mli. Susumɔ sane ni nyiɛ sɛɛ ni ba nɛɛ he okwɛ.
13, 14. Taakɛ akɛ gwantɛŋ bi lɛ he niiashikpamɔ fee he nɔkwɛmɔnɔ lɛ, te wɔɔfee tɛŋŋ wɔná mumɔŋ yelikɛbuamɔ ni he hiaa lɛ?
13 Toobii komɛi miikpe jwɛifɔ ko yɛ Scotland, kɛkɛ ni amɛteŋ ekome du gbɛ kɛyaje ŋmeŋme ko afã gbɛ, ni eshane kɛagbee bu ko ni afo afabaŋ awo he lɛ mli. Epilaaa, shi etsui fa, ni enyɛɛɛ ekwɔ kɛje kpo. No hewɔ lɛ ebɔi boo mɔbɔmɔbɔ. Enyɛ nu he, ni lɛ hu ebɔi boo mɔbɔmɔbɔ kɛyashi be mli ni tookwɛlɔ lɛ ba ni ebajie toobi lɛ.
14 Kadimɔ bɔ ni saji lɛ ba ha lɛ. Toobi lɛ tsɛ́ kɛha yelikɛbuamɔ, gwantɛŋ yoo lɛ kɛ egbee fata eyaafo lɛ he, ni tookwɛlɔ ni aha ehiɛ eba ehe nɔ lɛ bɔi nifeemɔ amrɔ nɔŋŋ koni ekɛjie lɛ. Kɛji akɛ kooloo ni edako kwraa lɛ kɛ enyɛ baanyɛ anu oshara he ni amɛtsɛ kɛha yelikɛbuamɔ amrɔ nɔŋŋ lɛ, ani esaaa akɛ wɔfeɔ nakai nɔŋŋ kɛji akɛ wɔshane yɛ mumɔŋ aloo wɔkɛ osharai komɛi ni jɛ Satan je lɛ mli kpe trukaa lɛ? (Yakobo 5:14, 15; 1 Petro 5:8) Esa akɛ wɔfee nakai, titri lɛ kɛji akɛ wɔbɛ niiashikpamɔ akɛni wɔdarako aloo wɔba anɔkwale lɛ mli etsɛko lɛ hewɔ.
Gbɛtsɔɔmɔ ni Jɛ Nyɔŋmɔ Ŋɔɔ lɛ Sɛɛdii kɛ Miishɛɛ Baa
15. Te yoo ko nu he eha tɛŋŋ beni ebɔi Kristofoi asafo lɛ kɛbɔɔ lɛ?
15 Susumɔ sɛɛnamɔ ni yɔɔ Biblia mli shishinumɔ kɛ jwɛŋmɔŋ toiŋjɔlɛ ni ekɛbahaa mɛi ni sɔmɔɔ anɔkwa Nyɔŋmɔ lɛ he lɛ he okwɛ. Yoo ko ni eye afii 70 ni eji Church of England jamɔ lɛ mlinyo ewala shihilɛ fɛɛ lɛ kpɛlɛ ni Yehowa Odasefoi lɛ ateŋ mɔ ko kɛ lɛ akase Biblia lɛ. Etsɛɛɛ ni ekase akɛ Nyɔŋmɔ gbɛi ji Yehowa, ni efata he kɛkɛɛ akɛ “Amen” kɛha sɔlemɔi ni jɛ tsuiŋ ni asɔle yɛ maŋ lɛ mli Maŋtsɛyeli Asa lɛ nɔ lɛ. Ekɛ henumɔ ni mli wa waa kɛɛ akɛ: “Yɛ nɔ najiaŋ ni nyɛaaha asusu akɛ Nyɔŋmɔ yɛ shɔŋŋ kwraa fe wɔ gbɔmɛi foji ni gboiɔ nɛɛ lɛ, nyɛtamɔ mɛi ni kɛ lɛ baa wɔteŋ diɛŋtsɛ tamɔ naanyo ko ni asumɔɔ lɛ. Eji niiashikpamɔ ko ni mikɛkpeko dã.” Ebaanyɛ efee akɛ nakai yoo ni yɔɔ anɔkwale lɛ he miishɛɛ ni asumɔɔ esane nɛɛ hiɛ kpaŋ bɔ ni anɔkwale lɛ ná enɔ hewalɛ klɛŋklɛŋ kwraa lɛ nɔ kɔkɔɔkɔ. Eba akɛ wɔ hu wɔhiɛ kpaŋ bɔ ni anɔkwale lɛ bafee nɔ ni jara wa waa kɛha wɔ beni wɔkpɛlɛ nɔ klɛŋklɛŋ kwraa lɛ nɔ.
16. (a) Mɛni baanyɛ aba kɛji akɛ wɔha shika námɔ fee nɔ titri ni ma wɔhiɛ? (b) Te wɔɔfee tɛŋŋ wɔná anɔkwa miishɛɛ?
16 Mɛi pii heɔ yeɔ akɛ, eji amɛyɛ shika babaoo kulɛ, amɛbaaná miishɛɛ waa. Shi kɛlɛ, kɛji akɛ wɔkɛ shika ni wɔɔná fee nɔ titri yɛ wɔshihilɛ mli lɛ, wɔbaaná “jwɛŋmɔŋ piŋmɔi babaoo” mli amanehulu. (1 Timoteo 6:10, Phillips) Susumɔ mɛi abɔ ni heɔ loto tikiti, amɛfiteɔ shika yɛ asɔshwɛmɔhei, aloo amɛkɛ amɛshika woɔ nitsumɔi wuji amli koni amɛná sɛɛ babaoo, ni amɛmiila ni amɛná jwetri babaoo lɛ ahe okwɛ. Amɛteŋ mɛi fioo ko pɛ ji mɛi ni amɛnine shɛɔ jwetri ni amɛhiɛ kã nɔ lɛ nɔ. Ni bei pii lɛ, mɛi ni amɛnine shɛɔ nɔ lɛ naa akɛ jwetri ni amɛnine shɛ nɔ trukaa lɛ haaa amɛná miishɛɛ. Shi moŋ, miishɛɛ ni sɛɛ tsɛɔ lɛ baa kɛjɛɔ Yehowa suɔmɔnaa nifeemɔ mli, Kristofoi asafo lɛ ni akɛ lɛ aaatsu nii yɛ gbɛtsɔɔmɔ ni baa kɛjɛɔ Yehowa mumɔ krɔŋkrɔŋ lɛ kɛ eŋwɛibɔfoi lɛ ayelikɛbuamɔ shishi lɛ mli. (Lala 1:1-3; 84:5, 6; 89:16) Kɛji akɛ wɔfee enɛ lɛ, jɔɔmɔi ni akpaaa gbɛ baaba wɔnɔ. Ani anɔkwale lɛ jara wa kɛha bo bɔ ni ekɛ jɔɔmɔi ni tamɔ nɛkɛ aaaba oshihilɛ mli?
17. Petro ni kɛ Simon, wolokpoolɔ lɛ yahi shi lɛ jieɔ mɛni kpo yɛ bɔfo lɛ subaŋ he?
17 Susumɔ bɔfo Petro niiashikpamɔ ko he okwɛ. Efã gbɛ akɛ maŋsɛɛ sanekpakpa shiɛlɔ yɛ afi 36 Ŋ.B. kɛtee Sharon Ŋa Kpalanaa lɛ nɔ. Eyawa yɛ Lida, he ni etsa Ainea ni yeɔ kuumɔ hela lɛ, ni etse mli kɛtee ŋshɔnaa maŋ ni ji Yopa lɛ mli. Eyatée Dorka ni egbo lɛ shi yɛ jɛmɛ. Bɔfoi lɛ Asaji 9:43 kɛɔ wɔ akɛ: “Ni eba mli akɛ ehi Yopa gbii kpalaŋŋ yɛ Simon, wolokpoolɔ lɛ ŋɔɔ.” Wolokpoomɔ ni awie he nɛɛ jieɔ su ni tsɔɔ mɛi ahe jwɛŋmɔ fɔŋ ni Petro bɛ lɛ kpo yɛ be mli eshiɛɔ etsɔɔ gbɔmɛi ni yɔɔ nakai maŋ lɛ mli lɛ. Yɛ mɛɛ gbɛ nɔ? Biblia he nilelɔ Frederic W. Farrar ŋma akɛ: “Anyɛŋ atsɔ mɔ ni nyiɛɔ Mose Mla ni atsɔ Naabu nɔ akɛha lɛ ni yɔɔ keketee ni eŋmɛɛɛ saji ahe ekɛsaa lɛ yiŋ ni ehi wolokpoolɔ shia. Kooloi srɔtoi ahewolo kɛ amɛgbohii ni nitsumɔ nɛɛ haa anaa daa gbi lɛ kɛ nibii ni ebiɔ ni akɛfee enɛ lɛ, haa ebafeɔ nɔ ko ni bɛ krɔŋŋ ni anyaŋeɔ yɛ mɛi ni yɔɔ keketee yɛ mla lɛ mli lɛ ahiɛ.” Kɛji akɛ Simon ni “shia yɔɔ ŋshɔ lɛ naa” lɛ bɛŋkɛɛɛ wolokpoomɔ he nɛɛ po lɛ, kɛlɛ, Farrar kɛɛ akɛ, Simon kɛ ehe ewo ‘nitsumɔ ko ni anyaŋeɔ ni haa bulɛ ni mɛi fɛɛ ni kɛ amɛhe ewo mli lɛ yɔɔ lɛ baa shi lɛ mli.’—Bɔfoi lɛ Asaji 10:6.
18, 19. (a) Mɛni hewɔ Petro hao yɛ ninaa ni enine shɛ nɔ lɛ hewɔ? (b) Mɛɛ jɔɔmɔ ni akpaaa gbɛ Petro nine shɛ nɔ?
18 Petro ni bɛ mɛi ahe jwɛŋmɔ fɔŋ lɛ kpɛlɛ Simon gbɔfeemɔ lɛ nɔ, ni Petro nine shɛ ŋwɛi gbɛtsɔɔmɔ ko ni ekpaaa gbɛ nɔ yɛ jɛmɛ. Ena ninaa ko, ni afã lɛ yɛ mli akɛ eye kooloi ni he tseee yɛ Yudafoi amla naa lɛ eko. Petro kpoo enɛ ni ekɛɛ akɛ eyeko “yakayaka nɔ ko loo nɔ ko ni he tseee dã.” Shi akɛɛ lɛ shii etɛ akɛ: “Nɔ ni Nyɔŋmɔ etsuu he lɛ, kaabu lɛ akɛ yakayaka nɔ ko.” Anuɔ shishi akɛ ‘Petro hao waa yɛ emligbɛ yɛ nɔ ni ninaa nɛɛ shishi baanyɛ aji lɛ he.’—Bɔfoi lɛ Asaji 10:5-17; 11:7-10.
19 Petro leee akɛ yɛ gbi ni tsɔ hiɛ lɛ mli, yɛ Kaisarea ni jɛkɛmɔ ji kilomitai 50 kɛjɛ heni eyɔɔ lɛ, Jeŋmajiaŋnyo ko ni atsɛɔ lɛ Kornelio hu ena ninaa. Yehowa bɔfo efa Kornelio akɛ etsu etsuji ni amɛyatao Petro yɛ Simon wolokpoolɔ lɛ shia. Kornelio tsu etsuji lɛ kɛtee Simon shia lɛ, ni Petro fata amɛhe kɛba Kaisarea. Kɛkɛ ni eshiɛ etsɔɔ Kornelio kɛ ewekumɛi kɛ enanemɛi lɛ yɛ jɛmɛ. Nɔ ni jɛ mli ba ji akɛ, amɛbatsɔmɔ klɛŋklɛŋ Jeŋmajiaŋbii heyelilɔi ni amɛfoko ketia ni amɛnine shɛ mumɔ krɔŋkrɔŋ lɛ nɔ ákɛ Maŋtsɛyeli gboshiniyelɔi. Eyɛ mli akɛ afolɔko hii lɛ ketia moŋ, shi abaptisi mɛi fɛɛ ni nu Petro wiemɔ lɛ. Enɛ gbele gbɛ kɛha gbɔmɛi ni jɛ jeŋmaji lɛ amli lɛ, ni Yudafoi lɛ susuɔ akɛ amɛhe tseee lɛ, ni amɛbatsɔmɔ Kristofoi asafo lɛ mli bii. (Bɔfoi lɛ Asaji 10:1-48; 11:18) Mɛɛ hegbɛ krɛdɛɛ po enɛ ji kɛha Petro nɛkɛ—enɛ fɛɛ jɛ anɔkwale lɛ ní jara wa waa kɛha lɛ, ní ha ebo gbɛtsɔɔmɔ ni jɛ Yehowa ŋɔɔ lɛ toi, ni ekɛ hemɔkɛyeli tsu he nii lɛ hewɔ!
20. Mɛɛ ŋwɛi sɛɛfimɔ akɛhaa wɔ kɛ wɔkɛ anɔkwale lɛ ye klɛŋklɛŋ gbɛhe yɛ wɔshihilɛ mli lɛ?
20 Paulo wo ŋaa akɛ: “Wɔfee anɔkwafoi yɛ suɔmɔ mli, ní wɔdara yɛ nibii fɛɛ gbɛfaŋ yɛ lɛ Kristo lɛ nɔŋŋ ni ji yitso lɛ he.” (Efesobii 4:15, wɔma efã ko nɔ mi.) Hɛɛ, anɔkwale lɛ baaha wɔna miishɛɛ ni anyɛŋ akɛ eko ato he bianɛ kɛji akɛ wɔkɛye klɛŋklɛŋ gbɛhe yɛ wɔshihilɛi amli ni wɔŋmɛ Yehowa gbɛ koni etsɔ emumɔ krɔŋkrɔŋ lɛ nɔ ekudɔ wɔnajifamɔi. Agbɛnɛ hu ha bɔfoi krɔŋkrɔŋi lɛ asɛɛfimɔ yɛ wɔ sanekpakpa shiɛmɔ nitsumɔ lɛ mli lɛ ahi ojwɛŋmɔ mli. (Kpojiemɔ 14:6, 7; 22:6) Kwɛ hegbɛ ni wɔná akɛ wɔyɔɔ sɛɛfimɔ ni tamɔ nɛkɛ yɛ nitsumɔ ni Yehowa kɛwo wɔdɛŋ akɛ wɔtsu lɛ mli! Emuuyeli mlihiɛmɔ baanyiɛ wɔhiɛ kɛjie Yehowa, anɔkwa Nyɔŋmɔ lɛ yi, kɛya naanɔi fɛɛ mli. Ani nɔ ko yɛ ni jara baanyɛ awa waa fe enɛ?—Yohane 17:3.
Mɛni Wɔkase?
• Mɛni hewɔ mɛi pii ekpɛlɛɛɛ anɔkwale lɛ nɔ lɛ?
• Te esa akɛ Kristofoi abu Satan je lɛ mli nibii lɛ amɛha tɛŋŋ?
• Mɛni esa akɛ efee wɔsubaŋ yɛ kpeei ahe, ni mɛni hewɔ?
• Mɛɛ gbɛnaa nii kã wɔnɔ akɛ wɔkwɛ wɔ diɛŋtsɛ wɔhe yɛ mumɔŋ?
[Nikasemɔ lɛ he Sanebimɔi]
[Shikpɔŋ he mfoniri/Mfoniri ni yɔɔ baafa 18]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
ŊSHƆ KPETEŊKPELE
Kaisarea
SHARON ŊA KPALANAA
Yopa
Lida
Yerusalem
[Mfoniri]
Petro nyiɛ ŋwɛi gbɛtsɔɔmɔ sɛɛ ni enine shɛ jɔɔmɔi ni ekpaaa gbɛ nɔ
[He ni Sane lɛ Jɛ]
Shikpɔŋ he mfoniri: Mountain High Maps® Copyright © 1997 Digital Wisdom, Inc.
[Mfoniri ni yɔɔ baafa 13]
Yesu ye anɔkwale lɛ he odase
[Mfoniri ni yɔɔ baafa 15]
Taakɛ heloo naa niyenii ji lɛ, mumɔŋ niyenii he hiaa kɛha wɔhilɛ-kɛhamɔ