Sanebimɔi ni Jɛ Kanelɔi Adɛŋ

Ani emuu ni oblayoo fro Maria yeee lɛ ná Yesu hɔŋɔɔ lɛ nɔ hewalɛ gbonyo?

Saji ni ajɛ mumɔ mli aŋmala lɛ kɛɛ yɛ “Yesu . . . fɔmɔ lɛ” he akɛ: “Enyɛ Maria lɛ, beni Yosef etsɛ ehe baa ni amɛnako amɛbakpe lɛ, ana akɛ ehiɛ musu kɛjɛ Mumɔ krɔŋkrɔŋ lɛŋ.” (Mateo 1:18) Yɛ anɔkwale mli lɛ, Nyɔŋmɔ mumɔ krɔŋkrɔŋ lɛ tsu nitsumɔ ni he hiaa waa he nii yɛ Maria hɔŋɔɔ lɛ mli.

Shi Maria hu? Ani emli wɔlɔ wala yibii loo efɔmɔ kotoku lɛ tsu gbɛfaŋnɔ nɔ ko he nii kwraa yɛ ehɔŋɔɔ lɛ mli? Kɛji akɛ wɔɔsusu shiwoi ni Nyɔŋmɔ kɛha Abraham, Isak, Yakob, Yuda, kɛ Maŋtsɛ David—ni ji Maria blematsɛmɛi lɛ he lɛ—wɔnaa akɛ esa akɛ bi ni abaafɔ́ lɛ afee amɛseshinyo diɛŋtsɛ. (1 Mose 22:18; 26:24; 28:10-14; 49:10; 2 Samuel 7:16) Mɛɛ gbɛ kroko nɔ bi ni Maria baafɔ́ lɛ baanyɛ afee gboshiniyelɔ ni sa yɛ nakai Nyɔŋmɔ shiwoi lɛ anaa yɛ? Esa akɛ efee lɛ diɛŋtsɛ emusuŋ bi.—Luka 3:23-34.

Yehowa bɔfo jie ehe kpo etsɔɔ oblayoo fro Maria ni ekɛɛ: “Kaashe gbeyei, Maria; ejaakɛ ohiɛ eba nyam yɛ Nyɔŋmɔ hiɛ. Ni naa, obaaná musu ni ooofɔ́ binuu, ni ooowo lɛ gbɛi akɛ Yesu.” (Luka 1:30, 31) Hɔŋɔɔ biɔ ni wɔlɔ ko afee nɔ ni bi baanyɛ ajɛ mli. Eka shi faŋŋ akɛ, Yehowa Nyɔŋmɔ ha wɔlɔ ko ni yɔɔ Maria musu mli lɛ batsɔ nɔ ni bi baanyɛ ajɛ mli, ni efee enɛ kɛtsɔ ebi koome lɛ wala ni ejie kɛjɛ mumɔŋ shihilɛhe lɛ kɛba shikpɔŋ nɔ lɛ nɔ.—Galatabii 4:4.

Ani bi ni aŋɔ lɛ hɔ yɛ gbɛ ni tamɔ nɛkɛ nɔ kɛtsɔ yoo ko ni yeee emuu nɔ lɛ baanyɛ afee mɔ ni yeɔ emuu ní esha ko bɛ egbɔmɔtsoŋ wala yibii lɛ amli? Te fɔmɔ su mlai lɛ tsuɔ nii ehaa tɛŋŋ kɛji ekomefeemɔ ba emuuyeli kɛ emuu ni ayeee teŋ? Kaimɔ akɛ akɛ mumɔ krɔŋkrɔŋ lɛ tsu nii kɛjie Nyɔŋmɔ Bi lɛ wala hewalɛ ni yeɔ emuu lɛ ni no ha hɔŋɔɔ lɛ ba. Enɛ fo emuu ni ayeee fɛɛ ni yɔɔ Maria wɔlɔ wala yibii lɛ mli lɛ mli, kɛtsɔ no nɔ lɛ aná fɔmɔ mli nifeemɔ ni yeɔ emuu kɛjɛ eshishijee lɛ.

Yɛ fɛɛ sɛɛ lɛ, wɔbaanyɛ wɔná nɔmimaa akɛ Nyɔŋmɔ mumɔ krɔŋkrɔŋ lɛ nitsumɔ yɛ nakai beaŋ lɛ ha Nyɔŋmɔ yiŋtoo lɛ ba mli anɔkwale. Bɔfo Gabriel etsɔɔ mli eha Maria akɛ: “Mumɔ krɔŋkrɔŋ aaaba onɔ, ni Ŋwɛinyo lɛ hewalɛ aaabahà onɔ, no hewɔ lɛ nakai bi krɔŋkrɔŋ lɛ hu ní ooofɔ́ lɛ, aaatsɛ́ lɛ Nyɔŋmɔ bi.” (Luka 1:35) Hɛɛ, Nyɔŋmɔ mumɔ krɔŋkrɔŋ lɛ fee, taakɛ eji lɛ, hebuu gbogbo bɔni afee ni emuu ni ayeee loo hewalɛ ni yeɔ awui ko akanyɛ efite lá kuli ni daa lɛ kɛjɛ hɔŋɔɔ mli aahu kɛyaa.

Eyɛ faŋŋ akɛ, Yesu ná ewala ni yeɔ emuu ákɛ adesa lɛ kɛjɛ eŋwɛi Tsɛ lɛ dɛŋ, shi jeee adesa ko. Yehowa ‘saa gbɔmɔtso ko’ kɛha Yesu, ni—kɛjɛ ehɔŋɔɔ mli aahu lɛ—eji mɔ ko ni “ehe bɛ kpa ko, ni etse ehe kɛjɛ eshafeelɔi ahe” lɛɛlɛŋ.—Hebribii 7:26; 10:5.

[Mfoniri ni yɔɔ baafa 19]

“Obaaná musu ni ooofɔ́ binuu”