Ógbɔko Tsɔ Bɔ ni Onyɛŋ Nii Okase

AFƆ Kseniya yɛ afi 1897 mli. Eyɛ biyei 3, binuu 1, nabii 15, kɛ nanakaŋsowai 25. Yɛ ewala shihilɛ mli fɛɛ lɛ, nɔ ni efɔlɔi tsɔɔ lɛ lɛ no efee. Eyɛ mli akɛ ejɛ Abkhaz Republic, ni kã Black Sea (Ŋshɔ Diŋ) lɛ kɛ Caucasus, ni ta efite jɛmɛ lɛ teŋ lɛ kɛba Moscow akɛ abobalɔ moŋ, shi ená eshihilɛ he miishɛɛ, titri lɛ yɛ nɔ ni etsɛ lɛ hemɔkɛyeli ni enine shɛ nɔ kɛjɛ eblematsɛmɛi lɛ adɛŋ lɛ mli.

Kseniya biyoo Meri batsɔ Yehowa Odasefoi lɛ ateŋ mɔ kome yɛ afi 1993 lɛ mli. Meri kɛ Kseniya bɔi wiemɔ ni kɔɔ Yehowa Nyɔŋmɔ kɛ Biblia lɛ he, shi esumɔɔɔ ni ebaabo toi. Kseniya yaa nɔ ekɛɔ ebiyoo lɛ akɛ, “Ekpe sɛɛ tsɔ kɛha mi akɛ makase nɔ ko hee.”

Ebiyoo Meri; enabi ŋa Londa; kɛ enanakaŋsowai Nana kɛ Zaza, ni amɛ fɛɛ amɛbatsɔmɔ Yehowa Odasefoi lɛ tee nɔ lolo amɛkɛ lɛ wie Biblia lɛ he. Gbi ko gbɛkɛ yɛ afi 1999 mli lɛ, amɛkane ŋmalɛ ko amɛha Kseniya ni esa etsui he. Ehiɛ Yesu wiemɔi ni yɔɔ miishɛɛ ni ekɛ bɔfoi anɔkwafoi lɛ wie beni etoɔ Nuntsɔ lɛ Gbɛkɛnaashi Niyenii lɛ shishi lɛ. (Luka 22:19, 20) Nakai gbɛkɛ lɛ, Kseniya kpɛ eyiŋ akɛ ebaakase Biblia lɛ, be mli ni eye afii 102.

Kseniya kɛɛ: “Beni mikɛ afii 102 ehi shi sɛɛ lɛ, kpaako minu wala shishi. Amrɔ nɛɛ miyɔse akɛ nɔkpakpa ko bɛ ni fe sɔɔmɔ ni wɔkɛaaha wɔ-Nyɔŋmɔ Yehowa ni he yɔɔ naakpɛɛ, ni yɔɔ suɔmɔ lɛ. Mifee klalo be fɛɛ be ni miyɛ gbɔmɔtsoŋ hewalɛ. Manyɛ nii makane ni glase he ehiaaa mi ni manyɛ mikɛ miweku lɛ abɔ kɛ be fɛɛ be.”

Abaptisi Kseniya yɛ November 5, 2000 lɛ mli. Ekɛɛ akɛ: “Amrɔ nɛɛ mikɛ miwala eha Yehowa koni majɛ suɔmɔ mli masɔmɔ lɛ. Mikɛ woji tɛtrɛbii kɛ dɛhiɛmɔ woji haa be mli ni mita bɔs amaamɔhe ni bɛŋkɛ mishia lɛ. Bei pii lɛ wekumɛi basaraa mi, ni mikɛ amɛ gbaa anɔkwale ni kɔɔ Yehowa he lɛ he sane kɛ miishɛɛ.”

Kseniya miikpa gbi ni ‘eheloo lɛ aaatsɔ efɔ fe gbekɛ nɔ; ni eeeku sɛɛ eeetsɔ oblayoo ekoŋŋ’ lɛ gbɛ. (Hiob 33:25) Kɛji mɔ ni eye afii oha kɛyaa lɛ nuuu he akɛ égbɔ tsɔ fe bɔ ni eeekase shishinumɔ ni yɔɔ shihilɛ he kɛjɛ Biblia lɛ mli lɛ, ni bo hu?