Ani Esa akɛ Hemɔkɛyeli Adamɔ Niiashishinumɔ Nɔ?

Nyɔŋmɔ jamɔ he nikasemɔhe ko ni yɔɔ United States lɛ nɔkwɛlɔ ko ŋma akɛ: “Gbɔmɛi ni fa babaoo tsɔ yɛ ni ‘sumɔɔ jamɔ,’ mɛi ni kɛ amɛhe woɔ jamɔ nifeemɔi amli kɛ yiŋtoo titri ko ni tsɔɔ akɛ amɛsumɔɔɔ ni amɛkɛ nii ahe susumɔ hewalɛ ni amɛyɔɔ lɛ tsuɔ nii.” Ekɛ fata he akɛ: “Amɛsumɔɔ ni amɛkpɛlɛ nɔ fɛɛ nɔ ni ‘damɔ hemɔkɛyeli’ nɔ lɛ nɔ kɛkɛ.”

NƆ NI etsɔɔ ji akɛ, mɛi babaoo ni kɛɔ akɛ amɛhiɛ jamɔ mli hemɔkɛyeli lɛ susuuu yiŋtoi ahewɔ ni amɛheɔ nɔ ni amɛfeɔ lɛ amɛyeɔ loo amɛsusuuu kɛji amɛhemɔkɛyeli lɛ damɔ nɔ ko ni hi jogbaŋŋ nɔ. Ebɛ naakpɛɛ mɔ akɛ jamɔ ebafee saneyitso ko ni mɛi babaoo shashaoɔ shi akɛ amɛaawie he.

Dɔlɛ sane ji akɛ, nifeemɔi tamɔ jamɔ mli amagai ni akɛtsuɔ nii kɛ sɔlemɔi ni atiɔ mli akɛɔ kɛjɛɔ yitsoŋ lɛ hu jeɔ nijiaŋ wui yɛ jwɛŋmɔ mli ni ajɛɔ asusuɔ nii ahe lɛ he. Nɛkɛ nifeemɔi nɛɛ, ni tsumaa he gbɛjianɔtoo ni yɔɔ fɛo, glase samfɛji ni yɔɔ haŋtsii kɛ amɛnɔ sui srɔtoi, kɛ lala ni kanyaa mɔ fata he lɛ tsɔɔ he ni mɛi akpekpei abɔ ená jamɔ mli niiashikpamɔ kɛyashɛ yɛ gbɛ ni yaa shɔŋŋ loo yɛ gbɛ ni shɛɛɛ shɔŋŋ nɔ. Eyɛ mli akɛ sɔlemɔi komɛi kɛɔ akɛ amɛhemɔkɛyeli lɛ damɔ Biblia lɛ nɔ moŋ, shi amɛ shɛɛ sane ni ji ‘hemɔ Yesu nɔ oye ni abaahere oyiwala’ lɛ jeɔ mɛi anijiaŋ wui yɛ Biblia lɛ ni akɛ hiɛdɔɔ baakase lɛ he. Mɛi krokomɛi shiɛɔ sanekpakpa kɛtsɔ heloonaa yelikɛbuamɔ nɔ loo maŋkwramɔ mli sanekpakpa. Mɛni ejɛ enɛ fɛɛ mli kɛba?

Yɛ nɔ ni kɔɔ shihilɛ lɛ he yɛ Amerika Kooyigbɛ lɛ, jamɔ he niŋmalɔ ko wie akɛ: “Kristojamɔ . . . bafeɔ hiɛaŋhiɛaŋ nɔ, [ni] atsɔɔɔ esɛɛnyiɛlɔi lɛ anii jogbaŋŋ yɛ hemɔkɛyeli lɛ mli.” Oshikifɔɔ nɔkwɛlɔ ko po tee nɔ etsɔɔ United States mli akɛ eji “maŋ ni emli bii lɛ leee Biblia lɛ mli.” Bɔni afee ni efee nɔ ni hiɛaŋkwɛmɔ bɛ mli lɛ, nɛkɛ saji ni awie nɛɛ hu baanyɛ afee anɔkwale yɛ maji krokomɛi ni akɛɔ akɛ Kristojamɔ ehe shi waa yɛ mli lɛ he. Jamɔi babaoo ni jeee Kristofoi anɔ lɛ hu jeɔ mɛi anijiaŋ wui yɛ niiahesusumɔ he, ni yɛ no najiaŋ lɛ amɛmaa wiemɔ ni atiɔ mli akɛɔ, kusum nifeemɔ mli sɔlemɔi, kɛ nibii anɔjwɛŋmɔ gbɛ̀i srɔtoi babaoo ni nɔ ni fata he ji teemɔŋ saji anɔmimaa, fe saji anɔ ni abaajwɛŋ jogbaŋŋ.

Ni kɛlɛ, gbɔmɛi nɛɛ nɔŋŋ ni susuuu ja ni amɛjamɔ mli hemɔkɛyelii lɛ ja ha loo anɔkwa ni amɛji lɛ he lɛ, susuɔ saji krokomɛi ahe jogbaŋŋ diɛŋtsɛ yɛ amɛdaa gbi shihilɛ mli. Ani okpɛlɛŋ nɔ akɛ eji nɔ ni efɔɔɔ kaa akɛ gbɔmɔ ni taoɔ nibii amli babaoo kɛha kar hemɔ kɛkɛ—nɔ ni gbi ko lɛ ebaaya eyagbe naa yɛ tumo nɔ lɛ—baakɛɛ yɛ ejamɔ he akɛ, ‘Kɛji ehi bɔ ni sa kɛha mifɔlɔi lɛ, ehi kɛha mi’?

Kɛji wɔyɛ Nyɔŋmɔ hiɛ ni wɔɔsa he miishɛɛ lɛɛlɛŋ lɛ, ani esaaa akɛ wɔkɛ hiɛdɔɔ susuɔ ja ni nɔ ni wɔheɔ wɔyeɔ yɛ ehe lɛ ja ha lɛ he? Bɔfo Paulo wie jamɔ mli bii komɛi ni hi shi yɛ egbii lɛ amli ni ‘hiɛ dɔɔ yɛ Nyɔŋmɔ he moŋ, shi jeee nilee naa’ lɛ ahe. (Romabii 10:2) Abaanyɛ akɛ mɛi nɛɛ ato mɔ ko ni pɛnteɔ tsũ he, ni abɔ lɛ apaa ni tsuɔ  nii waa koni esha shia ko he shi ekɛ pɛnte sui ni ejaaa tsuɔ nii akɛni ebooo shiatsɛ lɛ gbɛtsɔɔmɔi lɛ atoi lɛ hewɔ lɛ he. Ekolɛ mɔ ni pɛnteɔ tsũ lɛ he lɛ mii baashɛ enitsumɔ lɛ he, shi ani shiatsɛ lɛ baakpɛlɛ nɔ?

Mɛni ji nɔ ni Nyɔŋmɔ kpɛlɛɔ nɔ yɛ anɔkwa jamɔ he? Biblia lɛ haa hetoo akɛ: “Ejaakɛ enɛ hi ni eŋɔɔ Nyɔŋmɔ ni ji wɔyiwalaherelɔ lɛ naa, mɔ ni sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:3, 4) Ekolɛ mɛi komɛi baanu he akɛ anyɛŋ aná nilee ni tamɔ nɛkɛ yɛ jamɔi babaoo ni yɔɔ ŋmɛnɛ lɛ ateŋ. Shi susumɔ he okwɛ—kɛji eji Nyɔŋmɔ suɔmɔnaa nii akɛ mɛi fɛɛ ashɛ anɔkwale lɛ he nilee ni ja lɛ lee mli lɛ, ani ekɛbaatee amɛ yɛ gbɛ ni ejaaa nɔ? Efeŋ nɔ ni kɛ Biblia lɛ kpãa gbee, nɔ ni kɛɔ akɛ: “Kɛji ootao [Nyɔŋmɔ] lɛ, eeeha ona lɛ.”—1 Kronika 28:9.

Mɛɛ gbɛ nɔ Nyɔŋmɔ haa mɛi ni taoɔ lɛ yɛ anɔkwale mli lɛ naa lɛ yɛ? Nikasemɔ ni nyiɛ sɛɛ lɛ kɛ hetoo lɛ baaha.