Maŋtsɛyeli Jajelɔi Bɔ Amaniɛ

“Miisumɔ ni Masɔmɔ Nyɔŋmɔ”

“NYƐJEA emli, mimaŋ.” Eji tsɛmɔ ni ŋwɛibɔfo ko kɛha ni bɔfo Yohane nu he yɛ klɛŋklɛŋ afii oha Ŋ.B. lɛ mli. Mɛi akpekpei abɔ ni hiɛ tsui kpakpa lɛ ebo famɔ nɛɛ toi ni amɛje “Babilon kpeteŋkpele lɛ,” ni ji jeŋ apasa jamɔ maŋtsɛyeli lɛ mli yɛ wɔgbii nɛɛ amli. (Kpojiemɔ 18:1-4) Mɔ ni fata mɛi nɛɛ ahe ji Wilner ni jɛ Haiti, ni gba eniiashikpamɔ lɛ.

“Afɔ mi awo Katolik weku ni etuu ehe eha kwraa mli yɛ afi 1956 mli yɛ maŋ bibioo ni ji St. Marc lɛ mli, yɛ Haiti. Susumɔ miishɛɛ ni miweku lɛ ná beni ahala mi afata mɛi enyɔ krokomɛi ni jɛ wɔmaŋ lɛ mli lɛ ahe koni wɔya osɔfoi anikasemɔhe wulu yɛ St. Michel de I’Atalaye, yɛ Haiti lɛ mli lɛ he okwɛ. Kɛkɛ ni yɛ afi 1980 lɛ, akɛ wɔ tee Stavelot, yɛ Belgium, kɛha nɔtsamɔ tsɔsemɔ. Wɔtee Katolik univɛsiti ko hu yɛ jɛmɛ.

“Klɛŋklɛŋ lɛ, miná ekãa akɛ mikɛ mihe baawo osɔfoyeli nitsumɔ lɛ mli. Gbi lɛ eko beni wɔtee shwane niyelihe lɛ, osɔfo ni kwɛɔ wɔkuu lɛ nɔ lɛ bi koni mamɛ minitii fioo ko ejaakɛ eyɛ nɔ ko ni ebaasumɔ ni ekɛɛ mi. Susumɔ bɔ ni mihe jɔ̃ mihe beni ekɛɛ yɛ faŋŋ mli akɛ ená mihe miishɛɛ yɛ bɔlɛnamɔ gbɛfaŋ! Mikpoo enifeemɔi ni yaa nɔ lɛ, shi minijiaŋ je wui waa. Miŋma miweku lɛ yɛ sane lɛ he ni mishi osɔfoi anikasemɔhe wulu lɛ yɛ nyɔji fioo komɛi asɛɛ, eyɛ mli akɛ amɛnyaaa he. Miná wɔɔhe yɛ akrowa lɛ mli ni mitee nɔ mitiu nitsumɔ kasemɔ kroko sɛɛ.

“Beni miku misɛɛ kɛba St. Marc lɛ, minaaa hekɛnɔfɔɔ ko yɛ Katolik Sɔlemɔ lɛ mli dɔŋŋ. Miisumɔ akɛ masɔmɔ Nyɔŋmɔ lolo, shi mileee nɔ ni mafee. Mitee Adventist sɔlemɔ lɛ, Ebenezer sɔlemɔ lɛ, kɛ Mormon sɔlemɔ lɛ. Mihi shi akɛ mɔ ni bɛ gbɛtsɔɔmɔ yɛ mumɔŋ.

“Kɛkɛ ni mikai akɛ be mli ni miyaa osɔfoi anikasemɔhe wulu yɛ Belgium lɛ, no mli lɛ mifɔɔ Crampon Biblia lɛ kanemɔ. Mina yɛ mli akɛ Nyɔŋmɔ yɛ gbɛi. No hewɔ lɛ, be mli ni mikɛ egbɛi lɛ tsuɔ nii lɛ, mijɛ mitsui mli tɔŋŋ misɔle miha Nyɔŋmɔ koni eye ebua mi ni mana anɔkwale jamɔ lɛ.

“Yɛ no sɛɛ etsɛɛɛ lɛ, Yehowa Odasefoi enyɔ fã kɛbahi mikutso lɛ mli. Amɛyɛ dioo, amɛbuɔ mɔ waa, ni akɛ woo haa amɛ. Mihiɛ sɔ bɔ ni amɛshihilɛ yɔɔ ha lɛ. Gbi ko lɛ, Odasefoi lɛ ateŋ mɔ kome fɔ̃ nine etsɛ mi koni maba daa afi Kristo gbele lɛ Kaimɔ lɛ shishi. Miná kpeei lɛ he miishɛɛ waa ni mikpɛlɛ akɛ mikɛ Odasefoi lɛ baakase Biblia lɛ daa. Yɛ aaafee nyɔji ekpaa mli lɛ, miyiŋ tsɔ akɛ mina gbɛ ni sa ni matsɔ nɔ masɔmɔ Nyɔŋmɔ lɛ. Mijɔɔ miwala nɔ miha Yehowa ni abaptisi mi yɛ November 20, 1988 mli.”

Yɛ be ni sa mli lɛ, Wilner kɛ ehe wo be-fɛɛ sɔɔmɔ nitsumɔ lɛ mli. Ŋmɛnɛ, eesɔmɔ akɛ asafoŋ onukpa. Lɛ kɛ eŋa, kɛ amɛbii enyɔ lɛ miisɔmɔ kɛ miishɛɛ yɛ asafo lɛ mli.

[Mfoniri ni yɔɔ baafa 9]

Kɛtsɔ Biblia lɛ kanemɔ nɔ lɛ, Wilner ná ele akɛ Nyɔŋmɔ gbɛi ji Yehowa