Nyɔŋmɔ Hereɔ Jeŋmaji lɛ Fɛɛ Atuu

BENI John fã gbɛ kɛtee Mali klɛŋklɛŋ kwraa lɛ, gbɔfeemɔ ni hedɔɔ yɔɔ mli ni Mamadou kɛ eweku lɛ jie lɛ kpo amɛtsɔɔ lɛ lɛ ná enɔ hewalɛ. Beni John ta saa ni aŋmɛ yɛ shikpɔŋ ni amɛnine kã kã kome mli amɛyeɔ nii lɛ nɔ lɛ, esusu gbɛ ni hi fe fɛɛ ni eeetsɔ nɔ egba eshiatsɛ lɛ nikeenii ni jara wa fe fɛɛ—Maŋtsɛyeli lɛ he sanekpakpa ni jɛ Nyɔŋmɔ Wiemɔ, ni ji Biblia lɛ mli lɛ he sane. Eyɛ mli akɛ John nuɔ France wiemɔ, ní ji wiemɔ ni awieɔ yɛ Mali lɛ moŋ, shi esusu bɔ ni eeefee ni ekɛ weku ni hiɛ jamɔ srɔto kwraa ni susuɔ nii ahe yɛ gbɛ srɔto nɔ lɛ aaagba sane lɛ he.

Ebɛ naakpɛɛ akɛ, John susu Biblia mli sane ni kɔɔ Babel maŋtiase lɛ he. Nyɔŋmɔ futu atuatselɔi lɛ awiemɔ lɛ yɛ jɛmɛ. (1 Mose 11:1-9) Nɔ ni ejɛ mli kɛba ji akɛ, gbɔmɛi ni hiɛ wiemɔi, jamɔi, kɛ susumɔ gbɛ̀i srɔtoi ete shi yɛ shikpɔŋ lɛ nɔ hei srɔtoi. Ŋmɛnɛ, gbɛfaa kɛ shĩ ní ashiɔ ayahiɔ he kroko lɛ ebafee nɔ ni ehe shi, ni mɛi babaoo kɛ naagba ni tamɔ nɔ ni John kɛkpe lɛ nɔŋŋ miikpe, yɛ amɛ diɛŋtsɛ amɛmaji amli po: Bɔ ni amɛaafee ni amɛgba hiɛnɔkamɔ ni yɔɔ Biblia lɛ mli lɛ amɛtsɔɔ mɛi ni jɛ shihilɛi srɔtoi amli lɛ?

Blema Nɔkwɛmɔnɔ Ko

Taakɛ gbalɔi krokomɛi ni yɔɔ Israel lɛ ji lɛ, Yona wie etsɔɔ Israelbii lɛ titri. Egba yɛ be mli ni akutsei nyɔŋma maŋtsɛyeli ní ekwa hemɔkɛyeli lɛ kɛ ehe ewo nifeemɔi ni wooo Nyɔŋmɔ hiɛnyam lɛ mli yɛ faŋŋ mli. (2 Maŋtsɛmɛi 14:23-25) Susumɔ bɔ ni Yona baafee enii eha beni enine shɛ nitsumɔ krɛdɛɛ ko nɔ ákɛ eshĩ lɛ diɛŋtsɛ emaŋ koni eya Ashur ni eyashiɛ etsɔɔ gbɔmɛi ni yɔɔ Ninive lɛ, gbɔmɛi ni hiɛ jamɔ srɔto kɛ kusum srɔto lɛ he okwɛ. Ekolɛ Yona ewieee Ninive wiemɔ lɛ, aloo ekolɛ enaa tseee yɛ mli. Bɔ fɛɛ bɔ ni sane lɛ ji lɛ, ekolɛ Yona na akɛ nitsumɔ lɛ wa, ni ejo foi.—Yona 1:1-3.

Eyɛ faŋŋ akɛ, ehe miihia ni Yona ale akɛ Yehowa Nyɔŋmɔ kwɛɔ kɛtekeɔ kponɔgbɛ nii ni ekaa tsui lɛ ekwɛɔ. (1 Samuel 16:7) Yɛ be mli ni Yehowa etsɔ naakpɛɛ gbɛ nɔ ebaa Yona yi koni ekashiu lɛ, efã lɛ ekoŋŋ koni eyashiɛ etsɔɔ Ninivebii lɛ. Yona bo toi, ni nɔ ni jɛ mli ba ji akɛ, Ninivebii lɛ fɛɛ tsake amɛtsui. Shi kɛlɛ, Yona naaa jwɛŋmɔ ni ja lolo. Yehowa tsɔ nɔkwɛmɔnɔ ko ni abaanyɛ akase nii kɛjɛ mli lɛ nɔ etsɔɔ lɛ akɛ ehe miihia ni etsake ejwɛŋmɔ. Yehowa bi Yona akɛ: “Ninive maŋ kpeteŋkpele nɛɛ, ní gbɔmɛi fe akpei-oha-kɛ-nyɔŋmai-enyɔ ni leee amɛninejurɔ kɛ amɛbɛku, . . . sane akadɔ mi, bɛ?” (Yona 4:5-11) Ni ŋmɛnɛ, wɔ hu? Te wɔɔfee tɛŋŋ wɔye wɔbua mɛi ni jɛ shihilɛi srɔtoi amli lɛ?

 Samariabii kɛ Mɛi ni Jeee Yudafoi ni Wɔɔkpee Amɛ

Yɛ klɛŋklɛŋ afii oha lɛ mli lɛ, Yesu fã esɛɛnyiɛlɔi lɛ koni amɛfee gbɔmɛi ni yɔɔ jeŋmaji lɛ fɛɛ kaselɔi. (Mateo 28:19) Enɛ bɛ mlɛo kɛha amɛ. Yudafoi ji Yesu kaselɔi lɛ, ni taakɛ Yona ji lɛ, amɛfɔɔ gbɔmɛi ni jɛ shihilɛ kɛ hiŋmɛigbelemɔ kome too lɛ nɔŋŋ mli lɛ kɛ sanegbaa. Yɛ adebɔɔ su naa lɛ, hetsɛ̃ ni egbɛ eshwã yɛ amɛgbii lɛ amli lɛ hu baaná amɛnɔ hewalɛ. Shi kɛlɛ, Yehowa kudɔ saji bɔni afee ni etsuji lɛ ayɔse esuɔmɔnaa nii kɛha amɛ lɛ fiofio.

Klɛŋklɛŋ nifeemɔ ji ní amɛye hetsɛ̃ ni kã Yudafoi kɛ Samariabii lɛ ateŋ lɛ nɔ. Yudafoi lɛ kɛ Samariabii lɛ yeee. Ni kɛlɛ, Yesu tsɔ gbɛ ni fe ekome nɔ esaa gbɛ koni wɔsɛɛ lɛ Samariabii lɛ akpɛlɛ sanekpakpa lɛ nɔ. Etsɔɔ akɛ ekwɛɛɛ hiɛaŋ kɛtsɔ Samariayoo ko ni ekɛwie lɛ nɔ. (Yohane 4:7-26) Yɛ be kroko mli lɛ, etsɔ sane naatsɔɔmɔ ni kɔɔ Samarianyo naanyo lɛ nɔ etsɔɔ Yudanyo Nyɔŋma jalɔ ko akɛ gbɔmɛi ni jeee Yudafoi lɛ baanyɛ ajie suɔmɔ kpo amɛtsɔɔ amɛnaanyo. (Luka 10:25-37) Beni be shɛ ni Yehowa kɛ Samariabii lɛ baaba Kristofoi asafo lɛ mli lɛ, Filipo, Petro, kɛ Yohane—ni amɛ fɛɛ amɛji Yudafoi—lɛ shiɛ amɛtsɔɔ Samariabii lɛ. Amɛshɛɛ sane lɛ kɛ miishɛɛ kpele diɛŋtsɛ ba nakai maŋ lɛ mli.—Bɔfoi lɛ Asaji 8:4-8, 14-17.

Kɛ́ ewa kɛha Yudafoi Kristofoi lɛ akɛ amɛaasumɔ Samariabii, ni yɛ anɔkwale mli lɛ amɛji Yudafoi lɛ awekumɛi ni bɛŋkɛɛɛ amɛ lɛ, no lɛ ebaawa waa kɛha amɛ akɛ amɛaajie naanyo suɔmɔ kpo amɛtsɔɔ mɛi ni amɛjeee Yudafoi, loo Jeŋmajiaŋbii, ní Yudafoi lɛ gbeɔ amɛhe guɔ ni amɛnyɛ̃ɔ amɛ lɛ. Ni kɛlɛ, yɛ Yesu gbele lɛ sɛɛ lɛ, abaanyɛ ajie gbogbo ni kã Yudafoi Kristofoi lɛ kɛ Jeŋmajiaŋbii lɛ teŋ. (Efesobii 2:13, 14) Bɔni afee ni Yehowa aye abua Petro koni ekpɛlɛ gbɛjianɔtoo hee nɛɛ nɔ lɛ, etsɔɔ lɛ ninaa ko, nɔ mli ni E-kɛɛ lɛ akɛ, “nɔ ni Nyɔŋmɔ etsuu he lɛ, kaabu lɛ akɛ yakayaka nɔ ko.” No sɛɛ lɛ, Yehowa mumɔ lɛ nyiɛ ehiɛ kɛtee Jeŋmajiaŋnyo ko ni atsɛɔ lɛ Kornelio lɛ ŋɔɔ. Beni Petro nu Nyɔŋmɔ susumɔ lɛ shishi—akɛ esaaa akɛ etsɛɔ jeŋmajiaŋnyo nɛɛ akɛ mɔ ni he tseee ejaakɛ Nyɔŋmɔ etsuu ehe—lɛ, ewie yɛ mumɔ tsirɛmɔ naa akɛ: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:9-35) Kwɛ bɔ ni Petro naa kpɛ ehe eha beni Nyɔŋmɔ tsɔɔ akɛ ekpɛlɛ Kornelio kɛ eweku lɛ nɔ kɛtsɔ mumɔ krɔŋkrɔŋ lɛ ni efɔte eshwie amɛnɔ lɛ nɔ lɛ!

Paulo—Dɛŋdade ni Ahala Kɛha Jeŋmaji Lɛ

Paulo sɔɔmɔ nitsumɔ lɛ ji nɔkwɛmɔnɔ ni sa kadimɔ waa ní tsɔɔ bɔ ni Yehowa saa etsuji fiofio koni amɛsumɔ gbɔmɛi srɔtoi fɛɛ ni amɛye amɛbua amɛ. Beni atsake Paulo lɛ, Yesu kɛɛ akɛ Paulo baasɔmɔ ákɛ dɛŋdade ni ahala koni eyajaje E-gbɛi lɛ kɛha jeŋmaji abii lɛ. (Bɔfoi lɛ Asaji 9:15) No sɛɛ lɛ, Paulo tee Arabia, ekolɛ koni eyasusu Nyɔŋmɔ yiŋtoo akɛ ekɛ lɛ baatsu nii ni  ekɛjaje sanekpakpa lɛ etsɔɔ jeŋmaji lɛ he.—Galatabii 1:15-17.

Yɛ Paulo klɛŋklɛŋ maŋsɛɛ sanekpakpa shiɛmɔ nitsumɔ lɛ mli lɛ, ejie ekãa kpo yɛ shiɛmɔ ni eshiɛ etsɔɔ mɛi ni amɛjeee Yudafoi lɛ mli. (Bɔfoi lɛ Asaji 13:46-48) Yehowa jɔɔ Paulo nitsumɔ lɛ nɔ, ni efee odaseyeli ni tsɔɔ akɛ bɔfo lɛ miifee nii yɛ Yehowa gbɛjianɔtoo lɛ naa. Paulo tsɔɔ akɛ enuɔ Yehowa susumɔ lɛ shishi jogbaŋŋ beni ekɛ ekãa jaje Petro, mɔ ni jie hiɛaŋkwɛmɔ kpo yɛ ehe ni egbala kɛjɛ nyɛmimɛi ni amɛjeee Yudafoi lɛ ahe lɛ hewɔ.—Galatabii 2:11-14.

Anaa odaseyeli kroko ni tsɔɔ akɛ Nyɔŋmɔ miikudɔ Paulo mɔdɛŋbɔi lɛ yɛ emaŋsɛɛ sanekpakpa shiɛmɔ gbɛfaa ni ji enyɔ lɛ mli, beni mumɔ krɔŋkrɔŋ lɛ tsĩ Paulo naa koni ekɛyashiɛ yɛ Roma maŋ ni ji Bitinia lɛ mli lɛ. (Bɔfoi lɛ Asaji 16:7) Ekolɛ, no mli lɛ be shɛko. Shi kɛlɛ, sɛɛ mli lɛ, Bitiniabii komɛi batsɔmɔ Kristofoi. (1 Petro 1:1) Makedonianyo ko kpa Paulo fai yɛ ninaa mli, ni ekɛɛ: “Ba Makedonia ni obaye obua wɔ.” Paulo mu sane naa akɛ, esa akɛ etsake egbɛfaa lɛ bɔni afee ni enyɛ eyajaje sanekpakpa lɛ yɛ nakai Roma maŋ lɛ mli.—Bɔfoi lɛ Asaji 16:9, 10.

Aka Paulo nyɛmɔ ni ekɛtsakeɔ ehe ewoɔ shihilɛ mli lɛ waa beni eshiɛɔ etsɔɔ Ateenebii lɛ. Hela kɛ Roma mla lɛ tsĩɔ maŋsɛɛ nyɔŋmɔi kɛ jamɔ kusumii heei ni akɛaaba lɛ naa. Suɔmɔ ni Paulo yɔɔ kɛha gbɔmɛi lɛ tsirɛ lɛ koni esusu amɛjamɔ nifeemɔi lɛ ahe jogbaŋŋ. Eyɔse afɔleshaalatɛ ko ní aŋma nɔ nii akɛ, “Nyɔŋmɔ ni aleko lɛ nɔŋ” yɛ Ateene. Etsĩ nɛkɛ sane kuku nɛɛ tã yɛ edaseyeli nitsumɔ lɛ mli. (Bɔfoi lɛ Asaji 17:22, 23) Mɛɛ gbɛ ni hi ni ekɛkpa eshɛɛ sane lɛ hiɛ yɛ mlihilɛ kɛ bulɛ gbɛ nɔ po nɛ!

Kwɛ miishɛɛ ni Paulo baaná beni esusuɔ nɔ ni ejɛ enitsumɔ ákɛ bɔfo kɛha jeŋmaji lɛ mli kɛba lɛ he lɛ! Eye ebua ni ato asafoi ni feɔ Kristofoi babaoo ni amɛjeee Yudafoi yɛ Korinto, Filipi, Tesalonika, kɛ maji ni yɔɔ Galata lɛ. Eye ebua hii kɛ yei ni yɔɔ hemɔkɛyeli tamɔ, Damari, Dionisio, Sergio Paulo, kɛ Tito. Mɛɛ hegbɛ eji nɛkɛ akɛ aaana ni gbɔmɛi ni leee Yehowa loo Biblia lɛ miikpɛlɛ Kristojamɔ mli anɔkwale lɛ nɔ! Beni Paulo wieɔ enitsumɔ yɛ mɛi ni amɛjeee Yudafoi ni eye ebua amɛ koni amɛná anɔkwale lɛ he nilee lɛ he  lɛ, ekɛɛ akɛ: “Nɔ ni mikɛto mihiɛ titri ji akɛ, he ni atsĩko Kristo gbɛi atã yɛ lɛ, jɛi majaje sanekpakpa lɛ yɛ, . . . shi moŋ taakɛ bɔ ni aŋma lɛ akɛ: ‘Mɛi ni ajajeko ehe sane ko atsɔko amɛ lɛ, amɛaana, ni mɛi ni nuko lɛ, amɛaanu shishi.’” (Romabii 15:20, 21) Ani wɔbaanyɛ wɔfata he koni ajaje sanekpakpa lɛ atsɔɔ mɛi ni esoro amɛ kusumii yɛ wɔnɔ̃ lɛ he?

Ní Aaaye Abua Gbɔmɛi Fɛɛ ni Yɔɔ Shikpɔŋ Nɔ

Salomo sɔle eha Yehowa yɛ mɛi ni amɛjeee Israelbii ni baaba ni amɛbajá yɛ sɔlemɔwe lɛ mli yɛ Yerusalem lɛ hewɔ. Ekpa fai akɛ: “Bó toi yɛ ŋwɛi ni ji oshihilɛhe lɛ, ni ofee nɔ fɛɛ nɔ ni gbɔ lɛ boɔ tsɛɔo yɛ hewɔ lɛ, beni afee ni shikpɔŋ lɛ nɔ majimaji fɛɛ ale ogbɛi lɛ, koni amɛsheo gbeyei tamɔ omaŋ Israel, ni amɛsaa amɛná amɛle akɛ ogbɛi aŋɔwo nɛkɛ shia nɛɛ ni mima nɛɛ.” (1 Maŋtsɛmɛi 8:41-43, wɔma efã ko nɔ mi.) Maŋtsɛyeli jajelɔi akpei abɔ ni yɔɔ maji babaoo mli lɛ nuɔ he nakai nɔŋŋ. Amɛkɛ gbɔmɛi ni tamɔ Ninivebii, ni kɛ́ wɔɔwie he yɛ mumɔŋ gbɛ nɔ lɛ, ‘amɛleee amɛninejurɔ kɛ amɛbɛku’ lɛ kpeɔ. Ni Maŋtsɛyeli jajelɔi lɛ miishwe ni amɛkɛ amɛhe awo gbalɛi ni kɔɔ anɔkwa jalɔi ni abuaa amɛnaa kɛjɛɔ majimaji srɔtoi babaoo nɔ lɛ mlibaa lɛ mli.—Yesaia 2:2, 3; Mika 4:1-3.

Taakɛ bɔ ni gbɔmɛi ni jɛ Kristendom mli lɛ ekpɛlɛ Biblia mli hiɛnɔkamɔ he shɛɛ sane lɛ nɔ lɛ, gbɔmɛi ni jɛ jamɔi krokomɛi amli lɛ hu miifee nakai nɔŋŋ. Te esa akɛ enɛ asa ohe aha tɛŋŋ? Pɛimɔ omli jogbaŋŋ okwɛ. Kɛ́ onuɔ he akɛ gbɔmɛi ahe jwɛŋmɔ fɔŋ ehe shi yɛ omli waa lɛ, jiemɔ kɛjɛ omli kɛtsɔ suɔmɔ ni ooojie lɛ kpo lɛ nɔ. * Kaaku ohiɛ oshwie gbɔmɛi ni Nyɔŋmɔ miisumɔ ni ekpɛlɛ amɛ nɔ lɛ nɔ.—Yohane 3:16.

Kasemɔ nii jogbaŋŋ dani okɛ mɛi ni jɛ shihilɛ kroko mli lɛ agba sane. Le amɛhemɔkɛyelii, nibii ni amɛsusuɔ he, kɛ bɔ ni amɛsusuɔ nii ahe amɛhaa; kɛkɛ lɛ taomɔ nibii ni nyɛbaakpã gbee yɛ mli. Jiemɔ ejurɔfeemɔ kɛ musuŋtsɔlɛ kpo otsɔɔ mɛi krokomɛi. Tsi ohe kɛjɛ béi he, feemɔ tswãa kɛ mɔ ni tswaa mɔ emaa shi. (Luka 9:52-56) Kɛ́ ofee nakai lɛ, obaasa Yehowa, “mɔ ni sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli” lɛ hiɛ.—1 Timoteo 2:4.

Kwɛ bɔ ni wɔmii shɛɔ wɔhe wɔhaa kɛ́ wɔna gbɔmɛi ni jɛ shihilɛi srɔtoi amli yɛ wɔ asafoi lɛ amli lɛ! (Yesaia 56:6, 7) Kwɛ bɔ ni ekanyaa mɔ tsui akɛ jeee akɛ wɔmiinu ŋmɛnɛ ni aatsɛ gbɛi tamɔ Borteley, Amartey, Quarshie, kɛ Moolai kɛkɛ shi agbɛnɛ hu, gbɛi tamɔ Giambiasi, Jegan, Reza, kɛ Chan! Eji anɔkwale akɛ ‘agbele shinaa kpeteŋkpele ko ni nitsumɔ yɔɔ mli naa’ aha wɔ. (1 Korintobii 16:9) Eba akɛ wɔkɛ hegbɛi ni Nyɔŋmɔ ni kwɛɛɛ hiɛaŋ, Yehowa kɛha wɔ akɛ wɔhere gbɔmɛi ni jɛ jeŋmaji fɛɛ atuu lɛ baatsu nii jogbaŋŋ!

[Shishigbɛ niŋmaa]

[Mfonirii ni yɔɔ baafa 23]

Paulo gba gbɔmɛi ni yɔɔ he fɛɛ he lɛ sanekpakpa lɛ kɛtsɔ ehe ni etsake ewo amɛshihilɛ mli lɛ nɔ

. . . yɛ Ateene

. . . yɛ Filipi

. . . yɛ egbɛfaa lɛ mli