Yaa Nɔ Osɔmɔ Yehowa kɛ Tsui ni Efi Shi Shiŋŋ
Yaa Nɔ Osɔmɔ Yehowa kɛ Tsui ni Efi Shi Shiŋŋ
“Mitsui efi shi shiŋŋ, Oo Nyɔŋmɔ, mitsui efi shi shiŋŋ.”—LALA 57:7, NW.
1. Mɛni hewɔ wɔbaanyɛ wɔná yiŋtsɔmɔ ni tamɔ David nɔ̃ lɛ?
YEHOWA baanyɛ aha wɔfi shi shiŋŋ yɛ Kristofoi ahemɔkɛyeli mli, koni wɔnyɛ ni wɔkɛ wɔhe akpɛtɛ anɔkwa Kristojamɔ he ákɛ etsuji ni amɛjɔɔ amɛhe nɔ. (Romabii 14:4) No hewɔ lɛ, wɔbaanyɛ wɔná yiŋtsɔmɔ ni tamɔ lalatsɛ David, mɔ ni nɔ ko kanya lɛ ni elá akɛ: “Mitsui efi shi shiŋŋ, Oo Nyɔŋmɔ,” lɛ nɔ̃ lɛ. (Lala 108:1, NW) Kɛji akɛ wɔtsui efi shi shiŋŋ lɛ, ebaakanya wɔ ni wɔtsu wɔhe nɔ ni wɔjɔɔ wɔha Nyɔŋmɔ lɛ he nii. Ni kɛji akɛ wɔkwɛ lɛ gbɛ kɛha gbɛtsɔɔmɔ kɛ hewalɛ lɛ, wɔbaanyɛ wɔfee mɛi ni anyɛɛɛ atsirɛ amɛ, ni wɔfee shiŋŋ yɛ wɔfaishitswaa kɛ wɔhemɔkɛyeli mli ákɛ emuuyeli mlihiɛlɔi, ni ‘yɔɔ babaoo feemɔ yɛ Nuntsɔ lɛ nitsumɔ lɛ mli daa nɛɛ.’—1 Korintobii 15:58.
2, 3. Mɛni ji shishinumɔ diɛŋtsɛ ni yɔɔ ŋaawoi ni aŋma afɔ̃ shi yɛ 1 Korintobii 16:13 lɛ mli?
2 Yɛ ŋaawoi ni bɔfo Paulo kɛyaha Yesu sɛɛnyiɛlɔi ni yɔɔ blema Korinto, shi ekɔɔ ŋmɛnɛŋmɛnɛ beaŋ Kristofoi ahe lɛ mli lɛ, ekɛɛ akɛ: “Nyɛbua, nyɛdamɔa shi shiŋŋ yɛ hemɔkɛyeli lɛ mli, nyɛfea hii, ni nyɛhe awaa!” (1 Korintobii 16:13) Yɛ Hela wiemɔ mli lɛ, nɛkɛ famɔi nɛɛ ateŋ eko fɛɛ eko yɛ ŋmɛnɛŋmɛnɛ wiemɔ mli, ni tsɔɔ akɛ ewoɔ nifeemɔ ni yaa nɔ daa lɛ he hewalɛ. Mɛɛ shishinumɔ nɛkɛ ŋaawoo nɛɛ kɛhaa?
3 Wɔbaanyɛ ‘wɔbu’ yɛ mumɔŋ kɛtsɔ Abonsam ni wɔɔte shi wɔwo lɛ ni wɔkpɛtɛ Nyɔŋmɔ he gbagbalii lɛ nɔ. (Yakobo 4:7, 8) Wɔhe ni wɔkɛfɔ̃ɔ Yehowa nɔ lɛ haa wɔnyɛɔ wɔhiɔ shi yɛ ekomefeemɔ mli, ni ‘wɔdamɔɔ shi shiŋŋ yɛ Kristofoi ahemɔkɛyeli lɛ mli.’ Wɔ—ni yei babaoo fata wɔhe lɛ—‘yaa nɔ tamɔ hii’ kɛtsɔ Nyɔŋmɔ ni wɔsɔmɔɔ lɛ ekãa naa akɛ Maŋtsɛyeli jajelɔi lɛ nɔ. (Lala 68:12) ‘Wɔhe waa’ kɛtsɔɔ wɔhiɛ ni wɔkɛfɔ̃ɔ wɔŋwɛi Tsɛ lɛ nɔ be fɛɛ be kɛha hewalɛ koni wɔkɛfee esuɔmɔnaa nii lɛ nɔ.—Filipibii 4:13.
4. Mɛni kɛ wɔ baptisimɔ ákɛ Kristofoi lɛ ba?
4 Wɔjie wɔhe kpo akɛ wɔkpɛlɛ anɔkwa hemɔkɛyeli lɛ nɔ beni wɔjɔɔ wɔhe nɔ kwraa wɔha Yehowa ni wɔkɛ numiimɔ fee he okadi lɛ. Shi mɛni ha abaptisi wɔ? Klɛŋklɛŋ lɛ, wɔná Nyɔŋmɔ Wiemɔ lɛ he anɔkwa nilee. (Yohane 17:3) Enɛ ha wɔná hemɔkɛyeli ni etsirɛ wɔ koni wɔtsake wɔtsui, ni wɔjie anɔkwa dɔlɛ kpo yɛ efɔŋ ni wɔfee tsutsu lɛ ahe. (Bɔfoi lɛ Asaji 3:19; Hebribii 11:6) Nɔ ni nyiɛ sɛɛ ba ji heshwamɔ, ejaakɛ wɔtsi wɔhe kɛjɛ nifeemɔi ni ehiii lɛ ahe bɔni afee ni wɔtiu shihilɛ ni kɛ Nyɔŋmɔ suɔmɔnaa nifeemɔ kpãa gbee lɛ sɛɛ. (Romabii 12:2; Efesobii 4:23, 24) Nɔ ni nyiɛ sɛɛ ba ji wɔtsui muu fɛɛ mli ni wɔjɛ wɔjɔɔ wɔhe nɔ wɔha Yehowa yɛ sɔlemɔ mli. (Mateo 16:24; 1 Petro 2:21) Wɔbi henilee kpakpa kɛjɛ Nyɔŋmɔ ŋɔɔ, ni abaptisi wɔ ákɛ wɔhe nɔ ni wɔjɔɔ wɔha lɛ lɛ he okadi. (1 Petro 3:21) Nɛkɛ nifeemɔi nɛɛ ni wɔɔha ahi wɔjwɛŋmɔ mli lɛ baaye abua wɔ koni wɔkɛ wɔjwɛŋmɔ ama mɔdɛŋ ni wɔɔya nɔ wɔbɔ be fɛɛ be, koni wɔhi shi yɛ wɔ henɔjɔɔmɔ lɛ naa, ni wɔya nɔ wɔsɔmɔ Yehowa kɛ tsui ni efi shi shiŋŋ.
Yaa Nɔ yɛ Anɔkwale Nilee ni Otaoɔ lɛ Mli
5. Mɛni hewɔ esa akɛ wɔya nɔ wɔná mumɔŋ nilee?
5 Kɛji akɛ wɔɔhi shi yɛ wɔ henɔjɔɔmɔ kɛha Nyɔŋmɔ lɛ naa lɛ, belɛ esa akɛ wɔya nɔ wɔná Ŋmalɛ mli nilee ni tswaa hemɔkɛyeli emaa shi. Mɛɛ miishɛɛ po ebafee nɛkɛ, akɛ wɔɔye mumɔŋ niyenii beni wɔbale Nyɔŋmɔ anɔkwale lɛ klɛŋklɛŋ kwraa lɛ! (Mateo 24:45-47) Nakai “niyenii” lɛ ŋɔɔ waa—ni amɛkɛ mumɔŋ niyenii ni hi jogbaŋŋ ha wɔ. Agbɛnɛ ehe miihia ni wɔya nɔ wɔye mumɔŋ niyenii kpakpa lɛ koni wɔya nɔ wɔhiɛ tsui ni fiɔ shi shiŋŋ mli akɛ Yehowa tsuji ni amɛjɔɔ amɛhe nɔ.
6. Mɛɛ gbɛ nɔ ekolɛ atsɔ aye abua bo koni ona tsuiŋ hiɛsɔɔ oha Biblia mli anɔkwale lɛ?
6 Mɔdɛŋbɔɔ he miihia kɛha Ŋmalɛi lɛ ahe nilee lolo ni aaaná. Etamɔ jwetri ni áŋɔtee lɛ taomɔ—nɔ ko ni biɔ hiɛmiamɔ. Shi, kwɛ nyɔmɔwoo ni eji akɛ oooná “Nyɔŋmɔ he nilee”! (Abɛi 2:1-6) Beni Maŋtsɛyeli shiɛlɔ ko kɛ bo kase Biblia lɛ klɛŋklɛŋ kwraa lɛ, ekolɛ ekɛ Nilee Ni Kɛ Mɔ Yaa Naanɔ Wala Mli wolo lɛ tsu nii. Ekolɛ ekɛ be babaoo tsu nii ni nyɛkɛsusu yitso fɛɛ yitso he, ekolɛ fe shikome nikasemɔ. Ŋmalɛi ni atsɛ shi aŋmalako amli wiemɔi lɛ ní nyɛkane ni nyɛsusu he lɛ ahe ba sɛɛnamɔ kɛha bo. Kɛji akɛ ewa akɛ ooonu sane ko shishi lɛ, atsɔɔ mli aha bo. Mɔ ni kɛ bo kaseɔ Biblia lɛ saa ehe jogbaŋŋ, esɔle ebi Nyɔŋmɔ mumɔ lɛ, ni eye ebua bo koni oná tsuiŋ hiɛsɔɔ oha anɔkwale lɛ.
7. Mɛni haa mɔ ko he saa koni etsɔɔ mɛi krokomɛi Nyɔŋmɔ anɔkwale lɛ?
7 Mɔdɛŋbɔɔ nɛɛ sa jogbaŋŋ, ejaakɛ Paulo ŋma akɛ: “Mɔ ni atsɔɔ lɛ wiemɔ lɛ ha ekɛ mɔ ni tsɔɔ lɛ lɛ aye nibii kpakpai fɛɛ.” (Galatabii 6:6) Hela ŋmalɛ lɛ tsɔɔ yɛ biɛ akɛ anyɛ Nyɔŋmɔ Wiemɔ lɛ mli tsɔɔmɔi lɛ anɔ awo “mɔ ni atsɔɔ lɛ wiemɔ lɛ” jwɛŋmɔ kɛ tsui mli. Gbɛ ni atsɔɔ nɔ atsɔɔ bo nii nɛɛ haa ohe saa akɛ ooofee mɛi krokomɛi atsɔɔlɔ lolo. (Bɔfoi lɛ Asaji 18:25) Kɛji akɛ oooye anɔkwa yɛ ohenɔjɔɔmɔ lɛ naa lɛ, esa akɛ ohiɛ omumɔŋ hewalɛ kɛ shifimɔ lɛ mli kɛtsɔ Nyɔŋmɔ Wiemɔ lɛ kasemɔ daa nɔ.—1 Timoteo 4:13; Tito 1:13; 2:2.
Kaimɔ Otsuitsakemɔ kɛ Sɛɛkuu Lɛ
8. Te ebaa lɛ tɛŋŋ ni anyɛɔ ahiɛɔ jeŋba ni Nyɔŋmɔ gbeyeishemɔ yɔɔ mli lɛ mli lɛ?
8 Ani okaiɔ bɔ ni onu hejɔɔmɔ he beni okase anɔkwale lɛ, ni otsake otsui, ni onu Nyɔŋmɔ dɛŋ eshaifaa ni damɔ hemɔkɛyeli ni yɔɔ Yesu kpɔmɔ afɔleshaa lɛ nɔ lɛ he lɛ? (Lala 32:1-5; Romabii 5:8; 1 Petro 3:18) Yɛ anɔkwale mli lɛ osumɔŋ ni oku osɛɛ kɛya esha shihilɛ lɛ mli ekoŋŋ. (2 Petro 2:20-22) Kɛfata nibii krokomɛi ahe lɛ, daa sɔlemɔ kɛha Yehowa baaye abua bo koni oba ojeŋ kɛ Nyɔŋmɔ gbeyeishemɔ, ohi shi yɛ ohenɔjɔɔmɔ lɛ naa, ni oya nɔ osɔmɔ Yehowa yɛ anɔkwayeli mli.—2 Petro 3:11, 12.
9. Akɛni wɔtsi wɔhe kɛjɛ eshafeemɔ nifeemɔi ahe hewɔ lɛ, mɛɛ gbɛ esa akɛ wɔtsɔ nɔ?
9 Akɛni otsake kɛtsɔ esha nifeemɔi ni otsi ohe kɛjɛ he lɛ nɔ hewɔ lɛ, yaa nɔ otao Nyɔŋmɔ yelikɛbuamɔ yɛ otsui ni oooya nɔ oha efi shi shiŋŋ lɛ mli. Ni tsɔɔ akɛ, kulɛ onyiɛ gbɛjegbɛ wulu ni ejaaa lɛ nɔ, shi okwɛ shikpɔŋ mfoniri ni anyɛɔ akɛ he fɔ̃ɔ nɔ lɛ nɔ, ni obɔi gbɛfaa yɛ gbɛ ni ja lɛ nɔ. Agbɛnɛ kaadũ gbɛ dɔŋŋ. Yaa nɔ ni okɛ ohe afɔ̃ Nyɔŋmɔ gbɛtsɔɔmɔ nɔ, ni tswaa ofai shi akɛ obaanyiɛ gbɛ ni kɛ mɔ yaa wala mli lɛ nɔ.—Yesaia 30:20, 21; Mateo 7:13, 14.
Ohiɛ Akakpa Ohenɔjɔɔmɔ kɛ Baptisimɔ lɛ Nɔ Kɔkɔɔkɔ
10. Mɛɛ saji otii esa akɛ wɔha ehi wɔjwɛŋmɔ mli yɛ wɔ henɔjɔɔmɔ kɛha Nyɔŋmɔ lɛ he?
10 Ha ehi ojwɛŋmɔ mli akɛ, otsɔ sɔlemɔ nɔ ojɔɔ ohe nɔ oha Yehowa, kɛ hiɛnɔkamɔ akɛ obaasɔmɔ lɛ yɛ anɔkwayeli mli kɛya naanɔ. (Yuda 20, 21) Henɔjɔɔmɔ tsɔɔ tu ni atuɔ he amaa afã, loo hetsemɔ kɛha yiŋtoo ko ni yɔɔ krɔŋkrɔŋ. (3 Mose 15:31; 22:2) Ohenɔjɔɔmɔ lɛ jeee gbeekpamɔ ni hiɔ shi be kuku, ni asaŋ jeee kɛha gbɔmɛi. Eji henɔjɔɔmɔ kɛha Jeŋ Muu Fɛɛ Maŋtsɛ lɛ, ni ehiɔ shi daa, ni ní aaahi shi yɛ naa lɛ biɔ anɔkwa ni aaaye Nyɔŋmɔ yɛ wala shihilɛ be fɛɛ mli. Hɛɛ, ‘wɔhi shi jio, wɔgboi jio, Yehowa nii ji wɔ.’ (Romabii 14:7, 8) Miishɛɛ ni wɔbaaná lɛ damɔ wɔ heshibaa kɛha esuɔmɔnaa nii kɛ ya ni wɔɔya nɔ wɔsɔmɔ lɛ kɛ tsui ni efi shi shiŋŋ lɛ nɔ.
11. Mɛni hewɔ esa akɛ okai obaptisimɔ lɛ kɛ nɔ ni etsɔɔ lɛ?
11 Kaimɔ obaptisimɔ ni okɛfee otsui muu fɛɛ mli ni ojɛ ojɔɔ ohe nɔ oha Nyɔŋmɔ lɛ he okadi lɛ be fɛɛ be. Ejeee baptisimɔ ni anyɛ onɔ awo mli, ejaakɛ bo diɛŋtsɛ okpɛ oyiŋ nakai. Ani otswa ofai shi agbɛnɛ akɛ, okɛ osuɔmɔnaa nii lɛ baatsu nii yɛ Nyɔŋmɔ suɔmɔnaa nifeemɔ kɛ gbeekpamɔ naa, yɛ oshihilɛ be ni eshwɛ lɛ fɛɛ mli? Obi ni Nyɔŋmɔ aha bo henilee kpakpa, ni abaptisi bo akɛfee ohenɔjɔɔmɔ kɛha lɛ lɛ he okadi. Baamɔ nakai henilee kpakpa lɛ yi kɛtsɔ ohenɔjɔɔmɔ lɛ he nitsumɔ nɔ, ni Yehowa jɔɔmɔi babaoo lɛ baaba onɔ.—Abɛi 10:22.
Osuɔmɔnaa Nii Náa Mli Gbɛfaŋnɔ
12, 13. Wɔ diɛŋtsɛ wɔsuɔmɔnaa nii kɔɔ henɔjɔɔmɔ kɛ baptisimɔ he yɛ mɛɛ gbɛ nɔ?
12 Henɔjɔɔmɔ kɛ baptisimɔ kɛ jɔɔmɔi babaoo diɛŋtsɛ ebaha gbɔmɛi akpekpei abɔ yɛ shikpɔŋ lɛ nɔ he fɛɛ he. Kɛji akɛ wɔfee wɔ henɔjɔɔmɔ kɛha Nyɔŋmɔ lɛ he okadi kɛtsɔ nu mli baptisimɔ nɔ lɛ, wɔgboiɔ wɔhaa wɔ tsutsu shihilɛ gbɛ lɛ, shi jeee wɔ diɛŋtsɛ wɔsuɔmɔnaa nii. Ákɛ heyelilɔi ni atsɔɔ amɛ nii jogbaŋŋ lɛ, wɔkɛ wɔ diɛŋtsɛ wɔsuɔmɔnaa nii tsu nii beni wɔjɔɔ wɔhe nɔ wɔha Nyɔŋmɔ yɛ sɔlemɔ mli ní abaptisi wɔ lɛ. Henɔjɔɔmɔ kɛ baptisimɔ gbɛ lɛ biɔ ni wɔle nɔ ni Nyɔŋmɔ suɔmɔnaa nii ji, ni wɔje gbɛ wɔhala akɛ wɔbaatsu he nii. (Efesobii 5:17) No hewɔ lɛ, wɔkaseɔ Yesu ni kɛ lɛ diɛŋtsɛ esuɔmɔnaa nii tsu nii beni ekɛ ekapintɛ dadei lɛ shwie shi, ni abaptisi lɛ, ni etu ehe kwraa eha eŋwɛi Tsɛ lɛ suɔmɔnaa nifeemɔ lɛ.—Lala 40:8, 9; Yohane 6:38-40.
13 Yehowa Nyɔŋmɔ to eyiŋ akɛ ebaaha e-Bi lɛ “atsɔ amanehului amli ahi kɛwula shi.” No hewɔ lɛ ehe bahia ni Yesu kɛ esuɔmɔnaa nii atsu nii koni ekɛŋmɛ etsui shi yɛ piŋmɔi ni tamɔ nɛkɛ mli yɛ anɔkwayeli mli. Yɛ enɛ hewɔ lɛ, “eŋɔ sɔlemɔ kɛ faikpamɔi ni bolɔmɔ ni naa wa kɛ yaafonui fata he eshã afɔle . . . ni abo lɛ toi hu, ejaakɛ ebuɔ Nyɔŋmɔ.” (Hebribii 2:10, 18; 5:7, 8) Kɛji akɛ wɔjie Nyɔŋmɔ gbeyeishemɔ ni woo yɔɔ mli ni tamɔ nɛkɛ kpo lɛ, wɔ hu wɔyɛ nɔmimaa akɛ ‘abaabo wɔ toi,’ ni wɔbaanyɛ wɔná hekɛnɔfɔɔ akɛ Yehowa baaha wɔfi shi shiŋŋ akɛ e-Dasefoi ni amɛjɔɔ amɛhe nɔ.—Yesaia 43:10.
Obaanyɛ Ohiɛ Tsui ni Efi Shi Shiŋŋ Mli
14. Mɛni hewɔ esa akɛ wɔkane Biblia lɛ daa gbi lɛ?
14 Mɛni baaye abua bo koni ohiɛ tsui ni efi shi shiŋŋ mli koni ohi shi yɛ ohenɔjɔɔmɔ kɛha Nyɔŋmɔ lɛ naa? Akɛni oyiŋtoo ji ni oná Nyɔŋmɔ Wiemɔ lɛ he nilee ni fáa be fɛɛ be lɛ hewɔ lɛ, kanemɔ Biblia lɛ daa gbi. Enɛ ji nɔ ko ní “tsulɔ anɔkwafo kɛ nilelɔ lɛ” woɔ wɔ hewalɛ be fɛɛ be akɛ wɔfee. Akɛ ŋaawoo nɛɛ haa ejaakɛ wɔ henɔjɔɔmɔ lɛ ni wɔɔhi shi yɛ naa lɛ biɔ ni wɔya nɔ wɔnyiɛ Nyɔŋmɔ anɔkwale lɛ mli. Kɛji akɛ Yehowa gbɛjianɔtoo lɛ je gbɛ ekpɛlɛ apasa tsɔɔmɔi anɔ lɛ, kulɛ akɛ ŋaawoo akɛ akane Biblia lɛ haŋ Yehowa Odasefoi kɛ mɛi ni amɛshiɛɔ amɛhaa amɛ lɛ.
15. (a) Mɛni esa akɛ asusu he beni afeɔ yiŋkpɛi lɛ? (b) Mɛni hewɔ abaanyɛ akɛɛ akɛ heloo gbɛfaŋ nitsumɔ ji Kristofonyo lɛ nitsumɔ ni baa gbɛhe ni ji enyɔ lɛ?
15 Kɛji akɛ oofee yiŋkpɛi lɛ, susumɔ bɔ ni ekolɛ amɛbaasa ohe nɔ ni ojɔɔ oha Yehowa lɛ he aha lɛ he be fɛɛ be. Amɛbaanyɛ amɛkɔ oheloo gbɛfaŋ nitsumɔ he. Ani obɔɔ mɔdɛŋ ni oha eye ebua bo koni oha anɔkwa jamɔ aya hiɛ? Eyɛ mli akɛ nitsumɔtsɛmɛi naa akɛ anyɛɔ akɛ he fɔ̃ɔ Kristofoi ni amɛjɔɔ amɛhe nɔ lɛ anɔ ni amɛhe esa waa moŋ, shi amɛnaa hu akɛ, Yehowa Odasefoi kɛ hiɛnyam taomɔ epeleee ákɛ amɛaaya hiɛ yɛ je lɛ mli, ni amɛkɛ mɛi krokomɛi eshiii akaŋ yɛ gbɛhei ni sɛɛnamɔi yɔɔ he fe fɛɛ lɛ ahe. Nɔ̃ hewɔ ji akɛ, oti ni ma Odasefoi lɛ ahiɛ lɛ jeee ni amɛnine ashɛ ninámɔ nɔ, amɛhe gbɛ́i, amɛhiɛ aba nyam, loo amɛná hewalɛ nɔ. Nɔ ni he hiaa fe fɛɛ kɛha mɛi ni hiɔ shi yɛ amɛ henɔjɔɔmɔ kɛha Nyɔŋmɔ lɛ naa ji, ni amɛfee Nyɔŋmɔ suɔmɔnaa nii. Heloo gbɛfaŋ nitsumɔ ni haa amɛnine shɛɔ shihilɛ mli hiamɔ nii anɔ lɛ ji nitsumɔ ni ji enyɔ, nitsumɔ ni ebaa gbɛhe ni ji enyɔ. Taakɛ bɔfo Paulo ji lɛ, amɛ nitsumɔ titri ni baa klɛŋklɛŋ ji, Kristofoi asɔɔmɔ nitsumɔ lɛ. (Bɔfoi lɛ Asaji 18:3, 4; 2 Tesalonikabii 3:7, 8; 1 Timoteo 5:8) Ani okɛ Maŋtsɛyeli lɛ he nibii yeɔ klɛŋklɛŋ gbɛhe yɛ oshihilɛ mli?—Mateo 6:25-33)
16. Mɛni wɔbaanyɛ wɔfee kɛji akɛ yeyeeyefeemɔ ni he ehiaaa miiha eewa kɛmiiha wɔ akɛ wɔɔhi shi yɛ wɔhenɔjɔɔmɔ kɛha Nyɔŋmɔ lɛ naa?
16 Ekolɛ mɛi komɛi yɛ ni yeyeeyefeemɔi srɔtoi ye amɛnɔ kunim kwraa dani amɛkase anɔkwale lɛ. Shi amrɔ nɛɛ amɛtsui eyi obɔ kɛ miishɛɛ, shidaa, kɛ suɔmɔ kɛha Nyɔŋmɔ yɛ Maŋtsɛyeli hiɛnɔkamɔ lɛ ni amɛkpɛlɛ nɔ lɛ hewɔ! Ekolɛ jɔɔmɔi ni amɛná mli ŋɔɔmɔ kɛjɛ nakai be lɛ mli lɛ he susumɔ baanyɛ aye abua amɛ ni amɛhi shi yɛ amɛ henɔjɔɔmɔ kɛha Yehowa lɛ naa. Yɛ gbɛ kroko nɔ lɛ, kɛji akɛ yeyeeyefeemɔ ni he ehiaaa he naagbai ni yɔɔ gbɛjianɔtoo nɛɛ mli bianɛ lɛ he haomɔ gbe “Nyɔŋmɔ wiemɔ lɛ,” tamɔ bɔ ni ŋmeii tsĩɔ dumɔwui anaa koni amɛkadara ni amɛwo yibii lɛ, no hu? (Luka 8:7, 11, 14; Mateo 13:22; Marko 4:18, 19) Kɛji akɛ oná onu he akɛ enɛ miije shishi aba bo loo oweku lɛ nɔ lɛ, shɛ́ oyeyeeyefeemɔ lɛ ofɔ̃ Yehowa nɔ ni osɔle koni eye ebua bo ni oda yɛ suɔmɔ kɛ hiɛsɔɔ mli. Kɛji akɛ oshɛ́ ojatsu lɛ ofɔ̃ enɔ lɛ, ebaawaje bo, ni ebaaha bo hewalɛ ni baaha oya nɔ osɔmɔ lɛ yɛ miishɛɛ mli kɛ tsui ni efi shi shiŋŋ.—Lala 55:23; Filipibii 4:6, 7; Kpojiemɔ 2:4.
17. Te afeɔ tɛŋŋ ni anyɛɔ adamɔɔ kaai ni naa wa waa naa?
17 Yaa nɔ osɔle daa oha Yehowa Nyɔŋmɔ, tamɔ bɔ ni osɔle beni ojɔɔ ohe nɔ ohaa lɛ lɛ. (Lala 65:3) Kɛji akɛ aaka bo koni ofee efɔŋ loo okɛ kaa ko ni mli wa waa ekpe lɛ, taomɔ Nyɔŋmɔ gbɛtsɔɔmɔ kɛ eyelikɛbuamɔ sɛɛgbɛ koni okɛtsu nii. Ha bɔ ni hemɔkɛyeli he hiaa ha lɛ ahi ojwɛŋmɔ mli, ejaakɛ kaselɔ Yakobo ŋma akɛ: “Kɛ́ nilee [ni akɛaadamɔ kaa naa] eshwɛ nyɛteŋ mɔ ko lɛ, ékpa Nyɔŋmɔ ni haa mɛi fɛɛ faa ni ewieee mɔ ko hiɛ lɛ fai, ni aaaŋɔha lɛ. Shi ha ní ekpa fai yɛ hemɔkɛyeli mli, ni ekaje nɔ ko nɔ ko he ŋwane; ejaakɛ ŋwanejelɔ lɛ etamɔ ŋshɔke ní kɔɔyɔɔ tswaa kɛyaa kɛbaa. Ejaakɛ nakai gbɔmɔ ko akasusu akɛ eeená nɔ ko yɛ [Yehowa, NW] dɛŋ; jwɛŋmɔi enyɔnyɔtsɛ ko fiii shi yɛ egbɛi fɛɛ mli.” (Yakobo 1:5-8) Kɛji akɛ kaa ko fee tamɔ nɔ ni enaa wa tsɔ lɛ, wɔbaanyɛ wɔná nɔmimaa yɛ enɛ he: “Kaa ko bako nyɛnɔ ni jeee gbɔmɔ he nɔ; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ní nyɛje mli hu, koni nyɛnyɛ mli nyɛmɔ.”—1 Korintobii 10:13.
18. Mɛni wɔbaanyɛ wɔfee kɛji akɛ esha ko ni hiɛdɔɔ yɔɔ mli ni akɛ́tee lɛ miigbɔjɔ wɔfaishitswaa akɛ wɔɔhi shi yɛ wɔ henɔjɔɔmɔ kɛha Nyɔŋmɔ lɛ naa lɛ?
18 Shi kɛji akɛ esha ko ni hiɛdɔɔ yɔɔ mli miigba ohenilee naa ni eegbɔjɔ ofaishitswaa ákɛ ooohi shi yɛ ohenɔjɔɔmɔ kɛha Nyɔŋmɔ lɛ naa hu? Kɛji akɛ óshwa ohe lɛ, obaanyɛ oná miishɛjemɔ yɛ nilee ni oyɔɔ akɛ Yehowa ‘kpooŋ tsui ni werɛ eho ehe ni tswiaa shi kɛ dɔlɛ lɛ.’ (Lala 51:19) Taomɔ Kristofoi onukpai ni yɔɔ suɔmɔ lɛ ayelikɛbuamɔ, akɛni ole akɛ—yɛ Yehowa kasemɔ mli lɛ—amɛbuŋ bɔ ni oshweɔ ni oná okɛ oŋwɛi Tsɛ lɛ teŋ wekukpaa kpakpa mli ŋɔɔmɔ ekoŋŋ lɛ akɛ nɔ ko ni he ehiaaa. (Lala 103:10-14; Yakobo 5:13-15) Kɛkɛ lɛ beni oku sɛɛ oná mumɔŋ hewalɛ kɛ tsui ni fiɔ shi shiŋŋ ekoŋŋ lɛ, obaanyɛ ojaje onaji ni onyiɛ tɔrɔmɔɔ ekoŋŋ, ni obaanyɛ ohi shi yɛ ohenɔjɔɔmɔ kɛha Nyɔŋmɔ lɛ naa.—Hebribii 12:12, 13.
Yaa Nɔ Osɔmɔ kɛ Tsui ni Efi Shi Shiŋŋ
19, 20. Mɛni hewɔ ehe hiaa akɛ wɔhi shi yɛ wɔ henɔjɔɔmɔ lɛ naa lɛ?
19 Esa akɛ wɔbɔ mɔdɛŋ waa yɛ nɛkɛ jaramɔ bei nɛɛ amli koni wɔhi shi yɛ wɔ henɔjɔɔmɔ lɛ naa, ni wɔya nɔ wɔkɛ tsui ni efi shi shiŋŋ asɔmɔ Yehowa. Yesu kɛɛ akɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) Akɛni “naagbee gbii” lɛ amli wɔyɔɔ hewɔ lɛ, naagbee lɛ baanyɛ aba be fɛɛ be. (2 Timoteo 3:1) Agbɛnɛ hu, wɔteŋ mɔ ko bɛ ni baanyɛ aná nɔmimaa akɛ wɔbaahi wala mli wɔ́. (Yakobo 4:13, 14) No hewɔ lɛ, ehe miihia ni wɔya nɔ wɔhi shi yɛ wɔ henɔjɔɔmɔ lɛ naa ŋmɛnɛ!
20 Bɔfo Petro ma enɛ nɔ mi yɛ ewolo ni ji enyɔ lɛ mli. Etsɔɔ akɛ, bɔ ni mɛi ni leee Nyɔŋmɔ lɛ ahiɛ kpata yɛ Nu Afua lɛ mli lɛ, nakai nɔŋŋ hu abaakpata mfonirifeemɔŋ shikpɔŋ lɛ, loo adesai asafo fɔŋ lɛ hiɛ yɛ “Yehowa gbi” lɛ nɔ. No hewɔ lɛ, Petro jaje akɛ: “Mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli?” Kɛkɛ ni ewo amɛ hewalɛ hu akɛ: “Suɔmɔmɛi, akɛni nyɛle momo sa hewɔ lɛ nyɛsaraa, koni [apasa tsɔɔlɔi kɛ mɛi ni sheee Nyɔŋmɔ gbeyei] akalaka nyɛ hu, ni nyɛjɛ nyɛ diɛŋtsɛ nyɛshifimɔ lɛ mli nyɛgbee shi.” (2 Petro 3:5-17) Kwɛ awerɛho sane ni eeeji akɛ aaalaka mɔ ko ni abaptisi lɛ lɛ kɛya laajemɔ mli, ni eshihilɛ aba naagbee akɛ mɔ ni nyɛɛɛ ahiɛ tsui ni efi shi shiŋŋ mli!
21, 22. Yɛ mɛɛ gbɛ nɔ Lala 57:7 (NW) mli wiemɔi lɛ efee anɔkwale yɛ David kɛ anɔkwa Kristofoi asane lɛ mli?
21 Obaanyɛ owaje ofaishitswaa akɛ ooohi shi yɛ ohenɔjɔɔmɔ kɛha Nyɔŋmɔ lɛ naa, kɛji akɛ oha obaptisimɔ gbi ni ji miishɛɛ be lɛ hi ojwɛŋmɔ mli, ni otao Nyɔŋmɔ yelikɛbuamɔ koni oha owiemɔi kɛ onifeemɔi aha etsui anya lɛ. (Abɛi 27:11) Yehowa haaa ewebii anine anyɛ shi kɔkɔɔkɔ, no hewɔ lɛ, esa akɛ wɔye lɛ anɔkwa. (Lala 94:14) Ejie musuŋtsɔlɛ kɛ mɔbɔnalɛ kpo beni eha David henyɛlɔi lɛ agbɛjianɔtoo fee yaka ni ehere David yiwala lɛ. Akɛni David hiɛ sɔ enɛ hewɔ lɛ, ejaje bɔ ni esuɔmɔ ni eyɔɔ kɛha e-Yiwalaherelɔ lɛ efi shi shiŋŋ, ni etsiii ehe kɔkɔɔkɔ lɛ etsɔɔ. Ekɛ henumɔ ni mli wa la akɛ: “Mitsui efi shi shiŋŋ, Oo Nyɔŋmɔ, mitsui efi shi shiŋŋ.”—Lala 57:7, NW.
22 Taakɛ David ji lɛ, anɔkwa Kristofoi tsiko amɛhe kɛjɛko amɛhe ni amɛtu amɛha Nyɔŋmɔ lɛ he. Amɛkɛ tsuii ni efi shi shiŋŋ jajeɔ akɛ amɛyiwalaheremɔ kɛ yibaamɔ jɛ Yehowa, mɔ ni amɛláa yijiemɔ lalai amɛhaa lɛ lɛ. Kɛji akɛ otsui efi shi shiŋŋ lɛ, ekɛ ehe baafɔ̃ Nyɔŋmɔ nɔ, ni yɛ eyelikɛbuamɔ hewɔ lɛ, obaanyɛ otsu ohenɔjɔɔmɔ lɛ he nii. Hɛɛ, obaanyɛ otsɔ tamɔ “jalɔ lɛ,” ni lalatsɛ lɛ lá yɛ ehe akɛ: “Esheŋ sane fɔŋ adafitswaa ko gbeyei; eyɛ tsui, [ni efi shi shiŋŋ] ehiɛ kã Yehowa nɔ” lɛ. (Lala 112:6, 7) Yɛ hemɔkɛyeli ni oyɔɔ yɛ Nyɔŋmɔ mli kɛ ohe ni okɛfɔ̃ɔ enɔ kwraa hewɔ lɛ, obaanyɛ ohi shi yɛ ohenɔjɔɔmɔ lɛ naa, ní oya nɔ osɔmɔ Yehowa kɛ tsui ni efi shi shiŋŋ.
Ani Okaiɔ?
• Mɛni hewɔ esa akɛ wɔya nɔ wɔná Biblia mli anɔkwale nilee?
• Mɛni hewɔ esa akɛ wɔha wɔ tsuitsakemɔ kɛ sɛɛkuu lɛ ahi wɔjwɛŋmɔ mli lɛ?
• Wɔ henɔjɔɔmɔ kɛ baptisimɔ lɛ kaimɔ he baa sɛɛnamɔ kɛhaa wɔ yɛ mɛɛ gbɛ nɔ?
• Mɛni baaye abua wɔ koni wɔya nɔ wɔsɔmɔ Yehowa kɛ tsui ni efi shi shiŋŋ?
[Nikasemɔ lɛ he Sanebimɔi]
[Mfonirii ni yɔɔ baafa 18]
Kristofoi asɔɔmɔ nitsumɔ lɛ ni wɔkɛaafee wɔ nitsumɔ titri lɛ yeɔ ebuaa wɔ koni wɔya nɔ wɔsɔmɔ Yehowa kɛ tsui ni efi shi shiŋŋ
[Mfoniri ni yɔɔ baafa 18]
Ani oohiɛ omumɔŋ hewalɛnamɔ lɛ mli kɛtsɔ Nyɔŋmɔ Wiemɔ lɛ kanemɔ daa nɔ?