Beni Nilee Yɔɔ Mli akɛ Ojo Foi

BEI pii lɛ, nɔ ni kadiɔ je lɛ ŋmɛnɛ ji ekãafeemɔ mumɔ kɛ basabasafeemɔ loo shihilɛ ni kaa mɔ. Efɔɔ kaa akɛ, abuɔ mɔ ni joɔ shihilɛ ko naa foi lɛ akɛ mɔ ni he waaa loo eji feetɔ. Ebaanyɛ ebatsɔ mɔ ni ayeɔ ehe fɛo po.

Shi kɛlɛ, Biblia lɛ feɔ lɛ faŋŋ akɛ bei komɛi lɛ, foi ni aaaje lɛ bafeɔ nilee kɛ ekãafeemɔ fɛɛ. Akɛni Yesu Kristo yɔɔ nɔmimaa yɛ enɛ he hewɔ lɛ, dani ebaatsu ekaselɔi lɛ ni amɛkɛ amɛhe awo shiɛmɔ nitsumɔ lɛ mli lɛ, ekɛɛ amɛ akɛ: “Shi kɛ́ amɛmiiwa nyɛ yi yɛ maŋ nɛɛ mli lɛ, nyɛjoa foi nyɛyaa ekroko mli.” (Mateo 10:23) Hɛɛ, esa akɛ Yesu kaselɔi lɛ ajo foi yɛ amɛyiwalɔi lɛ anaa. Esaaa akɛ amɛkɛ amɛhe woɔ jamɔŋ ta ko mli, ní amɛbɔ mɔdɛŋ ni amɛnyɛ mɛi krokomɛi anɔ ni amɛtsake. Amɛ amɛhiɛ toiŋjɔlɛ shɛɛ sane lɛ. (Mateo 10:11-14; Bɔfoi lɛ Asaji 10:34-37) No hewɔ lɛ, yɛ nɔ najiaŋ ni Kristofoi aaaha amɛmli afu lɛ, esa akɛ amɛjo foi, ni amɛha gbɛ akã amɛ kɛ he ni béi lɛ jɛɔ kɛbaa lɛ teŋ. Kɛtsɔ nɛkɛ gbɛ nɔ lɛ, amɛhiɛɔ henilee kpakpa mli kɛ agbɛnɛ hu amɛkɛ Yehowa teŋ wekukpaa ni jara wa lɛ mli.—2 Korintobii 4:1, 2.

Anaa nɔkwɛmɔnɔ ko ni yɔɔ srɔto yɛ Biblia mli wolo ni ji Abɛi lɛ mli. Egbaa wɔ oblanyo ko ní yɛ nɔ najiaŋ ni eeejo kaa ko naa foi lɛ, enyiɛ yoo ajwamaŋ ko sɛɛ “tamɔ tsina ni ayaagbe lɛ.” Mɛni jɛ mli kɛba? Hiɛkpatamɔ, akɛni eŋmɛɛ ehe eha kaa ni baasa lɛ diɛŋtsɛ esusuma he lɛ hewɔ.—Abɛi 7:5-8, 21-23.

Kɛ́ okɛ shihilɛ ko ni miika bo koni okɛ ohe awo bɔlɛnamɔ mli jeŋba shara mli loo okɛ shihilɛ ko ni baanyɛ afee oshara lɛ kpe lɛ, no hu? Taakɛ Nyɔŋmɔ Wiemɔ lɛ tsɔɔ lɛ, nifeemɔ ni nilee yɔɔ mli ji ni ojo foi, ni oshi jɛmɛ oya nɔŋŋ kɛ foi.—Abɛi 4:14, 15; 1 Korintobii 6:18; 2 Timoteo 2:22.