Mɛni Mli Oshweshweeshwe Shihilɛ Yɔɔ?

Yɛ Afrika Anaigbɛ akrowa bibioo ko mli lɛ, oblanyo Josué kɛ eweku lɛ kɛ enanemɛi ye shɛɛ. * Kɛkɛ ni eshi kɛtee maŋ wulu lɛ mli koni eyatao shika gbɛfaŋ shweshweeshwe shihilɛ. Shi kɛlɛ, beni eyashɛ shi sɛɛ etsɛɛɛ lɛ, hiɛnɔkamɔ ni eyɔɔ lɛ ba shi be mli ni eyɔse akɛ maŋtiase lɛ jeee he ko ni yɔɔ mlɛo akɛ abaatsɔ niiatsɛ yɛ.

BENI Josué miaa ehiɛ koni etsake ehe kɛwo shihilɛ ni yɔɔ maŋ wulu lɛ mli lɛ mli lɛ, enijiaŋ baje wui kwraa. Maŋ wulu lɛ jeee bɔ ni esusu akɛ ebaaji lɛ kwraa. Yɛ nakai beaŋ nɔŋŋ lɛ, Josué miishwe yɛ etsui mli tɔŋŋ akɛ eku esɛɛ kɛya eweku kɛ enanemɛi lɛ aŋɔɔ yɛ akrowa ni abuuu ní eshi lɛ mli lɛ. Shi eeshe gbeyei akɛ akrowa lɛŋ bii komɛi baaye ehe fɛo. Ehao akɛ: ‘Amɛbaatsɛ mi yaka gbɔmɔ, ejaakɛ miyayeee omanye yɛ maŋtiase lɛ mli.’

Nɔ ni gbaa enaa fe fɛɛ ji nijiaŋwujee ni efɔlɔi baanyɛ anu he lɛ. Amɛhiɛ kã enɔ akɛ ebaaye ebua yɛ shika gbɛfaŋ. Be mli ni Josué bɔɔ mɔdɛŋ koni ekpee henumɔŋ naagba nɛɛ naa lɛ, ebɔi nitsumɔ ko ni haaa ená bulɛ tsɔ aha mɔ, ni ekɛ ŋmɛlɛtswai babaoo tsuɔ nii, ni shika ni esusuɔ akɛ ebaaná lɛ mlijaa ko pɛ enine shɛɔ nɔ. Etɔɔ lɛ waa diɛŋtsɛ yɛ nitsumɔ dɛŋdɛŋ ni etsuɔ lɛ hewɔ. Ni be ni ato kɛha Kristofoi anitsumɔ, ní ebuɔ akɛ ejara wa waa diɛŋtsɛ lɛ bɔi shibaa otsi fɛɛ otsi. Akɛni enine shɛɛɛ suɔmɔ ni eweku lɛ kɛ etsutsu nanemɛi lɛ jieɔ lɛ kpo amɛtsɔɔ lɛ lɛ nɔ dɔŋŋ hewɔ lɛ, efeɔ enii mɔbɔmɔbɔ ni enuɔ he akɛ eshwɛ ekome too. Ena akɛ maŋtiase lɛ hako lɛ shweshweeshwe shihilɛ ni eshweɔ babaoo lɛ.

Eyɛ mli akɛ ayɛ gbɛii kɛ hei srɔtoi moŋ, shi Josué niiashikpamɔ ni yɔɔ mɔbɔ lɛ ji nɔ ni fɔɔ kaa. Jeee akɛ Josué miifee pɛsɛmkunya yɛ shwe ni eshweɔ akɛ eshi lɛ mli—shi moŋ shweshweeshwe shihilɛ kɛkɛ etaoɔ. Enu he yɛ anɔkwale mli akɛ hegbɛi ni ebaaná yɛ maŋtiase lɛ mli lɛ hi kwraa fe nɔ ni yɔɔ ekrowa bibioo lɛ mli lɛ. Yɛ anɔkwale mli lɛ, bei komɛi lɛ ekolɛ mɔ ko baaha eshidaamɔ yɛ heloonaa nibii agbɛfaŋ lɛ aya hiɛ, shi no etsɔɔɔ akɛ eji shweshweeshwe shihilɛ diɛŋtsɛ. Eka shi faŋŋ akɛ ebaaa lɛ nakai yɛ Josué gbɛfaŋ, loo ni ebaaba yɛ mɛi krokomɛi babaoo ni bɔɔ mɔdɛŋ ni tamɔ nakai nɔŋŋ lɛ agbɛfaŋ. Enɛ haa wɔbiɔ akɛ, “Mɛni ji shweshweeshwe shihilɛ?”

Gbɔmɛi srɔtoi náa shweshweeshwe shihilɛ yɛ gbɛ̀i srɔtoi anɔ. Wiemɔ komekomei ashishitsɔɔmɔ wolo ko kɛɛ akɛ shweshweeshwe shihilɛ ji “heyeli kɛmiijɛ oshara mli” aloo “heyeli kɛmiijɛ gbeyeishemɔ loo yeyeeyefeemɔ mli.” Mɛi pii yɔseɔ akɛ “heyeli kɛmiijɛ oshara mli” bɛ shihilɛ mli kwraa ŋmɛnɛ. Amɛmii shɛɔ amɛhe bei abɔ ni amɛnuɔ he akɛ amɛyɛ shweshweeshwe, ekɔɔɔ he eko shihilɛi ni woɔ mɔ he gbeyei ni ekolɛ ebɔle amɛhe kɛkpe lɛ.

Ni bo hu? Nɛgbɛ otaoɔ shweshweeshwe shihilɛ yɛ? Ani anáa yɛ maŋtiase lɛ mli kɛ akɛmiito akrowa lɛ he, taakɛ Josué susu lɛ? Aloo anáa yɛ shika mli, ekɔɔɔ he eko he ni obaanyɛ oná yɛ loo gbɛ nɔ ni obaanyɛ otsɔ oná? Ani ekolɛ anáa yɛ shihilɛ mli gbɛhe ni nɔ kwɔ namɔ mli? Ekɔɔɔ he eko he ni oheɔ oyeɔ akɛ oshweshweeshwe shihilɛ yɔɔ lɛ, be enyiɛ nakai shweshweeshwe shihilɛ lɛ baahi shi kɛyashi kɛha bo kɛ oweku lɛ?

Nyɛhaa wɔsusua gbɛ̀i etɛ amli ni aŋkroaŋkroi babaoo taoɔ shweshweeshwe shihilɛ yɛ—yɛ shikpɔŋ lɛ nɔ he ko ni ayɔɔ; shika; loo gbɛhe. Kɛkɛ lɛ, wɔbaapɛi he ni anɔkwa shweshweeshwe shihilɛ ni hiɔ shi daa lɛ yɔɔ lɛ mli wɔkwɛ.

[Shishigbɛ niŋmaa]