Ani Osusuɔ He Jogbaŋŋ?

YESU KRISTO kɛ naanɔ wala he hiɛnɔkamɔ ha ekaselɔi lɛ, shi ewo amɛ hewalɛ hu ni amɛsusu Kristofoi ni amɛaatsɔmɔ lɛ he jogbaŋŋ. Efee sane oti lɛ he mfoniri kɛtsɔ sanebimɔ nɛɛ ni ebi lɛ nɔ akɛ: “Nyɛteŋ namɔ ni kɛji eetao mɔ̃ɔ emã lɛ ni etaŋ shi, ní ebu naa ekwɛ dã [loo, esusu he jogbaŋŋ] akɛ eyɛ nii bɔ ni aaashɛ naagbee lo?” (Luka 14:28) Mɛɛ nii ahe ní aaasusu jogbaŋŋ Yesu tsɔɔ lɛ?

Kristofoi fɛɛ kɛ kaai kpeɔ—ni ekomɛi amli wa. (Lala 34:20; Mateo 10:36) No hewɔ lɛ, esa akɛ wɔsaa wɔhe yɛ jwɛŋmɔŋ kɛ mumɔŋ fɛɛ bɔni afee ni wɔhiɛ akafee wɔ yaa be mli ni wɔkɛ shitee-kɛ-woo loo naagbai krokomɛi kpeɔ lɛ. Esa akɛ wɔ́tsɔ hiɛ momo wɔsusu naagbai nɛɛ ahe jogbaŋŋ ni wɔkɛto nibii ni baa yɛ Kristo kaselɔi ni wɔɔji lɛ he, ní wɔle akɛ nyɔmɔwoo lɛ—yiwalaheremɔ kɛmiijɛ esha kɛ gbele mli—lɛ jara wa aahu fe nɔ fɛɛ nɔ ni ŋmɛnɛŋmɛnɛ gbɛjianɔtoo nɛɛ baanyɛ aha wɔ. Hɛɛ, nɔ ko nɔ ko bɛ ni Nyɔŋmɔ ŋmɛɔ gbɛ—gbele po—ni baanyɛ aye wɔ awui kɛya naanɔ kɛji wɔtee nɔ wɔsɔmɔ lɛ.—2 Korintobii 4:16-18; Filipibii 3:8.

Mɛɛ gbɛ nɔ wɔhemɔkɛyeli lɛ aaatsɔ emli awa nakai? Wɔhemɔkɛyeli lɛ yaa nɔ emli waa be fɛɛ be ní wɔfeɔ yiŋkpɛɛ ni ja, ni wɔkɔɔ shidaamɔ ko ni yɔɔ shiŋŋ kɛha Kristofoi ashishitoo mlai lɛ, aloo ni wɔtsuɔ nifeemɔ ko he nii yɛ Nyɔŋmɔ suɔmɔnaa nifeemɔ kɛ gbeekpamɔ naa—titri lɛ kɛji wɔyɛ shihilɛ ni nyɛɔ wɔnɔ ni wɔfee nɔ kroko shishi lɛ. Kɛ wɔnine shɛ Yehowa jɔɔmɔ nɔ wɔdiɛŋtsɛ yɛ anɔkwa gbɛ ni wɔkɔ lɛ hewɔ lɛ, no wajeɔ wɔhemɔkɛyeli lɛ ni emli waa. Yɛ nakai gbɛ nɔ lɛ, wɔnyiɛɔ Yesu, eklɛŋklɛŋ kaselɔi lɛ, kɛ hii kɛ yei ni yɔɔ hemɔkɛyeli ni yɛ yinɔi ni eho lɛ mli fɛɛ lɛ ‘amɛsusu’ Nyɔŋmɔ sɔɔmɔ lɛ ‘he jogbaŋŋ’ lɛ anɔkwɛmɔnɔ lɛ sɛɛ.—Marko 1:16-20; Hebribii 11:4, 7, 17, 24, 25, 32-38.