Kpajeei Baa yɛ Gbɛi Srɔtoi Anɔ

ASRAAFOI ni bɔ mɔdɛŋ koni amɛnyɛ Christian ni yɔɔ Afrika maŋ ko mli lɛ nɔ amɛwo asraafoi anitsumɔ mli lɛ gbala lɛ gidigidi kɛtee, shi ekpɛlɛɛɛ akɛ eeeŋmɛɛ sane he ekɛsaa yɛ ehenilee ni Biblia etsɔse lɛ lɛ hewɔ. Sɛɛ mli lɛ, asraafoi lɛ kɛ lɛ tee asraafoi ansara ko mli, ni beni ayi lɛ yɛ jɛmɛ gbii ejwɛ sɛɛ lɛ, amɛteŋ mɔ kome tswa enane tu. Christian kɛ hiɛmiamɔ tee helatsamɔhe ko, shi ehe bahia ni afo enane kɛjɛ enakutso naa. Yɛ Afrika maŋ kroko mli lɛ, maŋ atuatselɔi ni hiɛ tui efolɔ gbekɛbii bibii po aniji loo amɛnaji. Ni kɛjɛ Cambodia kɛyashi Balkan maji lɛ amli, kɛjɛ Afghanistan kɛtee Angola lɛ, okplɛmii bibii ni fɛ́ɔ ni afũɔ yɛ shikpɔŋ yaa nɔ efolɔɔ gbekɛbii kɛ onukpai aniji loo amɛnaji bɔ ni esaaa, ni etoɔ amɛ kpa.

Nɔ kroko hu ni toɔ mɛi kpa ji osharai kɛ hela, tamɔ sikli hela nɛkɛ. Ebɔɔ po ni yɔɔ hei srɔtoi baanyɛ aha mɛi aje kpa. Ákɛ nɔkwɛmɔnɔ lɛ, yɛ akutsei ni bɛŋkɛ amɛhe lɛ amli yɛ Europa Bokagbɛ maŋtiase ko mli lɛ, gbekɛbii komɛi yɛ ni afɔ amɛ ákɛ mɛi ni amɛnine lɛ etse kɛjɛ nikutso lɛ nɔ. Nɔ̃ pɛ ni amɛyɔɔ kɛkɛ ji nɔ ko tamɔ kpɔ ko ni yɔɔ amɛnikutso lɛ shishi. Odaseyeli yɛ ni tsɔɔ akɛ tsofai ni fiteɔ nii ji nɔ ni fiteɔ gbɛjianɔtoo ni fɔmɔ kɛtsuɔ nii lɛ. Mɛi krokomɛi babaoo aniji kɛ naji fɛɛ yɛ moŋ, shi kɛlɛ amɛje kpa yɛ kuumɔ hela loo hela kroko hewɔ. Yɛ anɔkwale mli lɛ, kpajeei baa yɛ gbɛi srɔtoi anɔ.

Yɛ nɔ ni baanyɛ ekɛ enɛ aba lɛ fɛɛ sɛɛ lɛ, kpa ni ajeɔ lɛ baanyɛ afite nii waa. Junior abɛkugbɛ nakutso kɛbaa shi lɛ fo kɛje nɔ beni eye afii 20 lɛ. Ekɛɛ yɛ sɛɛ mli akɛ: “Miná henumɔŋ naagbai babaoo. Mifó aahu yɛ anɔkwale ni eji akɛ minaŋ minane lɛ dɔŋŋ lɛ hewɔ. Mileee nɔ ni mafee. Miyiŋ futu.” Shi kɛlɛ, etsɛɛɛ ni Junior nifeemɔ su tsake kwraa. Ebɔi Biblia lɛ kasemɔ, ni jeee nibii ni ye ebua lɛ koni edamɔ naa lɛ he nikasemɔ kɛkɛ shi eha ená wɔsɛɛ be ni yɔɔ miishɛɛ yɛ shikpɔŋ nɛɛ nɔ lɛ he hiɛnɔkamɔ ni yɔɔ naakpɛɛ hu. Kɛ oji mɔ ni eje kpa lɛ, ani obaasumɔ ni oná nakai hiɛnɔkamɔ lɛ eko?

Kɛ nakai ni lɛ, belɛ ofainɛ ni okane sane ni nyiɛ sɛɛ lɛ. Wɔmiijie yi akɛ otao Ŋmalɛ mli saji lɛ yɛ bo diɛŋtsɛ o-Biblia lɛ mli koni bo diɛŋtsɛ onyɛ ona nɔ ni Bɔlɔ lɛ esaa eto mɛi ni kaseɔ eyiŋtoo he nii ni amɛhiɔ shi yɛ naa yɛ amɛshihilɛ mli lɛ.