Ani Onuɔ Nyɔŋmɔ Suɔmɔ lɛ Shishi?

BE KO lɛ, gbɔmɔ ni ji Hiob tsɔɔ adesa shihilɛ ni yeee emuu lɛ mli yɛ wiemɔi nɛɛ amli akɛ: “Gbɔmɔ ni yoo fɔ́ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ́ kɛ haomɔ sɔŋŋ; ekwɛ̃ɔ tamɔ fɔfɔi, ni eŋãlaa; asaŋ ejoɔ foi tamɔ hɔ̃ɔŋ, ni etsɛɛɛ.” (Hiob 14:1, 2) No mli lɛ, taakɛ bɔ ni Hiob na bɔ ni shihilɛ lɛ yɔɔ lɛ, eyi obɔ kɛ piŋmɔ kɛ awerɛho. Ani onu he nakai pɛŋ?

Shi kɛlɛ, yɛ shihilɛi ni mli wawai kɛ naagbai ni ekolɛ wɔkɛbaakpe lɛ fɛɛ sɛɛ lɛ, hiɛnɔkamɔ ni ma shi shiŋŋ, nɔ ni damɔ Nyɔŋmɔ mɔbɔnalɛ kɛ suɔmɔ lɛ nɔ lɛ yɛ. Klɛŋklɛŋ kwraa lɛ, wɔŋwɛi Tsɛ ni naa mɔ mɔbɔ lɛ kɛ kpɔmɔ afɔleshaa lɛ eha koni ekpɔ̃ adesai kɛjɛ amɛ eshafeemɔ shihilɛ ni emuuyeli bɛ mli lɛ mli. Taakɛ Yohane 3:16, 17 tsɔɔ lɛ, Yesu Kristo kɛɛ akɛ: “Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala. Ejaakɛ Nyɔŋmɔ tsuuu ebi lɛ [Yesu] kɛbaaa je lɛ mli koni ebakojo je lɛ, shi moŋ koni atsɔ enɔ ahere je lɛ yiwala.”

Agbɛnɛ hu susumɔ mlihilɛ su ni Nyɔŋmɔ jieɔ lɛ kpo etsɔɔ wɔ adesai ni yeee emuu lɛ he okwɛ. Bɔfo Paulo jaje akɛ: “Lá kome eŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ, ni yinɔi ni eto lɛ kɛ amɛshihilɛhei lɛ ahusui lɛ ekpɛ mli eto momo, koni amɛtao Nyɔŋmɔ sɛɛgbɛ, akɛ aleenɔ kɛ́ amɛgbugbuu shi lɛ, amɛaana lɛ lo; tsɛbelɛ ekɛ wɔteŋ mɔ fɛɛ mɔ teŋ jɛkɛɛɛ.” (Bɔfoi lɛ Asaji 17:26, 27) Susumɔ nɔ ni no tsɔɔ kɛha wɔ lɛ he okwɛ! Eyɛ mli akɛ wɔji adesai ni yeee emuu moŋ, shi wɔbaanyɛ wɔná wɔkɛ wɔ Bɔlɔ ni yɔɔ suɔmɔ, Yehowa Nyɔŋmɔ teŋ wekukpaa mli ŋɔɔmɔ.

Belɛ wɔbaanyɛ wɔkɛ hekɛnɔfɔɔ akpee wɔsɛɛ be naa, akɛni wɔle akɛ Nyɔŋmɔ susuɔ wɔhe ni ejɛ suɔmɔ mli eto gbɛjianɔ kɛha wɔnaanɔ sɛɛnamɔ lɛ hewɔ. (1 Petro 5:7; 2 Petro 3:13) Belɛ, eka shi faŋŋ akɛ, wɔyɛ nɔ ni wɔɔdamɔ nɔ wɔkase nii babaoo ni kɔɔ wɔ Nyɔŋmɔ ni yɔɔ suɔmɔ lɛ he kɛtsɔ e-Wiemɔ, ni ji Biblia lɛ kasemɔ nɔ.