“Amɛshiu Kɛtee Shishi”

“Bu kwɔŋkwɔŋ lɛ etsĩ amɛnɔ; amɛshiu kɛtee shishi tamɔ tɛ.”

MOSE kɛ Israelbii lɛ tsɔ nakai wiemɔi lɛ anɔ amɛla kɛ miishɛɛ yɛ amɛyiwalaheremɔ kɛtsɔ Ŋshɔ Tsuru lɛ mli kɛ amɛhenyɛlɔi ni ji Mizraimbii lɛ ni tiuɔ amɛ lɛ ahiɛkpatamɔ lɛ hewɔ—Farao kɛ esraafoi lɛ.—2 Mose 15:4, 5.

Mɔ fɛɛ mɔ ni kɛ ehiŋmɛi naa nakai nifeemɔ ni yɔɔ naakpɛɛ lɛ, kaseɔ nii kpele kɛjɛɔ mli. Mɔ ko mɔ ko bɛ ni baanyɛ ete shi ewo loo etse atua eshi Yehowa nɔyeli hegbɛ lɛ yɛ omanyeyeli mli ni ehi wala mli. Shi kɛlɛ, yɛ nyɔji fioo komɛi asɛɛ lɛ, Israelbii ni ehe gbɛi—Kora, Datan, Abiram, kɛ amɛsɛɛfilɔi 250—tswa hegbɛ ni Nyɔŋmɔ kɛha Mose kɛ Aaron lɛ mpoa yɛ faŋŋ mli.—4 Mose 16:1-3.

Yɛ Yehowa gbɛtsɔɔmɔ naa lɛ, Mose bɔ Israelbii lɛ kɔkɔ koni amɛtsi amɛhe kɛjɛ shitee-kɛ-wolɔi lɛ abuui lɛ ahe. Datan kɛ Abiram ni amɛweku mli bii lɛ ebɔle amɛ lɛ, je gbɛ amɛkpoo akɛ amɛaatsake amɛshidaamɔ. Kɛkɛ ni Mose jaje akɛ, yɛ Yehowa diɛŋtsɛ gbɛ nɔ lɛ, E-baaha efee faŋŋ kɛha gbɔmɛi lɛ akɛ nɛkɛ hii nɛɛ “eye Yehowa he fɛo!” Yɛ nakai be lɛ mli nɔŋŋ lɛ, Yehowa gbá shikpɔŋ ni yɔɔ amɛshishi lɛ mli. “Ni amɛ kɛ amɛnii fɛɛ tee gbohiiaje hiɛkalɔi, ni shikpɔŋ lɛ mua enaa ewo amɛyi.” Ni Kora kɛ shitee-kɛ-wolɔi krokomɛi lɛ hu? “La jɛ Yehowa ŋɔɔ ni ebashã hii ohai enyɔ kɛ nyɔŋmai enumɔ lɛ ni kɛ tsofa kɛ ŋma ba lɛ.”—4 Mose 16:23-35; 26:10.

Farao kɛ etai lɛ, kɛ agbɛnɛ hu nakai shitee-kɛ-wolɔi ni yɔɔ ŋa lɛ nɔ lɛ fɛɛ ahiɛ kpata ejaakɛ amɛyɔseee Yehowa nɔyeli hegbɛ kɛ miishɛɛ ni eyɔɔ yɛ ewebii lɛ ashihilɛ mli lɛ. No hewɔ lɛ, ehe miihia waa ni mɛi fɛɛ ni baaná Yehowa hebuu yɛ naagbee gbii ni mli wa waa nɛɛ mli lɛ akase ni amɛbo Yehowa toi akɛ eji “Ŋwɛinyo lɛ” kɛ “Ofe lɛ.” Yɛ nakai feemɔ mli lɛ, amɛbaanyɛ amɛŋɔ Yehowa hewalɛwoo wiemɔi nɛɛ amɛwo amɛtsuii amli akɛ: “Kɛ mɛi akpe nyɔ yɛ omasɛi, ní mɛi akpei nyɔŋma hu nyɔ yɛ oninejurɔ nɔ po, bo lɛ, ebɛŋkɛŋo. Ohiŋmɛii kɛkɛ okɛaakwɛ, ni ooona mɛi fɔji anyɔmɔwoo. Ejaakɛ bo, Yehowa, ji mibobaahe! Oŋɔ Ŋwɛinyo lɛ ofee oshihilɛhe.”—Lala 91:1, 7-9.