Sanebimɔi ni Jɛ Kanelɔi Adɛŋ

Ani ehe miihia ni akɛ mɔ ko awo nu mli kwraa ni abaptisi lɛ kɛ́ eesumɔ ni abaptisi lɛ shi eje kpa ni naa wa waa loo ebɛ hewalɛ kwraa bɔ ni baaha efee nɔ ni wa akɛ aaabaptisi lɛ?

Aná wiemɔ “baptisimɔ” lɛ kɛjɛ Hela feemɔ wiemɔ ni ji baʹpto ní shishi ji “akɛwo mli kwraa” lɛ mli. (Yohane 13:26) Yɛ Biblia lɛ mli lɛ, ni “aaabaptisi” lɛ shishinumɔ nɔŋŋ ji ni “amii mɔ ko nu.” Yɛ nɔ ni kɔɔ Etiopia piafonyo lɛ baptisimɔ ni Filipo tsu he nii lɛ he lɛ, The Emphasised Bible, ni Rotherham ŋma lɛ kɛɛ akɛ: “Amɛyi enyɔ lɛ fɛɛ amɛbote nu lɛ mli, Filipo kɛ piafonyo lɛ fɛɛ—ni ebaptisi lɛ.” (Bɔfoi lɛ Asaji 8:38) No hewɔ lɛ, ajeɔ gbɛ akɛ mɔ ni abaptisiɔ lɛ lɛ woɔ nu mli kwraa.—Mateo 3:16; Marko 1:10.

Yesu fã ekaselɔi lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ.” (Mateo 28:19, 20) No hewɔ lɛ, Yehowa Odasefoi toɔ baptisimɔ he gbɛjianɔ yɛ nu bui, kpaakpoi, faai, loo hei krokomɛi ni nu fa babaoo bɔ ni abaanyɛ amii mɔ nu kwraa. Akɛni baptisimɔ yɛ nu mli kwraa lɛ ji Ŋmalɛ naa taomɔ nii hewɔ lɛ, adesai bɛ hegbɛ ko kwraa akɛ amɛaatsĩ mɔ ko baptisimɔ naa. No hewɔ lɛ, esa akɛ abaptisi mɔ ko kɛji akɛ ehe miihia ni ato gbɛjianɔ ni efɔɔɔ kaa po yɛ eshihilɛ lɛ hewɔ. Akɛ nɔkwɛmɔnɔ lɛ, baptisimɔ yɛ nibii agboi ni ajuɔ he yɛ mli ni awo mli nu obɔ lɛ he eba sɛɛnamɔ kɛha mɛi ni edara yɛ afii amli loo amɛbɛ gbɔmɔtsoŋ hewalɛ kwraa lɛ. Abaanyɛ aha nu ni yɔɔ mli lɛ afee nɔ ni yɔɔ kulɔkulɔ, koni akɛ mɔ ni abaabaptisi lɛ lɛ awo nu lɛ mli fiofio, ni kɛ ehe homɔ nu lɛ, baptisimɔ lɛ diɛŋtsɛ baanyɛ aba nɔ.

Anyɛ abaptisi gbɔmɛi ni eje kpa waa lɛ po. Akɛ nɔkwɛmɔnɔ lɛ, anyɛ abaptisi aŋkroaŋkroi ni afee amɛ sɛ̃kpãa opireshɛn ni no hewɔ lɛ, fɔlɔ yɔɔ amɛ sɛ̃ mli daa loo mɛi ni ehe miihia ni amɛmu kɛtsɔ tsɔne ni hɔ amɛdaaŋ loo gugɔ mli lɛ nɔ lɛ po. Yɛ anɔkwale mli lɛ, ehe baahia ni ato gbɛjianɔ jogbaŋŋ yɛ baptisimɔi fɛɛ ni tamɔ nɛkɛ lɛ mli. Ebaafee nɔ ni nilee yɔɔ mli akɛ abaaná helatsɛmɛi akwɛlɔ ni he esa yɛ jɛmɛ aloo datrɛfonyo ko kɛ ebaahi. Shi kɛlɛ, kɛji akɛ akɛ henɔkwɛmɔ jogbaŋŋ tsu nii lɛ, abaanyɛ atsu baptisimɔi lɛ ahe nii yɛ shihilɛi babaoo mli. No hewɔ lɛ, esa akɛ abɔ mɔdɛŋ fɛɛ ni aaanyɛ koni abaptisi mɔ ko yɛ nu mli kɛji akɛ enɛ ji mɔ lɛ shwelɛ yɛ anɔkwale mli ni ejɛ esuɔmɔ mli ekpɛlɛ osharai ni baanyɛ ajɛ mli aba lɛ nɔ lɛ.