Be ni Sa akɛ Ajie Teemɔŋ Sane ko Kpo

Saji komɛi ni abaaha ehi teemɔŋ lɛ baanyɛ atsɔɔ srɔtofeemɔ ni kã toiŋjɔlɛ kɛ béi teŋ. Shi ani be ko yɛ ni esa akɛ ajie teemɔŋ sane ko kpo? Kadimɔ nɔ ni gbalɔ Amos kɛɛ yɛ e-Nyɔŋmɔ lɛ he, akɛ: “Yehowa efeeŋ nɔ ko, akɛ ja ejie [eteemɔŋ sane, NW] lɛ kpo etsɔɔ etsuji, gbalɔi lɛ, dã.” (Amos 3:7) Wɔbaanyɛ wɔjɛ wiemɔi nɛɛ amli wɔkase nɔ ko ni kɔɔ teemɔŋ sane he. Yehowa baanyɛ aha saji komɛi ahi teemɔŋ kɛyashi be ko, kɛkɛ lɛ naagbee mli lɛ ejie lɛ kpo etsɔɔ aŋkroaŋkroi komɛi. Te wɔɔfee tɛŋŋ wɔkase Yehowa yɛ enɛ gbɛfaŋ?

Bei komɛi lɛ, nɔkwɛlɔi ni ahala amɛ yɛ Kristofoi asafo lɛ mli lɛ naa akɛ sɛɛnamɔ yɛ he akɛ amɛaaha sane ko ahi teemɔŋ. (Bɔfoi lɛ Asaji 20:28) Ákɛ nɔkwɛmɔnɔ lɛ, yɛ be mli ni asafo lɛ hilɛ-kɛhamɔ yɔɔ amɛjwɛŋmɔ mli lɛ, ekolɛ amɛbaakpɛ amɛyiŋ akɛ amɛbaahiɛ gbɛjianɔtoi komɛi loo tsakemɔi komɛi ni afeɔ yɛ asafoŋ gbɛnaa nii ahe saji ni yɔɔ fitsofitso lɛ amli lɛ yɛ teemɔŋ kɛyashi be pɔtɛɛ ko.

No hewɔ lɛ, yɛ sane ni tamɔ nɛkɛ mli lɛ, ehe miihia ni aha efee faŋŋ kɛha mɛi ni ekɔɔ amɛhe lɛ kɛ́ esa akɛ ajie sane lɛ kpo, be mli ni esa akɛ afee nakai, kɛ agbɛnɛ gbɛ ni esa akɛ atsɔ nɔ afee enɛɛmɛi. Le ni amɛaale be ni abaaha mɛi ale sane ko lɛ baanyɛ aye abua amɛ ni amɛha sane lɛ ahi teemɔŋ.—Abɛi 25:9.