Hɔmɔ Sɛɛfoo ko Miiba!

EKOLƐ obaabi akɛ: ‘Mɛɛ hɔmɔ ni?’ Eji hɔmɔ ni kɔɔ mumɔŋ niyenii he! Blema Hebri gbalɔ ko gba hɔmɔ nɛɛ he sane efɔ̃ shi akɛ: “Naa, gbii miiba, Nuŋtsɔ Yehowa kɛɛ, ni maha hɔmɔ aba shikpɔŋ lɛ nɔ, jeee aboloo hɔmɔ loo nu kumai ni, shi Yehowa wiemɔi lɛ atoiboo nɔ̃ ni!” (Amos 8:11) Bɔni afee ni aye abua kɛfo mumɔŋ hɔmɔ lɛ sɛɛ lɛ, Buu-Mɔɔ Biblia Gilead Skul ni yɔɔ Patterson, New York lɛ klas ni ji 112 lɛ mli bii 48 miiya shikpɔji srɔtoi 19 nɔ yɛ shikpɔji wuji kɛ ŋshɔkpɔi 5 anɔ.

Amɛyaaa kɛ looi kɛ ŋmãa diɛŋtsɛ, shi moŋ kɛ nilee, niiashikpamɔ, kɛ tsɔsemɔ. Amɛkɛ amɛhe wo Biblia kasemɔ mli vii nyɔji enumɔ, ni eji nɔ ni ato he gbɛjianɔ koni ewaje amɛhemɔkɛyeli lɛ kɛha maŋsɛɛ sanekpakpa shiɛmɔ nitsumɔ yɛ maŋsɛɛ shikpɔji anɔ. Yɛ March 9, 2002 lɛ, mɛi 5,554 ni ba skul naagbee nifeemɔ lɛ shishi lɛ bo wiemɔ lɛ toi kɛ miishɛɛ.

Stephen Lett, ní sɔmɔɔ akɛ Yehowa Odasefoi a-Nɔyeli Kuu lɛ mlinyo lɛ kɛ miishɛɛ gbele kpee lɛ naa. Ehere gbɔi babaoo ni jɛ je lɛŋ hei srɔtoi kɛba lɛ atuu yɛ gbɛ krɛdɛɛ nɔ. Kɛkɛ ni etee nɔ ni ekɛ Yesu wiemɔi akɛ, “Nyɛ ji je lɛŋ la lɛ” to wɔsɛɛ maŋsɛɛ sanekpakpa shiɛlɔi lɛ anitsumɔ lɛ he. (Mateo 5:14) Etsɔɔ mli akɛ: ‘Yɛ nyɛ nitsumɔi lɛ amli lɛ, nyɛbaaha Yehowa naakpɛɛ nitsumɔi srɔtoi babaoo lɛ “akpɛ́,” koni no aha mɛi ni yɔɔ tsui kpakpa lɛ ana bɔ ni Yehowa kɛ eyiŋtoi lɛ yɔɔ fɛo ha.’ Nyɛminuu Lett wo maŋsɛɛ sanekpakpa shiɛlɔi lɛ hewalɛ koni amɛkɛ Nyɔŋmɔ Wiemɔ lɛ mli la lɛ atsu nii ni amɛkɛkpa apasa tsɔɔmɔi amli duŋ lɛ he mama, ni amɛkɛtsɔɔ mɛi ni taoɔ anɔkwale lɛ gbɛ.

Jwɛŋmɔ Kpakpa He Miihia Kɛha Omanyeyeli

Yɛ sɛinɔtalɔ lɛ shishijee wiemɔi lɛ asɛɛ lɛ, Baltasar Perla, ni ji United States Nitsumɔhe Nine Ajinafoi Akuu lɛ mlinyo lɛ ha wiemɔi ni ato he gbɛjianɔ koni eye ebua mɛi ni egbe nikasemɔ lɛ naa lɛ ni amɛye omanye ákɛ maŋsɛɛ sanekpakpa shiɛlɔi lɛ mli klɛŋklɛŋ nɔ̃ lɛ. Ewie saneyitso ni ji, “Feemɔ Ekãa ni Ohe Awa ni Otsu He Nii” lɛ he. (1 Kronika 28:20) Maŋtsɛ Salomo ni hi shi yɛ blema Israel lɛ nine shɛ nitsumɔ ni wa ko nɔ akɛ etsu nɔ ko ni etsuko eko dã—ni ema sɔlemɔtsu yɛ Yerusalem. Salomo tsu he nii, ni kɛtsɔ Yehowa sɛɛfimɔ nɔ lɛ, egbe sɔlemɔtsu lɛ naa. Beni Nyɛminuu Perla kɛ nikasemɔ lɛ toɔ klas lɛ he lɛ, ekɛɛ akɛ: ‘Nyɛnine eshɛ nitsumɔ hee nɔ, ni ji akɛ nyɛbatsɔmɔ maŋsɛɛ sanekpakpa shiɛlɔi, ni ehe miihia ni nyɛfee ekãa ni nyɛhe awa.’ Eka shi faŋŋ akɛ, nikaselɔi lɛ ná miishɛɛ yɛ nɔmimaa ni amɛná akɛ Yehowa kwaŋ amɛ loo eshiŋ amɛ, bei abɔ ni amɛkɛ lɛ teŋ yɔɔ gbagbalii lɛ he. Nyɛminuu Perla wiemɔ lɛ kanya toibolɔi lɛ yɛ be mli ni ekɛ nɔ ni lɛ diɛŋtsɛ eyɔse nɛɛ mu ewiemɔ lɛ naa lɛ, akɛ: ‘Nyɛbaanyɛ nyɛye omanye diɛŋtsɛ ákɛ maŋsɛɛ sanekpakpa shiɛlɔi. Maŋsɛɛ sanekpakpa shiɛlɔi ji mɛi ni ha mi, mifɔlɔi, kɛ minyɛmi yoo bale anɔkwale lɛ!’

“Nyɛkwɛa Yehowa Gbɛ Kɛha Omanyeyeli” ji wiemɔ ni Samuel Herd, ni ji Nɔyeli Kuu lɛ mlinyo kroko lɛ ha lɛ saneyitso. Nikaselɔi lɛ kɛ amɛhe miiwo nitsumɔ ko mli yɛ maŋsɛɛ sanekpakpa shiɛmɔ nitsumɔ lɛ mli, ni omanye ni amɛbaaye lɛ pii damɔ amɛkɛ Yehowa teŋ wekukpaa lɛ nɔ. Nyɛminuu Herd wo amɛ ŋaa akɛ: ‘Nyɛná Biblia lɛ mli nilee babaoo kɛtsɔ nyɛ nikasemɔ yɛ Gilead lɛ nɔ. Nyɛnine shɛ nɔ yɛ miishɛɛ mli. Shi amrɔ nɛɛ, bɔni afee ni nyɛye omanye jogbaŋŋ lɛ, ehe miihia ni nyɛje shishi ni nyɛgba mɛi nɔ ni nyɛkase lɛ.’ (Bɔfoi lɛ Asaji 20:35) Maŋsɛɛ sanekpakpa shiɛlɔi lɛ baaná hegbɛi babaoo ni amɛkɛfee enɛ yɛ be mli ni ‘amɛ diɛŋtsɛ amɛkɛ amɛhe fɔ̃ɔ shi’ amɛhaa mɛi krokomɛi lɛ.—Filipibii 2:17.

Mɛɛ ŋaawoo wiemɔi ni akɛyeɔ shɛɛ nitsɔɔlɔi lɛ yɔɔ kɛha nikaselɔi lɛ? Mark Noumair ha esaneyitso lɛ damɔ Rut 3:18 lɛ nɔ, akɛ “Hii Shi Diŋŋ Kɛyashi Beyinɔ ni Ooona Bɔ ni Sane lɛ Naa Aaayakpa.” Beni wielɔ lɛ kɛ Naomi kɛ Rut nɔkwɛmɔnɔ lɛ tsuɔ nii lɛ, ewo mɛi ni egbe nikasemɔ lɛ naa lɛ hewalɛ koni amɛná hekɛnɔfɔɔ diɛŋtsɛ yɛ gbɛjianɔi ni Nyɔŋmɔ shikpɔŋ nɔ gbɛjianɔtoo lɛ eto shishi lɛ mli, ni amɛkɛ bulɛ aha teokrase hegbɛ. Beni Nyɛminuu Noumair  wiemɔ lɛ saa nikaselɔi lɛ atsuii ahe lɛ, ekɛɛ akɛ: ‘Ekolɛ bei komɛi baashɛ ni onuŋ nɔ hewɔ ni afee yiŋkpɛɛ ko ni saa ohe lɛ shishi loo ekolɛ oyɛ henumɔ ni mli wa waa akɛ esa akɛ afee nɔ ko yɛ gbɛ kroko nɔ. Mɛni obaafee? Ani obaate shi koni bo diɛŋtsɛ otsu sane lɛ he nii loo ‘obaahi shi diŋŋ’ ni okɛ ohe afɔ̃ Nyɔŋmɔ gbɛtsɔɔmɔ nɔ, kɛ hekɛnɔfɔɔ akɛ, yɛ be ni sa mli lɛ, ebaaha yibii kpakpai ajɛ mli kɛba.’ (Romabii 8:28) Ŋaawoo akɛ ‘akɛ hiɛ ama Maŋtsɛyeli nibii ahiɛyaa nɔ, ni aha hiɛ ahi nɔ ni Yehowa gbɛjianɔtoo lɛ feɔ nɔ moŋ fe ni akɛ hiɛ aaama aŋkroaŋkroi anɔ lɛ’ he baaba sɛɛnamɔ diɛŋtsɛ kɛha wɔsɛɛ maŋsɛɛ sanekpakpa shiɛlɔi lɛ yɛ amɛmaŋsɛɛ nitsumɔi lɛ amli.

Wallace Liverance, ni be ko lɛ, eji maŋsɛɛ sanekpakpa shiɛlɔ ni amrɔ nɛɛ eesɔmɔ akɛ Gilead nitsɔɔlɔ lɛ kɛ naagbee wiemɔ yɛ klɛŋklɛŋ wiemɔi lɛ fɛɛ mli lɛ ha. Ewiemɔ lɛ yitso ji “Ha Ohiɛ Ahi Ohe Nɔ, Hii Shi yɛ Nyɔŋmɔ Sɔɔmɔ lɛ Mli.” Etsɔɔ akɛ gbalɔ Daniel nu Babilon shigbeemɔ lɛ kɛ nɔ ni Yeremia gba akɛ Israelbii lɛ akpɔmɔ kɛmiijɛ nomŋɔɔ mli lɛ ebɛŋkɛ lɛ shishi. (Yeremia 25:11; Daniel 9:2) Daniel hiɛ yɛ Yehowa be he akɔntaabuu lɛ nɔ, ni enɛ ye ebua lɛ ni ehiɛ hi ehe nɔ yɛ Nyɔŋmɔ yiŋtoo lɛ ni baa mli lɛ mli. Nɔ ni tamɔɔɔ nakai lɛ, Israelbii ni hi shi yɛ gbalɔ Hagai gbii lɛ amli lɛ kɛɛ akɛ: “Be lɛ shɛko.” (Hagai 1:2) Amɛhiɛ je be ni amɛyɔɔ mli lɛ nɔ, ni amɛkɛ amɛhiɛ ma amɛ diɛŋtsɛ amɛ akɔnɔi kɛ nibii asɛɛtiumɔ nɔ, ni amɛshi nitsumɔ hewɔ ni akpɔ amɛ kɛjɛ Babilon lɛ, ni ji sɔlemɔtsu lɛ ni amɛaasaa amɛma ekoŋŋ lɛ. Nyɛminuu Liverance mu naa akɛ: “No hewɔ lɛ, ha ohiɛ ahi ohe nɔ, kɛtsɔ Yehowa yiŋtoo lɛ ni oooha ehi ojwɛŋmɔ mli be fɛɛ be lɛ nɔ.”

Gilead nitsɔɔlɔ Lawrence Bowen sɔmɔ akɛ sɛinɔtalɔ kɛha fã ko ni hiɛ saneyitso akɛ “Yehowa Jɔɔ Mɛi ni Kɛ Wiemɔ ni Hiɛ Kã lɛ Tsuɔ Nii Lɛ.” (Hebribii 4:12) Nifeemɔ fã nɛɛ wieɔ klasbii lɛ ashiɛmɔ nitsumɔ lɛ mli niiashikpamɔi ahe, ni ema bɔ ni Yehowa jɔɔ mɛi ni kɛ Biblia lɛ tsuɔ nii beni amɛshiɛɔ ni amɛtsɔɔ nii lɛ nɔ mi. Sɛinɔtalɔ lɛ tsɔɔ mli akɛ Yesu Kristo fee nɔkwɛmɔnɔ kpakpa efɔ̃ shi eha Nyɔŋmɔ sɔɔlɔi fɛɛ: ‘Yesu baanyɛ akɛɛ yɛ anɔkwale mli akɛ nɔ ni etsɔɔ lɛ, jeee lɛ diɛŋtsɛ enɔ̃, shi moŋ ewieɔ Nyɔŋmɔ Wiemɔ lɛ.’ Mɛi ni yɔɔ tsui kpakpa lɛ yɔse anɔkwale lɛ ni amɛtsu he nii jogbaŋŋ. (Yohane 7:16, 17) Nakai nɔŋŋ eji anɔkwale ŋmɛnɛ hu.

Gilead Tsɔsemɔ Sáa Mɔ Kɛha Nitsumɔ Kpakpa Fɛɛ Nitsumɔ Kpakpa

No sɛɛ lɛ, Betel weku lɛ mli bii ni etsɛ yɛ sɔɔmɔ lɛ mli, ni ji Richard Abrahamson kɛ Patrick LaFranca kɛ mɛi ekpaa ni egbe Gilead nikasemɔ naa ni amrɔ nɛɛ amɛmiisɔmɔ yɛ be-fɛɛ sɔɔmɔ krɛdɛɛ lɛ fãi srɔtoi amli lɛ gba sane. Beni mɛi ni egbe klas ni ji 112 lɛ naa lɛ nu akɛ yɛ afii nyɔŋmai komɛi asɛɛ lɛ, nakai mɛi ekpaa lɛ etee nɔ amɛkɛ tsɔsemɔ ni amɛnine shɛ nɔ yɛ Gilead ni kɔɔ Biblia mli nikasemɔ, niiamlitaomɔ ni yaa shɔŋŋ, kɛ mɛi ni akɛyeɔ yɛ gbɛ kpakpa nɔ lɛ miitsu nii yɛ nɔ ni amɛtsuɔ bianɛ lɛ fɛɛ sɛɛ lɛ, ewo amɛ hewalɛ.

Theodore Jaracz, ni ji Nɔyeli Kuu lɛ mlinyo lɛ ha kpee lɛ mli wiemɔ krɛdɛɛ lɛ. Eyitso ji “Nɔ ni Anyɛ Atsu yɛ Satan Hetsɛ ni Amia Hiɛ yɛ Mli lɛ Mli.” Yɛ nyɔji enumɔ ni eho lɛ mli lɛ, no mli lɛ nikaselɔi lɛ yɛ shihilɛ ni yɔɔ shweshweeshwe kɛ teokrase shihilɛ mli. Shi kɛlɛ, taakɛ atsɔɔ mli yɛ amɛ klas nifeemɔi lɛ amli lɛ, wɔyɛ henyɛlɔ jeŋ ko mli. Yehowa webii yɛ tutuamɔ shishi yɛ je lɛŋ fɛɛ. (Mateo 24:9) Beni Nyɛminuu Jaracz kɛ Biblia mli saji babaoo tsuɔ nii lɛ, etsɔɔ mli akɛ ‘wɔji mɛi ni Abonsam ejie ehiɛ eka titri. Esa akɛ wɔwaje wɔkɛ Yehowa teŋ wekukpaa lɛ ni wɔfi shi shiŋŋ ni wɔkpee kaai lɛ anaa.’ (Hiob 1:8; Daniel 6:4; Yohane 15:20; Kpojiemɔ 12:12, 17) Nyɛminuu Jaracz mu naa akɛ yɛ hetsɛ ni akɛbaa Nyɔŋmɔ webii lɛ anɔ lɛ fɛɛ sɛɛ lɛ, ‘tawuu nii ni asɔ̃ɔ ashiɔ wɔ lɛ eko eko bɛ ni baaye omanye, taakɛ Yesaia 54:17 lɛ kɛɔ lɛ. Yehowa baakwɛ koni ajie wɔ yɛ lɛ diɛŋtsɛ ebe ni sa mli kɛ egbɛ nɔ.’

Akɛni “asáa” Gilead klas ni ji 112 ni egbe nikasemɔ naa lɛ “pɛpɛɛpɛ” hewɔ lɛ, ŋwanejee ko bɛ he akɛ amɛbaatsu babaoo koni amɛkɛfo mumɔŋ hɔmɔ ni yɔɔ shikpɔji ni amɛbaasɔmɔ yɛ nɔ lɛ sɛɛ. (2 Timoteo 3:16, 17) Wɔkɛ ekãa miikwɛ amaniɛbɔi ni kɔɔ bɔ ni amɛkɛ shɛɛ sane ni haa mɔ tsui nyɔɔ emli lɛ haa gbɔmɛi ni yɔɔ nɛkɛ shikpɔji nɛɛ anɔ lɛ gbɛ.

[Akrabatsa ni yɔɔ baafa 23]

KLASBII LƐ AHE SAJI

Maji srɔtoi anɔ ni amɛjɛ kɛba: 6

Maji srɔtoi anɔ ni aha amɛ nitsumɔ yɛ mli: 19

Nikaselɔi lɛ ayifalɛ: 48

Afii abɔ ni amɛye lɛ mlijaa: 33.2

Afii abɔ ni amɛkɛhi anɔkwale lɛ mli lɛ mlijaa: 15.7

Afii abɔ ni amɛkɛsɔmɔ kɛ amɛbe fɛɛ mlijaa: 12.2

 [Mfoniri ni yɔɔ baafa 24]

Buu-Mɔɔ Biblia Gilead Skul Klasbii ni Ji 112 ni Gbe Nikasemɔ Naa

Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.