“Yoo Kpakpa Jio”

Aŋma nɛkɛ yijiemɔ wiemɔi nɛɛ aha Moab oblayoo ko. Eji okulafo ni atsɛɔ lɛ Rut, ni ji Israel yoo, Naomi shaayoo. Rut hi shi yɛ Israel aaafee afii 3000 ni eho nɛ, beni kojolɔi yeɔ nɔ lɛ, ni efee gbɛi kpakpa eha ehe. (Rut 3:11) Te efee tɛŋŋ ebaná gbɛi kpakpa nɛɛ? Namɛi baanyɛ aná enɔkwɛmɔnɔ lɛ he sɛɛ?

Akɛni Rut jeee mɔ ko ni ‘yeɔ hejɔ̃feemɔ aboloo’ hewɔ lɛ, ekɛ ŋmɛlɛtswai babaoo tsuɔ nii waa ekɛyeɔ kpɛkpɛo yɛ ŋmɔ shi, ni mɔdɛŋbɔɔ ni ekɛtsuɔ nii lɛ ha ená yijiemɔ lɛ. Be mli ni akɛɛ lɛ po akɛ abaasumɔ ni agbɔjɔ enitsumɔ lɛ mli lɛ, etee nɔ egbo deŋme, ni efee babaoo fe bɔ ni akpaa gbɛ. Nɔ ni ekaaa kwraa lɛ, esa ŋa ni sa yijiemɔ, ni yɔɔ nyɛmɔ ni tsuɔ nii waa ni awie ehe yɛ Biblia lɛ mli lɛ.—Abɛi 31:10-31; Rut 2:7, 15-17.

Rut mumɔŋ sui—he-kɛ-afɔleshaa su ni heshibaa yɔɔ mli ni ejieɔ lɛ kpo lɛ kɛ enɔkwa suɔmɔ lɛ—ji nibii titrii ni ha ená gbɛi kpakpa yɛ maŋ lɛ mli lɛ. Yɛ be mli ni eshi efɔlɔi kɛ emaŋ, ni ebɛ hiɛnɔkamɔ ko akɛ ebaaná shweshweeshwe shihilɛ ni baanyɛ ajɛ gbalashihilɛ mli kɛba lɛ, ekɛ ehe kpɛtɛ Naomi he. Yɛ nakai beaŋ nɔŋŋ lɛ, Rut tsɔɔ akɛ eesumɔ ni esɔmɔ Yehowa, ni ji eshaayoo lɛ Nyɔŋmɔ lɛ. Beni nɔ ni aŋma afɔ̃ shi yɛ Ŋmalɛ lɛ mli lɛ maa bɔ ni ehe yɔɔ sɛɛnamɔ ha lɛ lɛ nɔ mi lɛ, ekɛɛ akɛ “ehi hao [Naomi] fe bihii kpawo tete.”—Rut 1:16, 17; 2:11, 12; 4:15.

Gbɛi kpakpa ni Rut ná yɛ nanemɛi adesai ni ekɛbɔɔ lɛ ateŋ lɛ ji nɔ ni sa, shi nɔ ni yaa hiɛ fe fɛɛ ji bɔ ni Nyɔŋmɔ bu esubaŋ lɛ yɛ gbɛ ni ja nɔ lɛ kɛ nyɔmɔwoo ni ekɛha lɛ akɛ ená hegbɛ akɛ ebatsɔ Yesu Kristo blemanyɛ lɛ. (Mateo 1:5; 1 Petro 3:4) Mɛɛ nɔkwɛmɔnɔ kpakpa Rut ji nɛkɛ, jeee kɛha Kristofoi yei pɛ kɛkɛ, shi moŋ kɛha mɛi fɛɛ hu ni kɛɔ akɛ amɛjáa Yehowa lɛ!