Kaaha Alaka Bo

ETAMƆ nɔ ni lakamɔ etsɛ waa tamɔ adesai nɔŋŋ. Nibii ni ba klɛŋklɛŋ ni aŋmala ashwie shi yɛ yinɔsane mli lɛ ateŋ ekome ji lakamɔ nifeemɔ. No ji beni Satan laka Hawa yɛ Eden abɔɔ lɛ mli lɛ.—1 Mose 3:13; 1 Timoteo 2:14.

Eyɛ mli akɛ be ko bako dã kɛjɛ nakai beaŋ ní lakamɔ egbɛko eshwãko babaoo yɛ shikpɔŋ lɛ nɔ moŋ, shi egbɛ eshwã waa diɛŋtsɛ ŋmɛnɛ. Be mli ni ekpaa ŋmɛnɛŋmɛnɛ beaŋ nɔ lɛ gbɛ lɛ Biblia lɛ bɔ kɔkɔ akɛ: “Gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.”—2 Timoteo 3:13.

Alakaa gbɔmɛi yɛ yiŋtoi srɔtoi babaoo hewɔ. Shishiulɔi kɛ hii ni tswaa ojo lakaa mɛi koni amɛná amɛshika. Maŋkwralɔi komɛi lakaa amɛkutsoŋbii ni fɔɔ oshiki amɛhaa amɛ lɛ, ni amɛtswaa amɛfai shi akɛ amɛbaakã he amɛhi nitsumɔ mli hegbɛ ni amɛná yɛ maŋkwramɔ mli lɛ mli bɔ fɛɛ bɔ ni fee. Gbɔmɛi lakaa amɛ diɛŋtsɛ amɛhe po. Yɛ nɔ najiaŋ ni amɛaakpɛlɛ nɔ ni ji anɔkwalei ni eŋɔɔɔ ni kɔɔ nifeemɔ ko he lɛ nɔ lɛ, amɛsumɔɔ koni amɛsusu amɛha amɛ diɛŋtsɛ amɛhe akɛ efɔŋ ko baŋ nifeemɔi ni yɔɔ oshara lɛ asɛɛ ni amɛaatiu lɛ mli, tamɔ tawa shɛremɔ, tsofai fɔji kɛ nitsumɔ, loo bɔlɛnamɔ mli jeŋba shara.

Agbɛnɛ lakamɔ hu yɛ jamɔŋ saji amli. Jamɔ mli hiɛnyiɛlɔi ni hi shi yɛ Yesu gbii lɛ amli lɛ laka gbɔmɛi lɛ. Yesu wie yɛ mɛi ni lakaa mɛi lɛ ahe akɛ: “Shwilafoi ni tsɔɔ shwilafoi agbɛ ji amɛ; ni kɛ́ shwilafo miitsɔɔ shwilafo gbɛ lɛ, amɛyi enyɔ lɛ fɛɛ amɛaagbee bu mli.” (Mateo 15:14) Kɛfata he lɛ, gbɔmɛi lakaa amɛ diɛŋtsɛ amɛhe yɛ jamɔŋ saji amli. Abɛi 14:12 lɛ kɛɔ akɛ: “Gbɛ ko yɛ ni ja yɛ gbɔmɔ hiɛ; shi enaagbee lɛ gbele gbɛi ni.”

Taakɛ eji yɛ Yesu beaŋ lɛ, alakaa mɛi babaoo ŋmɛnɛ yɛ jamɔŋ saji amli, ni ejeee nɔ ni yɔɔ naakpɛɛ! Bɔfo Paulo wie akɛ Satan “eshwila mɛi ní heee yeee lɛ ajwɛŋmɔi lɛ yɛ, koni Kristo, ni ji Nyɔŋmɔ subaŋ lɛ, anunyam sanekpakpa lɛ la ní tsoɔ lɛ akakpɛ́ miiha amɛ.”—2 Korintobii 4:4.

Kɛji akɛ ojotswalɔ ko laka wɔ lɛ, wɔlaajeɔ shika. Kɛji maŋkwralɔ ko laka wɔ lɛ, ekolɛ nɔ ni baajɛ mli aba ji heyeli ni wɔyɔɔ lɛ eko ni baaŋmɛɛ wɔ. Shi kɛji Satan laka wɔ bɔni afee ni wɔkpoo anɔkwale ni kɔɔ Yesu Kristo he lɛ, wɔnaŋ naanɔ wala! No hewɔ lɛ kaaha alaka bo. Gbelemɔ ojwɛŋmɔ kɛ otsui oha jɛɛhe kome pɛ ni ŋwanejee ko bɛ he kɛha jamɔ mli anɔkwale lɛ, ni ji Biblia lɛ. Sɛɛnamɔ kpele baaŋmɛɛ wɔ kɛji wɔyafee nɔ kroko.—Yohane 17:3.