Majimaji Ateŋ Kpeei Wuji yɛ Afi 2003 Mli

YƐ Hɔɔ, October 6, 2001 mli lɛ, afee daa afi kpee kɛha Watch Tower Bible and Tract Society of Pennsylvania mli bii lɛ yɛ Jersey City, New Jersey, U.S.A. Yɛ nakai kpee lɛ sɛɛ lɛ, kuu lɛ mli bii lɛ kɛ amɛgbɔi lɛ ná kpee krɛdɛɛ ko mli ŋɔɔmɔ. Enɔ jetsɛremɔ lɛ, yɛ kpeei krokomɛi ni afee afata he yɛ Canada kɛ United States maŋtiasei ejwɛ mli lɛ mli lɛ, Yehowa Odasefoi a-Nɔyeli Kuu lɛ mli bii lɛ kɛ adafitswaa ni nyiɛ sɛɛ nɛɛ ha yɛ amɛnaamuu wiemɔ lɛ mli:

“Yɛ be mli ni wɔkpaa wɔsɛɛ be gbɛ lɛ, ehe miihia waa ni Nyɔŋmɔ webii fɛɛ akakwa amɛhenaabuamɔ kutuu. Bɔfo Paulo wo hewalɛ akɛ esa akɛ afee enɛ kɛ hewalɛ ni wɔɔwowoi wɔhe, titrii lɛ bɔni afee ni wɔha Yehowa gbi kpeteŋkpele ni yɔɔ gbeyei ni bɛŋkɛɔ lɛ ahi wɔjwɛŋmɔ mli. (Hebribii 10:24, 25) Yɛ nɛkɛ Ŋmalɛ naa famɔ nɛɛ kɛ gbeekpamɔ naa lɛ, wɔmiikpa gbɛ akɛ abaafee kpeei wuji yɛ je lɛŋ he fɛɛ he wɔsɛɛ afi [2002]. Kɛkɛ lɛ, yɛ afi 2003 mli lɛ, kɛ eeefee Yehowa suɔmɔnaa lɛ, abaanyɛ afee majimaji ateŋ kpeei wuji krɛdɛɛ yɛ je lɛŋ hei komɛi. Be ni esa akɛ wɔhiɛ atsɛ ni wɔshi kpe lɛ nɛ, ni wɔyɔse bɔ ni nibii yaa lɛ ehaa yɛ je lɛ mli.”

Ekɔɔɔ he eko be ni bɛ faŋŋ ni mli woɔ wu kɛ béi ni yɔɔ, yɛ be mli ni ŋmɛnɛŋmɛnɛ beaŋ gbɛjianɔtoo nɛɛ bɛŋkɛɔ enaagbee lɛ mli lɛ fɛɛ sɛɛ lɛ, esa akɛ Nyɔŋmɔ webii anitsumɔ lɛ aya hiɛ. Esa akɛ ajaje Maŋtsɛyeli sanekpakpa lɛ, ni Biblia mli kɔkɔbɔɔ shɛɛ sane lɛ fata he lɛ atsɔɔ maji, akutsei, lilɛi, kɛ gbɔmɛi fɛɛ, ni akɛɛ amɛ ni ‘amɛshe Nyɔŋmɔ gbeyei ni amɛkɛ anunyam aha lɛ, ejaakɛ ekojomɔ ŋmɛlɛtswaa lɛ eshɛ kpaakpa.’ (Kpojiemɔ 14:6, 7) No hewɔ lɛ, yɛ wɔ ŋwɛi Tsɛ lɛ suɔmɔnaa nifeemɔ kɛ enɔkpɛlɛmɔ naa lɛ, wɔmiito majimaji ateŋ kpeei wuji ahe gbɛjianɔ yɛ je lɛŋ hei srɔtoi kɛha afi 2003.

Kɛ́ wɔɔkɛɛ lɛ, ato henaabuamɔi ni tamɔ nɛkɛ he be ni abaanyɛ atsake lɛ he gbɛjianɔ yɛ maŋtiasei fioo komɛi amli yɛ Amerika Kooyigbɛ kɛ no sɛɛ be fioo lɛ, yɛ Europa. No sɛɛ be fioo yɛ afi 2003 mli lɛ, abaato gbɛjianɔ koni kpeeiyalɔi akui komɛi afã gbɛ kɛya Asia maji wuji komɛi amli; ni kɛmiiba afi lɛ naagbee mli lɛ, kui krokomɛi ni akɛbaafata he baaya Afrika, Amerika Wuoyigbɛ, kɛ Pasifik niiaŋ. Abaabi ni nitsumɔhe niji komɛi aha kpeeiyalɔi ayibɔ fioo ko aya hei pɔtɛɛ ni abaafee kpee lɛ yɛ lɛ, no hewɔ lɛ, anyɛŋ afɔ̃ nine atsɛ mɔ fɛɛ mɔ koni eya. Shi kɛlɛ, ebaafee nɔ ni woɔ mɔ hewalɛ akɛ aaaha kpeeiyalɔi fioo ko ayadamɔ maji srɔtoi lɛ anajiaŋ yɛ kpee lɛ eko fɛɛ eko mli.

Etsɛŋ ni Yehowa Odasefoi asafoi lɛ anine baashɛ saji ni kɔɔ henaabuamɔi nɛɛ ahe lɛ nɔ. Kpeeiyalɔi ni afɔ̃ amɛ nine lɛ anitsumɔhe niji lɛ kɛ saji ni kɔɔ gbi pɔtɛɛ kɛ maŋtiasei diɛŋtsɛ ni amɛbaaya lɛ he lɛ baaha. No hewɔ lɛ, aaaha ole akɛ ehe ehiaaa ni oŋma wolo loo obi enɛ he sane ko yɛ nɛkɛ be nɛɛ mli.

Mɛi ni abaahala yɛ naagbee mli pɛ ji Odasefoi ni ejɔɔ amɛhe nɔ ni abaptisi amɛ ní baafee nɔkwɛmɔnɔ kpakpa ni amɛbaajie nyɛmimɛi ahedɔɔ kpo amɛtsɔɔ nyɛmimɛi ni yɔɔ jɛmɛ lɛ. Mɛnɛɛmɛi hu baaná hegbɛ koni amɛjɛ suɔmɔ mli ni amɛhere gbɔi lɛ atuu ni amɛjie anɔkwa gbɔfeemɔ kpo amɛtsɔɔ amɛ. (Hebribii 13:1, 2) Nɔ ni baajɛ mli aba ji akɛ ‘amɛbaawowoo amɛhe hewalɛ.’ (Romabii 1:11, 12) Nitsumɔhe niji ni afɔ̃ amɛ nine koni amɛha kpeeiyalɔi aya maŋ loo maji pɔtɛɛ komɛi amli lɛ kɛ saji krokomɛi babaoo ni kɔɔ gbɛjianɔtoi nɛɛ ahe lɛ baaha.

Abaato gbii etɛ kpokpaa wulu nɔ kpeei kɛha afi 2003 lɛ he gbɛjianɔ yɛ maji babaoo mli taakɛ afɔɔ feemɔ lɛ. Kɛtsɔ wɔhe naa ni wɔɔbua kutuu lɛ nɔ lɛ, wɔ fɛɛ wɔbaaná hegbɛ koni ‘wɔnu, wɔkase, ni awo wɔ hewalɛ.’ (5 Mose 31:12; 1 Korintobii 14:31) Enɛ baaha Nyɔŋmɔ webii fɛɛ hegbɛ koni ‘amɛsa amɛnaa amɛkwɛ, ni amɛna akɛ Yehowa hi.’ (Lala 34:9) Yɛ majimaji ateŋ kpeei wuji fɛɛ, kɛ agbɛnɛ hu kpokpaa wulu nɔ kpeei babaoo shishi lɛ, maŋsɛɛ sanekpakpa shiɛlɔi baaba shishi, ni amɛteŋ mɛi komɛi baaná kpee lɛ mli gbɛfaŋ nɔ.

Yɛ nɛkɛ afi 2002 nɛɛ mli lɛ, wɔmiiná “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpeei ni kanyaa wɔ koni wɔye odase babaoo lɛ mli ŋɔɔmɔ. Yɛ be mli ni wɔfeɔ enɛ lɛ, eka shi faŋŋ akɛ nibii ni wɔkpaa gbɛ akɛ Yehowa esaa eto kɛha afi ni baa lɛ baada. Enɛ baaye abua wɔ koni ‘wɔsara, wɔhiɛ atsɛ, ni wɔsaa wɔhe wɔto’ yɛ jaramɔ bei ni mli wa nɛɛ mli.—Mateo 24:42-44.