“Nyɛbaa Miŋɔɔ, . . . ni Maha Nyɛ Hejɔɔmɔ”

“Nyɛhaa Wɔfea Mɛi Fɛɛ Ejurɔ”

ÁKƐ ashiɛ ni atsɔ̃ɔ mɛi Nyɔŋmɔ Maŋtsɛyeli lɛ he sanekpakpa lɛ ji nitsumɔ titri ni Yesu tsu. (Marko 1:14; Luka 8:1) Akɛni Kristo sɛɛnyiɛlɔi lɛ sumɔ akɛ amɛaakase lɛ hewɔ lɛ, amɛsusu nitsumɔ ni ji Biblia mli shɛɛ sane ni kɔɔ Nyɔŋmɔ Maŋtsɛyeli lɛ he ní aaatsɔɔ lɛ akɛ eji nitsumɔ ni he hiaa fe fɛɛ yɛ amɛshihilɛ mli. (Luka 6:40) Yɛ anɔkwale mli lɛ, eji mlifilimɔ kɛha Yehowa Odasefoi akɛ amɛaana bɔ ni Maŋtsɛyeli shɛɛ sane lɛ kɛ hejɔɔmɔ ni sɛɛ tsɛɔ hãa mɛi ni kpɛlɛɔ nɔ lɛ—taakɛ ekɛ hejɔɔmɔ hã mɛi beni Yesu yɔɔ shikpɔŋ nɔ lɛ.—Mateo 11:28-30.

Yɛ Nyɔŋmɔ Wiemɔ lɛ ni Yesu tsɔɔ lɛ sɛɛ lɛ, etsu nitsumɔi kpakpai krokomɛi tamɔ helatsɛmɛi ni etsa kɛ mɛi ni hɔmɔ yeɔ amɛ ni eha amɛ niyenii lɛ nɛkɛ. (Mateo 14:14-21) Nakai nɔŋŋ Yehowa Odasefoi kɛ nifeemɔi ni yeɔ buaa mɛi ni ehia amɛ lɛ fataa amɛ Biblia nitsɔɔmɔ nitsumɔ lɛ he. Yɛ anɔkwale mli lɛ, Ŋmalɛi lɛ sáa Kristofoi ‘kɛha nitsumɔ kpakpa fɛɛ nitsumɔ kpakpa,’ ni ewoɔ amɛ hewalɛ ni ‘amɛfee mɛi fɛɛ ejurɔ.’—2 Timoteo 3:16, 17; Galatabii 6:10.

“Wɔ Nyɛmimɛi lɛ Ye Ebua”

Yɛ September 1999 lɛ, shikpɔŋhosomɔ ko ni kpataa nii ahiɛ hoso Taiwan. Nyɔji fioo komɛi asɛɛ lɛ, nugbɔ ni nɛ waa kɛ snoo kpɔ agbo ko ni kumɔ kɛjɛ gɔŋ grɔŋŋ ko nɔ lɛ kɛ adebɔɔ naa oshara ni naa wa waa yɛ Venezuela yinɔsane mli lɛ ateŋ ekome ba. Nyɛsɛɛ nɛɛ kpaakpa lɛ, nu afua ni naa wa waa kpata nibii babaoo hiɛ yɛ Mozambique shikpɔŋ lɛ nɔ. Yɛ shihilɛi etɛ nɛɛ fɛɛ mli lɛ, Yehowa Odasefoi lɛ yashɛ jɛmɛ oya ni amɛkɛ niyenii, nu, tsofa, atade, buu, kɛ nihoomɔ nibii srɔtoi yahã mɛi ni oshara lɛ eshara amɛ lɛ. Mɛi ni etuu amɛhe amɛhã lɛ ateŋ mɛi komɛi ni yɔɔ tsofafeemɔ he hesaai lɛ mã be kukuoo helatsamɔhei koni akɛtsa mɛi ni epila lɛ, ni mɛi ni etuu amɛhe amɛhã lɛ ateŋ tsumalɔi lɛ hu ma shiai heei amɛha mɛi ni amɛshiai ekumɔ lɛ.

Mɛi ni oshara lɛ eshara amɛ lɛ atsuiŋ ta amɛ yɛ yelikɛbuamɔ ni yɔɔ ebe naa pɛpɛɛpɛ ni amɛnine shɛ nɔ lɛ hewɔ. Malyori, ní snoo ni kumɔ kɛjɛ gɔŋ grɔŋŋ ko nɔ lɛ kumɔ eshia yɛ Venezuela lɛ wie akɛ: “Be mli ni wɔbɛ  hiɛnɔkamɔ ko kwraa lɛ, wɔnyɛmimɛi lɛ ye ebua.” Sɛɛ mli beni mɛi ni etuu amɛhe amɛhã lɛ ma shia hee amɛha Malyori kɛ eweku lɛ, ebo akɛ: “Wɔnyɛŋ wɔda Yehowa shi bɔ ni sa, yɛ nibii fɛɛ ni efeɔ ehaa wɔ lɛ hewɔ!” Ni beni mɛi ni nu afua lɛ ekpata amɛnibii ahiɛ yɛ Mozambique lɛ nine shɛ samfei kɛha amɛshiai heei ní amã ahã amɛ lɛ nɔ lɛ, trukaa lɛ kuu muu lɛ fɛɛ bɔi Maŋtsɛyeli lala ni ji “Jehovah Is Our Refuge” * (Yehowa Ji Wɔbobaahe) lɛ lamɔ.

Mɛi ni ehia amɛ lɛ ni aaaye abua amɛ lɛ ji hejɔɔmɔ kɛha mɛi ni etuu amɛhe amɛhã lɛ hu. Marcelo ni sɔmɔ akɛ helatsɛmɛi akwɛlɔ yɛ abobalɔi ansara ko ni yɔɔ Mozambique lɛ wie akɛ: “Miná miishɛɛ ákɛ akɛ mi tsu nii kɛye ebua nyɛmimɛi nɛɛ ni ena nɔ waa lɛ.” Huang, ni etuu ehe ehã ni yɔɔ Taiwan lɛ wie akɛ: “Eji miishɛɛ kpele akɛ aaaná gbɛfaŋnɔ kɛja niyenii kɛ buui kɛhã nyɛmimɛi ní ehia amɛ lɛ. Eji nɔ ni woɔ mɔ hemɔkɛyeli hewalɛ.”

Hetuu-Kɛhamɔ Gbɛjianɔtoo ko ni Woɔ Yibii

Hetuu-kɛhamɔ nitsumɔ lɛ kɛ mumɔŋ hejɔɔmɔ hu ebahã gboklɛfoi akpei nyɔŋmai abɔ ni yɔɔ je lɛŋ fɛɛ lɛ. Yɛ mɛɛ gbɛ nɔ? Yɛ nyɛsɛɛ afii lɛ amli lɛ, Yehowa Odasefoi kɛ Biblia kasemɔ woji eyaha aŋkroaŋkroi ni fe 30,000 ni awo amɛ tsuŋ yɛ tsuŋwoohei aaafee 4,000 mli yɛ United States pɛ. Kɛfata he lɛ, yɛ hei ni aŋmɛɔ gbɛ lɛ, Odasefoi lɛ diɛŋtsɛ yaa tsuŋwoohei lɛ amli koni amɛkɛ gboklɛfoi lɛ ayakase Biblia lɛ, ní amɛkɛ amɛ afee Kristofoi akpeei. Ani gboklɛfoi lɛ náa he sɛɛ?

Gboklɛfoi komɛi ni kaseɔ Biblia lɛ je shishi amɛkɛ amɛnanemɛi gboklɛfoi lɛ gba Nyɔŋmɔ Wiemɔ lɛ mli tsɔɔmɔi ni hãa mɔ hejɔɔmɔ lɛ he sane. Enɛ hewɔ lɛ, ayɛ gboklɛfoi akui ni feɔ ekome kɛjáa Yehowa bianɛ yɛ tsuŋwoohei komɛi amli yɛ je lɛŋ fɛɛ. Gboklɛfonyo ko ni yɔɔ tsuŋwoohe ni yɔɔ Oregon, yɛ U.S.A. lɛ bɔ amaniɛ yɛ 2001 mli akɛ: “Wɔkuu lɛ miishwere. Wɔyɛ Maŋtsɛyeli shiɛlɔi 7 ní miifee Biblia mli nikasemɔi 38. Mɛi ni fa fe 25 baa maŋshiɛmɔ lɛ kɛ Buu-Mɔɔ Nikasemɔ lɛ shishi, ni mɛi 39 ba Kaimɔ [Kristo gbele] lɛ shishi. Etsɛŋ ni abaabaptisi mɛi etɛ krokomɛi hu!”

Sɛɛnamɔi kɛ Miishɛɛnamɔi

Tsuŋwoohei anɔkwɛlɔi eyɔse akɛ hetuu-kɛhamɔ gbɛjianɔtoo nɛɛ woɔ yibii. Nɔ ni haa nɔkwɛlɔi nɛɛ anaa kpɛɔ amɛhe waa ji hetuu-kɛhamɔ gbɛjianɔtoo nɛɛ mli sɛɛnamɔi ni sɛɛ tsɛɔ lɛ. Amaniɛbɔɔ ko tsɔɔ akɛ: “Yɛ afii nyɔŋma ni gbɛjianɔtoo nɛɛ etsu nii lɛ mli lɛ, gboklɛfoi ní abaptisiɔ amɛ yɛ tsuŋwoohe lɛ mli ákɛ Yehowa Odasefoi lɛ ateŋ mɛi komɛi lɛ ateŋ mɔ ko bɛ ni aŋmɛɛ ehe ni eku sɛɛ kɛba tsuŋwoohe lɛ mli ekoŋŋ—kɛ akɛmiito oha mlijaa 50-60 ní yɔɔ kui krokomɛi amli ni kuɔ amɛsɛɛ amɛbaa lɛ he lɛ.” Yɛ bɔ ni sɛɛnamɔi ni jɛ Odasefoi ni etuu amɛhe amɛhã lɛ anitsumɔ mli ba lɛ ta tsuŋwoohe ni yɔɔ Idaho lɛ osɔfo lɛ tsui mli hewɔ lɛ, ewie yɛ wolo ni eŋma eyahã Yehowa Odasefoi ajeŋ fɛɛ nitsumɔhe yitso lɛ mli akɛ: “Yɛ be mli ni mi diɛŋtsɛ lɛ mikɛ nyɛ tsɔɔmɔi lɛ kpãaa gbee lɛ, minaa ekpɛ mihe waa yɛ nyɛ gbɛjianɔtoo lɛ he.”

Mɛi ni yɔɔ tsuŋwoohe lɛ mli ni aaaye abua amɛ lɛ efee nɔ ni sɛɛnamɔ yɔɔ he kɛha mɛi ni etuu amɛhe amɛhã lɛ hu. Beni mɔ ko ni etuu ehe ehã lɛ kɛ gboklɛfoi akuu ko fee nikasemɔ ní amɛla Maŋtsɛyeli lala klɛŋklɛŋ kwraa lɛ sɛɛ lɛ, eŋma akɛ: “Eji hewalɛwoo nɔ̃ akɛ aaana hii 28 ní efee ekome kɛmiila yijiemɔ lalai kɛmiiha Yehowa. Ni amɛlá kɛ gbee ni jijeɔ! Mɛɛ hegbɛ krɛdɛɛ po eji nɛkɛ akɛ mɔ aaahi nifeemɔ ko ni tamɔ nɛkɛ shishi!” Mɔ ko ni etuu ehe ehã ni miisara tsuŋwoohei ni yɔɔ Arizona lɛ kɛɛ akɛ: “Mɛɛ jɔɔmɔ eji nɛkɛ, akɛ mikɛ mihe aaawo nitsumɔ krɛdɛɛ nɛɛ mli!”

Odasefoi ni etuu amɛhe amɛhã ni yɔɔ je lɛŋ fɛɛ lɛ kɛ Yesu ni wie akɛ: “Nɔ̃ hamɔ mli yɛ jɔɔmɔ fe hemɔ” lɛ baakpã gbee amrɔ nɔŋŋ. (Bɔfoi lɛ Asaji 20:35) Amɛmaa nɔ mi hu akɛ, ní akɛ Biblia mli ŋaawoo akɛ afee mɛi fɛɛ ejurɔ lɛ aaatsu nii lɛ ji hejɔɔmɔ lɛɛlɛŋ.—Abɛi 11:25.

[Shishigbɛ niŋmaa]

[Mfoniri ni yɔɔ baafa 8]

Venezuela

[Mfoniri ni yɔɔ baafa 8]

Taiwan

[Mfoniri ni yɔɔ baafa 8]

Mozambique