Wala Shihilɛ He Sane

Migbɔ Kotokoto Ni Miyɛ Afii Ni Miye Lɛ He Miishɛɛ

TAAKƐ MURIEL SMITH GBA

Shinaa ko ni atswa lɛ waa lɛ ha mihiɛgbɛ shinaa lɛ hoso waa. No mli lɛ, etsɛko tsɔ ni miku misɛɛ miba shia kɛha shwane niyenii yɛ be mli ni mitsu nii waa leebi mli yɛ shiɛmɔ nitsumɔ lɛ mli. Taakɛ mifɔɔ feemɔ lɛ, no mli lɛ miito nula kɛfee tii, ni mifee klalo akɛ majɔɔ mihe ŋmɛlɛtswaa fã. Shinaa lɛ tswaa lɛ gbɛɛ kɛtsara nɔ, ni beni mibɛŋkɛɔ jɛmɛ lɛ, misusu mɔ tuuntu ni baanyɛ atswa shinaa lɛ yɛ nɛkɛ beaŋ lɛ he. Etsɛɛɛ ni miná mile. Hii enyɔ ni yɔɔ mishinaa lɛ naa lɛ jie amɛhe shi akɛ amɛji polisifoi. Amɛkɛɛ amɛba biɛ koni amɛbakwɛ mishia lɛ mli akɛ amɛbaana woji ni Yehowa Odasefoi—gbɛjianɔtoo ko ni atsĩ amɛnaa lɛ fee lɛ eko lo.

Mɛni hewɔ Yehowa Odasefoi yɔɔ naatsii shishi yɛ Australia lɛ, ni te fee tɛŋŋ mibatsɔ amɛteŋ mɔ kome lɛ? Enɛ fɛɛ je shishi kɛ nikeenii ko ni jɛ minyɛ ŋɔɔ yɛ afi 1910 mli, beni miye afii nyɔŋma lɛ.

WEKU mli ni mijɛ lɛ hi ŋmoŋmolo tsũ ko mli yɛ Sydney Kooyigbɛ klotia ni yɔɔ Crows Nest lɛ mli. Mijɛ skul miba shia be ko ni mibana ni minyɛ kɛ nuu ko miiwie yɛ hiɛgbɛ shinaa lɛ naa. No mli lɛ, miitao ni male mɔ ni gbɔ ni ewo kootu ni ehiɛ baagi ni woji eyi mli obɔ lɛ ji lɛ kɛkɛ. Mikɛ heshibaa bi gbɛ ni mibote shia lɛ mli. Shi kɛlɛ, minitii fioo ko sɛɛ lɛ, Awo tsɛ mi. Ekɛɛ akɛ: “Nuu nɛɛ hiɛ woji komɛi ni yɔɔ miishɛɛ, ni fɛɛ kɔɔ Ŋmalɛi lɛ ahe. Agbɛnɛ, akɛni etsɛŋ ni obaaye ofɔmɔ gbi hewɔ lɛ, onine baanyɛ ashɛ atade hei loo woji nɛɛ anɔ. Te nɔ ni obaasumɔ lɛ?”

 Miha hetoo akɛ: “Oh, Awo, masumɔ woji lɛ, miida bo shi.”

No hewɔ lɛ, beni miyeɔ afii nyɔŋma lɛ, no mli lɛ miyɛ Studies in the Scriptures, ni Charles Taze Russell ŋma lɛ klɛŋklɛŋ wolokpoi etɛ lɛ. Nuu ni damɔ shinaa lɛ naa lɛ gbála mli etsɔɔ minyɛ akɛ ehe baahia ni eye ebua mi koni manu woji lɛ ashishi, akɛni eshishinumɔ baawa kɛha mi lɛ hewɔ. Awo kɛɛ akɛ ebaanya he akɛ ebaafee nakai. Awerɛho sane ji akɛ, yɛ sanegbaa nɛɛ sɛɛ lɛ, etsɛɛɛ ni Awo gbo. Ataa kɛ hiɛmiamɔ kwɛ mi, minyɛmi nuu lɛ, kɛ minyɛmi yoo lɛ jogbaŋŋ, shi gbɛnaa nii krokomɛi jwere minɔ ni esa akɛ matsu he nii, ni enɛɛmɛi haa mimli fuɔ. Ni kɛlɛ, etsɛŋ ni oshara kroko baajie ehiɛ kpo.

Klɛŋklɛŋ jeŋ ta lɛ fɛ yɛ afi 1914 mli, ni yɛ afi kome pɛ sɛɛ lɛ, agbe wɔtsɛ ni wɔsumɔɔ lɛ lɛ. Akɛni wɔtsɔmɔ awusãi agbɛnɛ hewɔ lɛ, akɛ minyɛmi nuu lɛ kɛ minyɛmi yoo lɛ tee koni amɛkɛ wekumɛi komɛi ayahi shi, ni akɛ mi tee Katolik kɔlegi ni awɔɔ jɛmɛ. Bei komɛi lɛ, mihe feɔ shoo waa. Shi, midaa shi akɛ aha mi hegbɛ koni mikɛtiu lala ni misumɔɔ lɛ sɛɛ, titri lɛ yɛ saŋku tswaa mli. Afii lɛ ho, ni migbe kɔlegi ni awɔɔ jɛmɛ lɛ naa. Yɛ afi 1919 mli lɛ, mikɛ Roy Smith, ni ji mɔ ko ni hɔɔ lalatswaa he nibii lɛ bote gbalashihilɛ mli. Yɛ afi 1920 mli lɛ, wɔbɔi fɔmɔ, ni daa gbi shihilɛ mli yeyeeyefeemɔ lɛ ŋɔ mibe fɛɛ. Shi nakai woji lɛ hu?

Akutsoŋnyo ko Gba Mi Mumɔŋ Anɔkwale lɛ He Sane

Yɛ nakai afii lɛ fɛɛ mli lɛ, mikɛ “Biblia woji” yaa he fɛɛ he ni maya. Eyɛ mli akɛ mikaneko woji nɛɛ diɛŋtsɛ moŋ, shi mile kɛjɛ mitsui mli akɛ shɛɛ sane ni yɔɔ mli lɛ he miihia. Kɛkɛ ni gbi ko yɛ afi 1920 afii lɛ anaagbee gbɛ lɛ, Lil Bimson, ni eji wɔ akutsoŋ bii lɛ ateŋ mɔ kome lɛ ba ebasara mi. Wɔbote asa lɛ nɔ, wɔta shi, ni wɔnu tii fioo.

Ejaje amrɔ nɔŋŋ akɛ: “Oh, oyɛ nakai woji lɛ eko!”

Mihiɛ fee mi yaa, ni mibi lɛ akɛ: “Mɛɛ woji?”

Ekɛ enine tsɔɔ Studies in the Scriptures ni yɔɔ wojiatoohe lɛ. Lil ma woji lɛ ni ekɛtee shia nakai gbi lɛ ni eyakane amɛ jogbaŋŋ. Miishɛɛ ni ená yɛ nɔ ni ekane lɛ mli lɛ bafee faŋŋ. Lil he woji babaoo kɛjɛ Biblia Kaselɔi, taakɛ atsɛɔ Yehowa Odasefoi yɛ nakai beaŋ lɛ aŋɔɔ. Kɛfata he lɛ, enyɛɛɛ ebu enaa ni egbaaa wɔ nibii fɛɛ ni ekaseɔ lɛ. Woji ni enine shɛ nɔ lɛ ateŋ ekome ji The Harp of God, ni etsɛɛɛ ni wɔnine shɛ wolo nɛɛ nɔ yɛ wɔshia lɛ. Mishihilɛ yɛ Yehowa sɔɔmɔ mli lɛ je shishi kwraa beni mihe be ni mikɛkane Biblia kasemɔ woji lɛ. Naagbee lɛ, miná hetoo miha shishijee sanebimɔi ni misɔlemɔ lɛ nyɛko amɛha mi hetoo lɛ.

Heniianaa lɛ, Roy bo Biblia mli shɛɛ sane lɛ toi jogbaŋŋ, ni wɔyi enyɔ lɛ fɛɛ batsɔmɔ Biblia kaselɔi ni yɔɔ ekãa waa. Kɛtsɔ hiɛ lɛ, no mli lɛ Roy ji Freemason jamɔ kuu lɛ mlinyo. Agbɛnɛ, wɔweku lɛ fee ekome yɛ anɔkwa jamɔ mli, ni shii enyɔ yɛ daa otsi mli lɛ, nyɛmimɛi lɛ ateŋ mɔ kome kɛ weku muu lɛ fɛɛ bafeɔ Biblia mli nikasemɔ. Wɔnine shɛ hewalɛwoo nɔ lolo beni wɔje shishi ni wɔbɔi kpeei ni Biblia Kaselɔi lɛ feɔ lɛ yaa lɛ. He ni afeɔ kpee lɛ yɛ, yɛ Sydney lɛ ji asa bibioo ko ni ahai yɛ Newtown klotia lɛ naa. Nakai be lɛ mli lɛ, Odasefoi ni yɔɔ maŋ tsomuu lɛ mli fɛɛ lɛ shɛɛɛ 400, no hewɔ lɛ, yɛ nyɛmimɛi lɛ ateŋ mɛi babaoo agbɛfaŋ lɛ, kpeeiyaa biɔ ni afã gbɛ kakadaŋŋ diɛŋtsɛ.

 Kpeei ni wɔweku lɛ baaya lɛ tsɔɔ akɛ esa akɛ wɔfo Sydney Lɛjiadaamɔhe lɛ be fɛɛ be. Dani abaafee Sydney Lɛjiadaamɔhe Nu Hiɛ Agba lɛ yɛ afi 1932 mli lɛ, no mli lɛ esa akɛ wɔkɛ lɛlɛ bibioo ko afo. Yɛ be kɛ nyɔmɔ ni wɔbɔɔ yɛ gbɛfaa nɛɛ fɛɛ sɛɛ lɛ, wɔbɔ mɔdɛŋ akɛ wɔfoŋ mumɔŋ niyenii ni Yehowa kɛhaa lɛ eko mli. Mɔdɛŋ ni wɔbɔ koni wɔnane amɔ shi yɛ anɔkwale lɛ mli lɛ he ba sɛɛnamɔ, akɛni no mli lɛ, jeŋ ta ni ji enyɔ lɛ miijie ehe kpo fiofio lɛ hewɔ, ni maŋkwramɔŋ saji ni akɛ he wooo mli lɛ baasa wɔweku lɛ he tɛ̃ɛ lɛ.

Kaa Be kɛ Jɔɔmɔi Abe

Afi 1930 afii lɛ ashishijee lɛ ji miishɛɛ be kɛha mi kɛ miweku lɛ. Abaptisi mi yɛ afi 1930 mli, ni yɛ afi 1931 mli lɛ, miyɛ nakai kpee ni hiɛ kpaŋ nɔ lɛ shishi beni wɔ fɛɛ wɔte shi wɔdamɔ shi ni wɔkpɛlɛ nɔ akɛ wɔbaaŋɔ gbɛi ni ji Yehowa Odasefoi lɛ. Mi kɛ Roy bɔ mɔdɛŋ akɛ wɔbaahi shi yɛ nakai gbɛi lɛ naa kɛtsɔ wɔhe ni wɔkɛaawo shiɛmɔ gbɛ̀i kɛ tafaai fɛɛ ni gbɛjianɔtoo lɛ woɔ he hewalɛ lɛ mli. Ákɛ nɔkwɛmɔnɔ lɛ, yɛ afi 1932 mli lɛ, wɔkɛ wɔhe wo dɛhiɛmɔ woji atafaa krɛdɛɛ ko ni ato he gbɛjianɔ koni wɔnine ashɛ gbɔmɛi babaoo ni eba koni amɛbakwɛ Sydney Lɛjiadaamɔhe Nu Hiɛ Agba lɛ naa gbelemɔ lɛ. Ama kar ni tsɔne ni akɛtswaa lala yɔɔ mli lɛ kɛ nitsumɔ lɛ nɔ mi, ni wɔná hegbɛ ni wɔha akɛ tsɔne ni tswaa lala lɛ eko ma wɔ weku kar lɛ nɔ. Kɛtsɔ tsɔnei ahe ŋaa nɛɛ nɔ lɛ, wɔha Biblia mli wiemɔi ni Nyɛminuu Rutherford ha ni amɔmɔ awo kpaai anɔ lɛ jije yɛ Sydney gbɛjegbɛi lɛ anɔ.

Shi kɛlɛ, shihilɛ miitsake ni emli miiwo wu. Beni shɛɔ afi 1932 mli lɛ, no mli lɛ Ohia Shihilɛ ni Mli Wa lɛ ená Australia nɔ hewalɛ waa diɛŋtsɛ, no hewɔ lɛ, mi kɛ Roy kpɛ wɔyiŋ akɛ wɔbaaha wɔshihilɛ afee nɔ ni yɔɔ mlɛo. Gbɛ kome ni wɔtsɔ nɔ wɔfee enɛ ji kɛtsɔ bɛŋkɛmɔ ni wɔtsi wɔbɛŋkɛ asafo lɛ, ni enɛ ha wɔgbɛfaa he nyɔji lɛ ba shi waa diɛŋtsɛ. Eyɛ mli akɛ no mli lɛ, shika gbɛfaŋ nɔnyɛɛ lɛ faaa tsɔ moŋ beni Jeŋ Ta II lɛ he ŋmiŋmi mɔ jeŋ muu lɛ fɛɛ lɛ.

Akɛni Yehowa Odasefoi ni yɔɔ je lɛŋ fɛɛ lɛ bo Yesu famɔ akɛ akafee je lɛ fã lɛ toi hewɔ lɛ, amɛbafee mɛi ni awaa amɛ yi, ni nakai nɔŋŋ eba lɛ yɛ Australia. Akɛni ta lɛ he tsuiyeli miikanya amɛ hewɔ lɛ, mɛi komɛi wo wɔ gbɛi akɛ Komunistbii. Shitee-kɛ-wolɔi nɛɛ folɔɔ wɔnaa akɛ, Yehowa Odasefoi lɛ kɛ amɛ-redio nitsumɔhei ejwɛ ni amɛyɔɔ yɛ Australia lɛ miitsu nii ni amɛkɛ shɛɛ saji miimaje Japan asraafoi lɛ.

Nyɛmimɛi oblahii ni atsɛ amɛ awo asraafoi anitsumɔ lɛ mli lɛ kɛ nɔnyɛɛ ni mli wa ni baaha amɛŋmɛɛ sane he kɛsaa lɛ kpe. Miyɛ he miishɛɛ akɛ makɛɛ akɛ wɔbihii etɛ lɛ fɛɛ hiɛ amɛhemɔkɛyelii lɛ amli ni amɛhi shi akɛ mɛi ni kɛ amɛhe wooo maŋkwramɔŋ saji amli. Awo wɔbi nukpa, ni ji Richard tsuŋ nyɔji 18. Wɔ bi ni ji enyɔ, Kevin nyɛ ekɛ egbɛi ha akɛ mɔ ni le ni ekpoo. Mɔbɔ sane ji akɛ, wɔ nakutsoŋ bi, ni ji Stuart ná moto oshara ni egbo yɛ be mli ni enyiɛ gbɛ kɛyaa saneyelihe ko ni eyafã ehe yɛ sane ni kɔɔ maŋkwramɔŋ sane ni akɛ he wooo mli lɛ he lɛ. Nɛkɛ oshara nɛɛ kɛ nɔnyɛɛ kpele diɛŋtsɛ ba. Ni kɛlɛ, wɔhiɛ ni wɔha ehi Maŋtsɛyeli lɛ kɛ Yehowa shiwoo ni kɔɔ gbohiiashitee lɛ he lɛ nɔ lɛ ye ebua wɔ ni wɔkpee shihilɛ lɛ naa.

Amɛnine Shɛɛɛ Nyɔmɔwoo Diɛŋtsɛ lɛ Nɔ

Yɛ January 1941 mli lɛ, atsĩ Yehowa Odasefoi anitsumɔ ni yɔɔ Australia lɛ naa. Shi, taakɛ Yesu bɔfoi lɛ fee lɛ, mi kɛ Roy bo Nyɔŋmɔ moŋ toi akɛ nɔyelɔ fe gbɔmɛi, ni wɔkɛ afii enyɔ kɛ fã tee nɔ wɔtsu nii yɛ teemɔŋ. Nɛkɛ be nɛɛ mli polisifoi enyɔ ni wo shia atadei ni mitsĩ amɛtã kɛtsɔ hiɛ lɛ shi mishinaa lɛ. Mɛni ba?

Ojogbaŋŋ, miha amɛba mli. Beni amɛboteɔ shia lɛ mli lɛ, mibi amɛ akɛ, “Ani ebaagba nyɛnaa kɛji migbe tii ni minuɔ lɛ naa dani nyɛkwɛ minibii lɛ amli?” Miishɛɛ sane ji akɛ, amɛkpɛlɛ nɔ, ni mitee kpata lɛ shi ni miyasɔle miha Yehowa ni mijwɛŋ nɔ ni mafee he. Beni miku misɛɛ lɛ, polisifoi lɛ ateŋ mɔ kome bote wɔ nikasemɔhe lɛ, ni eloo nɔ fɛɛ nɔ ni ebaanyɛ ena ní Buu Mɔɔ okadi yɔɔ nɔ lɛ, ni nɔ ni fata he ji woji ni yɔɔ mi-shiɛmɔ baagi lɛ mli lɛ kɛ Biblia lɛ.

Kɛkɛ ni ebi akɛ: “Ani oheɔ oyeɔ akɛ obɛ woji krokomɛi ni okɛto yɛ wolo adekai amli? Wɔnine eshɛ adafitswaa nɔ akɛ oyaa kpeei daa otsi yɛ asa ko nɔ yɛ gbɛjegbɛ nɛɛ naagbeehe lɛ nɔ, ni akɛ, okɛ woji babaoo yaa jɛmɛ.”

 Miha hetoo akɛ: “Eji anɔkwale, shi eko bɛ jɛmɛ bianɛ.”

Ekɛɛ akɛ: “Hɛɛ, wɔle nakai, Aw. Smith. Wɔle hu akɛ, akɛ woji lɛ toɔ yɛ mɛi ni yɔɔ kpokpaa nɛɛ nɔ lɛ ashiai amli.”

Yɛ wɔbi nuu lɛ sɛɛtsu lɛ mli lɛ, amɛna wolo adekai enumɔ ni dɛhiɛmɔ woji ni ji Freedom or Romanism yɔɔ mli.

Ebi akɛ: “Ani oheɔ oyeɔ akɛ obɛ nɔ ko nɔ ko kwraa dɔŋŋ yɛ he ni akɛ tsɔne maa lɛ mli?”

Mikɛɛ akɛ: “Dabi, nɔ ko kwraa bɛ jɛmɛ.”

Kɛkɛ ni egbele kɔba ko naa yɛ niyelihe lɛ. Ena woji ni aŋmako nii yɛ nɔ ní wɔŋmaa asafo akɔntaabuu lɛ yɛ nɔ. Eloo enɛɛmɛi ni no sɛɛ lɛ ema nɔ mi akɛ ebaakwɛ he ni akɛ tsɔne lɛ maa lɛ mli.

Mikɛɛ akɛ: “Ba nɛkɛ gbɛ mɔ.”

Amɛnyiɛ misɛɛ kɛtee he ni akɛ tsɔne maa lɛ, ni yɛ be mli ni amɛkwɛ jɛmɛ sɛɛ lɛ, amɛshi agbɛnɛ.

Ojogbaŋŋ, nakai polisifoi lɛ susu akɛ amɛnine eshɛ jweremɔ nɔ̃ wulu ko nɔ yɛ nakai wolo adekai enumɔ lɛ hewɔ! Shi kɛlɛ, amɛshi jweremɔ nɔ̃ diɛŋtsɛ lɛ yɛ sɛɛ. Yɛ nakai gbii lɛ amli lɛ, miisɔmɔ akɛ asafoŋ woloŋmalɔ, ni mihiɛ asafoŋ shiɛlɔi lɛ agbɛi kɛ woji krokomɛi ni he hiaa waa yɛ shia lɛ mli. Miida shi akɛ, nyɛmimɛi lɛ ebɔ wɔ kɔkɔ koni wɔsaa wɔhe kɛha nakai nibii amli kwɛmɔ lɛ, ni mikɛ nɛkɛ woji nɛɛ eto jogbaŋŋ. Mikɛ wo wolo kotokui amli ni mikɛwo kɔɔpoi ni tii, sikli, kɛ ashikishaŋ yɔɔ mli lɛ ashishi. Mikɛ eko hu yato loofɔlɔ tsũ ni bɛŋkɛ he ni akɛ tsɔne maa lɛ mli lɛ he lɛ. No hewɔ lɛ polisifoi lɛ ho kɛtsɔ woji diɛŋtsɛ ni amɛtaoɔ lɛ he.

Mikɛ Mihe Wo Be-Fɛɛ Sɔɔmɔ Nitsumɔ lɛ Mli

Beni shɛɔ afi 1947 lɛ, no mli lɛ, wɔbii onukpai lɛ eje shishi amɛmiito amɛ diɛŋtsɛ amɛweku shishi. Yɛ nɛkɛ be nɛɛ mli lɛ, mi kɛ Roy kpɛ wɔyiŋ akɛ wɔbaanyɛ wɔkɛ wɔhe awo be-fɛɛ sɔɔmɔ nitsumɔ lɛ mli. No mli lɛ, hiamɔ eba yɛ Australia Wuoyigbɛ shikpɔŋ lɛ nɔ, no hewɔ lɛ, wɔhɔɔ wɔshia lɛ ni wɔkɛhe shwiili, ni wɔwo lɛ gbɛi akɛ Mizpa, ni eshishi ji “Buu Mɔɔ.” Nɛkɛ shihilɛ gbɛ nɛɛ ha wɔnyɛ wɔshiɛ yɛ hei ni etse amɛhe banee lɛ mli. Bei pii lɛ, wɔtsuɔ nii yɛ shikpɔŋkuku ni yɔɔ akrowa ni akɛwoko mɔ ko dɛŋ lɛ mli. Mikɛ miishɛɛ kaiɔ nibii ni tee nɔ yɛ nakai beaŋ lɛ babaoo. Nikasemɔi ni mifee lɛ ateŋ ekome ji nɔ ni mikɛ oblayoo ko ni atsɛɔ lɛ Beverly fee lɛ. Dani eeeya ehiɛ kɛshɛ baptisimɔ he lɛ, efã kɛshi akutso lɛ mli. Kwɛ miishɛɛ ni miná beni yɛ afii komɛi asɛɛ lɛ, nyɛmi yoo ko banina mi yɛ kpee wulu ko shishi ni ejie ehe shi etsɔɔ mi akɛ lɛ ji Beverly lɛ! Kwɛ miishɛɛ ni miná akɛ yɛ nɛkɛ afii nɛɛ fɛɛ mli lɛ, mana akɛ ekɛ ewu kɛ ebii lɛ fɛɛ miisɔmɔ Yehowa lɛ.

Yɛ afi 1979 mli lɛ, miná hegbɛ mitee Gbɛgbalɔi Asɔɔmɔ Skul lɛ eko. Nɔ kome ni ama nɔ mi yɛ skul lɛ shishi ji akɛ, dani mɔ ko aaanyɛ aya nɔ yɛ gbɛgbamɔ sɔɔmɔ nitsumɔ lɛ mli lɛ, esa akɛ mɔ lɛ aná teemɔŋ nikasemɔ su kpakpa. Mibana diɛŋtsɛ akɛ eji anɔkwale. Nikasemɔ, kpeeiyaa, kɛ shiɛmɔ nitsumɔ lɛ ebafee mishihilɛ fɛɛ. Mibuɔ mihe akɛ eji hegbɛ ni miná akɛ masɔmɔ akɛ daa gbɛgbalɔ nɔ ni fa fe afii 50 nɛ.

Gbɔmɔtsoŋ Hewalɛnamɔ Mli Naagbai Anaakpeemɔ

Shi kɛlɛ, afii nyɔŋmai abɔ ni eho nɛɛ lɛ kɛ naagbai pɔtɛɛ komɛi eba minɔ. Yɛ afi 1962 mli lɛ, ana akɛ miiye hiŋmɛi nɔhaa hela. Yɛ nakai be lɛ mli lɛ, tsofafeemɔ ni yɔɔ lɛ mɔɔɔ shi jogbaŋŋ, ni  mihiŋmɛi lɛ fite oyayaayai. Roy hu hewalɛnamɔ ba shi, ni yɛ afi 1983 mli lɛ, eye kuumɔ hela ní ha ekumɔ kwraa ni enyɛɛɛ ewie. Eje mli yɛ afi 1986 lɛ mli. Ekɛ yelikɛbuamɔ ni sɛɛnamɔ yɔɔ he pii eha mi beni miyɔɔ be-fɛɛ sɔɔmɔ nitsumɔ lɛ mli lɛ, ni mihiɛ miitse lɛ diɛŋtsɛ.

Yɛ nibii ni gbalaa mɔ sɛɛ nɛɛ fɛɛ sɛɛ lɛ, mibɔ mɔdɛŋ koni mahiɛ mumɔŋ nifeemɔ gbɛ kpakpa ni afo afɔ̃ shi lɛ mli. Mihe kar ko ni yɔɔ hewalɛ, ni hi kɛha shiɛmɔ nitsumɔ lɛ yɛ wɔ akutso ni tamɔ akrowa lɛ mli, ni mitsa migbɛgbamɔ nitsumɔ lɛ nɔ kɛtsɔ yelikɛbuamɔ ni mibi yoo Joyce kɛha mi lɛ nɔ. Mihiŋmɛi lɛ tee nɔ efite fiofio kɛyashi beni mihiŋmɛi kome lɛ enaaa nii dɔŋŋ. Datrɛfoi lɛ kɛ glase hiŋmɛi ko to najiaŋ. Shi, kɛtsɔ shwɛde ni haa anaa nii wuji kɛ woji ni akɛ niŋmaa wuji eŋmala lɛ nɔ lɛ, minyɛɔ mikɛ ŋmɛlɛtswai enumɔ tsuɔ nii gbi kome ni mikɛkaseɔ nii yɛ be mli ni mikɛ hiŋmɛi kome ni eshwɛ lɛ tsuɔ nii lɛ.

Nikasemɔ be efee nɔ ni jara wa waa kɛha mi be fɛɛ be. No hewɔ lɛ, obaanyɛ osusu bɔ ni minaa kpɛ mihe hã beni be ko ni mikaseɔ nii shwane lɛ, kɛkɛ ni trukaa lɛ, minyɛɛɛ mana nii dɔŋŋ lɛ he okwɛ. Ebafee tamɔ nɔ ni mɔ ko egbe kane lɛ. Agbɛnɛ minaaa nii kwraa dɔŋŋ. Te mifee tɛŋŋ mitsa nikasemɔ lɛ nɔ lɛ? Ojogbaŋŋ, eyɛ mli akɛ amrɔ nɛɛ minuuu nii jogbaŋŋ moŋ, shi mikɛ mihe fɔ̃ɔ kasɛt kɛ suɔmɔ mli ni miweku lɛ jɛɔ amɛkɛ yelikɛbuamɔ haa mi koni mihe awa yɛ mumɔŋ lɛ nɔ.

Hiɛmiamɔ Kɛyashi Naagbee

Amrɔ nɛɛ, akɛni miye fe afii oha hewɔ lɛ, nibii fioo komɛi eyaaa nɔ jogbaŋŋ yɛ migbɔmɔtsoŋ hewalɛnamɔ gbɛfaŋ, ni ehe ebahia ni maba minitsumɔ shi. Bei komɛi lɛ, mifeɔ basaa fioo. Yɛ anɔkwale mli lɛ, amrɔ nɛɛ ni minaaa nii kwraa hewɔ lɛ, bei komɛi lɛ, miduɔ gbɛ! Miisumɔ ni mafee Biblia mli nikasemɔi ekoŋŋ, shi yɛ bɔ ni migbɔmɔtsoŋ hewalɛnamɔ yɔɔ lɛ hewɔ lɛ, minyɛɛɛ maje kpo ni miyatao mɛi. Shishijee lɛ, enɛ hao mi. Ehe bahia ni makpɛlɛ minyɛmɔi anɔ ni maná nɔ ni minyɛɔ mitsuɔ lɛ he miishɛ. Enɛ jeee nɔ ko ni yɔɔ mlɛo kwraa. Shi kɛlɛ, kwɛ hegbɛ ni eji akɛ daa nyɔŋ nɔ lɛ, minyɛɔ mibuɔ be ni mikɛtsu nii ni mikɛwie wɔ Nyɔŋmɔ kpeteŋkpele, ni ji Yehowa lɛ he lɛ he akɔntaa. Kɛ́ hegbɛi anaa gbele kɛha mi koni magba Biblia he sane, kɛ́ mɛi tamɔ helatsɛmɛi akwɛlɔi, jarayelɔi, kɛ mɛi krokomɛi ba mishia lɛ, miŋɔɔ hegbɛ lɛ ni mikɛ amɛ gbaa sane—yɛ ŋaa mli.

Jɔɔmɔi ni haa mɔ tsui nyɔɔ emli lɛ ateŋ ekome ni fe fɛɛ ji ni mana ni miweku lɛ mli yinɔbii ni ji ejwɛ lɛ miisɔmɔ Yehowa yɛ anɔkwayeli mli. Mɛnɛɛmɛi ateŋ mɛi komɛi eshɛ he ni amɛmiisɔmɔ ákɛ gbɛgbalɔi yɛ hei ni hiamɔ lɛ eda yɛ ákɛ onukpai loo asafoŋ sɔɔlɔi, kɛ agbɛnɛ hu yɛ Betel. Yɛ anɔkwale mli lɛ, taakɛ miyinɔbii lɛ ateŋ mɛi babaoo ji lɛ, mikpa gbɛ akɛ nibii agbɛjianɔtoo nɛɛ naagbee lɛ baaba nɔŋŋ. Shi kwɛ shweremɔ ni miná yɛ afii nyɔŋmai kpawo ni mikɛsɔmɔ lɛ mli! Ehaa mitsui nyɔɔ mimli diɛŋtsɛ akɛ mikɛ mihe wo nɔ ko ni yɔɔ nyam nɛɛ mli.

Helatsɛmɛi akwɛlɔi ni basaraa mi lɛ wieɔ akɛ nɔ ni eha miyɔɔ wala mli ji hemɔkɛyeli ni miyɔɔ lɛ. Mikɛ amɛ kpãa gbee. Ekãa ni afeɔ yɛ Yehowa sɔɔmɔ mli lɛ haa shihilɛ feɔ nɔ ni hi fe fɛɛ. Taakɛ Maŋtsɛ David ji lɛ, manyɛ makɛɛ akɛ migbɔ kotokoto ni miyɛ afii ni miye lɛ he miishɛɛ.—1 Kronika 29:28.

(Nyɛmiyoo Muriel Smith tsɔ esɛɛ yɛ April 1, 2002, be mli ni aheɔ agbe wolo nɛɛ ŋmaa naa lɛ. Eshwɛ nyɔŋ kome pɛ ni eye afi 102, lɛɛlɛŋ akɛ eji anɔkwayeli kɛ tsuishiŋmɛɛ he nɔkwɛmɔnɔ kpakpa.)

[Mfonirii ni yɔɔ baafa 24]

Beni miye aaafee afii enumɔ, kɛ beni miye afii 19, beni mikɛ miwu Roy kpe lɛ

[Mfoniri ni yɔɔ baafa 26]

Wɔ kar kɛ shwiili ni wɔwo lɛ gbɛi akɛ Mizpa

[Mfoniri ni yɔɔ baafa 27]

Mi kɛ miwu Roy yɛ afi 1971 mli