Shihilɛ yɛ Apasa Hemɔkɛyeli Kudɔmɔ Shishi

BE MLI ni oshiɔ shia lɛ, okɛ mɔ ko kpe hiɛ kɛ hiɛ. Otɛ waa. Loofɔlɔ henɔ ko bolɔɔ nyɔɔŋ. Ofɔɔ lamɔ kome too lɛ nɔŋŋ lamɔ shii abɔ. Kɛha mɛi pii lɛ, eji nifeemɔi komɛi kɛkɛ ni yeee mɔ awui. Shi kɛha mɛi komɛi yɛ Afrika Anaigbɛ lɛ, abaanyɛ abu enɛɛmɛi akɛ okadii, nɔ ko ni miiba he okadii, loo shɛɛ saji ni jɛ mumɔi aje lɛ mli. Kɛ eji shade kpakpa loo amanehulu lɛ, asusuɔ akɛ ebɛŋkɛ kpaakpa, ni okadi ni ekɛhaa lɛ kɛ eshishitsɔɔmɔ lɛ ji nɔ ni tsɔɔ.

Eji anɔkwale akɛ, maji ni bɛ Afrika hu heɔ apasa hemɔkɛyelii amɛyeɔ. Yɛ afii babaoo ni gbɔmɛi babaoo ni yɔɔ China kɛ tsutsu Soviet Union kwasafo maji lɛ amli lɛ kɛhi shi yɛ he ni aheɔ ayeɔ titri yɛ akɛ Nyɔŋmɔ ko bɛ lɛ fɛɛ sɛɛ lɛ, amɛkã he amɛkɛ amɛhe kpɛtɛɔ apasa hemɔkɛyelii ahe lolo. Yɛ Anaigbɛ maji lɛ amli lɛ, mɛi pii yabiɔ ŋulamiiaŋkwɛlɔi nɔ ni baaba, amɛsheɔ Sohaa ni yagbeɔ gbi ni ji 13 yɛ nyɔŋ ko nɔ lɛ gbeyei, ni amɛtaooo alɔnte diji. Mɛi komɛi ni yɔɔ shikpɔŋ lɛ nɔ Kooyigbɛ Shɔŋŋ lɛ buɔ kooyigbɛ atatui lɛ amli lakpɛmɔi lɛ akɛ eji ta kɛ tsɛŋemɔ hela ni baaba he okadi. Yɛ India lɛ, tsɔnei wuji akudɔlɔi ni heɔ amɛyeɔ akɛ ehe miihia ni amɛná bɔlɛ bɔni afee ni eha amɛgbɔmɔtso lɛ afee ŋanii yɛ gbii ni jeŋ edɔ lɛ nɔ lɛ miigbɛ AIDS kɛmiishwã. Yɛ Japan lɛ, nitsulɔi ní gbaa gbɛ yɛ shikpɔŋ lɛ shishi lɛ heɔ amɛyeɔ akɛ kɛji yoo ko yanyiɛ gbɛ ni agbaa yɛ shikpɔŋ lɛ shishi lɛ eko nɔ dani agbe naa lɛ, ekɛ shade fɔŋ baa. Apasa hemɔkɛyelii hu shwereɔ yɛ kpɔiaŋgbɔlemɔ ni ebatsɔ nitsumɔ lɛ mli. Volleyball tswalɔ ko kɛɛ yɛ omanye ni eyaa nɔ eyeɔ lɛ he akɛ ejɛ sɔks diŋ ni ewoɔ, yɛ nɔ najiaŋ ni eeewo eyɛŋ lɛ hewɔ. Kɛ́ akɛɛ aawie enɛ he lɛ, je baatsere wɔ.

Ni bo hu? Ani ekolɛ bo hu oyɛ teemɔŋ sane ko, gbeyeishemɔ ni anyɛɛɛ atsɔɔ shishi? Ani “hemɔkɛyeli, hemɔkɛyeli fã kɛ fã, loo kusum ko mlitsɔɔmɔ ni etamɔ nɔ ni nilee bɛ mli” ená onɔ hewalɛ? Hetoo ni obaaha lɛ baanyɛ ajie enɛ kpo, ejaakɛ nakai ji bɔ ni wolo ko ni akɛtaoɔ saji amli lɛ tsɔɔ wiemɔ “apasa hemɔkɛyeli” lɛ shishi.

Mɔ ni haa apasa hemɔkɛyeli náa hewalɛ yɛ eyiŋkpɛi kɛ edaa gbi shihilɛ nɔ lɛ miiŋmɛ gbɛ koni nɔ ko ni lɛ diɛŋtsɛ lɛ enuuu shishi jogbaŋŋ lɛ aye enɔ. Ani nilee yɛ enɛ mli? Ani esa akɛ wɔba wɔhe shi wɔha nɔ ni ekolɛ eji hewalɛ fɔŋ ni bɛ faŋŋ ni tamɔ nɛkɛ? Ani apasa hemɔkɛyeli ji gbɔjɔmɔ ni yeee awui ko loo hegbeyeiwoo nɔ ko ni yɔɔ oshara?