Amɛmii Shɛ Amɛhe akɛ Amɛkase Nikanemɔ!

YƐ SOLOMON ISLANDS hei komɛi lɛ, ehe bahia ni mɛi aaashɛ oha mlijaa 80 ní amɛbatsɔmɔ Yehowa Odasefoi bianɛ lɛ kɛ nii ni anyɛɛɛ akane lɛ he naagba akpe. Jeee akɛ enɛ eha amɛhe ni amɛkɛwoɔ asafoŋ kpeei amli daa otsi lɛ eba shi kɛkɛ, shi eha efee nɔ ni wa waa kɛha amɛ hu akɛ amɛaatsɔɔ mɛi krokomɛi Maŋtsɛyeli lɛ he anɔkwalei lɛ. Ani ebaanyɛ eba lɛ akɛ mɛi ni edara ní mɔko pɛnsil mli dã po lɛ aaatsɔmɔ mɛi ni le nikanemɔ lɛɛlɛŋ?

Akɛ wolo bibioo ni ji Apply Yourself to Reading and Writing (Kasemɔ Nikanemɔ kɛ Niŋmaa), ni Yehowa Odasefoi fee lɛ etsu nii yɛ nikanemɔ kɛ niŋmaa skul lɛ shishi yɛ nɔ ni miihe ashɛ Yehowa Odasefoi asafoi fɛɛ mli yɛ Solomon Islands hei srɔtoi fɛɛ. Niiashikpamɔi fioo komɛi ni nyiɛ sɛɛ nɛɛ tsɔɔ bɔ ni kɛtsɔ nɛkɛ gbɛjianɔtoo nɛɛ nɔ lɛ, aye abua mɛi ohai abɔ ni amɛná hesaai heei. Nɔ ni fe fɛɛ lɛ, nikanemɔ ni amɛkase lɛ eha amɛnyɛ amɛmiiye amɛhemɔkɛyeli lɛ he odase jogbaŋŋ.—1 Petro 3:15.

Maŋsɛɛ sanekpakpa shiɛlɔ ko ni ahã lɛ nitsumɔ yɛ asafo ko ni Maŋtsɛyeli shiɛlɔi ni fa fe oha yɔɔ mli lɛ mli lɛ yɔse akɛ yɛ daa otsi Biblia mli nikasemɔ ni akɛ Buu-Mɔɔ feɔ lɛ shishi lɛ, mɛi ni hiɛ amɛ diɛŋtsɛ amɛwoji tɛtrɛbii lɛ faaa, ni amɛteŋ mɛi fioo ko pɛ hãa saji ahetoo. Mɛni hewɔ? Amɛleee nikanemɔ. Beni asafo lɛ tswa adafi akɛ ato skul he gbɛjianɔ ni akɛbaatsɔɔ nikanemɔ kɛ niŋmaa lɛ he adafi lɛ, maŋsɛɛ sanekpakpa shiɛlɔ lɛ kɛ ehe hã kɛ miishɛɛ akɛ ebaafee tsɔɔlɔ. Shishijee mli lɛ, nikaselɔi fioo ko pɛ ba, shi etsɛɛɛ ni mɛi ni fa fe 40, ni amɛye afii srɔtoi bɔi baa.

Mɛni jɛ mli ba? Maŋsɛɛ sanekpakpa shiɛlɔ lɛ gba akɛ: “Beni aje nikanemɔ kɛ niŋmaa lɛ shishi etsɛɛɛ nɔŋŋ lɛ, mitee jara lɛ nɔ leebi ŋmɛji ekpaa koni miyahe niyenii maha maŋsɛɛ sanekpakpa shiɛlɔi ashia mli bii lɛ. Mina nikaselɔi lɛ ekomɛi yɛ jɛmɛ, mɛi ni darako kwraa lɛ po, ni amɛmiihɔɔ akokooshi kɛ yelibaai. Mɛni hewɔ? Ejaakɛ amɛmiitao amɛná shika bɔ ni sa amɛkɛhe pɛn kɛ niŋmaa wolo ni amɛkɛbaakase nii yɛ nikanemɔ kɛ niŋmaa  skul lɛ shishi! Agbɛnɛ hu, nakai nikasemɔ lɛ ni akɛ he woɔ mli lɛ gbeleɔ gbɛ koni mɔ diɛŋtsɛ aná Buu-Mɔɔ wolo tɛtrɛɛ lɛ eko.” Ekɛfata he akɛ: “Amrɔ nɛɛ yɛ asafoŋ Buu-Mɔɔ Nikasemɔ lɛ shishi lɛ, gbekɛbii kɛ onukpai fɛɛ kɛ amɛhe woɔ mli pɛpɛɛpɛ, ni wɔsanegbaai lɛ yɛ miishɛɛ.” Nɛkɛ maŋsɛɛ sanekpakpa shiɛlɔ nɛɛ ná miishɛɛ waa diɛŋtsɛ, beni klasbii lɛ ateŋ mɛi ejwɛ bi kɛji amɛbaanyɛ amɛkɛ amɛhe awo maŋshiɛmɔ nitsumɔ lɛ mli lɛ, ejaakɛ taakɛ bɔ ni amɛtsɔɔ mli lɛ, “amɛsheee gbeyei dɔŋŋ” lɛ.

Sɛɛnamɔi kpakpai ni ejɛ mli kɛbaha nikaselɔi ni kɛ amɛhe woɔ nikanemɔ kɛ niŋmaa skul lɛ mli lɛ, etee hiɛ kwraa fe nii ni akaseɔ ekanemɔ kɛ eŋmaa kɛkɛ. Ákɛ nɔkwɛmɔnɔ lɛ, Odasefonyo ko ŋa ni heee yeee lɛ bafee haomɔ jɛɛhe kɛha asafo lɛ afii babaoo. Kɛji emli wo la fioo nɔŋŋ pɛ lɛ, etswiaa mɛi tɛi, ni ekɛ tso tutuaa yei krokomɛi po. Kɛ ekɛ ewu tee Kristofoi akpeei ashishi bei komɛi lɛ, eyeɔ ehe awuŋa aahu akɛ nuu lɛ babɔi hiŋmɛi glase ni yɔɔ tũu bumɔ, bɔni afee ni yoo lɛ akafolɔ enaa akɛ eekwɛ yei krokomɛi.

Shi kɛlɛ, beni nikanemɔ kɛ niŋmaa skul lɛ je shishi etsɛɛɛ lɛ, nɛkɛ yoo nɛɛ kɛ heshibaa bi akɛ: “Ani manyɛ mafata klasbii lɛ ahe?” Aha lɛ hetoo akɛ hɛɛ. Kɛjɛ no nɔ kɛyaa lɛ, efooo klas loo asafoŋ kpee mli gbi ko gbi ko. Ebɔ enikanemɔ kɛ niŋmaa lɛ he mɔdɛŋ waa ni ená hiɛyaa ni yɔɔ naakpɛɛ ni hã ená miishɛɛ waa. Enibimɔ ni nyiɛ sɛɛ ji akɛ: “Ani manyɛ maná Biblia mli nikasemɔ?” Ewu kɛ lɛ bɔi nikasemɔ kɛ miishɛɛ, ni ekã he etee hiɛ yɛ enyɛmɔ ni eyɔɔ yɛ nikanemɔ kɛ niŋmaa he lɛ mli kɛ nilee ni eyɔɔ yɛ Biblia lɛ mli lɛ.

Ebaanyɛ efee gbɛtsii nii wulu kɛha mɔ ko ni eye afii 50 ni mɔko pɛnsil mli dã lɛ akɛ eeemɔ pɛn loo pɛnsil mli kɛkɛ ni ebɔi niŋmaa okadii lɛ aŋmalamɔ. Yɛ nikasemɔ lɛ shishijee gbɛ lɛ, mɛi komɛi awaobii anaa fee totrofɛi yɛ nineshiwalɛ ni amɛkɛnyɛɔ pɛnsil kɛ wolo lɛ nɔ lɛ hewɔ. Yɛ otsii komɛi asɛɛ be mli ni nikaselɔi lɛ ekomɛi egbo deŋme yɛ pɛnsil lɛ mli mɔmɔ kɛ ekudɔmɔ sɛɛ lɛ, amɛkɛ gbeewalɛ kɛ hiɛ ŋmɔlɔŋmɔlɔ kɛɛ waa akɛ: “Manyɛ matsɔmɔ minine oyayaayai yɛ wolo lɛ nɔ bɔ ni naagba ko kwraa bɛ he!” Nikaselɔi lɛ ahiɛyaa ni tsɔɔlɔi lɛ naa lɛ hu hãa tsɔɔlɔi lɛ amii shɛɔ amɛhe. Tsɔɔlɔi lɛ ateŋ mɔ kome kɛɛ akɛ: “Klas ko nii ni aaatsɔɔ lɛ ji miishɛɛ nɔ̃ kpele diɛŋtsɛ, ni bei pii lɛ, nikaselɔi lɛ jieɔ anɔkwa hiɛsɔɔ ni amɛyɔɔ yɛ gbɛjianɔtoo ní jɛ Yehowa ŋɔɔ nɛɛ he lɛ kpo yɛ faŋŋ mli, kɛtsɔ dɛ ni amɛtswaa yɛ nikasemɔ lɛ eko fɛɛ eko naagbee lɛ nɔ.”

Nɛkɛ Odasefoi ni agbɛnɛ amɛle nikanemɔ kɛ niŋmaa nɛɛ lɛ, fataa maŋsɛɛ sanekpakpa shiɛlɔi lɛ ahe kɛnáa miishɛɛ. Mɛni hewɔ? Ejaakɛ amɛbaanyɛ amɛjɛ amɛnyɛmɔi ni amɛyɔɔ yɛ niŋmaa kɛ nikanemɔ mli lɛ mli agbɛnɛ ní amɛwo Yehowa hiɛ nyam.

[Mfonirii ni yɔɔ baafa 8, 9]

Gbekɛbii kɛ onukpai fɛɛ ahiɛ sɔɔ nikanemɔ kɛ niŋmaa skul lɛ