Ani Obaahiɛ Onɔkwayeli lɛ Mli?

AFILIMATAI enyiɛ gboi nyɛ? Mɔ ko mɔ ko leee, ni ekolɛ mɛi fioo ko susuɔ amɛhe—loofɔji babaoo yɔɔ. Shi kɛlɛ, Yehowa susuɔ amɛhe. Beni Yesu wieɔ loofɔji ni eka shi faŋŋ akɛ amɛjeee nɔ ko nɛɛ ahe lɛ, ekɛɛ ekaselɔi lɛ akɛ: “Amɛteŋ ekome folo enyɔŋ shikpɔŋ, ja ejɛ nyɛtsɛ lɛ dɛŋ.” Ekɛfata he akɛ: “Nyɛkashea gbeyei; nyɛjara wa aahu fe afilimatai babaoo.”—Mateo 10:29, 31.

Sɛɛ mli lɛ, kaselɔi lɛ nu bɔ ni Yehowa buɔ amɛ akɛ amɛjara wa lɛ shishi jogbaŋŋ. Amɛteŋ mɔ kome, ni ji bɔfo Yohane ŋma akɛ: “Enɛ mli Nyɔŋmɔ suɔmɔ ni ekɛsumɔɔ wɔ lɛ je kpo yɛ, akɛ Nyɔŋmɔ tsu lɛ diɛŋtsɛ ebi koome lɛ kɛba je lɛŋ, koni wɔtsɔ enɔ wɔná wala.” (1 Yohane 4:9) Jeee kpɔmɔ nɔ lɛ pɛ Yehowa kɛhaa, shi moŋ emaa nɔ mi ehaa etsuji fɛɛ akɛ: “Mishiŋo ni misaa mikwaŋo gbi ko gbi ko.”—Hebribii 13:5.

Eyɛ faŋŋ akɛ, suɔmɔ ni Yehowa yɔɔ kɛha ewebii lɛ ma shi shiŋŋ. Shi kɛlɛ, sanebimɔ lɛ teɔ shi akɛ, ‘Ani wɔkɛ wɔhe ekpɛtɛ Yehowa he aahu akɛ wɔshiŋ lɛ gbi ko gbi ko?’

Mɔdɛŋ ni Satan Bɔɔ Koni Eku Emuuyeli Mli ni Wɔhiɛ lɛ Mli

Beni Yehowa gbala Satan jwɛŋmɔ kɛba Hiob anɔkwayeli gbɛ ni ekɔ lɛ nɔ lɛ, Satan ha hetoo akɛ: “Ani Hiob baajá bo kɛji enaaa nɔ ko kɛjɛɛɛ mli?” (Hiob 1:9, Today’s English Version) Etsɔɔ akɛ anɔkwa ni adesai yeɔ Nyɔŋmɔ lɛ damɔ ‘nɔ ni amɛbaaná kɛjɛ mli lɛ’ nɔ titri. Kɛ́ enɛ ji anɔkwale lɛ, no lɛ Kristofonyo fɛɛ Kristofonyo emuuyeli lɛ mli baanyɛ agbɔjɔ—kɛ́ nɔ ni akɛhaa lɛ kaa mɔ bɔ ni sa.

Yɛ Hiob sane lɛ mli lɛ, Satan kɛɛ yɛ shishijee mli akɛ anɔkwa ni Hiob yeɔ Nyɔŋmɔ lɛ sɛɛ baafo kɛji enibii ni ebuɔ akɛ amɛjara wa diɛŋtsɛ lɛ ahiɛ kpata. (Hiob 1:10, 11) Beni heguɔgbee nɛɛ baaa mli lɛ, Satan kɛɛ akɛ: “Gbɔmɔ kɛ nɔ fɛɛ nɔ ni eyɔɔ lɛ baaha bɔni afee ni ehi wala mli.” (Hiob 2:4, TEV) Eyɛ mli akɛ nɔ ni Satan kɛɛ lɛ baanyɛ afee anɔkwale yɛ mɛi komɛi agbɛfaŋ moŋ, shi Hiob eŋmɛɛɛ enɔkwayeli lɛ he. Yinɔsane ni aŋma afɔ̃ shi lɛ tsɔɔ akɛ eji anɔkwale. (Hiob 27:5; 42:10-17) Ani oyɛ anɔkwayeli ni tamɔ no nɔŋŋ? Aloo obaaha Satan afite onɔkwayeli lɛ? Beni wɔpɛiɔ anɔkwalei komɛi ni kɔɔ Kristofonyo fɛɛ Kristofonyo he lɛ mli wɔkwɛɔ lɛ, susumɔ bo diɛŋtsɛ ohe okwɛ.

Bɔfo Paulo hé eye akɛ anɔkwa Kristofonyo anɔkwayeli lɛ baanyɛ afee nɔ ni mli wa waa. Eŋma akɛ: “Miyɛ hewalɛ yɛ nɔ, ákɛ gbele jio wala jio . . . nii ni yɔɔ nɛɛ jio, nii ni baaba lɛ jio . . . aloo nii ni abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ni yɔɔ Kristo Yesu, wɔ-Nuŋtsɔ lɛ, mli lɛ mli.” (Romabii 8:38, 39) Wɔbaanyɛ wɔná hemɔkɛyeli ni tamɔ nakai nɔŋŋ kɛji suɔmɔ ni wɔyɔɔ kɛha Yehowa lɛ mli wa. Nakai suɔmɔ lɛ ji kpãa ko ni anyɛɛɛ afite lɛ, nɔ ni gbele po nyɛŋ aye nɔ kunim.

Kɛ́ nakai wekukpaa kã wɔkɛ Nyɔŋmɔ teŋ lɛ, wɔbiŋ gbi ko gbi ko akɛ, ‘Yɛ biɛ afii fioo komɛi  asɛɛ lɛ, ani makã he masɔmɔ Yehowa lolo?’ Nakai yiŋkɔshikɔshifeemɔ lɛ baatsɔɔ akɛ anɔkwa ni wɔyeɔ Nyɔŋmɔ lɛ damɔ nɔ ni baanyɛ aba wɔnɔ yɛ wɔshihilɛ be mli lɛ nɔ. Shihilɛi ni yɔɔ sɛɛ lɛ esaaa anɔkwa emuuyeli mlihiɛmɔ he. Edamɔ gbɔmɛi ni wɔji yɛ mligbɛ lɛ nɔ. (2 Korintobii 4:16-18) Kɛ́ wɔsumɔɔ Yehowa kɛ wɔtsui fɛɛ lɛ, no lɛ wɔhaŋ enijiaŋ aje wui kɔkɔɔkɔ.—Mateo 22:37; 1 Korintobii 13:8.

Shi kɛlɛ, esa akɛ wɔkai akɛ, be fɛɛ be lɛ, Satan miitao ni efite emuuyeli mli ni wɔhiɛ lɛ. Ebaanyɛ eka wɔ koni wɔŋmɛɛ wɔhe wɔha heloo lɛ sɛɛdii nii lɛ, wɔŋmɛɛ wɔhe wɔha tipɛŋfoi anɔnyɛɛ, loo wɔha amanehulu ko aha wɔshi anɔkwale lɛ. Eyɛ mli akɛ emuu ni wɔ diɛŋtsɛ lɛ wɔyeee lɛ haa Satan nitsumɔ lɛ feɔ mlɛo moŋ, shi jeŋ ni etsi ehe kɛjɛ Nyɔŋmɔ he lɛ ji ehefatalɔ titri yɛ nɛkɛ tutuamɔ nɛɛ mli. (Romabii 7:19, 20; 1 Yohane 2:16) Ni kɛlɛ, wɔyɛ shihilɛi kpakpai babaoo yɛ nɛkɛ ta nɛɛ mli, ni amɛteŋ nɔ ni fe fɛɛ ji anɔkwa ni eji akɛ wɔjeee mɛi ni leee Satan ŋaatsɔɔi lɛ.—2 Korintobii 2:11.

Mɛni ji Satan ŋaatsɔɔi lɛ? Paulo tsɛ́ amɛ yɛ ewolo ni eŋma kɛyaha Efesobii lɛ amli akɛ “ŋaatsɔɔi,” loo “gbɛ nigii.” * (Efesobii 6:11; NW shishigbɛ niŋmaa) Satan kɛ ŋaatsɔɔi ni yɔɔ nigii shwieɔ wɔgbɛ lɛ nɔ bɔni afee ni efite wɔ emuuyeli lɛ. Wɔdaa shi akɛ, wɔbaanyɛ wɔyɔse nɛkɛ gbɛ nigii nɛɛ, ejaakɛ aŋmala Abonsam gbɛ̀i lɛ ashwie shi aha wɔ yɛ Nyɔŋmɔ Wiemɔ lɛ mli. Mɔdɛŋ ni Satan bɔ koni efite Yesu kɛ Hiob emuuyeli lɛ feɔ gbɛ̀i komɛi ni etsɔɔ nɔ koni ekɛfite wɔ Kristofoi anɔkwayeli lɛ he nɔkwɛmɔnɔ.

Anyɛɛɛ Afite Yesu Emuuyeli Mlihiɛmɔ Lɛ

Yɛ Yesu sɔɔmɔ nitsumɔ lɛ shishijee mli lɛ, Satan ná ekãa ni eka Nyɔŋmɔ Bi lɛ kɛtsɔ mpoa ni etswa lɛ koni eha tɛ atsɔ aboloo lɛ nɔ. Mɛɛ ŋaa nɛ! Yesu yeko nii gbii 40, no hewɔ lɛ, ŋwanejee ko bɛ he akɛ hɔmɔ miiye lɛ waa. (Luka 4:2, 3) Satan kɛɛ Yesu akɛ etsu nɔ ni etsui shweɔ lɛ he nii amrɔ nɔŋŋ, yɛ gbɛ ni teɔ shi shiɔ Yehowa suɔmɔnaa nii lɛ nɔ. Nakai nɔŋŋ ŋmɛnɛ, je lɛŋ nifeemɔ lɛ woɔ hewalɛ ni atsu nɔ ni tsui sumɔɔ lɛ he nii amrɔ nɔŋŋ, ni asusuuu nɔ ni baajɛ mli kɛba lɛ he kwraa. Shɛɛ sane lɛ ji akɛ, ‘Ehe miihia bo amrɔ nɛɛ nɔŋŋ,’ loo yɛ kukufoo mli lɛ, ‘Bo lɛ feemɔ nɔ ni osumɔɔ kɛkɛ!’

Eji Yesu gbe hɔmɔ ni yeɔ lɛ lɛ ni esusuuu nɔ ni baajɛ mli kɛba lɛ he kulɛ, Satan baaye omanye yɛ ka ni eka koni eha Yesu aŋmɛɛ ehemɔkɛyeli lɛ he kɛsaa lɛ mli. Yesu susu saji ahe yɛ mumɔŋ gbɛ nɔ, ni ekɛ ekãa ha hetoo akɛ: “Aŋma akɛ, ‘Jeee aboloo kɛkɛ nɔ gbɔmɔ tsɔɔ ni eyi náa wala, shi Nyɔŋmɔ wiemɔ fɛɛ wiemɔ nɔ moŋ ni.’”—Luka 4:4; Mateo 4:4.

Kɛkɛ ni Satan tsake egbɛ lɛ. Be mli ni Abonsam kɛ Ŋmalɛi, ni Yesu jɛɔ mli etsɛɔ wiemɔi ayisɛɛ lɛ tsuɔ nii yɛ gbɛ ni ejaaa nɔ lɛ, ewo Yesu hewalɛ koni ejɛ sɔlemɔwe lɛ yiteŋ shɔŋŋ lɛ nɔ egbee shi. Satan kɛɛ akɛ, ‘Bɔfo ko baabaa oyi.’ Yesu efeko eyiŋ akɛ ebaabi naakpɛɛ hebuu ko kɛjɛ e-Tsɛ ŋɔɔ koni ekɛgbala jwɛŋmɔ kɛba lɛ diɛŋtsɛ enɔ. Yesu kɛɛ akɛ: “Kaaka [Yehowa,  NW], o-Nyɔŋmɔ lɛ.”—Mateo 4:5-7; Luka 4:9-12.

Naagbee ŋaa ni Satan kɛtsu nii lɛ yɛ tɛ̃ɛ diɛŋtsɛ. Ebɔ mɔdɛŋ ni ekɛ Yesu ato gbɛjianɔ kɛtsɔ je lɛ kɛ emli anunyam lɛ fɛɛ ni ekɛɛ ekɛbaaha lɛ kɛji efee jamɔ he nɔ kome pɛ lɛ nɔ. Eehe efee nɔ fɛɛ nɔ ni Satan yɔɔ ni ekɛbaaha. Shi te aaafee tɛŋŋ ni Yesu afee jamɔ he nɔ ko yɛ e-Tsɛ lɛ henyɛlɔ ni fe fɛɛ lɛ hiɛ? Esusuŋ enɛ feemɔ he kɔkɔɔkɔ! Yesu ha hetoo akɛ: “[Yehowa, NW], o-Nyɔŋmɔ lɛ, ojá, ni lɛ kɛkɛ osɔmɔ!”—Mateo 4:8-11; Luka 4:5-8.

Beni nɛkɛ mɔdɛŋbɔi etɛ nɛɛ yeee omanye lɛ, Satan ‘shi Yesu kɛyashi be kroko ni sa.’ (Luka 4:13) Enɛ tsɔɔ akɛ be fɛɛ be nɛɛ Satan efee klalo akɛ eeená hegbɛ ko koni eka Yesu emuuyeli mlihiɛmɔ lɛ. Be ni sa ko te shi yɛ afii enyɔ kɛ fã ko sɛɛ beni Yesu je shishi koni esaa ekaselɔi lɛ kɛha egbele ni ebɛŋkɛ lɛ. Bɔfo Petro kɛɛ akɛ: “Naa ohe mɔbɔ, Nuŋtsɔ, enɛ akagbeleo fɔ̃ɔŋfɔ̃!”—Mateo 16:21, 22.

Ani nakai ŋaa he jwɛŋmɔ kpakpa ni ahiɛ shi ejaaa lɛ baaŋɔɔ Yesu naa, akɛni ejɛ ekaselɔi lɛ ateŋ mɔ kome ŋɔɔ lɛ hewɔ? Yesu yɔse oya akɛ nakai wiemɔi lɛ jieɔ Satan susumɔi akpo, shi jeee Yehowa nɔ. Kristo ha hetoo kɛ ekãa akɛ: “Ho misɛɛ, Satan! ootɔ̃tɔ̃ minane: ejaakɛ ojwɛŋŋ Nyɔŋmɔ nii ahe, shi gbɔmɛi anii ahe moŋ ojwɛŋɔ.”—Mateo 16:23.

Akɛni Yesu yɛ suɔmɔ kɛha Yehowa be fɛɛ be hewɔ lɛ, Satan nyɛɛɛ aku enɔkwayeli lɛ mli. Nɔ ko nɔ ko bɛ ni Abonsam baanyɛ ekɛha, kaa ko bɛ, bɔ fɛɛ bɔ ni emli wa ha, ní baanyɛ egbɔjɔ Yesu anɔkwayeli kɛha eŋwɛi Tsɛ lɛ mli. Ani wɔbaanyɛ wɔtswa wɔfai shi nakai nɔŋŋ kɛ shihilɛ ha ebafee nɔ ni wa akɛ wɔɔhiɛ wɔ anɔkwayeli lɛ mli? Hiob nɔkwɛmɔnɔ lɛ baaye abua wɔ koni wɔnu kaai ni wɔbaanyɛ wɔkɛkpe lɛ shishi jogbaŋŋ.

Anɔkwayeli yɛ Be Mli ni Ayɔɔ Amanehulu Shishi

Taakɛ Hiob yɔse lɛ, amanehulu baanyɛ aba wɔ nɔ be fɛɛ be. Eji nuu ko ni ebote gbalashihilɛ mli ni yɔɔ bii nyɔŋma kɛ mumɔŋ gbɛjianɔtoo kpakpa. (Hiob 1:5) Shi Hiob emuuyeli mlihiɛmɔ kɛha Nyɔŋmɔ lɛ bafee sane yɛ ŋwɛi gwabɔɔ lɛ mli ni eleee, ni Satan tswa efai shi akɛ ebaafite ehemɔkɛyeli lɛ yɛ gbɛ fɛɛ gbɛ ni eeenyɛ nɔ.

Etsɛɛɛ nɔŋŋ ni Hiob heloonaa nibii ahiɛ kpata. (Hiob 1:14-17) Ni kɛlɛ, Hiob anɔkwayeli lɛ kpee kaa lɛ naa ejaakɛ ekɛ ehiɛ efɔko shika nɔ kɔkɔɔkɔ. Beni Hiob kaiɔ be ni eji niiatsɛ lɛ, ekɛɛ akɛ: “Kɛji miŋɔ shika mifee mibobaa nɔ̃, . . . kɛji minya akɛ minii ní miná lɛ fá, . . . no hu ji nɔ̃ sha . . . , ejaakɛ kulɛ mikwá Mawu ní yɔɔ ŋwɛi lɛ.”—Hiob 31:24, 25, 28.

Ŋmɛnɛ, wɔ hu nɔ fɛɛ nɔ ni wɔyɔɔ lɛ baanyɛ aje wɔdɛŋ yɛ be kukuoo ko mli. Atswa nitsulɔ ko ni ji Yehowa Odasefoi lɛ ateŋ mɔ kome lɛ ojo, ni eha shika babaoo ni eyɔɔ yɛ shikatoohe lɛ fɛɛ tã. Ekpɛlɛ nɔ yɛ faŋŋ mli akɛ: “Eshwɛ fioo kulɛ miná tsui hela. Yɛ anɔkwale mli lɛ, eji jeee mikɛ Nyɔŋmɔ teŋ wekukpaa lɛ hewɔ kulɛ, maná eko. Ni kɛlɛ, nɛkɛ niiashikpamɔ nɛɛ ha miyɔse akɛ mumɔŋ nibii jeee nibii ni baa klɛŋklɛŋ yɛ mishihilɛ mli. Miishɛɛ ni shika ni mináa lɛ ha miná lɛ batsɔ nɔ ni he hiaa mi fe nɔ fɛɛ nɔ ni eshwɛ.” Nɛkɛ Odasefonyo nɛɛ eba enitsumɔ lɛ mli nibii lɛ ashi bɔ ni sa, ni be fɛɛ be nɛɛ esɔmɔɔ akɛ gbɛgbalɔi awalɔ, ni etuɔ ŋmɛlɛtswai 50 loo nɔ ni fe nakai daa nyɔŋ nɔ ewoɔ Kristofoi ashiɛmɔ nitsumɔ lɛ mli. Shi kɛlɛ, naagbai krokomɛi baanyɛ ekɛ haomɔi babaoo aba fe mɔ ko nii ni eyɔɔ ni aaaje edɛŋ.

Hiob yeko amaniɛbɔɔ ni kɔɔ enii ni eyɔɔ lɛ ahiɛkpatamɔ lɛ he ŋkɔmɔ egbeko naa ni enine shɛ wiemɔ nɔ akɛ ebii nyɔŋma lɛ egboi. Fɛɛ sɛɛ lɛ ekɛɛ lolo akɛ: “Aaajie Yehowa gbɛi lɛ yi kɛ̃.” (Hiob 1:18-21) Ani wɔbaahiɛ wɔ emuuyeli lɛ mli kɛji wɔweku lɛ mli bii babaoo gboi? Francisco, ni ji Kristofonyo nɔkwɛlɔ ko ni yɔɔ Spain lɛ bii enyɔ gboi yɛ bɔs mli oshara ko ni yɔɔ mɔbɔ mli. Ená miishɛjemɔ kɛtsɔ bɛŋkɛmɔ ni etsi ebɛŋkɛ Yehowa ni eha enitsumɔ lɛ tee hiɛ yɛ Kristofoi asɔɔmɔ nitsumɔ lɛ mli lɛ nɔ.

Yɛ be mli ni Hiob bii lɛ ahiɛ ekpata yɛ naakpɛɛ gbɛ nɔ po sɛɛ lɛ, kaa ni ekɛkpeɔ lɛ bako  naagbee. Satan kɛ hela ko ni anyaŋeɔ ni waa mɔ he tswa lɛ. Yɛ nakai be lɛ mli lɛ, Hiob ŋa wo lɛ ŋaa gbonyo. Ewo lɛ hewalɛ akɛ: “Kwá Nyɔŋmɔ ni ogbo!” Hiob ku ehiɛ eshwie eŋaawoo lɛ nɔ, ni ekɛ “enaabu efeee esha ko.” (Hiob 2:9, 10) Enɔkwayeli lɛ damɔɔɔ eweku lɛ henumɔŋ sɛɛfimɔ lɛ nɔ, shi moŋ edamɔ wekukpaa ni kã ekɛ Yehowa teŋ lɛ nɔ.

Flora, ní ewu kɛ ebinuu nukpa lɛ kɛ nɔ ni fe afii nyɔŋma ni eho nɛ ekwa Kristofoi agbɛ lɛ nuɔ henumɔi ni Hiob ná lɛ shishi. Ekpɛlɛ nɔ akɛ: “Kɛ́ onaaa sɛɛfimɔ kɛjɛɛɛ oweku lɛ ŋɔɔ amrɔ nɔŋŋ lɛ, ebaanyɛ efee nɔ ni haoɔ mɔ waa. Shi mile akɛ mináŋ miishɛɛ yɛ Yehowa gbɛjianɔtoo lɛ sɛɛ. No hewɔ lɛ, mifi shi shiŋŋ ni mikɛ Yehowa baye klɛŋklɛŋ gbɛhe yɛ be mli ni mibɔɔ mɔdɛŋ ni maya nɔ mafee ŋa kɛ nyɛ kpakpa lɛ. Misɔle be fɛɛ be, ni Yehowa waje mi. Yɛ shitee-kɛ-woo ni miwu kɛbaa lɛ fɛɛ sɛɛ lɛ, miji mɔ ko ni yɔɔ miishɛɛ ejaakɛ mikɛ mihe fɔ̃ɔ Yehowa nɔ kwraa.”

Nɔ kroko ni Satan tsɔ nɔ koni ekɛfite Hiob anɔkwayeli lɛ kɔɔ enanemɛi etɛ lɛ he. (Hiob 2:11-13) Kwɛ bɔ ni ebaahao lɛ eha beni amɛbɔi lɛ atɛŋbuu lɛ. Eji ekpɛlɛ amɛnaataamɔi lɛ anɔ kulɛ, hekɛnɔfɔɔ ni eyɔɔ yɛ Yehowa Nyɔŋmɔ mli lɛ baafite. Amɛŋaawoo ni jeɔ mɔ nijiaŋ wui lɛ baanyɛ akumɔ emumɔ kɛ enɔkwayeli lɛ, kɛkɛ lɛ, Satan ŋaatsɔɔ lɛ baaye omanye.

Nɔ ni tamɔɔɔ nakai lɛ, Hiob kɛɛ akɛ: “Mibemyeli lɛ miŋmɛŋ he kɛyashi beyinɔ ni magbo.” (Hiob 27:5) Ekɛɛɛ akɛ, ‘Mihaŋ nyɛshɔ mi emuuyeli lɛ kɛya!’ Hiob le akɛ enɔkwayeli lɛ damɔ lɛ kɛ suɔmɔ ni eyɔɔ kɛha Yehowa lɛ nɔ.

Blema Ŋaa ko ni Akɛtsɔɔ Mɔ Tsɔne

Satan kã he ekɛ ŋaawoo gbonyo loo wiemɔi ni asusuuu he ni jɛɔ nanemɛi kɛ nanemɛi heyelilɔi aŋɔɔ lɛ tsuɔ nii lolo. Nijiaŋwujee ni jɛ asafo lɛ mli lɛ baanyɛ afite hekɛnɔfɔɔ ni wɔyɔɔ lɛ yɛ gbɛ ni waaa nɔ fe yiwaa ni jɛ asafo lɛ sɛɛ. Kristofonyo onukpa ko ni tsutsu ko lɛ ena nɔ yɛ ta mli akɛ asraafonyo lɛ kɛ no to piŋmɔ ni ená yɛ nanemɛi Kristofoi komɛi awiemɔ ni asusuuu he kɛ nifeemɔi ahe lɛ he. Ekɛɛ yɛ sɛɛ mli akɛ: “Eji nii ni ehiii fe fɛɛ ni mitsɔ mli dã.”

Yɛ gbɛ kroko nɔ lɛ, wɔmli baanyɛ afu yɛ emuu ni wɔnanemɛi heyelilɔi lɛ yeee lɛ he aahu akɛ wɔkɛ nakai gbɔmɛi lɛ ateŋ mɛi komɛi baakpa wiemɔ loo wɔbaabɔi Kristofoi akpeei amli folɔmɔ. Ni wɔɔwo wɔtsui yɛ awui ni aye wɔhenumɔi lɛ baanyɛ afee sane ko ni he hiaa waa diɛŋtsɛ. Shi kwɛ awerɛho sane ni nakai nii ni akwɛɛɛ kɛyaaa shɔŋŋ lɛ baanyɛ efee ni wɔŋmɛ gbɛ ni nɔ ni mɛi krokomɛi feɔ loo amɛkɛɔ loo amɛkɛɛ lɛ agbɔjɔ wɔnii ni jara wa fe fɛɛ ni wɔyɔɔ—wɔkɛ Yehowa teŋ wekukpaa—lɛ mli. Kɛ́ wɔŋmɛ no gbɛ lɛ, no lɛ wɔbaagbee Satan blema ŋaatsɔɔ lɛ ekome mli.

Shishinumɔ yɛ he akɛ wɔɔkpá shishitoo mlai ni nɔ kwɔlɔ yɛ Kristofoi asafo lɛ mli lɛ gbɛ. Shi kɛ́ wɔkpa babaoo tsɔ gbɛ kɛjɛ wɔnanemɛi jalɔi ni kã he amɛyeee emuu lolo lɛ adɛŋ fe bɔ ni sa lɛ, no lɛ bɔ fɛɛ bɔ ni fee lɛ, wɔnine baanyɛ shi. Nɔ ni tamɔɔɔ nakai lɛ, Yehowa kɛ jwɛŋmɔ kpakpa tsuɔ nii yɛ nɔ ni ekpaa gbɛ yɛ wɔdɛŋ lɛ mli. Kɛ́ wɔkase enɔkwɛmɔnɔ lɛ, no lɛ ebaasaa wɔ koni wɔdamɔ emuu ni amɛyeee lɛ naa. (Efesobii 4:2, 32) Bɔfo Paulo kɛ ŋaawoo nɛɛ ha akɛ: “Nyɛmli afũa, shi nyɛkafea esha; hulu akanyɔ shi yɛ nyɛmlila lɛ nɔ, ni asaŋ nyɛkɛ nyɛhe akafɔ̃a shi nyɛhaa abonsam.”—Efesobii 4:26, 27.

Taakɛ Biblia lɛ tsɔɔ yɛ faŋŋ mli lɛ, Satan kɛ ŋaa gbɛ̀i srɔtoi babaoo tsuɔ nii bɔni afee ni—kɛ́ eeenyɛ lɛ—etao gbɛ ni eeetsɔ nɔ efite Kristofoia emuuyeli mlihiɛmɔ lɛ. Eŋaatsɔɔi lɛ ekomɛi feɔ heloo ni egbee shi lɛ fɛo, ni ekrokomɛi hu bafeɔ piŋmɔ jɛɛhe. Yɛ nɔ ni wɔsusu he kɛtsɔ hiɛ lɛ naa lɛ, obaanyɛ ona nɔ hewɔ ni esaaa akɛ wɔhaa enine shɛɔ wɔnɔ ni wɔhiɛ bɛ wɔhe nɔ lɛ. Akɛni suɔmɔ ni oyɔɔ kɛha Nyɔŋmɔ lɛ ehe shi shiŋŋ yɛ otsui mli hewɔ lɛ, tswaa ofai shi akɛ obaaha ana Abonsam akɛ amalelɔ, ni oha Yehowa tsui anya. (Abɛi 27:11; Hiob 8:44) Kaimɔ akɛ, ekɔɔɔ he eko kaa fɛɛ kaa ni baaba wɔgbɛ nɔ lɛ, esaaa akɛ wɔŋmɛɛɔ anɔkwa Kristofoi anɔkwayeli lɛ he wɔsaa.

[Shishigbɛ niŋmaa]