Ani Okaiɔ?

Ani onya Buu-Mɔɔ srɔtoi ni je kpo nyɛsɛɛ nɛɛ akanemɔ he? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni ji mɔbɔnalɛ, ni mɛni hewɔ esa akɛ Kristofoi aná eko lɛ?

Eji nyɛmɔ ni wɔnyɛɔ wɔkɛ wɔhe woɔ mɔ kroko shihilɛ mli, tamɔ akɛ wɔɔnu mɔ kroko piŋmɔ he yɛ wɔtsui mli. Awoɔ Kristofoi ŋaa koni ‘amɛnanaa amɛha amɛhe, amɛdɔ amɛhe akɛ nyɛmimɛi.’ (1 Petro 3:8) Yehowa fee mɔbɔnalɛ ni aaajie lɛ kpo lɛ he nɔkwɛmɔnɔ efɔ̃ shi eha wɔ koni wɔnyiɛ sɛɛ. (Lala 103:14; Zakaria 2:12) Wɔbaanyɛ wɔha wɔhenumɔi aya hiɛ yɛ enɛ gbɛfaŋ kɛtsɔ toiboo, nikwɛmɔ, kɛ susumɔ ni wɔɔsusu he lɛ nɔ.—4/15, baafa 24-26.

• Kɛ́ nine aaashɛ anɔkwa miishɛɛ nɔ lɛ, mɛni hewɔ esa akɛ mumɔŋ tsamɔ aba dani naagbee tsabaa kɛha gbɔmɔtsoŋ kpajeei aba lɛ?

Mɛi babaoo ni yɔɔ gbɔmɔtsoŋ hewalɛ lɛ bɛ miishɛɛ, amɛkɛ naagbai babaoo miikpe. Nɔ ni tamɔɔɔ nakai lɛ, Kristofoi babaoo ni eje kpa yɛ gbɔmɔtsoŋ ŋmɛnɛ lɛ kɛ miishɛɛ babaoo miisɔmɔ Yehowa. Mɛi ni náa mumɔŋ tsamɔ he sɛɛ lɛ baaná hegbɛ koni amɛná gbɔmɔtsoŋ kpajeei ni abaafo sɛɛ yɛ jeŋ hee lɛ mli lɛ mli ŋɔɔmɔ.—5/1, baafa 6-7.

• Mɛni hewɔ Hebribii 12:16 lɛ kɛɛ Esau tamɔ ajwamaŋbɔlɔ nɔŋŋ lɛ?

Biblia mli amaniɛbɔɔ lɛ tsɔɔ akɛ, Esau jie jwɛŋmɔŋ su ni ma amrɔ sɛɛnamɔi anɔ, kɛ bulɛ ni abɛ kɛha krɔŋkrɔŋ nibii lɛ kpo. Kɛji akɛ ŋmɛnɛ, mɔ ko ŋmɛ gbɛ ni ená nakai jwɛŋmɔŋ su lɛ eko lɛ, ebaanyɛ eha ekɛ ehe awo eshai ni yɔɔ hiɛdɔɔ, tamɔ ajwamaŋbɔɔ mli.—5/1, baafa 10-11.

• Namɔ ji Tertullian, ni mɛni akɛle lɛ waa?

Eji klɛŋklɛŋ afii ohai enyɔ kɛ afii ohai etɛ Ŋ.B. lɛ mli niŋmalɔ kɛ Nyɔŋmɔ jamɔ he nilelɔ. Ale lɛ akɛ mɔ ko ni ŋmala woji srɔtoi yɛ Kristojamɔ folo hefamɔ mli. Beni ekɛ ehefamɔ lɛ haa lɛ, eto susumɔi kɛ jeŋ nilee tsɔɔmɔi ni bafee shishitoo nɔ kɛha tsɔɔmɔi afitemɔ lɛ shishi, tamɔ Triniti tsɔɔmɔ lɛ nɛkɛ.—5/15, baafa 29-31.

• Mɛni hewɔ adesai ahelai, jeŋbai, kɛ gbele jɛɛɛ fɔmɔ su pɛ lɛ?

Jeŋ nilelɔi emu sane naa akɛ, yɛ faŋŋ mli lɛ fɔmɔ su ji nɔ ni kɛ adesai ahelai lɛ srɔtoi baa, ni mɛi krokomɛi heɔ yeɔ akɛ wɔfɔmɔ su ji nɔ ni tsɔɔ wɔjeŋba. Ni kɛlɛ, Biblia lɛ haa wɔnuɔ bɔ ni fee ni adesai ba wala mli kɛ bɔ ni fee ni esha kɛ emuu ni ayeee ba ni ehao adesai lɛ shishi. Yɛ be mli ni ebaanyɛ eba lɛ akɛ wɔfɔmɔ su baanyɛ aná wɔnɔ hewalɛ yɛ jeŋba gbɛfaŋ lɛ, emuu ni wɔyeee kɛ shihilɛ ni ebɔle wɔhe kɛkpe lɛ hu ji nibii titrii ni náa wɔnɔ hewalɛ.—6/1, baafa 9-11.

• Mɛɛ gbɛ nɔ adaa fã ko ni ayana yɛ Oxyrhynchus ni yɔɔ Mizraim lɛ ha anu Nyɔŋmɔ gbɛi lɛ kɛ nitsumɔ shishi yɛ?

Nɔ ni yɔɔ nɛkɛ Hiob 42:11, 12 lɛ fã ni jɛ Hela Septuagint lɛ mli ji Tetragrammaton lɛ (ni ji Hebri niŋmaa okadii ejwɛ ni damɔ shi kɛha Nyɔŋmɔ gbɛi lɛ). Enɛ ji odaseyeli kroko ni tsɔɔ akɛ Nyɔŋmɔ gbɛi yɛ Hebri mli lɛ je kpo yɛ Septuagint lɛ mli, nɔ ni bei pii lɛ niŋmalɔi tsɛɔ yisɛɛ yɛ Kristofoi a-Hela Ŋmalɛi lɛ amli lɛ.—6/1, baafa 30.

• Akɛ Roma Nɔyeli lɛ mli akaŋshii nifeemɔ ni tsɔɔ yiwalɛ kɛ gbɔmɔgbee lɛ eto mɛɛ ŋmɛnɛŋmɛnɛ beaŋ hiɛtserɛjiemɔi ni akwɛɔ lɛ ahe?

Nyɛsɛɛ nɛɛ nibii ni ajie lɛ kpo atsɔɔ yɛ Colosseum yɛ Rome, Italy lɛ tsĩ nɔ ko ni je amɛhe ŋmɛnɛ lɛ tã kɛtsɔ tsina nɔmɔ, abɔtirifɔ̃ɔ, kar kɛ moto foidamɔ, kɛ nɔmɔ ni nikwɛlɔi lɛ nɔɔ lɛ he vidio ni ejie lɛ nɔ. Mra be mli Kristofoi lɛ kpɛlɛ nɔ akɛ Yehowa sumɔɔɔ yiwalɛ loo yiwalɔi, ni nakai nɔŋŋ esa akɛ Kristofoi ni yɔɔ ŋmɛnɛ lɛ afee. (Lala 11:5)—6/15, baafa 29.

• Mɛni wɔbaanyɛ wɔkase kɛjɛ Ezra nɔkwɛmɔnɔ lɛ mli, beni wɔbɔɔ mɔdɛŋ koni wɔfee tsɔɔlɔi ni he esa lɛ?

Ezra 7:10 lɛ maa nibii ejwɛ ni Ezra fee, ni wɔbaanyɛ wɔbɔ mɔdɛŋ wɔkase lɛ anɔ mi. Ekɛɔ akɛ: “Ezra kɛ [1] etsui efɔ̃ nɔ[2] akɛ eeetao Yehowa mla lɛ sɛɛgbɛ [3] ní eye nɔ [4] ní etsɔɔ mɛi akpɔi lɛ kɛ mlai lɛ yɛ Israel.” (Wɔma efã ko nɔ mi.)—7/1, baafa 20.

• Mɛɛ shihilɛi srɔtoi enyɔ mli esa akɛ Kristofonyo yoo ahà eyi nɔ?

Ekome kɔɔ shihilɛi ni teɔ shi yɛ shia lɛ mli lɛ he. Eyi nɔ ni ehàa lɛ jieɔ yɔsemɔ ni eyɔse akɛ ewu lɛ ji mɔ ni yɔɔ hegbɛ akɛ enyiɛɔ hiɛ yɛ sɔlemɔ kɛ Biblia mli nitsɔɔmɔ mli lɛ kpo. Ekroko lɛ kɔɔ asafoŋ nitsumɔi ahe, he ni eyɔseɔ ákɛ akɛ Ŋmalɛ naa hegbɛ eha hii ni abaptisi amɛ lɛ akɛ amɛtsɔɔ nii ni amɛkɛ gbɛtsɔɔmɔ aha lɛ. (1 Korintobii 11:3-10)—7/15, baafa 26-27.

• Mɛni hewɔ Kristofoi kpɛlɛɔ nɔ akɛ yoga tsɔɔ babaoo fe kpɔiaŋgbɔlemɔ kɛkɛ, ni eyɛ oshara lɛ?

Oti ni yɔɔ yoga ni akɛɛ akɛmiigbɔle kpɔiaŋ lɛ mli ji ni eha mɔ ko kɛ mumɔŋ hewalɛ ko ni fe adesai anɔ lɛ afee ekome. Nɔ ni kɛ Nyɔŋmɔ gbɛtsɔɔmɔ kpãaa gbee lɛ, yoga biɔ ni aha jwɛŋmɔ lɛ akpa nitsumɔ trukaa. (Romabii 12:1, 2) Yoga baanyɛ eha mɔ ko kɛ ehe awo mumɔi atsɛmɔ kɛ ŋkunyaayeli mli osharai amli. (5 Mose 18:10, 11)—8/1, baafa 20-22.