Jeŋ ni Hiɛ Susumɔi ni Ejaaa yɛ Anɔkwayeli He

SOHAA gbɛkɛ ko beni jeŋ edɔ fioo yɛ Tel Aviv, Israel lɛ, oblanyo ko yafata oblahii kɛ oblayei akuu ko ni ebua amɛhe naa yɛ gbɛkɛnaashi hiɛtserɛjiemɔhe ko lɛ he. Be fioo ko sɛɛ lɛ, okplɛm ni fiteɔ nii waa ko fɛ kɛbatsɔ kuu ni ebua amɛhe naa lɛ ateŋ.

Mɛi ni kɛ okplɛm gbeɔ mɛi krokomɛi kɛ amɛ diɛŋtsɛ amɛhe lɛ ateŋ mɔ kome hu ŋɔ ewala eha, ni étsɔ yiwalɛ gbɛ nɔ egbe oblahii kɛ oblayei 19. Sɛɛ mli lɛ, tsofafeemɔ he nikaselɔ ko bɔ adafitswalɔi amaniɛ akɛ: “Gbɔmɔtso lɛ fãi srɔtoi egbɛ eshwã he fɛɛ he, amɛ fɛɛ lɛ oblahii kɛ oblayei, mɛi ni darako kwraa—nɔ ko ni yɔɔ gbeyei fe fɛɛ ni mina pɛŋ.”

Thurstan Brewin ŋma yɛ The Lancet lɛ mli akɛ: “Nifeemɔ ni tamɔ nɛkɛ lɛ yɛ sui ni mɔ fɛɛ mɔ nyaa he, tamɔ anɔkwayeli . . . , ni baanyɛ eha tai afee nɔ ni waaa kwraa akɛ eeeje shishi, kɛ nɔ ni wa waa akɛ aaafo sɛɛ.” Hɛɛ, akɛ gbɔmɛi babaoo ni agbe yɛ anɔkwayeli hewɔ kɛjɛ Kristendom Sɛŋmɔtso He Tawuui lɛ anɔ kɛyashi gbɛjianɔi ni ato kɛgbe gbɔmɛi babaoo yɛ Nazi Germany lɛ nɔ lɛ alá efite adesai ayinɔsane mli.

Mɛi ni Anɔkwa ni Ayeee Saa Amɛhe lɛ Ayi ni Faa

Ŋwanejee ko bɛ he akɛ, anɔkwayeli he shɛiifeemɔ baanyɛ afite nii, shi anɔkwa ni ayeee lɛ hu baanyɛ ajwa maŋ kwraa kɛmɔ shi. Webster’s New Encyclopedic Dictionary lɛ kɛɔ akɛ, ni aaaye anɔkwa lɛ tsɔɔ ‘hemɔ ni aheɔ mɔ ko loo shihilɛ gbɛ ko ayeɔ,’ ni “etsɔɔ mɔ aŋkro loo nɔ ko ni atuɔ he ahaa waa yɛ shifimɔ mli, yɛ kwamɔ loo sɛɛgbɛ tsɔɔmɔ he kaa fɛɛ sɛɛ.” Yɛ be mli ni mɛi babaoo kɛɔ akɛ, amɛhiɛ sɔɔ anɔkwayeli ni tamɔ nɛkɛ lɛ, adesai miina nɔ kɛmiijɛ anɔkwayeli ni abɛ kwraa lɛ mli yɛ he ni he hiaa fe fɛɛ—weku kɔkɔrɔɔ lɛ mli. Gbalamlitsemɔ etee hiɛ oyayaayai, emli ewo wu kɛtsɔ mɔ diɛŋtsɛ taomɔ nii asɛɛtiumɔ babaoo, daa gbi shihilɛ mli nɔnyɛɛi, kɛ nɔ ni jɛɔ bɔlɛnamɔ mli anɔkwa ni ayeee ni egbɛ eshwã lɛ mli kɛbaa lɛ nɔ. Ni bei pii lɛ oblahii kɛ oblayei ni efeko nɔ ko lɛ ji mɛi ahe ni esaa, tamɔ mɛi ni okplɛm ni fɛ yɛ Tel Aviv lɛ sa amɛhe lɛ nɛkɛ.

Amaniɛbɔɔ ko kɛɛ akɛ: “Bei pii lɛ, nɔ ni jɛɔ gbalamlitsemɔ, mligbalamɔ, kɛ fɔlɔ kome mɔ shihilɛ mli baa ji weku ni fiteɔ, ni gbekɛ skulyaa he naagba ji naagbai ni enɛ kɛbaa lɛ ateŋ ekome.” Etamɔ nɔ ni gbekɛbii hii ni yɔɔ fɔlɔ kome mɔ ni ji nyɛmɛi lɛ awekui amli lɛ titri ji mɛi ni baanyɛ aná skulyaa he naagba, mɛi ni baanyɛ agbe amɛ diɛŋtsɛ amɛhe, kɛ mɛi ni baanyɛ atsɔmɔ gbekɛbii ni yeɔ awui. Daa afi lɛ, gbekɛbii akpe toi akpe kome afɔlɔi tseɔ gbala mli yɛ United States, ni etamɔ nɔ ni yɛ afi fɛɛ afi mli lɛ, gbekɛbii fɛɛ ni mɛi ni ebote gbalashihilɛ mli fɔɔ lɛ amlijaa fã yɛ nakai maŋ lɛ nɔ lɛ afɔlɔi baatse gbala mli yɛ be mli ni nakai gbekɛbii lɛ yeɔ afi 18 lɛ. Akɔntaabui tsɔɔ akɛ, nɔ ni aaanyɛ ajɛ enɛ mli aba lɛ kumɔɔ mɔ tsui nakai nɔŋŋ kɛha obalahii kɛ obalayei babaoo yɛ je lɛŋ hei krokomɛi.

 Anɔkwayeli—Su ni Nɔ Kwɔ Tsɔ̃?

Etamɔ nɔ ni amrɔ nɛɛ kusum nifeemɔi amli anɔkwayelii srɔtoi ni eba shi lɛ, hãa Maŋtsɛ David wiemɔi lɛ feɔ nɔ ni ja fe be fɛɛ ni eho, akɛ: “Buamɔ wɔ, Yehowa! ejaakɛ hetselɔi miitã, ejaakɛ anɔkwafoi asɛɛ miifo yɛ gbɔmɛi abii ateŋ.” (Lala 12:2) Mɛɛba anɔkwa ni ayeee nɛɛ egbɛ eshwã nɛkɛ? Beni Roger Rosenblatt ŋmaa he sane yɛ Time wolo tɛtrɛɛ lɛ mli lɛ, ekɛɛ akɛ: “Yɛ bɔ ni anɔkwayeli nɔ kwɔ hã lɛ fɛɛ sɛɛ lɛ, wɔnyɛŋ wɔkpa wɔ adesai abɔɔ su mli jeŋbai ni egbee shi lɛ gbɛ akɛ eeekpɛtɛ anɔkwayeli he, yɛ bɔ ni gbeyeishemɔ efa ehã, mɔ diɛŋtsɛ he ni eheee eyeee, nibii asɛɛ ni akɛ pɛsɛmkunya tiuɔ, kɛ hiɛnyam taomɔ ni yɔɔ adesai asui amli lɛ hewɔ.” Beni Biblia lɛ tsɔɔ be ni wɔyɔɔ mli nɛɛ mli lɛ, efee lɛ faŋŋ akɛ: ‘Gbɔmɛi aaatsɔmɔ hesuɔlɔi, mɛi ni yeee anɔkwa, mɛi ni edɔɔɔ mɔ he.’—2 Timoteo 3:1-5.

Yɛ be mli ni wɔsusuɔ hewalɛ ni naa wa ni anɔkwayeli—loo anɔkwa ni ayeee lɛ—náa yɛ mɔ jwɛŋmɔ kɛ enifeemɔi anɔ lɛ he lɛ, wɔɔnyɛ wɔbi akɛ, ‘Namɔ esa jogbaŋŋ akɛ wɔye lɛ anɔkwa?’ Kadimɔ nɔ ni sane ni nyiɛ sɛɛ lɛ yɔɔ kɛɛmɔ yɛ sanebimɔ nɛɛ he.

[He ni Mfoniri ni yɔɔ baafa 3 lɛ Jɛ]

Mfoniri ni yɔɔ yiteŋgbɛ lɛ: © AFP/CORBIS