Namɔ Esa akɛ Oye Lɛ Anɔkwa?

“Wɔmaŋ lɛ: . . . Eba akɛ eeeji nɔ ni ja be fɛɛ be; shi wɔmaŋ ni, ekɔɔɔ he eko kɛji eja loo ejaaa.”—Stephen Decatur, U.S. ŋshɔ hiɛ lɛji amli nitsulɔ nukpa, afi 1779-1820.

MƐI babaoo buɔ anɔkwa ni yiŋkɔshikɔshifeemɔ ko kwraa bɛ he ni mɔ ko yeɔ emaŋ lɛ akɛ gbɛnaa nii ni nɔ kwɔ fe fɛɛ ni kã amɛnɔ. Mɛi krokomɛi baawie Stephen Decatur wiemɔi lɛ yɛ gbɛ kroko nɔ akɛ, ‘Mijamɔ, éba akɛ eeeji nɔ ni ja be fɛɛ be; shi mijamɔ lɛ, ekɔɔɔ he eko kɛji eja loo ejaaa.’

Eyɛ faŋŋ akɛ, he ni afɔ wɔ yɛ lɛ ji nɔ ni bei pii lɛ etsɔɔ maŋ loo jamɔ ni ebiɔ ni wɔye lɛ anɔkwa lɛ, shi yiŋkpɛɛ ni tsɔɔ mɔ ni esa akɛ wɔye lɛ anɔkwa lɛ ji nɔ ko ni he hiaa aahu tsɔ bɔ ni wɔnyɛŋ wɔshi wɔha nɔ ko ni baa trukaa kɛkɛ. Shi kɛlɛ, toiboo kɛ hetuu-kɛhamɔ ni akɛtsɔse mɔ ko ní aaabi he saji lɛ biɔ ekãa, ni eteeɔ shihilɛ ni mli wawai ashi.

Anɔkwayelii Srɔtoi Ahe Kaa Ko

Yoo ko ni da yɛ Zambia lɛ kɛɛ akɛ: “Miná suɔmɔ miha jamɔ beni midako kwraa. Daa gbi sɔlemɔ ni asɔleɔ yɛ weku gbatsu lɛ mli, jamɔŋ gbii  juji ayeli, kɛ sɔlemɔtsu lɛ mliyaa daa lɛ fata tsɔsemɔ ni akɛhã mi lɛ he. Mijamɔ kɛ misɔɔmɔ lɛ, kɛ mikusum, mikutsoŋ, kɛ miwekuŋ nifeemɔi yɛ tsakpaa kpaakpa.”

Shi kɛlɛ, beni eye kɛjɛ afi 17 kɛyaa lɛ, ekɛ Yehowa Odasefoi bɔi Biblia lɛ kasemɔ ni no sɛɛ etsɛɛɛ nɔŋŋ lɛ ekpɛ eyiŋ akɛ ebaatsake ejamɔ lɛ. Ani enɛ ji nifeemɔ ko ni tsɔɔ anɔkwa ni ayeee?

Atsɔse Zlatko yɛ Bosnia, ni be ko lɛ ekɛ ehe wo nɔmɔ ni sa emaŋ ni ejɛ mli lɛ he lɛ mli. Lɛ hu ekɛ Yehowa Odasefoi bɔi Biblia lɛ kasemɔ. Bianɛ lɛ ekpooɔ akɛ eeewuu ta eshi mɔ ko. Ani eefee ehe mɔ ni yeee anɔkwa?

Bɔ ni ohãa nakai sanebimɔi lɛ ahetoo ohãa lɛ damɔ osusumɔi anɔ. Yoo ni atsĩ etã kɛtsɔ hiɛ lɛ kɛɛ akɛ: “Yɛ mikutso lɛ mli lɛ, tsakemɔ ni mɔ aaatsake ejamɔ lɛ kɛ hiɛshishwiemɔ ni hiɛ kpaaa nɔ kɔkɔɔkɔ nyiɛ; abuɔ lɛ akɛ eji nifeemɔ ko ni etsɔɔɔ anɔkwayeli, hekɛnɔfɔɔ ni mɔ weku kɛ ekutsoŋbii yɔɔ yɛ emli lɛ fitemɔ.” Nakai nɔŋŋ Zlatko tsutsu nanemɛi asraafoi lɛ bu mɛi fɛɛ ni kpoo akɛ amɛaafata amɛhe kɛwuu ta lɛ akɛ amɛji mɛi ni abɛ hekɛnɔfɔɔ yɛ amɛmli. Shi nakai yoo lɛ kɛ Zlatko fɛɛ nuɔ he akɛ, anɔkwayeli ko ni nɔ kwɔ—Nyɔŋmɔ ni aaaye lɛ anɔkwa—kanyaa amɛ nifeemɔi lɛ. Nɔ ni he hiaa fe fɛɛ lɛ, te Nyɔŋmɔ naa mɛi ni miitao amɛye lɛ anɔkwa lɛ ehaa tɛŋŋ?

Anɔkwayeli ni Ja—Suɔmɔ Kpojiemɔ

Maŋtsɛ David kɛɛ Yehowa Nyɔŋmɔ akɛ: “Okɛ mɔ ko ni yeɔ anɔkwa lɛ baaye yɛ anɔkwayeli mli.” (2 Samuel 22:26, NW) Hebrew wiemɔ ni atsɔɔ shishi akɛ “anɔkwayeli” yɛ biɛ lɛ jieɔ susumɔ ni ji mlihilɛ ni jɛɔ suɔmɔ mli ekɛ ehe kpɛtɛɔ nɔ ko he, kɛyashi beyinɔ ni yiŋtoo ni eyɔɔ yɛ nakai nii lɛ he lɛ aaaba mli. Yehowa jɛɔ esuɔmɔ mli ekɛ ehe kpɛtɛɔ mɛi ni yeɔ lɛ anɔkwa lɛ ahe, tamɔ su ni kã yoofɔyoo ko kɛ ebi fufɔoo ko teŋ lɛ. Yehowa kɛɛ esɔɔlɔi anɔkwafoi yɛ blema Israel lɛ akɛ: “Aso yoo hiɛ aaakpa ebi fufɔoo nɔ, aloo emusuŋ etsɔŋ lɛ yɛ emusuŋ bi hewɔ? Ni kɛ́ mɛnɛɛmɛi ahiɛ aaakpa nɔ tete lɛ, mi lɛ mihiɛ kpaŋ onɔ!” (Yesaia 49:15) Mɛi ni miishwe ni amɛkɛ anɔkwa ni aaaye Nyɔŋmɔ lɛ aye klɛŋklɛŋ gbɛhe lɛ anine baashɛ ehebuu ni suɔmɔ yɔɔ mli lɛ nɔ kɛ̃.

Yehowa ni aaaye lɛ anɔkwa lɛ damɔ suɔmɔ nɔ. Ekanyaa mɔ koni esumɔ nɔ ni Yehowa sumɔɔ, ni enyɛ̃ nifɔjianii ni Yehowa nyɛ̃ɔ lɛ. (Lala 97:10) Akɛni Yehowa su ni nɔ kwɔ fe fɛɛ lɛ ji suɔmɔ hewɔ lɛ, Nyɔŋmɔ ni aaaye lɛ anɔkwa lɛ yeɔ ebuaa kɛtsĩɔ mɔ naa kɛjɛɔ mɛi ni akɛ amɛ aaaye yɛ gbɛ ni suɔmɔ bɛ mli nɔ lɛ he. (1 Yohane 4:8) No hewɔ lɛ kɛji mɔ ko jɛɔ anɔkwa ni eeeye Nyɔŋmɔ lɛ mli etsakeɔ ejamɔ mli hemɔkɛyelii lɛ, no etsɔɔɔ akɛ esumɔɔɔ eweku lɛ dɔŋŋ.

Nyɔŋmɔ ni Aaaye Lɛ Anɔkwa—Kanyamɔ ni He Baa Sɛɛnamɔ

Yoo ni atsĩ etã kɛtsɔ hiɛ lɛ tsɔɔ enifeemɔ lɛ mli yɛ nɛkɛ gbɛ nɔ akɛ: “Kɛtsɔ Biblia lɛ ni mikase lɛ nɔ lɛ, mibaná mile Yehowa akɛ anɔkwa Nyɔŋmɔ lɛ, ni miná mi kɛ lɛ teŋ wekukpaa. Yehowa tamɔɔɔ nyɔŋmɔi ni mijá tsutsu lɛ eko kwraa; eŋmɛɔ pɛpɛɛpɛ yɛ suɔmɔ, jalɛsaneyeli, ŋaalee, kɛ hewalɛ mli. Akɛni Yehowa biɔ hetuu-kɛhamɔ kɛha ekome too hewɔ lɛ, ehe bahia ni mashĩ nyɔŋmɔi krokomɛi lɛ yɛ sɛɛ.

“Mifɔlɔi kɛɛ mi shii abɔ akɛ amɛmli efu mi waa diɛŋtsɛ, ni ákɛ, miiha amɛnine miinyɛ shi. Enɛ bafee nɔ ni wa waa kɛha mi, akɛni mifɔlɔi lɛ anɔkpɛlɛmɔ tsɔɔ babaoo kɛha mi lɛ hewɔ. Shi beni miyaa hiɛ fiofio yɛ Biblia mli anɔkwale he nilee mli lɛ, nɔ ni mihala lɛ bafee faŋŋ kɛha mi. Minyɛɛɛ makpoo Yehowa.

“Halamɔ ni mihalaa akɛ maye Yehowa anɔkwa moŋ fe jamɔŋ kusum nifeemɔi lɛ, etsɔɔɔ akɛ miifee mihe mɔ ni yeee miweku lɛ anɔkwa. Mibɔ mɔdɛŋ waa akɛ mahã amɛna kɛtsɔ miwiemɔi kɛ minifeemɔi anɔ akɛ, minuɔ bɔ ni amɛnuɔ he amɛhãa lɛ shishi. Shi kɛji miyeee Yehowa anɔkwa lɛ, no lɛ ekolɛ matsĩ miweku lɛ naa kɛjɛ le ni amɛaale lɛ lɛ he, ni no baafee nifeemɔ ko diɛŋtsɛ ni tsɔɔ anɔkwa ni ayeee.”

Nakai nɔŋŋ mɔ ko jeee mɔ ni abɛ hekɛnɔfɔɔ yɛ emli kɛji anɔkwa ni eeeye  Nyɔŋmɔ lɛ biɔ ni ehi shi akɛ mɔ ni kɛ ehe wooo maŋ saji amli, ní etsi ehe kɛjɛ tu ni eeewo nɔ yɛ mɛi krokomɛi anɔ lɛ he lɛ. Nɛkɛ ji bɔ ni Zlatko tsɔɔ enifeemɔi lɛ amli: “Eyɛ mli akɛ atsɔse mi ákɛ mɔ ni gbɛi Kristofonyo lɛ kã enɔ kɛkɛ moŋ, shi mikɛ mɔ ni jeee nakai hi shi. Be mli ni ta lɛ fɛ lɛ, kui enyɔ lɛ fɛɛ bi ni maye amɛ anɔkwa. Anyɛ minɔ koni mahala mɛi ni manɔ mahã. Minɔ yɛ ta lɛ mli afii etɛ kɛ fã. Sɛɛ mli lɛ mi kɛ miŋa jo foi kɛtee Croatia, he ni wɔkɛ Yehowa Odasefoi yakpe yɛ lɛ.

“Wɔbanu shishi kɛjɛ wɔ Biblia nikasemɔ lɛ mli akɛ, Yehowa ji mɔ klɛŋklɛŋ ni esa akɛ wɔye lɛ anɔkwa, ni ákɛ, eetao ni wɔsumɔ wɔnaanyo gbɔmɔ ekɔɔɔ he eko jamɔ loo maŋ nɔ he ni ejɛ. Bianɛ lɛ, mi kɛ miŋa efee ekome yɛ jamɔ ni wɔkɛhãa Yehowa lɛ mli, ni mikase akɛ minyɛŋ maye Nyɔŋmɔ anɔkwa ni mawuu mashi minaanyo gbɔmɔ.”

Anɔkwayeli ni Jɛ Anɔkwa Nilee Mli

Akɛni Yehowa ji wɔ-Bɔlɔ hewɔ lɛ, anɔkwa ni wɔɔye lɛ lɛ bafeɔ nɔ ni he hiaa waa diɛŋtsɛ fe nɔ fɛɛ nɔ mli ní ebiɔ ni wɔye anɔkwa yɛ lɛ. (Kpojiemɔ 4:11) Shi kɛlɛ, bɔni afee ni akaha anɔkwa ni aaaye Nyɔŋmɔ lɛ miitsɔ hewalɛ ni akɛfeɔ shɛii ni akɛfiteɔ nii lɛ, esa akɛ ejɛ anɔkwa nilee mli. Biblia lɛ woɔ wɔ ŋaa akɛ: ‘Nyɛtsɔmɔa mɛi heei yɛ nyɛjwɛŋmɔ hewalɛ lɛ mli, ni nyɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwayeli ni ja mli.’ (Efesobii 4:23, 24) Gbɔmɔ ni ehe gbɛi ni ŋma nakai wiemɔi ni jɛ mumɔŋ lɛ, ná ekãa kɛbi anɔkwayeli srɔtoi ni akɛtsɔse lɛ lɛ he sane. Tsakemɔ ni he baa sɛɛnamɔ jɛ eniiamlitaomɔ lɛ mli kɛba.

Hɛɛ, Saulo kɛ anɔkwayelii srɔtoi ahe kaa kpe, taakɛ mɛi babaoo kɛkpe yɛ wɔbei nɛɛ amli lɛ. Atsɔse Saulo yɛ eweku lɛ kusum nifeemɔi ni yɔɔ keketee lɛ anaa, ni ebatsɔ mɔ ni yeɔ anɔkwa waa diɛŋtsɛ kɛha jamɔ mli ni afɔ lɛ awo lɛ. Anɔkwayeli kɛha gbɛ ni ekɔ lɛ po tsirɛ lɛ koni etsu yiwalɛ nii eshi mɛi ni kɛ lɛ kpãaa gbee yɛ esusumɔ he lɛ. Ana akɛ Saulo fɔɔ Kristofoi ashiai amli yaa yɛ ekãa naa, ni egbalaa amɛ kɛyaa koni agbala amɛ toi, ni gbele amɛ po.—Bɔfoi lɛ Asaji 22:3-5; Filipibii 3:4-6.

Shi kɛlɛ, beni Saulo nine shɛ Biblia mli anɔkwa nilee nɔ nɔŋŋ pɛ lɛ, efee nɔ ni etipɛŋfoi lɛ ateŋ mɛi pii buɔ no akɛ nifeemɔ ko ni jwɛŋmɔ bɛ mli lɛ. Etsake ejamɔ. Saulo, ni sɛɛ mli lɛ abale lɛ akɛ bɔfo Paulo lɛ, hala akɛ ebaaye Nyɔŋmɔ anɔkwa moŋ fe kusum nifeemɔ. Nyɔŋmɔ ni aaaye lɛ anɔkwa ni damɔ anɔkwa nilee nɔ lɛ, kanya Saulo koni efee mɔ ko ni toɔ etsui shi, mɔ ni sumɔɔ mɔ, kɛ mɔ ni woɔ mɔ hewalɛ, nɔ ni tamɔɔɔ etsutsu jeŋba ni yɔɔ shɛii ni fiteɔ nii lɛ.

Mɛni Hewɔ Esa akɛ Oye Anɔkwa?

Ni wɔɔŋmɛ gbɛ ni anɔkwa ni wɔyeɔ lɛ adamɔ Nyɔŋmɔ shishitoo mlai anɔ lɛ kɛ sɛɛnamɔi ni yɔɔ faŋŋ baa. Ákɛ nɔkwɛmɔnɔ lɛ, afi 1999 amaniɛbɔɔ ko ni jɛ Australian Institute of Family Studies lɛ kɛɛ akɛ, kɛfata shishitoo nibii ni hãa gbalashihilɛi feɔ nɔ ni miishɛɛ yɔɔ mli kɛ nɔ ni sɛɛ tsɛɔ lɛ ahe lɛ ji “hekɛnɔfɔɔ kɛ anɔkwayeli . . . [kɛ] mumɔŋ shidaamɔ ni akɛtsuɔ nii.” Ana kɛjɛ nakai nikasemɔ lɛ nɔŋŋ mli akɛ “gbalashihilɛi ni miishɛɛ yɔɔ mli ni ma shi shiŋŋ” yeɔ ebuaa  kɛha hii kɛ yei amiishɛɛnamɔ, gbɔmɔtsoŋ hewalɛnamɔ, kɛ wala ni sɛɛ tsɛɔ babaoo, ni ákɛ, gbalashihilɛi ni ma shi shiŋŋ hãa bii náa hegbɛ ni hi ni amɛkɛaaná shihilɛ mli miishɛɛ.

Yɛ ŋmɛnɛŋmɛnɛ yiŋkɔshikɔshi je nɛɛ mli lɛ, anɔkwayeli loo shifimɔ tamɔ yibaamɔ kpãa ko ni akɛfiɔ serelɔ ko ni miipele kɛyabote yibaamɔ lɛlɛ ko mli. Kɛji “serelɔ” lɛ kɛ shiŋŋfeemɔ tsuuu nii lɛ, nibii komɛi tamɔ ŋshɔkei kɛ kɔɔyɔɔ baatswa lɛ kɛya kɛba. Shi kɛji etsuuu anɔkwayeli he nii lɛ, etamɔ nɔ ni akɛ eyibaamɔ kpãa lɛ efi meele ni miishiu he. Taakɛ eba Saulo nɔ lɛ, ebaanyɛ egbala lɛ kɛyawo nifeemɔ gbɛ ko ni fiteɔ nii lɛ mli. Shi kɛlɛ, Yehowa ni aaaye lɛ anɔkwa, ni damɔ anɔkwa nilee nɔ lɛ, ji yibaamɔ kpãa ni hãa wɔnáa shidaamɔ kpakpa, ní nyiɛɔ wɔhiɛ kɛyaa yiwalaheremɔ mli.—Efesobii 4:13-15.

Yehowa kɛ shiwoo nɛɛ haa mɛi ni yeɔ lɛ anɔkwa lɛ akɛ: “Yehowa sumɔɔ jalɛsaneyeli, ni ekwaŋ enɔkwafoi lɛ. Abaabaa amɛyi kɛya naanɔ kɛ̃.” (Lala 37:28) Etsɛŋ ni abaaŋmɛ mɛi fɛɛ ni yeɔ Yehowa anɔkwa lɛ gbɛ ni amɛbote paradeiso shikpɔŋ lɛ nɔ, he ni amɛbaaná heyeli kɛjɛ ŋkɔmɔyeli kɛ piŋmɔ mli lɛ mli ŋɔɔmɔ yɛ, ni amɛbaaná naanɔ wekukpaai amli miishɛɛ ni jamɔŋ kɛ maŋkwramɔŋ mligbalamɔi bɛ mli lɛ.—Kpojiemɔ 7:9, 14; 21:3, 4.

Bianɛ po lɛ, aŋkroaŋkroi akpekpei abɔ ni yɔɔ shikpɔŋ lɛ nɔ he fɛɛ he ekpa shi amɛna akɛ, anɔkwa miishɛɛnamɔ jɛɔ anɔkwa ni amɛyeɔ Yehowa lɛ pɛ mli kɛbaa. Mɛni hewɔ ohaaa Yehowa Odasefoi aye abua bo kɛtao bɔ ni osusuɔ yɛ anɔkwayeli he ohaa lɛ mli, yɛ Biblia mli anɔkwale lɛ gbɛtsɔɔmɔ naa lɛ? Biblia lɛ kɛɔ wɔ akɛ: “Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo; nyɛkwɛa nyɛ diɛŋtsɛ nyɛhe ni ahia.”—2 Korintobii 13:5.

Ebiɔ ekãa dani wɔɔnyɛ wɔbi wɔhemɔkɛyeli lɛ he sane kɛ nɔ hewɔ ni wɔyeɔ he anɔkwa lɛ, shi emli nyɔmɔwoi lɛ he baanyɛ aba sɛɛnamɔ babaoo kɛ́ nɔ ni jɛɔ mli baa lɛ hãa wɔbɛŋkɛɔ Yehowa Nyɔŋmɔ kpaakpa lɛ. Yoo lɛ ni awie ehe kɛtsɔ hiɛ lɛ jieɔ henumɔi ni tamɔ mɛi babaoo anɔ̃ lɛ kpo beni ekɛɔ akɛ: “Mikase akɛ Yehowa kɛ eshishitoo mlai lɛ anɔkwa ni wɔyeɔ lɛ, yeɔ ebuaa wɔ koni wɔŋmɛ pɛpɛɛpɛ yɛ bɔ ni wɔkɛ wɔwekui yeɔ wɔhaa lɛ mli, koni wɔtsɔmɔ akutsoŋbii kpakpai. Ekɔɔɔ he eko bɔ ni kaai lɛ amli wa ha, kɛji wɔyeɔ Yehowa anɔkwa lɛ, ebaaye wɔ anɔkwa be fɛɛ be.”

[Mfonirii ni yɔɔ baafa 6]

Anɔkwa nilee tsirɛ Saulo koni etsake bɔ ni ekɛ anɔkwayeli tsuɔ nii ehaa lɛ

[Mfoniri ni yɔɔ baafa 7]

Mɛni hewɔ otaooo anɔkwayelii srɔtoi ni oyeɔ lɛ amli okwɛɛɛ yɛ Biblia mli anɔkwale lɛ gbɛtsɔɔmɔ naa lɛ?

[He ni Mfoniri ni yɔɔ baafa 4 lɛ Jɛ]

Churchill, ŋwɛi abɛkugbɛ: U.S. National Archives photo; Joseph Göbbels, ninejurɔgbɛ kwraa: Library of Congress