Sanebimɔi ni Jɛ Kanelɔi Adɛŋ

Mɛɛ gbɛtsɔɔmɔ ni kɔɔ bii atsɔsemɔ he Ŋmalɛi lɛ kɛhaa yɛ be mli ni fɔlɔi lɛ ateŋ mɔ kome ji Yehowa Odasefonyo ní mɔ kroko lɛ jeee Odasefonyo lɛ?

Ŋmalɛ naa shishitoo mlai enyɔ ni he hiaa kɛ gbɛtsɔɔmɔ ni kɔɔ bii atsɔsemɔ he lɛ haa fɔlɔ ko ni ji Odasefonyo ni yɔɔ hefatalɔ ko ni jeee Odasefonyo lɛ. Ekome ji: “Esa akɛ aboɔ Nyɔŋmɔ moŋ toi fe gbɔmɛi.” (Bɔfoi lɛ Asaji 5:29) Ekroko lɛ ji: “Wu lɛ ji ŋa lɛ yitso, taakɛ bɔ ni Kristo hu ji asafo lɛ yitso . . . lɛ.” (Efesobii 5:23) Naagbee nɔ̃ lɛ kɔɔɔ ŋamɛi ni ji Odasefoi ni yɔɔ wumɛi ni ji Odasefoi lɛ pɛ ahe, shi moŋ ekɔɔ ŋamɛi ni ji Odasefoi ni yɔɔ wumɛi ni jeee Odasefoi lɛ hu ahe. (1 Petro 3:1) Mɛɛ gbɛ nɔ fɔlɔ ko ni ji Odasefonyo lɛ baanyɛ atsɔ aŋmɛ pɛpɛɛpɛ yɛ shishitoo mlai nɛɛ anaa yɛ be mli ni etsɔɔ ebii lɛ anii lɛ?

Kɛ́ wu lɛ ji Yehowa Odasefoi lɛ ateŋ mɔ kome lɛ, sɔ̃ kã enɔ akɛ ekɛ mumɔŋ kɛ heloonaa nibii fɛɛ ahã eweku lɛ. (1 Timoteo 5:8) Eyɛ mli akɛ ekolɛ nyɛ ni heee yeee lɛ kɛ amɛbii lɛ baashara yɛ be babaoo mli moŋ, shi esa akɛ tsɛ ni ji Odasefonyo lɛ atsɔɔ ebii lɛ anii kɛtsɔ jamɔŋ tsɔsemɔ ni ekɛaaha amɛ yɛ shia, kɛ kɛtsɔ Kristofoi akpeei, he ni amɛbaaná jeŋba he tsɔsemɔ kɛ naanyobɔɔ kpakpa he sɛɛ yɛ lɛ ni ekɛ amɛ aaaya lɛ nɔ lɛ nɔ.

Ni kɛji akɛ eŋa ni ejeee Odasefonyo lɛ ma nɔ mi akɛ ekɛ gbekɛbii lɛ baaya ejamɔhe lɛ, loo ebaatsɔɔ amɛ ejamɔ lɛ mli hemɔkɛyelii hu? Ekolɛ maŋ lɛ mli mla lɛ baahã lɛ hegbɛ koni efee nakai. Kɛ́ jamɔŋ nifeemɔi yɛ hei nɛɛ baatsɔ̃ gbekɛbii lɛ ayiŋ loo efeŋ nakai lɛ, ekolɛ ebaadamɔ bɔ ni tsɛ lɛ mumɔŋ tsɔsemɔ lɛ hi ha lɛ nɔ titri. Beni gbekɛbii lɛ daraa lɛ, esa akɛ Ŋmalɛ naa tsɔsemɔ ni amɛtsɛ kɛha amɛ lɛ aye abua amɛ koni amɛnyiɛ Nyɔŋmɔ Wiemɔ lɛ mli anɔkwale lɛ sɛɛ. Kwɛ bɔ ni tsɛ ni heɔ yeɔ lɛ mii baashɛ ehe eha, kɛji akɛ ebii lɛ kpɛ amɛyiŋ akɛ amɛbaakɔ shidaamɔ yɛ anɔkwale lɛ gbɛfaŋ lɛ!

Kɛ́ nyɛ lɛ ji Yehowa Odasefoi lɛ ateŋ mɔ kome lɛ, esa akɛ ejie bulɛ kpo etsɔɔ yitsoyeli he mla lɛ yɛ be mli ni esusuɔ ebii lɛ anaanɔ hilɛ-kɛhamɔ he lɛ. (1 Korintobii 11:3) Yɛ shihilɛi babaoo mli lɛ, ehefatalɔ ni heee yeee lɛ eteŋ shi ewoŋ eŋa ni ji Odasefonyo lɛ kɛji ekɛ jeŋba kɛ mumɔŋ tsɔsemɔ haa amɛbii lɛ, ni nine shɛɔ tsɔsemɔ ni kɔɔ enɛɛmɛi ahe lɛ anɔ yɛ Yehowa webii akpeei ashishi. Nyɛ lɛ baanyɛ aye abua ewu ni heee yeee lɛ, koni ena sɛɛnamɔi ni yɔɔ tsɔsemɔ ni tswaa mɔ emaa shi ni amɛbii lɛ anine shɛɔ nɔ kɛtsɔ Yehowa gbɛjianɔtoo lɛ nɔ lɛ he. Ebaanyɛ etsɔ ŋaa gbɛ nɔ ema sɛɛnamɔ ni yɔɔ Biblia mli jeŋba he shishitoo mlai ni aaatɛo awo amɛbii lɛ amli lɛ nɔ mi, akɛni gbekɛbii lɛ kɛ jeŋ ko ni jeŋba miiya nɔ eefite miikpe lɛ hewɔ.

Shi kɛlɛ, ekolɛ wu ni heee yeee lɛ baama nɔ mi akɛ ebii lɛ kɛ lɛ afee ekome kɛjá, ní ekɛ amɛ baaya ejamɔhe lɛ, ni ebaatsɔse amɛ yɛ ejamɔ mli hemɔkɛyeli lɛ naa. Aloo ekolɛ wu ko baate shi ashi jamɔi fɛɛ, ni ebaama nɔ mi ákɛ akɛ jamɔŋ tsɔsemɔ ko akaha ebii lɛ. Ákɛ weku lɛ yitso lɛ, lɛ ji mɔ titri ni sɔ̃ kã enɔ akɛ efeɔ yiŋkpɛɛ lɛ. *

Yɛ be mli ni ŋa ni ji Odasefonyo lɛ jieɔ bulɛ kpo etsɔɔ ewu lɛ yitsoyeli lɛ, ákɛ Kristofonyo ni ejɔɔ ehe nɔ lɛ, ehe miihia ni eha bɔfo Petro kɛ Yohane ni kɛɛ akɛ: “Wɔ lɛ wɔnyɛŋ akɛ ja wɔwie nii ni wɔna kɛ nii  ni wɔnu lɛ” nifeemɔ lɛ ahi ejwɛŋmɔ mli. (Bɔfoi lɛ Asaji 4:19, 20) Yɛ ebii lɛ amumɔŋ hilɛ-kɛhamɔ hewɔ lɛ, nyɛ ni ji Odasefonyo lɛ baatao hegbɛi koni ekɛ jeŋba he gbɛtsɔɔmɔ aha amɛ. Sɔ̃ kã enɔ yɛ Yehowa hiɛ akɛ etsɔɔ mɛi krokomɛi nɔ ni ele akɛ no ji anɔkwale lɛ, ni esaaa akɛ ejieɔ ebiii lɛ kɛjɛɔ mli. (Abɛi 1:8; Mateo 28:19, 20) Mɛɛ gbɛ nɔ nyɛ ni ji Odasefonyo lɛ aaatsɔ atsu naagba ni mli wa nɛɛ he nii?

Ŋɔɔ sane ni kɔɔ hemɔkɛyeli ni aaaná yɛ Nyɔŋmɔ mli lɛ akɛ nɔkwɛmɔnɔ. Ekolɛ ŋa ni ji Odasefonyo lɛ nyɛŋ ekɛ ebii lɛ afee Biblia mli nikasemɔ ni ato he gbɛjianɔ yɛ ewu lɛ naatsii lɛ hewɔ. Ani esa akɛ yɛ yiŋtoo nɛɛ hewɔ lɛ ekpoo akɛ eeekɛɛ ebii lɛ nɔ fɛɛ nɔ ni kɔɔ Yehowa he? Dabi. Ewiemɔi kɛ enifeemɔi lɛ diɛŋtsɛ baajie ehemɔkɛyeli yɛ Bɔlɔ lɛ mli lɛ kpo etsɔɔ. Ŋwanejee ko bɛ he akɛ ebii lɛ baahiɛ sanebimɔi yɛ sane lɛ he. Esa akɛ ekɛ ejamɔ mli heyeli lɛ atsu nii, kɛtsɔ ehemɔkɛyeli yɛ Bɔlɔ lɛ mli ni eeetsɔɔ mɛi, ni ebii lɛ fata he lɛ nɔ, ni esaaa akɛ esheɔ gbeyei. Kɛji ekolɛ enyɛŋ ekɛ ebii lɛ afee Biblia mli nikasemɔ loo ekɛ amɛ aya kpeei be fɛɛ be po lɛ, ebaanyɛ edu nilee ni kɔɔ Yehowa Nyɔŋmɔ he lɛ ewo amɛ mli.—5 Mose 6:7.

Yɛ nɔ ni kɔɔ wekukpaa ni kã Odasefonyo ko kɛ ehefatalɔ ni heee yeee lɛ teŋ lɛ he lɛ, bɔfo Paulo ŋma akɛ: “Atsuuɔ nuu ni heee yeee lɛ he yɛ ŋa lɛ mli, ni atsuuɔ yoo ni heee yeee lɛ hu he yɛ wu lɛ mli; ejaakɛ jeee nakai jikulɛ, nyɛbii lɛ hu he yɛ muji; shi agbɛnɛ lɛ amɛhe etse.” (1 Korintobii 7:14) Yehowa buɔ gbalashihilɛ wekukpaa lɛ akɛ ehe tse yɛ hefatalɔ ni heɔ yeɔ lɛ hewɔ, ni abuɔ gbekɛbii lɛ akɛ amɛhe tse yɛ Yehowa hiɛ. Esa akɛ ŋa ni ji Odasefonyo lɛ abɔ mɔdɛŋ fɛɛ ni eeenyɛ koni eye ebua ebii lɛ ni amɛnu anɔkwale lɛ shishi, koni eshi nɔ ni baajɛ mli aba yɛ naagbee lɛ ewo Yehowa dɛŋ.

Yɛ be mli ni gbekɛbii lɛ daraa lɛ, amɛji mɛi ni esa akɛ amɛkpɛ amɛyiŋ yɛ nɔ shidaamɔ ni amɛbaakɔ lɛ he, ni amɛdamɔɔ saji ni amɛnine eshɛ nɔ kɛjɛ amɛfɔlɔi lɛ aŋɔɔ lɛ nɔ amɛfeɔ enɛ. Ekolɛ amɛbaakpɛ amɛyiŋ koni amɛfee amɛnii yɛ Yesu wiemɔi lɛ kɛ gbeekpamɔ naa akɛ: “Mɔ ni dɔɔ tsɛ loo nyɛ he fe mi lɛ, esaaa mi.” (Mateo 10:37) Afãa amɛ hu akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli.” (Efesobii 6:1) Oblahii kɛ oblayei babaoo ekpɛ amɛyiŋ akɛ ‘amɛaabo Nyɔŋmɔ moŋ toi akɛ nɔyelɔ’ fe amɛfɔlɔ ni jeee Odasefonyo lɛ, ekɔɔɔ he eko yiwaa ni nakai fɔlɔ lɛ kɛaaba amɛnɔ lɛ fɛɛ sɛɛ. Mɛɛ nyɔmɔwoo eeeji kɛha fɔlɔ ni ji Odasefonyo lɛ nɛkɛ, akɛ eeena akɛ ebii lɛ ekpɛ amɛyiŋ akɛ amɛbaasɔmɔ Yehowa yɛ shitee-kɛ-woo fɛɛ sɛɛ lɛ!

[Shishigbɛ niŋmaa]