Te Aaafee Tɛŋŋ ni Jwɛŋmɔŋ Nyɛmɔ Aaabu Ohe?

ŊSHƆKEI ni nɔkwɔlɔ gojoo kwɛmɔ yɛ fɛo naakpa, shi kɛha wolɛi lɛ amɛtsɔɔ oshara. Nakai nui ni kuɔ lɛ baanyɛ aha amɛwala aŋmɛɛ amɛ.

Nakai nɔŋŋ hu ekolɛ Nyɔŋmɔ sɔɔlɔi kɛ nɔnyɛɛi ni kãa he emli woɔ wu ní kaa akɛ eeeye amɛnɔ kwraa lɛ baakpe. Ekolɛ oyɔse nakai kaai ni eko nyiɛ eko sɛɛ tamɔ ŋshɔkei ni gbáa Kristofoi anaa lɛ. Eka shi faŋŋ akɛ oosumɔ ni okpee amɛ naa kɛ ekãa, ni okpɛ oyiŋ akɛ obaakpoo mumɔŋ shishamɔ. (1 Timoteo 1:19) Jwɛŋmɔŋ nyɛmɔ ji ohebuu lɛ fã ko ni he hiaa waa. Mɛni ni, ni te afeɔ tɛŋŋ anáa?

Hebri wiemɔ mezim·mahʹ ni atsɔɔ shishi akɛ “jwɛŋmɔŋ nyɛmɔ” lɛ jɛ shishijee wiemɔ ko ni shishi ji “ni ato ŋaa loo ato yiŋ fɔŋ” lɛ mli. (Abɛi 1:4) No hewɔ lɛ, Biblia shishitsɔɔmɔi komɛi tsɔɔ mezim·mahʹ shishi akɛ “ŋaalee” loo “shɔŋŋ ninamɔ.” Biblia he nilelɔi Jamieson, Fausset, kɛ Brown tsɔɔ mezim·mahʹ mli akɛ “hiɛ ni hiɔ he nɔ jogbaŋŋ ni haa ajoɔ efɔŋ naa foi ni nine shɛɔ nɔ nɔkpakpa nɔ.” Enɛ tsɔɔ nibii ni baajɛ wɔnifeemɔi lɛ amli aba yɛ sɛɛ mli kɛ amrɔ nɔŋŋ lɛ he ni wɔɔsusu. Kɛ́ wɔyɛ jwɛŋmɔŋ nyɛmɔ lɛ, no lɛ wɔbaasusu wɔ nihalamɔi ahe jogbaŋŋ dani wɔbaatsu he nii, titri lɛ kɛji esa akɛ afee yiŋkpɛi ni he hiaa.

Kɛji mɔ ko ni yɔɔ jwɛŋmɔŋ nyɛmɔ miikpɛ eyiŋ yɛ ewɔsɛɛ loo yɛ shihilɛi ni eyɔɔ mli amrɔ nɛɛ he lɛ, klɛŋklɛŋ lɛ esusuɔ he jogbaŋŋ koni eyɔse osharai loo tsɔnei ni baanyɛ aba lɛ. Kɛ́ eyɔse osharai ni aaanyɛ aba lɛ, esusuɔ bɔ ni eeefee ekpoo amɛ lɛ he, ni esusuɔ bɔ ni ebaasa ekutso kɛ enanemɛi ahe eha lɛ he. No hewɔ lɛ, ebaanyɛ eto gbɛ ko ni baawo yibii kpakpai ni ekolɛ ena Nyɔŋmɔ jɔɔmɔi po lɛ he ŋaa. Nyɛhaa wɔsusua nɔkwɛmɔnii komɛi ni anyɛɔ atsuɔ he nii ni feɔ nifeemɔ nɛɛ he mfoniri.

Joo Bɔlɛnamɔ Jeŋba Shara He Kaa lɛ Naa Foi

Kɛji kɔɔyɔɔ tswa ŋshɔkei ni mli wa kɛbatswa lɛlɛ ko yitsogbɛ lɛ, atsɛɔ nifeemɔ lɛ akɛ akoto. Amlakui awala boteɔ oshara mli akɛ amɛ lɛlɛ lɛ baabutu, ja amɛkɛ hesaa ha lɛlɛ lɛ yitso kpee ŋshɔke lɛ.

Wɔkɛ shihilɛ ni tamɔ nakai nɔŋŋ miikpe, akɛni wɔyɛ jeŋ ko ni bɔlɛnamɔ eyi gbɔmɛi ajwɛŋmɔ mli obɔ lɛ hewɔ. Daa gbi lɛ, wɔkɛ bɔlɛnamɔ mli susumɔi kɛ mfonirii ni tamɔ ŋshɔkei kpeɔ. Wɔnyɛŋ wɔkwa hewalɛ ni amɛbaanyɛ amɛná yɛ wɔ adebɔɔ naa bɔlɛnamɔŋ akɔnɔi lɛ anɔ lɛ. Esa akɛ wɔkɛ jwɛŋmɔŋ nyɛmɔ atsu nii koni wɔkɛ ekãa akpee kaa lɛ naa, fe ni wɔɔkpalaŋ kɛyabote oshara shihilɛi amli kɛkɛ.

Ákɛ nɔkwɛmɔnɔ lɛ, bei pii lɛ Kristofoi hii kɛ mɛi ni bɛ bulɛ kɛha yei, ni amɛbuɔ amɛ akɛ bɔlɛnamɔ he nɔ̃ ko kɛkɛ lɛ tsuɔ nii. Ekolɛ nanemɛi nitsulɔi kɛ yakayaka fɛoyelii kɛ bɔlɛnamɔ hefɛoyelii baawo amɛ sanegbaai lɛ amli. Shihilɛ nɛɛ baanyɛ adu jeŋba shara he susumɔi awo Kristofonyo ko jwɛŋmɔ mli.

 Ekolɛ Kristofonyo yoo ko baatsu heloonaa nitsumɔ, ni no hewɔ lɛ, ekolɛ ekɛ shihilɛ ni mli wawai baakpe. Ekolɛ ekɛ hii kɛ yei ni kɛ ejeŋba he tɛi lɛ kpãaa gbee lɛ baatsu nii. Ekolɛ enanemɛi nitsulɔi hii lɛ ateŋ mɔ ko baajie miishɛɛ kpo yɛ ehe. Shishijee mli lɛ, ekolɛ ekɛ lɛ baaye yɛ mlihilɛ naa ni ebaabu lɛ yɛ ejamɔŋ susumɔi lɛ ahewɔ po. Miishɛɛ babaoo ni nuu lɛ jieɔ lɛ kpo yɛ ehe kɛ bɛŋkɛmɔ ni ebɛŋkɛɔ lɛ be fɛɛ be lɛ baanyɛ atsirɛ lɛ koni esumɔ akɛ ekɛ lɛ aaabɔ gbagbalii.

Ákɛ Kristofoi lɛ, mɛɛ gbɛ nɔ jwɛŋmɔŋ nyɛmɔ baanyɛ aye abua wɔ yɛ shihilɛi ni tamɔ nɛkɛ mli? Klɛŋklɛŋ lɛ, ebaanyɛ ehɛle wɔ shi yɛ mumɔŋ osharai ahe, ni nɔ ni ji enyɔ lɛ, ebaanyɛ ekanya wɔ koni wɔto gbɛ ni ja he ŋaa. (Abɛi 3:21-23) Yɛ shihilɛi ni tamɔ nɛkɛ mli lɛ, ekolɛ ehe baahia koni wɔha efee faŋŋ eha wɔnanemɛi nitsulɔi lɛ akɛ wɔ jeŋba he tɛi lɛ yɛ srɔto yɛ wɔ Ŋmalɛ naa hemɔkɛyelii lɛ ahewɔ. (1 Korintobii 6:18) Wɔ wiemɔ kɛ subaŋ baanyɛ aye nakai shɛɛ sane lɛ he odase. Kɛfata he lɛ, ekolɛ ehe baahia ni wɔfo husu wɔwo bɔ ni wɔkɛ nanemɛi nitsulɔi komɛi bɔɔ haa lɛ he.

Shi kɛlɛ, jeee nitsumɔhei pɛ shihilɛi ni kɛ mɔ yaa jeŋba shara mli lɛ yɔɔ. Ekolɛ amɛbaate shi kɛji gbalashihilɛ mli hefatalɔi ŋmɛ naagbai agbɛ ni amɛfite nɔ ni haa amɛfeɔ ekome lɛ. Gbɛfalɔ sɔɔlɔ ko yɔse akɛ: “Gbalashihilɛ ni fiteɔ lɛ baaa trukaa. Ekolɛ gbalashihilɛ mli hefatalɔi lɛ amli baagbala fiofio, ni amɛkɛ amɛhe efɔɔɔ sanegbaa loo amɛfeee ekome kɛfeee nii. Ekolɛ amɛbaatiu heloonaa nibii asɛɛ koni amɛkɛto amɛgbalashihilɛ ni efee shwɛm lɛ najiaŋ. Ni akɛni amɛfɔɔɔ amɛhe yijiemɔ hewɔ lɛ, ekolɛ amɛbaaná mɛi krokomɛi ní esoro amɛbɔɔ su lɛ he miishɛɛ.”

Nɛkɛ sɔɔlɔ ni yɔɔ niiashikpamɔ nɛɛ tsa nɔ akɛ: “Yɛ be kɛ bei amli lɛ, esa akɛ gbalashihilɛ mli hefatalɔi atara shi ni amɛsusu he kɛji akɛ nɔ ko miifite amɛ wekukpaa lɛ. Esa akɛ amɛto bɔ ni amɛbaanyɛ amɛfee ekome kɛkase nii, kɛsɔle, ni amɛshiɛ lɛ he gbɛjianɔ. Ehe baaba sɛɛnamɔ kɛha amɛ saŋŋ kɛji akɛ amɛkɛ amɛhe wie ‘yɛ shia, yɛ gbɛ nɔ, beni amɛkã shi, kɛ beni amɛte shi,’ taakɛ fɔlɔi kɛ gbekɛbii feɔ pɛpɛɛpɛ lɛ.”—5 Mose 6:7-9.

Jeŋba ni Jeee Kristofoi Anɔ lɛ Naa ni Wɔɔdamɔ

Yɛ yelikɛbuamɔ ni jwɛŋmɔŋ nyɛmɔ kɛhaa wɔ koni wɔkpee jeŋba he kaai anaa yɛ omanyeyeli mli lɛ sɛɛ lɛ, ebaanyɛ eye ebua wɔ hu koni wɔdamɔ naagbai ni baa yɛ wɔkɛ nanemɛi Kristofoi ateŋ lɛ naa. Kɛji kɔɔyɔɔ tswa ŋshɔkei kɛbatswa lɛlɛ lɛ sɛɛ lɛ, ehaa anáa nɔ ni ale lɛ akɛ odi. Ŋshɔkei lɛ baanyɛ awo lɛlɛ lɛ sɛɛ lɛ nɔ ni amɛkpa lɛ afã. Enɛ haa lɛlɛ lɛ koŋ nɔ gbɛ kpeeɔ he ni ŋshɔkei lɛ jɛ kɛbaa lɛ, ni no baanyɛ eha ebutu.

Wɔ hu oshara ni baa kɛjɛɔ he ko ni akpaaa gbɛ lɛ baanyɛ aba wɔnɔ. Wɔkɛ nyɛmimɛi Kristofoi hii kɛ yei anɔkwafoi babaoo sɔmɔɔ Yehowa kɛ “gbee kome.” (Zefania 3:9) Kɛ amɛteŋ mɔ ko fee enii yɛ gbɛ ni jeee Kristofoi anɔ nɔ lɛ, ekolɛ no baafee tamɔ hekɛnɔfɔɔ ni wɔyɔɔ yɛ mɔ lɛ mli lɛ mlikuu, ni ekolɛ ekɛ nɔnyɛɛ ni naa wa baaba wɔnɔ. Mɛɛ gbɛ nɔ ekolɛ jwɛŋmɔŋ nyɛmɔ baabu wɔhe kɛjɛ pɛpɛɛpɛ ni wɔŋmɛŋ kɛ awui ni eeeye wɔ fe nine lɛ he yɛ?

Kaimɔ akɛ “mɔ ko mɔ ko bɛ ni efeee esha.” (1 Maŋtsɛmɛi 8:46) No hewɔ lɛ, esaaa akɛ efeɔ wɔ naakpɛɛ akɛ yɛ bei komɛi amli lɛ ekolɛ nyɛmi nuu Kristofonyo ko baawo wɔ mli la loo etɔ̃ wɔnɔ. Akɛni wɔle enɛ hewɔ lɛ, wɔbaanyɛ wɔsaa wɔhe kɛha nɔ ni baanyɛ aba lɛ ni wɔjwɛŋ bɔ ni wɔbaafee wɔnii wɔha lɛ he kɛ eba. Te bɔfo Paulo fee enii eha tɛŋŋ beni enyɛmimɛi Kristofoi lɛ ekomɛi wie ehe yɛ gbɛ ni yeɔ awui kɛ nɔ ni bulɛ bɛ mli nɔ lɛ? Yɛ nɔ najiaŋ ni eeeha pɛpɛɛpɛ ni eŋmɛɔ yɛ mumɔŋ lɛ aaaŋmɛɛ lɛ lɛ, emu sane naa akɛ Yehowa nɔkpɛlɛmɔ ni enine aaashɛ nɔ lɛ he miihia waa fe adesai anɔkpɛlɛmɔ. (2 Korintobii 10:10-18) Su ni tamɔ nɛkɛ ni wɔɔná lɛ baaye abuɔ wɔ koni wɔkpoo oyai ni wɔɔye kɛfee nii kɛji mɔ ko nifeemɔi gba wɔnaa.

Etamɔ wɔwao ni wɔtɛ. Kɛji wɔtɛ lɛ, ekolɛ wɔsusuŋ nii ahe jogbaŋŋ yɛ miniti kome loo enyɔ mli. Shi kɛji hewaa lɛ naa ba shi lɛ, wɔbaanyɛ wɔsusu ni wɔfee nii jogbaŋŋ. Nakai nɔŋŋ kɛji mɔ ko wie loo efee enii yɛ gbɛ ni ejaaa nɔ lɛ, esaaa akɛ wɔfeɔ he nɔ ko amrɔ nɔŋŋ. Shi moŋ mɛɛ ni osusu nibii ni baajɛ najiaŋ ni oooto ni osusuuu he lɛ mli aba lɛ he.

 Malcolm ni kɛ afii babaoo esɔmɔ akɛ maŋsɛɛ sanekpakpa shiɛlɔ lɛ tsɔɔ nɔ ni efeɔ kɛji atɔ̃ enɔ lɛ mli. “Klɛŋklɛŋ nii ni mifeɔ ji ni makwɛ sanebimɔi ni miŋmala mishwie shi lɛ amli: Ani mimli efu nyɛmi nɛɛ akɛni esoro wɔsui lɛ hewɔ? Ani nɔ ni ekɛɛ lɛ he hiaa diɛŋtsɛ? Ani hewalɛ ni atridii hela ní mɔ mi lɛ ná yɛ mihenumɔi anɔ lɛ miiha miinu nii ahe fe nine? Ani masusu nibii ahe yɛ gbɛ kroko nɔ yɛ ŋmɛlɛtswai fioo sɛɛ?” Taakɛ Malcolm eyɔse lɛ, bei pii lɛ naataamɔ lɛ he ehiaaa, ni abaanyɛ aku hiɛ afɔ̃ nɔ. *

Malcolm kɛfata he akɛ: “Bei komɛi lɛ, yɛ mɔdɛŋ fɛɛ ni mibɔɔ koni masaa bei lɛ fɛɛ sɛɛ lɛ, nyɛmi kroko lɛ ejieee naanyobɔɔ su kpo. Mibɔɔ mɔdɛŋ koni mikaha enɛ miigba minaa. Akɛni mifee nɔ fɛɛ nɔ ni manyɛ hewɔ lɛ, minaa sane lɛ yɛ gbɛ kroko nɔ. Yɛ mijwɛŋmɔ mli lɛ, mibuɔ sane lɛ akɛ nɔ ko ni ekolɛ ‘abaatsu he nii wɔsɛɛ,’ fe ni masusu he akɛ nɔ ni mi diɛŋtsɛ matsu he nii. Miŋmɛŋ gbɛ ni eye mi awui yɛ mumɔŋ loo ni esa wekukpaa ni kã mikɛ Yehowa kɛ minyɛmimɛi ateŋ lɛ ahe.”

Taakɛ Malcolm ji lɛ, esaaa akɛ wɔ hu wɔhaa mɔ aŋkro ko jeŋba fɔŋ haoɔ wɔ fe nine. Ayɛ nyɛmimɛi hii kɛ yei anɔkwafoi babaoo ni sa yɛ asafo fɛɛ asafo mli. Eji miishɛɛ akɛ wɔkɛ “jwɛŋmɔ kome” aaanyiɛ yɛ Kristofoi agbɛ nɔ. (Filipibii 1:27) Wɔŋwɛi Tsɛ lɛ suɔmɔ sɛɛfimɔ lɛ ní wɔɔkai lɛ hu baaye abuɔ wɔ koni wɔkɛ nilee asusu saji ahe.—Lala 23:1-3; Abɛi 5:1, 2; 8:12.

Kaasumɔ Nibii ni Yɔɔ Je lɛ Mli Lɛ

Jwɛŋmɔŋ nyɛmɔ baanyɛ aye abua wɔ koni wɔkpee nɔnyɛɛ kroko ni yɔɔ nigii lɛ naa. Kɛji kɔɔyɔɔ tswa ŋshɔke lɛ kɛbatswa lɛlɛ lɛ koŋ nɔ lɛ, atsɛɔ no amɛmrɛ. Yɛ bɔ ni efɔɔ kaa yɛ kɔɔyɔŋ tsakemɔi amli lɛ, ekolɛ nakai ŋshɔke lɛ baatsi lɛlɛ lɛ fiofio kɛjɛ he ni eto akɛ eyaa lɛ he. Shi kɛlɛ, kɛ ahum miitswa lɛ, ŋshɔke ni tswaa lɛlɛ lɛ koŋ nɔ lɛ baanyɛ aha lɛlɛ lɛ abutu.

 Nakai nɔŋŋ kɛji wɔŋmɛɛ wɔhe wɔha nɔnyɛɛ akɛ wɔye nibii fɛɛ ni yiwalɛ jeŋ nɛɛ yɔɔ ni ekɛaaha lɛ mli ŋɔɔmɔ lɛ, nɛkɛ ninamɔ shihilɛ nɛɛ baanyɛ atsi wɔ kɛjɛ mumɔŋ gbɛ lɛ nɔ. (2 Timoteo 4:10) Kɛji wɔtsĩii enɛ naa lɛ, yɛ naagbee lɛ suɔmɔ kɛha je lɛ baanyɛ eha wɔshi Kristofoi agbɛ lɛ nɔ kwraa. (1 Yohane 2:15) Mɛɛ gbɛ nɔ jwɛŋmɔŋ nyɛmɔ baanyɛ aye abua wɔ yɛ?

Klɛŋklɛŋ lɛ, ebaaye ebua wɔ koni wɔsusu osharai ni ekolɛ wɔkɛbaakpe lɛ he. Je lɛ kɛ jarayeli he ŋaa fɛɛ ni abaanyɛ asusu he lɛ tsuɔ nii koni ekɛlaka wɔ. Eyaa nɔ be fɛɛ be ehaa shihilɛ ko ni asusuɔ akɛ esa akɛ mɔ fɛɛ mɔ atiu sɛɛ—shikatsɛmɛi ahewoo shihilɛ lɛ, fɛo nibii lɛ, kɛ “mɛi ni etamɔ nɔ ni amɛye omanye lɛ” yaa hiɛ. (1 Yohane 2:16) Awoɔ wɔ shi akɛ mɛi fɛɛ, titri lɛ wɔ tipɛŋfoi kɛ akutsoŋbii ahiɛ baasɔ wɔ ni amɛbaakpɛlɛ wɔnɔ. Jwɛŋmɔŋ nyɛmɔ baaye abua wɔ koni wɔte shi wɔshi lakamɔ wiemɔ nɛɛ, ni ekai wɔ bɔ ni ehe hiaa ni ‘shika suɔmɔ akaba wɔjeŋba mli,’ akɛni Yehowa ewo shi akɛ ‘eshiŋ wɔ gbi ko gbi ko’ lɛ hewɔ.—Hebribii 13:5.

Nɔ ni ji enyɔ lɛ, jwɛŋmɔŋ nyɛmɔ baatsi wɔnaa koni wɔkanyiɛ mɛi ni “edũ gbɛ kɛjɛ anɔkwale lɛ he” lɛ asɛɛ. (2 Timoteo 2:18) Ewa waa akɛ wɔɔwie wɔshi mɛi ni be ko ni eho lɛ wɔsumɔɔ amɛ ni wɔkɛ wɔhe fɔ̃ɔ amɛnɔ lɛ. (1 Korintobii 15:12, 32-34) Kɛ́ mɛi ni amɛjeee Kristofoi dɔŋŋ lɛ ná wɔnɔ hewalɛ kɛyashi he ko po lɛ, ebaatsĩ wɔmumɔŋ shweremɔ lɛ naa, ni yɛ naagbee lɛ ekɛ wɔ baawo oshara mli. Wɔbaafee tamɔ lɛlɛ ko ni aha etsi ehe kɛjɛ gbɛ ni esa akɛ enyiɛ nɔ lɛ he bibioo pɛ. Yɛ gbɛfaa kakadaŋŋ lɛ sɛɛ lɛ, lɛlɛ ni tamɔ nɛkɛ baakpeleke shi yɛ he ko ni kɛ he ni eyaa lɛ teŋ jɛkɛ.—Hebribii 3:12.

Jwɛŋmɔŋ nyɛmɔ baanyɛ aye abua wɔ koni wɔle bɔ ni wɔmumɔŋ shihilɛ ji diɛŋtsɛ, kɛ bɔ ni wɔ wɔsɛɛ mumɔŋ shihilɛ baanyɛ atamɔ. Ekolɛ wɔyɔse bɔ ni ehe hiaa ni wɔkɛ wɔhe awo Kristofoi anitsumɔi amli. (Hebribii 6:11, 12) Kadimɔ bɔ ni Odasefonyo oblanuu ko kɛ jwɛŋmɔŋ nyɛmɔ tsu nii ni eye ebua lɛ ni edi mumɔŋ otii asɛɛ: “Miná hegbɛ akɛ maná nitsumɔ akɛ adafitswaa ŋmalɔ. Miná enɛ he miishɛɛ waa diɛŋtsɛ, shi mikai Biblia mli wiemɔ kuku akɛ ‘je lɛ hoɔ eyaa’ yɛ be mli ni ‘mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ’ lɛ. (1 Yohane 2:17) Misusu nii ahe akɛ esa akɛ bɔ ni mihiɔ shi mihaa lɛ ajie mihemɔkɛyelii lɛ akpo. Mifɔlɔi ekwa Kristofoi ahemɔkɛyeli lɛ, ni misumɔŋ akɛ manyiɛ amɛ nɔkwɛmɔnɔ lɛ sɛɛ. No hewɔ lɛ mikpɛ miyiŋ akɛ mahi shi akɛ mɔ ni yiŋtoo yɔɔ eshihilɛ mli, ni mikɛ mihe wo be-fɛɛ sɔɔmɔ nitsumɔ lɛ mli akɛ daa gbɛgbalɔ. Yɛ afii ejwɛ ni miishɛɛ yɔɔ mli lɛ sɛɛ lɛ, mile akɛ mihala nɔ ni hi lɛ.”

Mumɔŋ Ahumii Anaa ni Wɔɔdamɔ yɛ Omanyeyeli Mli

Mɛni hewɔ ehe hiaa waa akɛ wɔkɛ jwɛŋmɔŋ nyɛmɔ atsu nii ŋmɛnɛ lɛ? Esa akɛ amlakui lɛ ahiɛ ahi oshara he okadii anɔ, titri lɛ kɛ ahumii miihe atswa. Kɛji je lɛ mli jɔ oya ni kɔɔyɔɔ bɔi tswaa waa lɛ, amɛgbeɔ abalaa lɛ ni amɛfeɔ klalo kɛkpeɔ naagba lɛ naa. Yɛ shishinumɔ ni tamɔ nakai nɔŋŋ naa lɛ, esa akɛ wɔfee klalo kɛkpee nɔnyɛɛi ni mli wawai diɛŋtsɛ anaa yɛ be mli ni yiwalɛ nibii agbɛjianɔtoo nɛɛ bɛŋkɛɔ enaagbee lɛ. Nibii ni ja ni tsɔɔ jeŋba kpakpa lɛ nɔ miigbɔ yɛ adesai ateŋ, ni ‘gbɔmɛi fɔji miiwo wu yɛ efɔŋ mli.’ (2 Timoteo 3:13) Taakɛ amlakui boɔ kɔɔyɔŋ tsakemɔ he saji atoi be fɛɛ be lɛ, esa akɛ wɔ hu wɔbo gbalɛ naa kɔkɔbɔɔi ni yɔɔ Nyɔŋmɔ Wiemɔ ni jɛ mumɔŋ lɛ mli lɛ toi.— Lala 19:8-12.

Kɛji akɛ wɔkɛ jwɛŋmɔŋ nyɛmɔ tsu nii lɛ, wɔkɛ nilee ni kɛ mɔ yaa naanɔ wala mli lɛ miitsu nii. (Yohane 17:3) Wɔbaanyɛ wɔtsɔ hiɛ wɔsusu naagbai ahe ni wɔto wɔyiŋ yɛ bɔ ni wɔbaatsu amɛhe nii wɔha lɛ he. No lɛ wɔbaasaa wɔhe jogbaŋŋ koni wɔkakpalaŋ kɛmiijɛ Kristofoi agbɛ lɛ nɔ, ni wɔbaanyɛ wɔto ‘shishitoo kpakpa kɛha be ni baaba lɛ’ kɛtsɔ mumɔŋ otii ni wɔkɛaamamɔ wɔhiɛ ni wɔɔtiu sɛɛ lɛ anɔ.—1 Timoteo 6:19.

Kɛ́ wɔkɛ ŋaawoo ni hi kɛ jwɛŋmɔŋ nyɛmɔ to lɛ, ehe ehiaŋ ‘akɛ wɔɔshe trukaa hekpokpomɔ ko gbeyei.’ (Abɛi 3:21, 25, 26) Shi moŋ wɔbaanyɛ wɔná miishɛɛ kɛjɛ Nyɔŋmɔ shiwoo akɛ: “Ejaakɛ ŋaalee aaabote otsui mli ni nilee aaaŋɔɔ osusuma naa; jwɛŋmɔ aaabaa oyi jogbaŋŋ” lɛ mli.—Abɛi 2:10, 11.

[Shishigbɛ niŋmaa]

[Mfoniri ni yɔɔ baafa 23]

Sane ni agbaa daa lɛ tswaa gbalashihilɛ lɛ emaa shi