Wala Shihilɛ He Sane

“Mitsakeŋ Nɔ ko Kwraa!”

TAAKƐ GLADYS ALLEN GBA

Bei komɛi lɛ, abiɔ mi akɛ, “Kɛ́ aha bo hegbɛ koni okɛje shihilɛ shishi ekoŋŋ lɛ, mɛni obaatsake?” Manyɛ maha hetoo yɛ anɔkwale mli akɛ, “Mitsakeŋ nɔ ko kwraa!” Ha matsɔɔ bo nɔ hewɔ ni minuɔ he nɛkɛ lɛ.

YƐ AFI 1929 hulutsoo be mli, beni miye afii enyɔ lɛ, nɔ ko ni yɔɔ naakpɛɛ ba mitsɛ, Matthew Allen nɔ. Enine shɛ dɛhiɛmɔ wolo ni ji Millions Now Living Will Never Die!, ni International Bible Students, taakɛ atsɛɔ Yehowa Odasefoi yɛ nakai beaŋ lɛ fee lɛ nɔ. Beni Ataa kɛ hehiamɔ ekane baafai fioo komɛi asɛɛ lɛ, ejaje akɛ, “Enɛ ji saji ni he hiaa fe fɛɛ ni mikane pɛŋ!”

No sɛɛ etsɛɛɛ lɛ, Ataa nine shɛ Biblia Kaselɔi lɛ awoji krokomɛi anɔ. Efiteee be kwraa ni ebɔi akutsoŋbii lɛ nɔ ni ekaseɔ lɛ gbaa. Shi kɛlɛ, no mli lɛ, Yehowa Odasefoi asafo ko bɛ wɔ akrowa lɛ mli. Akɛni Ataa na bɔ ni Kristofoi anaanyobɔɔ ni aaaná daa lɛ he hiaa lɛ hewɔ lɛ, eha weku lɛ fã kɛtee Orangeville, Ontario, Canada, yɛ afi 1935 mli akɛni asafo yɛ jɛmɛ lɛ hewɔ.

Yɛ nakai gbii lɛ amli lɛ, no mli lɛ jeee be fɛɛ be awoɔ gbekɛbii hewalɛ koni amɛya asafoŋ kpeei; bei pii lɛ, amɛhiɔ kpeehe lɛ agbo lɛ naa ni amɛshwɛɔ kɛyashiɔ onukpai lɛ kpaa. Enɛ eŋɔɔɔ Ataa naa. Esusu eyiŋ akɛ, “Kɛ́ kpeei lɛ hi kɛha mi lɛ, no lɛ amɛhi kɛha mibii lɛ.” No hewɔ lɛ, eyɛ mli akɛ Ataa kɛ ehe bɔi asafo lɛ he bɔɔ etsɛko moŋ, shi ekɛɛ mi, minyɛmi nuu Bob, minyɛmi yoo Ella, kɛ Ruby koni wɔyafata onukpai lɛ ahe yɛ kpeei lɛ ashishi, ni wɔfee nakai. Etsɛɛɛ ni Odasefoi abii krokomɛi hu bɔi kpee lɛ shishi baa. Kpeeiyaa kɛ saji ahetoo hamɔ bafee wɔshihilɛ fã ko ni he hiaa waa diɛŋtsɛ.

 Ataa sumɔɔ Biblia lɛ, ni eyɛ gbɛ ni yɔɔ miishɛɛ ni etsɔɔ nɔ efeɔ Biblia mli saji lɛ ahe mfoniri. Kɛtsɔ enɛɛmɛi anɔ lɛ, enyɛmɔ nikasemɔi ni he hiaa lɛ anɔ ewo wɔtsuii bibii lɛ amli, ni mikã he mikɛ miishɛɛ babaoo kaiɔ lolo. Ekome ni mikaiɔ ji akɛ Yehowa jɔɔ mɛi ni boɔ lɛ toi lɛ.

Ataa tsɔɔ wɔ hu koni wɔkɛ Biblia lɛ atsu nii ni wɔkɛfã wɔhemɔkɛyeli lɛ he. Wɔkɛfeɔ shwɛmɔ. Ataa baanyɛ akɛɛ akɛ, “Miheɔ miyeɔ akɛ, kɛ́ migbo lɛ miiya ŋwɛi. Agbɛnɛ, nyɛtsɔɔa mi akɛ jeee nakai eji.” Mi kɛ Ruby baapɛi concordance lɛ mli koni wɔtao ŋmalɛi ni wɔbaanyɛ wɔkɛtsu nii ni wɔkɛtsɔɔ akɛ nakai tsɔɔmɔ lɛ jeee anɔkwale. Beni wɔkane ŋmalɛi ni wɔna lɛ, Ataa baakɛɛ akɛ, “Ehi, shi miyiŋ tsɔko lolo.” No hewɔ lɛ, wɔkuɔ wɔsɛɛ wɔyapɛiɔ concordance lɛ mli ekoŋŋ. Bei pii lɛ, enɛ yaa nɔ ŋmɛlɛtswai abɔ kɛyashi Ataa tsui nyɔɔ emli yɛ hetooi ni wɔkɛha lɛ he. Nɔ ni jɛ mli ba ji akɛ, mi kɛ Ruby he basa waa ni wɔgbalaa wɔhemɔkɛyelii lɛ amli ni wɔfãa he.

Gbɔmɛi Agbeyeishemɔ nɔ Kunimyeli

Yɛ tsɔsemɔ kpakpa ni minine shɛ nɔ yɛ shia kɛ asafoŋ kpeei ashishi lɛ fɛɛ sɛɛ lɛ, manyɛ makpɛlɛ nɔ akɛ nibii komɛi yɛ, yɛ Kristofonyo tsɔmɔ he ni mina akɛ ewa waa. Taakɛ gbekɛbii babaoo ji lɛ, minyaaa srɔto ni miyɔɔ yɛ mɛi krokomɛi ahe lɛ he kwraa, titri lɛ miklasbii lɛ. Mishishijee hemɔkɛyeli he kaa lɛ kɔɔ nɔ ni wɔtsɛɔ lɛ adafitswaa nyiɛmɔi lɛ he.

Yiŋtoo lɛ ji ni aha nyɛmimɛi hii kɛ yei akuu ko anyiɛ blɛoo yɛ gbɛjegbɛi wuji lɛ ahe ni amɛhiɛ okadii ni aŋmala nii yɛ nɔ. Wɔ fɛɛ wɔle wɔhe yɛ wɔ akrowa ni emli bii shɛɔ aaafee 3,000 loo nɔ̃ lɛ mli. Yɛ adafitswaa nyiɛmɔ lɛ ekome mli lɛ, minyiɛ liamɔ srɛnɛɛ ni ato lɛ naagbee gbɛ ní mihiɛ wolo ko ni aŋma yɛ nɔ akɛ, “Jamɔ Tsɔɔ Mɔ Tsɔne ni Eji Shishiulɔ.” Miskulbii lɛ ateŋ mɛi komɛi na mi, ni etsɛɛɛ nɔŋŋ ni amɛnyiɛ misɛɛ ni amɛmiila, akɛ “Nyɔŋmɔ Ahere Maŋtsɛ lɛ Yiwala.” Te mitsu shihilɛ lɛ he nii miha tɛŋŋ? Mikɛ ekãa sɔle koni maná hewalɛ ni matsa nɔ. Beni nyiɛmɔ lɛ ba naagbee lɛ, mihe fee oya kɛtee Maŋtsɛyeli Asa lɛ nɔ koni mikɛ okadi ni mihiɛ lɛ ayafɔ̃ shi ni maya shia. Shi kɛlɛ, mɔ ni kwɛɔ nɔ lɛ kɛɛ mi akɛ nyiɛmɔ kroko baaje shishi, ni ákɛ mɔ kome he miihia lolo koni ehiɛ okadi lɛ eko. No hewɔ lɛ, mitee ekoŋŋ, ni misɔle waa fe tsutsu lɛ. Shi kɛlɛ, yɛ nɛkɛ be nɛɛ mli lɛ, etɔ miskulbii lɛ ni amɛtee shia. Sɔlemɔi ni misɔle kɛha hewalɛnamɔ lɛ bafee shidaa sɔlemɔi!—Abɛi 3:5.

No mli lɛ, wɔhereɔ be-fɛɛ sɔɔlɔi hiɛmɛɛ yɛ wɔshia lɛ. Amɛji kuu ko ni he yɔɔ miishɛɛ ni eyɛ miishɛɛ akɛ aaahere amɛ hiɛmɛɛ. Mikaiɔ jogbaŋŋ akɛ be fɛɛ be lɛ, wɔfɔlɔi wieɔ be-fɛɛ sɔɔmɔ nitsumɔ lɛ he amɛtsɔɔ wɔ gbekɛbii lɛ akɛ eji nitsumɔ ni fe fɛɛ ni aaanyɛ atsu.

Akɛni mibo amɛhewalɛwoo lɛ toi hewɔ lɛ, yɛ afi 1945 mli lɛ, mije minitsumɔ yɛ be-fɛɛ sɔɔmɔ lɛ mli lɛ shishi. Sɛɛ mli lɛ miyafata minyɛmiyoo Ella, ní tsuɔ gbɛgbamɔ nitsumɔ lɛ yɛ London, Ontario lɛ he. Jɛmɛ ji he ni atsɔɔ mi sɔɔmɔ nitsumɔ lɛ fã ko ni misusu akɛ minyɛŋ matsu kɔkɔɔkɔ lɛ yɛ. Nyɛmimɛi lɛ jɛɔ okpɔlɔ kome he kɛyaa ekroko he yɛ hei ni ahɔɔ dãai yɛ lɛ ni amɛkɛ Buu-Mɔɔ kɛ Consolation (ni amrɔ nɛɛ atsɛɔ lɛ Awake!) lɛ haa nihelɔi lɛ. Heniianaa lɛ, atsuɔ nitsumɔ lɛ yɛ Hɔɔ shwane mli, no hewɔ lɛ, miyɛ otsi muu fɛɛ ni mikɛbaasɔle kɛha ekãa koni  manyɛ matsu! Dabi, nitsumɔ lɛ bɛ mlɛo kɛha mi, shi nyɔmɔwoo yɛ mli.

Yɛ gbɛ kroko nɔ lɛ, mikase gbɛ ni atsɔɔ nɔ akɛ Consolation woji krɛdɛɛ ni wieɔ yiwaa ni nyɛmimɛi ni yɔɔ Nazi yiwalɛ nsrai amli lɛ yɔɔ mli lɛ he lɛ haa, titri lɛ, bɔ ni feɔ ni nine shɛɔ Canada nitsumɔtsɛmɛi wuji, ni nitsumɔ wuji amli onukpai fata he lɛ nɔ. Yɛ afii lɛ amli lɛ, mina akɛ Yehowa fiɔ wɔsɛɛ be fɛɛ be, shii abɔ ni wɔkɛ wɔhe fɔ̃ɔ enɔ kɛha hewalɛ lɛ. Taakɛ Ataa fɔɔ kɛɛmɔ lɛ, Yehowa jɔɔ mɛi ni boɔ Lɛ toi lɛ.

Mikpɛlɛ Ninefɔɔ akɛ Miyasɔmɔ yɛ Quebec lɛ Nɔ

Yɛ July 4, 1940 mli lɛ, atsĩ Yehowa Odasefoi anitsumɔ lɛ naa yɛ Canada. Sɛɛ mli lɛ, ajie naatsii lɛ, shi atee nɔ awa wɔ yi yɛ Roma Katolik maŋ ni ji Quebec lɛ mli. Aje tafaa krɛdɛɛ ko ni akɛ dɛhiɛmɔ wolo ni hiɛ saneyitso ni mli wa ni ji Quebec’s Burning Hate for God and Christ and Freedom Is the Shame of All Canada lɛ shishi koni akɛgbala jwɛŋmɔ kɛba niseniianii ni afeɔ wɔnyɛmimɛi lɛ yɛ jɛmɛ lɛ nɔ. Nathan H. Knorr, ni ji Yehowa Odasefoi a-Nɔyeli Kuu lɛ mlinyo lɛ kɛ gbɛgbalɔi ohai abɔ kpe yɛ maŋ ni ji Montreal lɛ mli koni egbála nɔ ni baanyɛ ajɛ nɔ ni wɔbaafee lɛ mli kɛba lɛ mli etsɔɔ wɔ. Nyɛminuu Knorr kɛɛ wɔ akɛ kɛ́ wɔkpɛlɛ akɛ wɔkɛ wɔhe baawo tafaa lɛ mli lɛ, no lɛ wɔbaanyɛ wɔkpa gbɛ akɛ abaamɔ wɔ ni abaawo wɔ tsuŋ. Kwɛ bɔ ni enɛ baafee anɔkwale ha! Yɛ be kpalaŋŋ ko sɛɛ lɛ, amɔ mi shii 15. Kɛ́ wɔtee shiɛmɔ lɛ, wɔkwɛɔ akɛ wɔkɔlɔ brɔshi ni akɛshaa daaŋ kɛ osɛrɛ kɛji akɛ ekolɛ ehe bahia ni wɔye jenamɔ lɛ yɛ tsuŋwoohe lɛ.

Yɛ shishijee mli lɛ, wɔtsuɔ nitsumɔi lɛ babaoo yɛ teemɔŋ bɔni afee ni wɔkagbala jwɛŋmɔ kɛmiiba wɔnɔ. Mifɔɔ dɛhiɛmɔ woji babaoo hiɛmɔ yɛ baagi ko ni mikɛtsotsoroɔ mikuɛ yɛ miŋwɛi atade lɛ shishi lɛ mli. Baagi ni mli eyi obɔ kɛ dɛhiɛmɔ woji lɛ da saŋŋ, ni ehaa mifeɔ tamɔ mɔ ni hiɛ hɔ. Enɛ he ba sɛɛnamɔ kɛha mi, kɛ́ mibote tsɔne ni nyiɛɔ oketeke gbɛ nɔ ni mɛi babaoo yɔɔ mli ni miiya shikpɔŋkuku lɛ mli lɛ. Bei babaoo lɛ hii ni sumɔɔ yei asane teɔ shi amɛdamɔɔ shi koni amɛha “yoohɔlɔ” lɛ ata amɛsɛii lɛ anɔ.

Beni be shwie mli lɛ, wɔje shishi wɔbɔi woji jaa yɛ shwane mli. Wɔshiɔ dɛhiɛmɔ woji etɛ loo ejwɛ yɛ shinaai anaa, kɛkɛ lɛ wɔtee shikpɔŋkuku kroko mli. Bei pii lɛ, enɛ yeɔ omanye jogbaŋŋ. Shi kɛlɛ, kɛ́ Roma Katolik osɔfo ko ná ele akɛ wɔyɛ nakai akrowa lɛ mli lɛ, no lɛ wɔbaanyɛ wɔkpa gbɛ akɛ wɔkɛ naagba baakpe. Yɛ be ko mli lɛ, osɔfo ko wo basabasafeelɔi 50 loo 60 ni ji onukpai kɛ gbekɛbii hewalɛ koni amɛfɔ ameo kɛ wuɔ wɔji amɛtswia wɔ. Wɔyaba abo yɛ nyɛmi yoo Kristofonyo ko shia, he ni wɔkamɔ shikpɔŋ wɔwɔ kɛye jenamɔ lɛ yɛ lɛ.

No mli lɛ, gbɛgbalɔi ahe miihia waa koni amɛyashiɛ amɛtsɔɔ mɛi ni yɔɔ Quebec ni wieɔ France wiemɔ lɛ, no hewɔ lɛ, yɛ December 1958 mli lɛ, mi kɛ minyɛmiyoo Ruby bɔi France wiemɔ lɛ kasemɔ. No sɛɛ lɛ, akɛ nitsumɔi babaoo wo wɔdɛŋ yɛ hei ni awieɔ France wiemɔ lɛ yɛ lɛ. Nitsumɔ fɛɛ nitsumɔ ji niiashikpamɔ ko ni ekaaa. Yɛ he ko lɛ, wɔjɛ shinaa naa kɛtee shinaa naa ŋmɛlɛtswai kpaanyɔ gbi kome yɛ afii enyɔ mli ni mɔ ko mɔ ko booo wɔ toi! Gbɔmɛi lɛ baa bafiliɔ mɔ ni damɔ shinaa lɛ naa lɛ, kɛkɛ lɛ amɛgbala shinaa lɛ naa mama lɛ kɛtsi shinaa lɛ naa. Shi wɔnijiaŋ ejeee wui. Ŋmɛnɛ, asafoi enyɔ ni miishwere waa yɛ nakai maŋ lɛ mli.

Yehowa Waje Wɔ yɛ Gbɛ̀i Fɛɛ Nɔ

Gbɛgbamɔ krɛdɛɛ nitsumɔ naa gbele eha wɔ yɛ afi 1965 mli. Yɛ gbɛgbamɔ krɛdɛɛ nitsumɔ ko mli lɛ, wɔbanu nɔ ni yɔɔ Paulo wiemɔi ni aŋma afɔ̃ shi yɛ 1 Timoteo 6:8 lɛ shishi jogbaŋŋ, akɛ: “Kɛ́ wɔyɛ ŋmãa kɛ hehaanii kɛkɛ lɛ, esa akɛ wɔmii ashɛ he.” Esa akɛ wɔlɛte shika he jogbaŋŋ bɔni afee ni wɔnyɛ wɔkwɛ wɔhe. No hewɔ lɛ, wɔkɛ shika toɔ kɛha nɔ ni haa tsũ mli dɔɔ, tsũ nyɔmɔwoo, kane nyɔmɔwoo, kɛ niyenii. Beni wɔtsu enɛ he nii wɔgbe naa lɛ, eshwɛɔ wɔ shika cent 25 pɛ ni wɔbaanyɛ wɔkɛhe nɔ ni wɔsumɔɔ yɛ nyɔŋ lɛ mli.

Yɛ shika fioo ni wɔyɔɔ ni wɔkɛaawo nɔ ni haa tsũ mli dɔɔ lɛ he nyɔmɔ hewɔ lɛ, wɔhaa etsuɔ nii ŋmɛlɛtswai fioo ko pɛ yɛ gbɛkɛnaashi mli.  No hewɔ lɛ, wɔsɛɛ tsũ lɛ mli edɔɔɔ fe Degrees Celsius 15, ni bei pii lɛ emli jɔɔ ŋanii. Ojogbaŋŋ, gbi ko lɛ, Ruby Biblia mli nikaselɔi lɛ ateŋ mɔ kome binuu basara wɔ. Ekolɛ, etee shia ni eyakɛɛ enyɛ akɛ fɛi miihe agbe wɔ, ejaakɛ kɛjɛ no sɛɛ kɛbaa lɛ, yoo lɛ kɛ dɔlai nyɔŋma majeɔ wɔ daa nyɔŋ nɔ koni wɔkɛhe mu bɔni afee ni wɔha tsɔne ni haa tsũ mli dɔɔ lɛ ama nɔ be fɛɛ be. Wɔnuuu he akɛ nɔ ko eŋmɛɛ wɔ yɛ gbɛ ko nɔ. Jeee niiatsɛmɛi ji wɔ, shi wɔnine shɛ hiamɔ nii anɔ be fɛɛ be. Wɔnu he akɛ nɔ fɛɛ nɔ ni fata he lɛ ji jɔɔmɔ. Kwɛ bɔ ni wiemɔi ni yɔɔ Lala 37:25 lɛ efee anɔkwale eha, akɛ: “Minako jalɔ ko ni akwa lɛ loo ni eseshibii miisisɛ̃ aboloo pɛŋ”!

Yɛ shitee-kɛ-woo ni wɔkɛkpe lɛ fɛɛ sɛɛ lɛ, miná miishɛɛ akɛ mana ni mɛi ni mikɛfee Biblia mli nikasemɔi lɛ ateŋ mɛi babaoo ebaná anɔkwale lɛ he nilee. Mɛi komɛi kɛ amɛhe wo be-fɛɛ sɔɔmɔ nitsumɔ lɛ mli akɛ nitsumɔ ko, ni enɛ eha miná miishɛɛ kpele ko.

Wɔkpee Kaai Heei Anaa yɛ Omanyeyeli Mli

Cornwall, Ontario, bafee wɔ nitsumɔhe hee yɛ afi 1970 mli. Aaafee afi sɛɛ beni wɔbashɛ Cornwall lɛ, hela mɔ Awo. No mli lɛ, Ataa eje mli yɛ afi 1957 mli, ni mi kɛ minyɛmimɛi yei enyɔ lɛ ja Awo kwɛmɔ lɛ kɛyashi egbo yɛ afi 1972 lɛ mli. Ella Lisitza kɛ Ann Kowalenko, ni ji mɛi ni fata wɔhe yɛ gbɛgbamɔ krɛdɛɛ nitsumɔ lɛ mli lɛ ha wɔfi shi ni amɛjɛ suɔmɔ mli amɛfi wɔsɛɛ yɛ be nɛɛ mli. Beni wɔbɛ lɛ, amɛkwɛ wɔ Biblia nikasemɔi lɛ anɔ ni amɛtsu sɔ̃i krokomɛi ahe nii amɛha wɔ. Kwɛ bɔ ni wiemɔi ni yɔɔ Abɛi 18:24 lɛ ji anɔkwale ha, akɛ: “Naanyo ko yɛ ni kpɛtɛɔ mɔ gbagbalii fe nyɛmi”!

Eji anɔkwale akɛ, shihilɛ mli eyi obɔ kɛ kaai ni mli wawai sɔŋŋ. Yɛ Yehowa suɔmɔ sɛɛfimɔ lɛ hewɔ lɛ, minyɛ mikpee naa. Mikã he mikɛ miishɛɛ miitiu be-fɛɛ sɔɔmɔ nitsumɔ lɛ sɛɛ. Bob, ní gbo yɛ afi 1993 mli lɛ, kɛ nɔ ni fe afii 20 tsu gbɛgbamɔ nitsumɔ lɛ, ni nɔ ni fata he ji afii 10 ni jara wa ni lɛ kɛ eŋa, Doll kɛ amɛhe wo gbɛgbamɔ nitsumɔ lɛ mli lɛ. Minyɛmiyoo onukpa, Ella ní tsɔ esɛɛ yɛ October 1998 mli lɛ kɛ nɔ ni fe afii 30 tsu gbɛgbamɔ nitsumɔ lɛ, ni ehiɛ gbɛgbamɔ mumɔ lɛ mli be fɛɛ be. Yɛ afi 1991 mli lɛ, minyɛmiyoo kroko, ni ji Ruby ye kansa. Ni kɛlɛ, ekɛ ehewalɛ fioo ni eyɔɔ lɛ shiɛ sanekpakpa lɛ. Lɛ hu ekpaaa mɔ naaŋmɔlɔwoo kɛyashi gbi leebi ni egbo yɛ September 26, 1999 mli. Eyɛ mli  akɛ minyɛmimɛi yei lɛ bɛ dɔŋŋ moŋ, shi miyɛ mumɔŋ weku ni ji nyɛmimɛi hii kɛ yei ni haaa makpa mɔ naaŋmɔlɔwoo.

Kɛ́ mikwɛ be ni miye yɛ mishihilɛ mli lɛ, mɛni matsake? Miboteko gbalashihilɛ mli dã, shi aha mi fɔlɔi ni sumɔɔ mi, nyɛmi nuu, kɛ nyɛmimɛi yei ní kɛ anɔkwale lɛ ye klɛŋklɛŋ gbɛhe yɛ amɛshihilɛ mli lɛ. Miikpa gbɛ akɛ etsɛŋ ni mana amɛ fɛɛ ekoŋŋ yɛ gbohiiashitee lɛ mli. Amrɔ nɛɛ, miinu he akɛ mitsɛ miifua mi, ni miina minyɛ hiɛ yaafonui yɛ be mli ni wɔfua wɔhe waa lɛ. Ella, Ruby, kɛ Bob baahuru kɛ miishɛɛ.

Dani nakai be lɛ aaashɛ lɛ, miyɛ yiŋtoo ni madamɔ nɔ matsa nɔ mikɛ hewalɛ ni eshwɛ yɛ mimli lɛ ajie Yehowa yi. Be-fɛɛ sɔɔmɔ nitsumɔ lɛ ji shihilɛ ni ŋɔɔ ni nyɔmɔwoo yɔɔ mli. Etamɔ bɔ pɛ ni lalatsɛ lɛ kɛɛ yɛ mɛi ni nyiɛɔ yɛ Yehowa gbɛ̀i lɛ anɔ lɛ he lɛ, akɛ: “Aaajɔɔo ni aaahi ahao hu!”—Lala 128:1, 2.

[Mfonirii ni yɔɔ baafa 26]

Ataa sumɔɔ Biblia lɛ. Etsɔɔ wɔ koni wɔkɛtsu nii ni wɔkɛfã wɔhemɔkɛyeli lɛ he

[Mfoniri ni yɔɔ baafa 28]

Kɛjɛ abɛku kɛmiiya ninejurɔ: Ruby, mi, Bob, Ella, Awo, kɛ Ataa yɛ afi 1947 mli

[Mfoniri ni yɔɔ baafa 28]

Hiɛgbɛ; abɛku kɛmiiya ninejurɔ gbɛ: Mi, Ruby, kɛ Ella yɛ Kpokpaa Wulu nɔ Kpee ko shishi yɛ afi 1998 mli