“Nyɛbaa Miŋɔɔ, . . . ni Maha Nyɛ Hejɔɔmɔ”

Gbekɛbii ni Tamɔ Bɔ́ ni Haa Tsui Nyɔɔ Mɔ Mli

ŊWANEJEE ko bɛ he akɛ Yesu Kristo sɛɛnyiɛlɔi ni darako lɛ yɛ ejwɛŋmɔ mli beni ekɛɛ akɛ: “Nyɛbaa miŋɔɔ, . . . ni maha nyɛ hejɔɔmɔ” lɛ. (Mateo 11:28) Beni mɛi bɔi amɛbii kɛ eŋɔɔ baa lɛ, ekaselɔi lɛ bɔ mɔdɛŋ koni amɛtsĩ amɛ gbɛ. Shi Yesu kɛɛ akɛ: “Nyɛhaa gbekɛbii lɛ abaa miŋɔɔ, ni nyɛkatsĩa amɛ gbɛ.” Yesu ‘loo amɛ atuu, ni ebɔi amɛ jɔɔmɔ’ po. (Marko 10:14-16) Ŋwanejee ko bɛ he akɛ Yesu bu gbekɛbii akɛ mɛi ni jara wa.

Biblia lɛ wieɔ gbekɛbii hii kɛ yei anɔkwafoi, kɛ oblahii kɛ oblayei kɛ gbekɛbii bibii hu ni fee nɔkwɛmɔnii ni nɔ bɛ yɛ Nyɔŋmɔ sɔɔmɔ mli lɛ ahe. Agba “oblahii asafo” ni haa hejɔlɛ tamɔ bɔ́ lɛ he sane afɔ̃ shi yɛ Lalai awolo lɛ mli. Ewieɔ “oblahii” kɛ “oblayei” ni miijie Yehowa gbɛi lɛ yi lɛ hu ahe.—Lala 110:3; 148:12, 13.

He ko Kɛha Oblahii kɛ Oblayei Ashweremɔ

Esa jogbaŋŋ ákɛ akɛ gbekɛbii aaato bɔ́ he, ejaakɛ bɔ́ kɛ nifalɛ kɛ jɔɔmɔ yɛ tsakpaa. (1 Mose 27:28) Bɔ́ nɛɔ blɛoo ni ehaa mɔ he jɔɔ lɛ. Yɛ be ni Kristo eba nɛɛ mli lɛ, Kristofoi gbekɛbii ni fa babaoo jɛɔ amɛsuɔmɔ kɛ ekãa mli amɛkɛ amɛ diɛŋtsɛ amɛhe haa. Taakɛ bɔ́ ni haa mɔ he jɔɔ lɛ ji lɛ, gbekɛbii hii kɛ yei babaoo kɛ mlifilimɔ miisɔmɔ Nyɔŋmɔ, ni amɛyeɔ amɛbuaa amɛnanemɛi jálɔi.—Lala 71:17.

Kristofoi oblahii kɛ oblayei jeee hejɔɔmɔ kɛha mɛi krokomɛi pɛ; amɛ diɛŋtsɛ hu amɛnáa miishɛɛ yɛ amɛsɔɔmɔ lɛ mli. Nyɔŋmɔ gbɛjianɔtoo lɛ haa amɛ he ko ni amɛbaanyɛ amɛshwere yɛ. Kɛ́ gbekɛbii hii kɛ yei hiɛ jeŋbai ni nɔ kwɔlɔ amli lɛ, amɛnáa amɛkɛ Nyɔŋmɔ teŋ wekukpaa ni mli wa mli ŋɔɔmɔ. (Lala 119:9) Yɛ asafo lɛ mli lɛ, amɛkɛ amɛhe hu woɔ nitsumɔi kpakpai amli, ni amɛnáa nanemɛi kpakpai—nibii ni haa anáa tsui ni nyɔɔ mɔ mli kɛ shihilɛ ni shishinumɔ yɔɔ mli.

‘Hewalɛ kɛ Tsuiwoo’

Ani Kristofoi oblahii kɛ oblayei lɛ diɛŋtsɛ hu nuɔ he tamɔ “bɔ́”? Okɛ Tania, ni ji oblayoo fioo ko ni kɛ ehe woɔ asafoŋ nitsumɔi amli kɛ ekãa, ni ekɛ nɔ ni fe ŋmɛlɛtswai 70 tsuɔ sɔɔmɔ nitsumɔ lɛ daa nyɔŋ nɔ kɛ miishɛɛ lɛ agba sane. Te enuɔ he ehaa tɛŋŋ? Ekɛɛ akɛ: “Minuɔ he akɛ miyɛ miishɛɛ kɛ hewalɛ. Yehowa kɛ eshikpɔŋ nɔ gbɛjianɔtoo lɛ ni miyɔɔ yɛ mishihilɛ mli lɛ ji ‘hewalɛ kɛ tsuiwoo’ kɛha mi.”—Abɛi 3:8.

Ariel, ni ji oblayoo be-fɛɛ sɔɔlɔ kroko hu lɛ hiɛ sɔɔ mumɔŋ niyenii ni enine shɛɔ nɔ yɛ asafo lɛ mli lɛ waa. Ekɛɛ akɛ: “Kɛji mitee Kristofoi akpeei, kpeei wuji  kɛ kpeei bibii ashishi, ni minyɛ miye Yehowa mumɔŋ okpɔlɔ lɛ nɔ nii lɛ, enɛ woɔ mi hewalɛ yɛ mumɔŋ, ni eyeɔ ebuaa mi koni mana akɛ miyɛ nanemɛi nitsulɔi yɛ je lɛŋ fɛɛ.” Beni etsɔɔ tsuiwoo jɛɛhe ni fe fɛɛ lɛ, ekɛɛ akɛ: “Eji miishɛɛ diɛŋtsɛ kɛha mi akɛ miyɛ Yehowa akɛ naanyo, titri lɛ kɛji minu loo mina hewalɛ ni ehiii kwraa ni je nɛɛ náa yɛ mɛi anɔ lɛ.”—Yakobo 2:23.

Beni Abishai ye afii 20 lɛ, no mli lɛ eesɔmɔ akɛ be-fɛɛ sanekpakpa jajelɔ kɛ asafoŋ sɔɔlɔ yɛ asafo lɛ mli. Ekɛ wiemɔi nɛɛ tsɔɔ bɔ ni enuɔ he ehaa lɛ mli, akɛ: “Minuɔ he akɛ mihe ejɔ mi, ejaakɛ mile bɔ ni atsuɔ naagbai babaoo ni gbekɛbii kɛkpeɔ ŋmɛnɛ lɛ ahe nii ahaa. Biblia mli anɔkwale lɛ miiye miibua mi koni mikɛ mihiɛ afɔ̃ nɔ ni esa akɛ mafee bɔni afee ni mikɛ susuma muu fɛɛ asɔmɔ Yehowa lɛ nɔ.”

Beni Antoine ye kɛjɛ afii nyɔŋma kɛ etɛ kɛyaa lɛ, no mli lɛ emli fuɔ mramra. Be ko lɛ ekɛ sɛi tswa enaanyo nikaselɔ ko, ni ekɛ pɛnsil tsu mɔ kroko. Antoine jeee mɔ ko ni yɔɔ miishɛɛ! Shi Biblia mli nitsɔɔmɔ lɛ tsake ejeŋba. Amrɔ nɛɛ ni eye afii 19, ni eesɔmɔ akɛ asafoŋ sɔɔlɔ kɛ be-fɛɛ sɔɔlɔ yɛ asafo lɛ mli lɛ, ekɛɛ akɛ: “Miida Yehowa shi akɛni eŋmɛ mi gbɛ ni miná ehe nilee, kɛ yelikɛbuamɔ ni ekɛha mi ni hã mina bɔ ni ehe hiaa ni mikɛ henɔyeli atsu nii ni matsake mishihilɛ lɛ hewɔ. Yɛ nɛkɛ gbɛ nɔ lɛ, mijo naagbai babaoo anaa foi.”

Mɛi krokomɛi yɔseɔ Kristofoi gbekɛbii asubaŋ ni haa tsui nyɔɔ mɔ mli lɛ. Matteo ji gbekɛ nuu Odasefonyo ko ni yɔɔ Italy. Etsɔɔlɔ lɛ tswa adafi akɛ mɔ fɛɛ mɔ ni yɔɔ klas lɛ ni kɛ wiemɔ sha ko aaatsu nii lɛ baawo toigbalamɔ shika fioo ko. Yɛ be ko sɛɛ lɛ gbekɛbii lɛ bi ni afo mla lɛ mli ejaakɛ amɛkɛɛ akɛ, “anyɛŋ ahi shi ni akɛ wiemɔ sha ko tsuuu nii.” Matteo tsɔɔ mli akɛ: “Shi tsɔɔlɔ lɛ kɛɛ enɛ jeee anɔkwale, ni ekɛ mi, ni ji Yehowa Odasefoi lɛ ateŋ mɔ kome lɛ fee nɔkwɛmɔnɔ, ni ejie miyi yɛ klasbii lɛ fɛɛ ahiɛ yɛ miwiemɔ ni he tse lɛ hewɔ.”

Yɛ Thailand lɛ, tsɔɔlɔ ko tsɛ Racha ni eye afii 11 lɛ yɛ eklasbii toigbolɔi lɛ ahiɛ ni ejie eyi yɛ ejeŋba kpakpa lɛ hewɔ ni ekɛɛ: “Mɛni hewɔ nyɛ fɛɛ nyɛkɛ lɛ efeee nyɛ nɔkwɛmɔnɔ? Ebɔɔ mɔdɛŋ waa yɛ enikasemɔ mli ni eyɛ jeŋba kpakpa.” Kɛkɛ ni ekɛɛ gbekɛbii lɛ akɛ: “Misusuɔ akɛ esa akɛ nyɛtsɔmɔ Yehowa Odasefoi tamɔ bɔ ni Racha ji lɛ bɔni afee ni nyɛjeŋba ahi.”

Eyɛ miishɛɛ akɛ Kristofoi oblahii kɛ oblayei miiha Yehowa he nilee ni amɛyɔɔ lɛ miiya hiɛ, ni amɛmiifee esuɔmɔnaa nii. Nɛkɛ gbekɛbii ni sa nɛɛ jieɔ nilee ni afɔɔ namɔ yɛ mɛi ni edara ahe lɛ kpo. Nyɔŋmɔ baanyɛ aye abua amɛ ni amɛye omanye yɛ amɛ amrɔmrɔ shihilɛ nɛɛ mli, ní eha amɛ wɔsɛɛ be ni yɔɔ nyam yɛ jeŋ hee ni baa lɛ mli. (1 Timoteo 4:8) Nɔ ni tamɔɔɔ ŋmɛnɛŋmɛnɛ nibii agbɛjianɔtoo ni efee shwɛm yɛ mumɔŋ, ni emli eyi obɔ kɛ gbekɛbii ni bɛ miishɛɛ ni amɛ nijiaŋ eje wui nɛɛ, oblahii kɛ oblayei lɛ haa anaa akɛ amɛyɛ miishɛɛ!