‘Nyɛkwɛa Bɔ ni Nyɛboɔ Sane Toi Nyɛhaa lɛ Jogbaŋŋ’
‘Nyɛkwɛa Bɔ ni Nyɛboɔ Sane Toi Nyɛhaa lɛ Jogbaŋŋ’
“Esa akɛ wɔmɔ nii ni wɔnu lɛ mli ni awa, koni wɔkakpalaŋ kɛjɛ he be ko.”—HEBRIBII 2:1.
1. Feemɔ bɔ ni nibii ni gbalaa mɔ jwɛŋmɔ lɛ baanyɛ ekɛ oshara aba lɛ he mfoniri.
DAA afi lɛ, gbɔmɛi aaafee 37,000 gboiɔ yɛ tsɔne mli oshara mli yɛ United States pɛ. Mɛi ni yɔɔ nilee babaoo yɛ enɛ he lɛ kɛɔ akɛ eji tsɔne kudɔlɔi lɛ haa amɛhiɛ hiɔ gbɛ lɛ nɔ jogbaŋŋ kulɛ, amɛbaanyɛ amɛtsĩ gbelei nɛɛ babaoo naa. Okadii kɛ adafitswai ahe okadii ni mamɔ gbɛjegbɛi ahe loo tɛlifoŋ ni tsɔne kudɔlɔi komɛi kɛtsuɔ nii lɛ gbalaa amɛjwɛŋmɔ kɛjɛɔ tsɔne lɛ kudɔmɔ nɔ. Ayɛ mɛi hu ni yeɔ nii yɛ tsɔne mli—yɛ be mli ni amɛkudɔɔ tsɔne lɛ. Yɛ shihilɛi nɛɛ fɛɛ mli lɛ, nibii ni gbalaa jwɛŋmɔ lɛ baanyɛ ekɛ oshara aba.
2, 3. Mɛɛ ŋaawoo Paulo kɛha Hebri Kristofoi lɛ, ni mɛni hewɔ eŋaawoo lɛ sa lɛ?
2 Yɛ nɔ ni miihe ashɛ afii 2,000 dani afee tsɔne lɛ, bɔfo Paulo tsĩ nɔ ko pɔtɛɛ ni gbalaa mɔ jwɛŋmɔ ní miifee oshara kɛmiiha Hebri Kristofoi komɛi lɛ tã. Paulo ma nɔ mi akɛ áha Yesu Kristo ni átee lɛ shi lɛ hegbɛ ni nɔ kwɔ fe bɔfoi lɛ fɛɛ, ejaakɛ akɛ lɛ eta Nyɔŋmɔ ninejurɔ nɔ. Kɛkɛ ni bɔfo lɛ kɛɛ akɛ: “No hewɔ lɛ esa akɛ wɔmɔ nii ni wɔnu lɛ mli ni awa, koni wɔkakpalaŋ kɛjɛ he be ko.”—Hebribii 2:1.
3 Mɛni hewɔ esa akɛ Hebri Kristofoi lɛ ‘amɔ nii ni amɛnu’ ni kɔɔ Yesu he “lɛ mli ni awa” lɛ? Ejaakɛ nɔ ni miihe ashɛ afii 30 eho ni Yesu shi shikpɔŋ lɛ nɔ. Yɛ amɛ Nuŋtsɔ lɛ shimɔ sɛɛ lɛ, Hebri Kristofoi komɛi je shishi amɛbɔi kpalaŋmɔ kɛmiijɛ anɔkwa hemɔkɛyeli lɛ he. Yuda jamɔ, ni ji amɛtsutsu jamɔ lɛ bɔi amɛjwɛŋmɔ gbalamɔ.
Ehe Bahia ni Amɛbo Sane Toi Jogbaŋŋ
4. Mɛni hewɔ ekolɛ, aka Hebri Kristofoi komɛi ni amɛku amɛsɛɛ kɛya Yuda jamɔ mli lɛ?
4 Mɛni hewɔ abaaka Kristofonyo ko ní eku esɛɛ kɛya Yuda jamɔ mli lɛ? Ojogbaŋŋ, jamɔ he gbɛjianɔtoo ni yɔɔ Mla lɛ shishi lɛ kɔɔ nibii ni akɛ hiŋmɛi naa lɛ he. Mɛi baanyɛ ana osɔfoi lɛ ni amɛnu afɔleshaai lɛ ahe ŋma. Shi kɛlɛ, yɛ shihilɛi komɛi amli lɛ, Kristojamɔ bafee srɔto. Kristofoi ná Osɔfo Nukpa, Yesu Kristo, shi afii nyɔŋmai etɛ nɛ ni anako lɛ yɛ shikpɔŋ nɔ. (Hebribii 4:14) Amɛyɛ sɔlemɔtsu, shi e-hekrɔŋkrɔŋ lɛ yɛ ŋwɛi diɛŋtsɛ. (Hebribii 9:24) Ákɛ nɔ ni tamɔɔɔ helooŋ ketiafoo yɛ Mla lɛ shishi lɛ, Kristofoi aketiafoo lɛ ji “tsuiŋ ketiafoo ni yɔɔ mumɔ mli.” (Romabii 2:29) No hewɔ lɛ, kɛha Hebri Kristofoi lɛ, ekolɛ Kristojamɔ je shishi efee tamɔ nɔ ni bɛ faŋŋ.
5. Paulo tsɔɔ akɛ jamɔ he gbɛjianɔtoo ni Yesu to shishi lɛ nɔ kwɔ kwraa fe nɔ ni yɔɔ Mla lɛ shishi lɛ yɛ mɛɛ gbɛ nɔ?
5 Ehe bahia ni Hebri Kristofoi lɛ ayɔse nɔ ko ni sa kadimɔ waa yɛ jamɔ he gbɛjianɔtoo ni Kristo to shishi lɛ he. Edamɔ hemɔkɛyeli nɔ babaoo fe ninamɔ nɔ, ni kɛlɛ, enɔ kwɔ fe Mla ni akɛha kɛtsɔ gbalɔ Mose nɔ lɛ. Paulo ŋma akɛ: “Kɛ́ tsinai kɛ tookpakpoi alá kɛ tsinayoo lamulu ni atsɔɔ ashwãa mɛi ni ebule amɛhe lɛ anɔ lɛ tsuuɔ amɛhe ni amɛhe tseɔ yɛ heloo gbɛfaŋ lɛ: enyiɛ nɔŋŋ ni Kristo, ní tsɔ̃ naanɔ mumɔ lɛ nɔ eŋɔ ehe ni kpa ko bɛ he lɛ eha Nyɔŋmɔ lɛ, lá lɛ tsumɔŋ wɔhenilee lɛ he kɛjɛŋ nitsumɔi gbohii amli, koni wɔsɔmɔ Nyɔŋmɔ hiɛkãlɔ lɛ?” (Hebribii 9:13, 14) Hɛɛ, eshaifaa ni akɛhaa kɛtsɔ hemɔkɛyeli yɛ Yesu Kristo kpɔmɔ afɔleshaa lɛ nɔ lɛ nɔ kwɔ kwraa yɛ gbɛ̀i babaoo nɔ fe nɔ ni afɔlei ni ashaa yɛ Mla lɛ shishi lɛ kɛhaa lɛ.—Hebribii 7:26-28.
6, 7. (a) Mɛɛ shihilɛ ha ebafee nɔ ni he hiaa akɛ Hebri Kristofoi lɛ ‘akwɛ bɔ ni amɛboɔ sane toi amɛhaa lɛ jogbaŋŋ’? (b) Beni Paulo ŋma ewolo lɛ kɛyaha Hebribii lɛ, no mli lɛ be enyiɛ eshwɛ kɛha Yerusalem? (Kwɛmɔ shishigbɛ niŋmaa.)
6 Yiŋtoo kroko yɛ hewɔ ni ehe bahia akɛ Hebri Kristofoi lɛ akwɛ bɔ ni amɛboɔ nibii ni amɛnu yɛ Yesu he lɛ toi lɛ amɛhaa lɛ jogbaŋŋ lɛ. Egba akɛ abaakpata Yerusalem hiɛ. Yesu kɛɛ akɛ: “Ogbii miiba, ni ohenyɛlɔi lɛ aaatsa bu awo ohe, ni amɛaabɔleɔ kpula ni amɛaasa oyi yɛ he fɛɛ he, ni amɛaaŋɔo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ ekroko nɔ yɛ omli, ejaakɛ oyooo osaramɔ be lɛ!”—Luka 19:43, 44.
7 Mɛɛ be enɛ baaba mli? Yesu etsɔɔɔ gbi kɛ ŋmɛlɛtswaa lɛ. Shi moŋ, ekɛ gbɛtsɔɔmɔ nɛɛ ha akɛ: “Kɛ́ nyɛna akɛ abɔ nsra awo Yerusalem he lɛ, belɛ nyɛnáa nyɛlea akɛ efitemɔ lɛ eshɛ. No mli lɛ mɛi ni yɔɔ Yudea lɛ ajo foi aya gɔji lɛ anɔ, ni mɛi ni yɔɔ maŋ lɛŋ lɛ aje kpo, ni mɛi ni yɔɔ akrowai lɛ akaba maŋ.” (Luka 21:20, 21) Yɛ afii 30 ni Yesu ewie nakai wiemɔi lɛ sɛɛ lɛ, Kristofoi komɛi ni yɔɔ Yerusalem lɛ ehiɛɛɛ amɛ hehiamɔ henumɔ lɛ mli ni amɛha nibii gbala amɛjwɛŋmɔ. Kɛ́ wɔɔkɛɛ lɛ, amɛjie amɛhiŋmɛii kɛje gbɛ lɛ nɔ. Kɛ́ amɛtsakeee amɛjwɛŋmɔ lɛ, no lɛ amanehulu baaba amɛnɔ bɔ fɛɛ bɔ ni fee. Kɛji amɛsusu he nakai loo amɛsusuuu he nakai jio lɛ, Yerusalem hiɛkpatamɔ lɛ ebɛŋkɛ kpaakpa! * Hiɛnɔkamɔ ji akɛ, Paulo ŋaawoo lɛ bɔ Kristofoi ni yɔɔ Yerusalem ni wɔɔ mumɔŋ wɔdɔi lɛ kɔkɔ.
Ní ‘Aaakwɛ Bɔ ni Aboɔ Sane Toi Ahaa lɛ Jogbaŋŋ’ Ŋmɛnɛ
8. Mɛni hewɔ esa akɛ ‘wɔkwɛ bɔ ni wɔboɔ’ anɔkwalei ni yɔɔ Nyɔŋmɔ Wiemɔ lɛ mli lɛ ‘toi wɔhaa lɛ jogbaŋŋ lɛ’?
8 Taakɛ klɛŋklɛŋ afii oha lɛ mli Kristofoi lɛ ji lɛ, ehe miihia ni ‘wɔkwɛ bɔ ni wɔboɔ’ anɔkwalei ni yɔɔ Nyɔŋmɔ Wiemɔ lɛ mli lɛ ‘toi wɔhaa lɛ jogbaŋŋ.’ Mɛni hewɔ? Ejaakɛ wɔ hu hiɛkpatamɔ ko ni eshwɛ fioo ni baaba lɛ kã wɔhiɛ, jeee kɛha maŋ kome kɛkɛ, shi moŋ kɛha nibii agbɛjianɔtoo muu lɛ fɛɛ. (Kpojiemɔ 11:18; 16:14, 16) Eji anɔkwale akɛ, wɔleee gbi kɛ ŋmɛlɛtswaa pɔtɛɛ ni Yehowa baatsu nii nɛɛ he nii. (Mateo 24:36) Ni kɛlɛ, wɔji mɛi ni kɛ amɛhiŋmɛii miina Biblia mli gbalɛi amlibaa ní tsɔɔ yɛ faŋŋ mli akɛ wɔyɛ “naagbee gbii lɛ” amli. (2 Timoteo 3:1-5) No hewɔ lɛ, esa akɛ wɔkwɛ wɔhe nɔ jogbaŋŋ yɛ nɔ fɛɛ nɔ ni baanyɛ agbala wɔjwɛŋmɔ lɛ he. Esa akɛ wɔbo Nyɔŋmɔ Wiemɔ lɛ toi jogbaŋŋ koni wɔnu bɔ ni ehe hiaa ni wɔkɛ oyaiyeli atsu nii ahe nii lɛ jogbaŋŋ. Ja wɔfee nakai pɛpɛɛpɛ dani wɔbaanyɛ ‘nii ni baaba nɛɛ fɛɛ mli wɔje.’—Luka 21:36.
9, 10. (a) Te wɔɔfee tɛŋŋ wɔtsɔɔ akɛ wɔboɔ mumɔŋ nibii atoi jogbaŋŋ? (b) Nyɔŋmɔ wiemɔ lɛ ji ‘kane ha wɔnane’ kɛ ‘la hu yɛ wɔtempɔŋi anɔ’ yɛ mɛɛ gbɛ nɔ?
9 Yɛ nɛkɛ jaramɔ bei nɛɛ amli lɛ, te wɔɔfee tɛŋŋ wɔtsɔɔ akɛ ‘wɔmiikwɛ bɔ ni wɔboɔ’ mumɔŋ nibii ‘atoi wɔhaa lɛ jogbaŋŋ’ lɛ? Gbɛ kome ji ní wɔya Kristofoi akpeei, kpeei bibii, kɛ kpeei wuji daa. Esa akɛ wɔfee Biblia lɛ kaselɔi ni yɔɔ ekãa bɔni afee ni wɔnyɛ wɔtsi wɔbɛŋkɛ e-Ŋmalɔ, ni ji Yehowa lɛ. (Yakobo 4:8) Kɛ́ wɔná Yehowa he nilee kɛtsɔ teemɔŋ nikasemɔ kɛ kpeei anɔ lɛ, no lɛ wɔbaatamɔ lalatsɛ lɛ ní kɛɛ Nyɔŋmɔ akɛ: “Owiemɔ lɛ ji kane ha minane kɛ la hu yɛ mitempɔŋ lɛ nɔ.”—Lala 119:105.
10 Biblia lɛ feɔ ‘la yɛ wɔtempɔŋ lɛ nɔ’ kɛji egba wɔ Nyɔŋmɔ yiŋtoi kɛha wɔsɛɛ. Eji ‘kane hu ha wɔnane.’ Yɛ gbɛ kroko nɔ lɛ, ebaanyɛ eye ebua wɔ ni wɔle nɔ ni wɔbaafee beni wɔkɛ shihilɛ mli naagbai ni kaa mɔ ekpe lɛ. Enɛ hewɔ ni kɛji wɔbakpe koni wɔkɛ nanemɛi heyelilɔi abo tsɔsemɔi atoi ni wɔ diɛŋtsɛ wɔkane Nyɔŋmɔ Wiemɔ lɛ, esa akɛ ‘wɔkwɛ bɔ ni wɔboɔ toi wɔhaa lɛ jogbaŋŋ lɛ.’ Saji ni wɔnine shɛɔ nɔ lɛ baaye abua wɔ koni wɔfee yiŋkpɛi ni nilee yɔɔ mli ni kɛ sɛɛnamɔi baa, nɔ ni saa Yehowa hiɛ ní haa etsui nyaa kɛ miishɛɛ. (Abɛi 27:11; Yesaia 48:17) Te wɔɔfee tɛŋŋ wɔha be sɛɛkɛlɛ ni wɔjwɛŋmɔ nyɛɔ emɔɔ nii lɛ aya hiɛ yɛ kpeei ashishi kɛ teemɔŋ nikasemɔ bei amli bɔni afee ni wɔná Nyɔŋmɔ mumɔŋ gbɛjianɔtoo lɛ he sɛɛ kɛmɔ shi lɛ?
Be Sɛɛkɛlɛ ni Wɔjwɛŋmɔ Nyɛɔ Emɔɔ Nii ní Wɔɔha Eya Hiɛ
11. Mɛni hewɔ bei komɛi lɛ toiboo ni aaafee yɛ Kristofoi akpeei ashishi lɛ bɛ mlɛo lɛ?
11 Bei komɛi lɛ, toiboo ni aaafee yɛ Kristofoi akpeei ashishi lɛ bɛ mlɛo. Ekolɛ abifao yaafo loo mɔ ko ni ekpe sɛɛ ni miitao sɛi ata nɔ lɛ baanyɛ agbala jwɛŋmɔ lɛ yɛ gbɛ ni waaa nɔ. Ekolɛ ebaatɔ wɔ waa yɛ gbi ko mli nitsumɔ dɛŋdɛŋ lɛ sɛɛ. Ekolɛ mɔ ni wieɔ yɛ wiemɔ kpoku lɛ nɔ lɛ jeee mɔ ko ni wiemɔ kanyaa mɔ, ni beni wɔbaahɛre shi lɛ, wɔjwɛŋmɔ miikpa shi—ni ekolɛ wɔmiiwɔ po! Akɛni saji ni akɛhaa lɛ ahe miihia waa hewɔ lɛ, esa akɛ wɔbɔ mɔdɛŋ koni wɔha be sɛɛkɛlɛ ni wɔjwɛŋmɔ nyɛɔ emɔɔ nii lɛ aya hiɛ yɛ asafoŋ kpeei ashishi. Shi te wɔɔfee tɛŋŋ wɔfee enɛ?
12. Mɛni baaha efee mlɛo kɛha wɔ koni wɔbo sane toi jogbaŋŋ yɛ kpeei ashishi?
12 Bei pii lɛ, kɛ́ wɔsaa wɔhe jogbaŋŋ lɛ, ewaaa akɛ wɔɔbo sane toi jogbaŋŋ yɛ kpeei ashishi. Belɛ, mɛni hewɔ otooo be ko ní otsɔ hiɛ osusu woji ni abaasusu he lɛ he lɛ? Eheɔ minitii fioo pɛ daa gbi ni akɛkane ni asusu otsi Biblia kanemɔ lɛ mli yitsei ni akɛha lɛ ahe. Kɛ́ wɔto gbɛjianɔ lɛ, wɔbaanyɛ wɔná be hu koni wɔkɛsaa wɔhe kɛha Asafo Woloŋ Nikasemɔ lɛ kɛ Buu-Mɔɔ Nikasemɔ lɛ. Gbɛjianɔtoo fɛɛ gbɛjianɔtoo ni wɔbaahala lɛ, nɔ kome yɛ faŋŋ akɛ: Hesaamɔ baaye abua wɔ koni wɔbo saji ni abaasusu he yɛ asafoŋ kpeei ashishi lɛ toi jogbaŋŋ.
13. Mɛni baanyɛ aye abua wɔ koni wɔha wɔjwɛŋmɔ ahi saji ni asusuɔ he yɛ wɔkpeei ashishi lɛ nɔ?
13 Kɛfata wɔhe ni wɔɔsaa jogbaŋŋ lɛ he lɛ, mɛi komɛi ena akɛ amɛnyɛɔ amɛboɔ sane toi jogbaŋŋ yɛ kpeei ashishi kɛ́ amɛta Maŋtsɛyeli Asa lɛ hiɛgbɛ sɛii lɛ anɔ. Wielɔ lɛ hiɛ kwɛmɔ, Biblia lɛ mli kwɛmɔ yɛ be mli ni akaneɔ ŋmalɛ ko, kɛ saji otii ni aŋmalaa ashwieɔ shi lɛ ji gbɛ̀i krokomɛi ni wɔtsɔɔ nɔ ni wɔhaaa wɔjwɛŋmɔ akpa shi. Shi kɛlɛ, wɔtsui ni wɔɔfee lɛ klalo lɛ he miihia waa fe ŋaa gbɛ pɔtɛɛ ko ni atsɔɔ nɔ ahaa jwɛŋmɔ hiɔ nii anɔ. Esa akɛ wɔnu yiŋtoo hewɔ ni wɔkpeɔ kutuu lɛ shishi. Wɔkɛ wɔnanemɛi heyelilɔi lɛ kpeɔ, titri lɛ, koni wɔjá Yehowa. (Lala 26:12; Luka 2:36, 37) Kpeei ji gbɛ ni he hiaa ni atsɔɔ nɔ alɛɔ wɔ yɛ mumɔŋ. (Mateo 24:45-47) Kɛfata he lɛ, amɛhaa wɔnáa hegbɛi ni ‘wɔkɛ kanyaa wɔhe kɛha suɔmɔ kɛ nitsumɔi kpakpai.’—Hebribii 10:24, 25.
14. Mɛni ji nɔ diɛŋtsɛ ni haa kpee ko yeɔ omanye?
14 Ekolɛ, mɛi komɛi baadamɔ nitsɔɔmɔ hesaai ni mɛi ni kɛ amɛhe wo nifeemɔ lɛ mli lɛ yɔɔ lɛ nɔ amɛkɛtsɔɔ bɔ ni kpee ko hi ha. Kɛ́ wielɔi lɛ ahe esa lɛ, abaanyɛ awie kpee lɛ he akɛ eŋɔɔ. Shi kɛ́ efee tamɔ nɔ ni nitsɔɔmɔ hesaa ko bɛ mli lɛ, ekolɛ wɔbaasusu he yɛ gbɛ kroko nɔ. Eji anɔkwale akɛ esa akɛ mɛi ni yɔɔ nifeemɔ yɛ gbɛjianɔtoo lɛ mli lɛ abɔ mɔdɛŋ koni amɛkɛ nitsɔɔmɔ hesaai atsu nii, ní titri lɛ amɛshɛ tsuii ahe. (1 Timoteo 4:16) Ni kɛlɛ, esaaa akɛ wɔ mɛi ni wɔboɔ toi lɛ wieɔ nii ahe bɔ ni esaaa. Eyɛ mli akɛ nitsɔɔmɔ hesaa ni mɛi ni kɛ amɛhe woɔ nifeemɔ lɛ mli lɛ yɔɔ lɛ he miihia moŋ, shi jeee no ji nɔ̃ titri ni haa kpee ko yeɔ omanye. Ani okpɛlɛɛɛ nɔ akɛ nɔ̃ titri ni esa akɛ wɔsusu he lɛ jeee bɔ ni wielɔ lɛ ha ewiemɔ lɛ jogbaŋŋ eha, shi moŋ bɔ ni wɔbo toi jogbaŋŋ wɔha? Kɛ́ wɔtee kpeei ashishi ni wɔbo nɔ ni akɛhaa lɛ toi jogbaŋŋ lɛ, belɛ wɔmiisɔmɔ Nyɔŋmɔ yɛ esuɔmɔnaa nii kɛ gbeekpamɔ naa. No ji nɔ ni haa kpee lɛ yeɔ omanye. Kɛ́ wɔmiishwe ni wɔná Nyɔŋmɔ he nilee lɛ, no lɛ wɔbaaná kpeei ahe sɛɛ, ní ekɔɔɔ he eko nyɛmɔi ni wielɔ lɛ yɔɔ. (Abɛi 2:1-5) Belɛ, bɔ fɛɛ bɔ ni fee lɛ, nyɛhaa wɔtswaa wɔfai shi akɛ, ‘wɔbaakwɛ bɔ ni wɔboɔ sane toi’ yɛ wɔkpeei ashishi lɛ ‘wɔhaa lɛ jogbaŋŋ.’
Ná Teemɔŋ Nikasemɔ Hesɛɛ Kɛmɔ Shi
15. Nikasemɔ kɛ enɔ jwɛŋmɔ he baanyɛ aba sɛɛnamɔ kɛha wɔ yɛ mɛɛ gbɛ nɔ?
15 Wɔnáa hesɛɛ babaoo diɛŋtsɛ kɛji akɛ ‘wɔbo sane toi jogbaŋŋ’ yɛ be mli ni wɔfeɔ teemɔŋ nikasemɔ kɛ sane nɔjwɛŋmɔ mli. Biblia lɛ kɛ Kristofoi awoji akanemɔ kɛ enɔ jwɛŋmɔ lɛ baaha wɔná hegbɛi ni hi fe fɛɛ kɛnyɛmɔ anɔkwalei ni yɔɔ Nyɔŋmɔ Wiemɔ lɛ mli lɛ anɔ wɔwo wɔtsuii amli. Nɔ ni baajɛ mli kɛba ji akɛ, enɛ baaná hewalɛ waa yɛ gbɛ ni wɔtsɔɔ nɔ wɔjwɛŋɔ ni wɔfeɔ nii lɛ nɔ. Eji anɔkwale akɛ, ebaaye ebua wɔ koni wɔná miishɛɛ yɛ Yehowa suɔmɔnaa nifeemɔ mli. (Lala 1:2; 40:9) No hewɔ lɛ, ehe miihia ni wɔha bɔ ni wɔjwɛŋmɔ nyɛɔ emɔɔ nii ehaa lɛ aya hiɛ bɔni afee ni wɔná he sɛɛ jogbaŋŋ beni wɔkaseɔ nii lɛ. Nibii nyɛɔ egbalaa mɔ jwɛŋmɔ yɛ gbɛ ni waaa nɔ! Nibii bibii ni folɔɔ nifeemɔi amli—tɛlifoŋ gbɛɛmɔ loo gbɛɛmɔ ko baanyɛ agbala wɔjwɛŋmɔ. Aloo ekolɛ ewaa akɛ wɔjwɛŋmɔ baama nɔ ko nɔ be kakadaŋŋ. Wɔbaanyɛ wɔta shi kɛ yiŋtoo kpakpa akɛ wɔbaaye mumɔŋ niyenii, shi yɛ be fioo ko sɛɛ lɛ, wɔbaana akɛ wɔjwɛŋmɔ miikpa shi. Te wɔɔfee tɛŋŋ ‘wɔkwɛ bɔ ni wɔboɔ sane toi wɔhaa lɛ jogbaŋŋ’ yɛ be mli ni wɔfeɔ teemɔŋ nikasemɔ yɛ Nyɔŋmɔ Wiemɔ lɛ mli lɛ?
16. (a) Mɛni hewɔ ehe hiaa ni wɔto be kɛha teemɔŋ nikasemɔ lɛ? (b) Mɛɛ gbɛ nɔ oto be kɛha Nyɔŋmɔ Wiemɔ lɛ kasemɔ?
16 Ehi akɛ oto gbɛjianɔ ni ohala shihilɛ ni hi fe fɛɛ ni obaanyɛ okɛkase nii. Kɛha wɔteŋ mɛi babaoo lɛ, wɔnaaa be wɔhaaa wɔhe. Wɔbaanyɛ wɔnu he tamɔ nɔ ni gbi lɛ mli nifeemɔi lɛ miiloo wɔ tamɔ tso nine ko ni faa looɔ lɛ kɛyaa. Kɛ́ wɔɔkɛɛ lɛ, esa akɛ wɔwuu wɔshi nu ni hoɔ lɛ, koni wɔtao dioofeemɔ be ko yɛ wɔshihilɛ ni dekã bɛ mli lɛ mli. Wɔnyɛŋ wɔmɛ koni hegbɛ ni wɔɔnyɛ wɔkɛkase nii lɛ diɛŋtsɛ naa agbele aha wɔ. Yɛ no najiaŋ lɛ, esa akɛ wɔkudɔ shihilɛ lɛ kɛtsɔ be ni wɔɔto koni wɔkɛkase nii lɛ nɔ. (Efesobii 5:15, 16) Mɛi komɛi toɔ be yɛ leebi mli beni nibii babaoo nyɛɛɛ agbala jwɛŋmɔ lɛ. Mɛi krokomɛi hu naa akɛ gbɛkɛnaashi haa amɛnáa hegbɛ ni hi. Oti lɛ ji akɛ esaaa akɛ wɔkuɔ wɔhiɛ wɔshwieɔ bɔ ni ehe hiaa ni wɔná Nyɔŋmɔ kɛ e-Bi lɛ he anɔkwa nilee lɛ nɔ. (Yohane 17:3) No hewɔ lɛ, nyɛhaa wɔtoa be kɛha teemɔŋ nikasemɔ ni wɔkɛ nakai gbɛjianɔtoo lɛ atsu nii.
17. Mɛni ji sane nɔjwɛŋmɔ, ni ehe baanyɛ aba sɛɛnamɔ kɛha wɔ yɛ mɛɛ gbɛ nɔ?
17 Sane nɔjwɛŋmɔ—nɔ ni wɔkase kɛtsɔ nikasemɔ nɔ lɛ he susumɔ—he miihia waa. Sane nɔjwɛŋmɔ yeɔ ebuaa wɔ ni wɔkɛ Nyɔŋmɔ susumɔi woɔ wɔtsuii amli. Eyeɔ ebuaa wɔ ni wɔnaa bɔ ni wɔɔfee ni wɔkɛ Biblia mli ŋaawoo atsu nii bɔni afee ni wɔtsɔmɔ “wiemɔ lɛ nɔyelɔi, ni jeee wiemɔ lɛ nulɔi kɛkɛ.” (Yakobo 1:22-25) Kɛfata he lɛ, sane nɔjwɛŋmɔ yeɔ ebuaa wɔ ni wɔtsiɔ wɔbɛŋkɛɔ Yehowa, ejaakɛ eyeɔ ebuaa wɔ ni wɔsusuɔ esui lɛ ahe kɛ bɔ ni amaa nɔ mi yɛ saji ni asusu he yɛ nikasemɔ bei amli lɛ he lɛ.
18. Mɛɛ shihilɛi ahe hiaa kɛha sane nɔjwɛŋmɔ ni mɔɔ shi?
18 Bɔni afee ni wɔná nikasemɔ kɛ sane nɔjwɛŋmɔ he sɛɛ kɛmɔ shi lɛ, esa akɛ wɔjie nibii ni baagbala wɔjwɛŋmɔ lɛ kɛjɛ wɔyitsoŋ. Bɔni afee ni wɔná saji heei beni wɔjwɛŋɔ sane nɔ lɛ, ehe miihia ni wɔjie ŋmɛnɛŋmɛnɛ beaŋ shihilɛi ni gbalaa mɔ jwɛŋmɔ lɛ kɛjɛ wɔyitsoŋ. Enɛ ni wɔɔfee lɛ heɔ be kɛ he ni yɔɔ dioo, ni kɛlɛ, kwɛ miishɛɛ ni eji ákɛ akɛ he aaawo mumɔŋ niyenii kɛ nui he anɔkwale ni anaa yɛ Nyɔŋmɔ Wiemɔ lɛ mli lɛ mli!
19. (a) Yɛ nɔ ni kɔɔ teemɔŋ nikasemɔ he lɛ, mɛni eye ebua mɛi komɛi ni amɛha be sɛɛkɛlɛ ni amɛjwɛŋmɔ nyɛɔ emɔɔ nii lɛ etee hiɛ? (b) Mɛni esa akɛ efee wɔsu yɛ nikasemɔ he, ni mɛɛ sɛɛnamɔ wɔbaanyɛ wɔná kɛjɛ nitsumɔ ni he hiaa nɛɛ mli?
19 Ni kɛ́ be sɛɛkɛlɛ ni wɔjwɛŋmɔ nyɛɔ emɔɔ nii lɛ yɛ kuku ni wɔjwɛŋmɔ bɔiɔ shikpaa yɛ nikasemɔ be fioo ko mli lɛ, no hu? Mɛi komɛi ena akɛ amɛbaanyɛ amɛha be sɛɛkɛlɛ ni amɛjwɛŋmɔ nyɛɔ emɔɔ nii lɛ aya hiɛ beni amɛkaseɔ nii lɛ kɛtsɔ nikasemɔ be ni yɔɔ kuku ni amɛkɛ jeɔ shishi, kɛkɛ lɛ fiofio lɛ amɛha esɛɛ etsɛ lɛ nɔ. Esa akɛ oti ni ma wɔhiɛ lɛ afee akɛ wɔbaatsɛ yɛ nikasemɔ he moŋ fe ni wɔɔfee lɛ kpalakpala. Esa akɛ wɔná sane ni asusuɔ he lɛ he miishɛɛ waa diɛŋtsɛ. Ni wɔbaanyɛ wɔkɛ woji babaoo ni tsulɔ anɔkwafo kɛ nilelɔ kuu lɛ kɛha wɔ lɛ atsu nii ni wɔkɛpɛi nibii amli lolo. Sɛɛnamɔ babaoo yɛ taomɔ ni oootao “Nyɔŋmɔ nibii ni mli kwɔlɔ” lɛ he. (1 Korintobii 2:10) Kɛ́ wɔfee nakai lɛ, ehaa Nyɔŋmɔ he nilee ni wɔyɔɔ lɛ yaa hiɛ ni wɔbanáa jwɛŋmɔŋ nyɛmɔi. (Hebribii 5:14) Kɛ́ wɔji Nyɔŋmɔ Wiemɔ lɛ kaselɔi ni yɔɔ ekãa lɛ, no lɛ wɔbaatsɔmɔ “mɛi ni yɔɔ hewalɛ ni amɛkɛaatsɔɔ mɛi krokomɛi hu.”—2 Timoteo 2:2.
20. Te wɔɔfee tɛŋŋ wɔná wɔkɛ Yehowa Nyɔŋmɔ teŋ wekukpaa mli ŋɔɔmɔ ni wɔya nɔ wɔhiɛ mli?
20 Kristofoi akpeei ni wɔɔya kɛ wɔhe ni wɔkɛaawo teemɔŋ nikasemɔ mli lɛ baaye abua wɔ koni wɔná wɔkɛ Yehowa teŋ wekukpaa mli ŋɔɔmɔ ni wɔya nɔ wɔhiɛ mli. Eka shi faŋŋ akɛ, nɛkɛ ji bɔ ni ebalɛ yɛ lalatsɛ lɛ gbɛfaŋ, mɔ ni kɛɛ Nyɔŋmɔ akɛ: “Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ.” (Lala 119:97) Belɛ, bɔ fɛɛ bɔ ni fee lɛ, nyɛhaa wɔyaa kpeei, kpeei bibii, kɛ kpeei wuji daa. Ni eba akɛ wɔbaato be kɛha Biblia mli nikasemɔ kɛ enɔ jwɛŋmɔ. Kɛkɛ lɛ, abaajɔɔ wɔ babaoo akɛ ‘wɔkwɛ bɔ ni wɔboɔ’ Nyɔŋmɔ Wiemɔ lɛ ‘toi wɔhaa lɛ jogbaŋŋ.’
[Shishigbɛ niŋmaa]
^ kk. 7 Eeenyɛ eba aka, aŋma wolo lɛ kɛyaha Hebribii lɛ yɛ afi 61 Ŋ.B. Kɛ́ nakai ni lɛ, no lɛ aaafee afii enumɔ pɛ sɛɛ ni Cestius Gallus asraafoi lɛ babɔ nsra amɛwo Yerusalem he. Etsɛɛɛ ni nakai asraafoi lɛ gbala amɛhe shi, ni eha Kristofoi lɛ ná hegbɛ ni amɛjo foi. Afii ejwɛ sɛɛ lɛ, Roma asraafoi ni yɔɔ Tatsɛ Tito shishi lɛ kpata maŋ lɛ hiɛ.
Ani Okaiɔ?
• Mɛni hewɔ Hebri Kristofoi komɛi kpalaŋɔ kɛjɛɔ anɔkwa hemɔkɛyeli lɛ he lɛ?
• Te wɔɔfee tɛŋŋ wɔbo sane toi jogbaŋŋ yɛ Kristofoi akpeei ashishi?
• Mɛni baaye abua wɔ koni wɔná teemɔŋ Biblia mli nikasemɔ kɛ enɔ jwɛŋmɔ he sɛɛ lɛ?
[Nikasemɔ lɛ he Sanebimɔi]
[Mfoniri ni yɔɔ baafa 11]
Ehe bahia ni Hebri Kristofoi lɛ ahiɛ ahi amɛhe nɔ yɛ Yerusalem hiɛkpatamɔ ni ebɛŋkɛ lɛ he
[Mfoniri ni yɔɔ baafa 13]
Fɔlɔi baanyɛ aye abua amɛbii koni amɛná Kristofoi akpeei ahe sɛɛ