Ani Esa akɛ Ofee Mɔ ni Haaa Nɔ ko Agba Enaa?

EKOLƐ, mɛi babaoo baanu he akɛ kɛji akɛ asusu akɛ amɛji mɛi ni haaa nɔ ko agba amɛnaa lɛ, belɛ eji yijiemɔ. Shi kɛlɛ, nakai su lɛ baanyɛ atsake ni efee mɔ ni feɔ anyagba. Biblia lɛ kɛɔ akɛ: ‘Anyagba ni kwashiai feɔ lɛ aaakpata amɛhiɛ.’ (Abɛi 1:32) Mɛni no tsɔɔ?

Biblia shishitsɔɔmɔi krokomɛi tsɔɔ shishijee Hebri wiemɔ lɛ shishi kɛ wiemɔi tamɔ “jwɛŋmɔ bɛ mli” (American Standard Version), “tsui mli nyɔɔ diɛŋtsɛ” (The New American Bible), kɛ “anyagbafeemɔ.” (The New English Bible) Yɛ shishinumɔ nɛɛ naa lɛ, akɛ anyagbafeemɔ tsaa anihaolɔ kɛ mɔ ni bɛ jwɛŋmɔ, ni no hewɔ lɛ, nakai nɔŋŋ akɛtsaa kwashiafeemɔ loo buuluufeemɔ.

Yɛ klɛŋklɛŋ afii oha lɛ mli lɛ, Kristofoi ni yɔɔ Laodikea asafo lɛ mli lɛ haaa mumɔŋ gbɔjɔmɔ shihilɛ mli ni amɛyɔɔ lɛ agba amɛnaa kwraa. Amɛkɛ anyagbafeemɔ shwã akɛ, “nɔ ko nɔ ko he ehiaaa [amɛ].” Yesu Kristo jaje amɛ, ni ekɛɛ amɛ koni amɛtsiɛ ekãa ni amɛyɔɔ ákɛ Kristofoi lɛ hiɛ.—Kpojiemɔ 3:14-19.

Anyagbafeemɔ ji su ko hu ni ale waa yɛ mɛi ni hi shi yɛ Noa gbii lɛ amli lɛ ahe. Amɛha shihilɛ mli nibii ni yɔɔ je nɛŋ lɛ he amɛjwɛŋmɔ, “niyeli kɛ ninumɔ kɛ yoowɛɛ kɛ gbala hamɔ . . . , ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee.” Kɛkɛ ni Yesu kɛfata he akɛ: “Nakai nɔŋŋ gbɔmɔ bi lɛ baa lɛ aaatamɔ.”—Mateo 24:37-39.

Biblia mli gbalɛi ni eba mli lɛ tsɔɔ akɛ wɔyɛ “gbɔmɔ bi,” Yesu Kristo ‘ba ni eba’ be lɛ mli. Eba akɛ wɔfeŋ anyagba, wɔhiŋ shi kɛkɛ, wɔfeŋ wɔhe mɛi ni nɔ ko kɔɔɔ amɛhe eko—wɔfee wɔhe mɛi ni haaa nɔ ko kwraa agba amɛnaa kɔkɔɔkɔ.—Luka 21:29-36.