Maŋtsɛyeli Jajelɔi Bɔ Amaniɛ

Jweremɔ Nɔ Kɛha Maŋtsɛyeli Asa Ko

FINLAND Ministry of Environment (Maŋ Sɔɔmɔ ni Kwɛɔ Finland Shikpɔŋ Shikamɔ Nɔ) lɛ hala afi 2000 lɛ akɛ “Afi Kɛha Shikpɔŋ nɔ Saamɔ.” Gbɛjianɔtolɔi lɛ ateŋ mɔ kome jaje akɛ: “Yiŋtoo hewɔ ni wɔhala shikpɔŋ lɛ nɔ saamɔ akɛ saneyitso kɛha afi lɛ ji, koni ekai wɔ fɛɛ hewalɛ ni abɔɔi náa yɛ wɔ daa gbi shihilɛi amli kɛ wɔhewalɛnamɔ nɔ.”

Yɛ January 12, afi 2001 lɛ, Yehowa Odasefoi anitsumɔhe nine ni yɔɔ Finland lɛ nine shɛ wolo ko nɔ kɛjɛ Finnish Association of Landscape Industries (Finland Nitsumɔi ni Kwɛɔ Shikpɔji Anɔ Akuu) lɛ ŋɔɔ. Wolo lɛ tsɔɔ mli akɛ, akɛ shikpɔŋ nɔ saamɔ he saneyitso ni ahala kɛha afi lɛ he jweremɔ nii lɛ eko eha Yehowa Odasefoi a-Maŋtsɛyeli Asa ni yɔɔ Tikkurila lɛ, yɛ ehewɔ wulamɔ ni sa kadimɔ kɛ abɔɔ ni akwra lɛ fɛfɛo lɛ hewɔ. Wolo lɛ kɛfata he akɛ: “Yɛ hulutsoo be kɛ fɛ̃ibe mli fɛɛ lɛ, Maŋtsɛyeli Asa lɛ hewɔŋ shikpɔŋ tso muu lɛ fɛɛ shikamɔ yɛ fɛo, eyɛ fɛo naakpa, ni enɔ bɛ.”

Akɛ jweremɔ nɔ lɛ ha Yehowa Odasefoi lɛ yɛ nifeemɔ ko ni nilelɔi kɛ guɔyelɔi 400 ba eko ni afee yɛ Rosendahl Gbɔiatoohe ni yɔɔ Tampere, yɛ Finland lɛ shishi. Finnish Association of Landscape Industries lɛ kɛ adafitswaa ni jɛ nɔyeli lɛ ŋɔɔ hu ha adafitswaa woji kɛ adafitswaa gbɛjianɔtoi krokomɛi aŋmalalɔi, koni amɛha maŋbii lɛ ale, nɔ ni kɛɔ akɛ: “Etamɔ nɔ ni be fɛɛ be lɛ ato Yehowa Odasefoi a-Maŋtsɛyeli Asai ni yɔɔ maŋ lɛŋ hei srɔtoi babaoo lɛ ahe gbɛjianɔ fɛfɛo. Bɔ ni asaa amɛ hewɔŋ aha lɛ teeɔ kɛ hoo lɛ mɔ fɛɛ mɔ ni tsɔɔ jɛmɛ kɛhoɔ lɛ miishɛɛ shi. Tikkurila Maŋtsɛyeli Asa tso muu lɛ fɛɛ ji abɔɔ ko ni yɔɔ fɛo waa he nɔkwɛmɔnɔ. Tsũ lɛ kɛ ehewɔŋ shikpɔŋ lɛkɛtɛɛ lɛ fɛɛ haa toiŋjɔlɛ kɛ dioofeemɔ hiɔ shi.”

Ayɛ Maŋtsɛyeli Asai 233 yɛ Finland, ni abɔɔi fɛfɛji bɔle babaoo he. Shi kɛlɛ, nɔ ni haa hei nɛɛ feɔ nɔ ni yɔɔ fɛo waa ji akɛ amɛji hei kɛha anɔkwa jamɔ kɛ Biblia mli nitsɔɔmɔ. Kɛha Yehowa Odasefoi ni fa fe akpekpei ekpaa ni yɔɔ je lɛŋ fɛɛ lɛ, kɛ́ Maŋtsɛyeli Asa ko—yɛ hiŋmɛi nɔ loo ebɛ haŋtsii lɛ—eji heko ni asumɔɔ waa. No hewɔ ni amɛsumɔɔ akɛ amɛjɛ amɛsuɔmɔ mli ni amɛkɛ ekãa akwɛ nɔ jogbaŋŋ lɛ. Maŋtsɛyeli Asai lɛ anaa shinaai lɛ anaa kã kɛha mɛi fɛɛ ni yɔɔ okutso lɛ mli!