Ani Daimonioi Ahewalɛ Miitsu Nii?

“Yiŋfutumɔ eye je lɛ nɔ, oookɛɛ nɔ ni mumɔi atsɛmɔ hewalɛi miibɔ mɔdɛŋ waa ni amɛtsĩ yibaamɔ agbó yɛ osharai amli lɛ fɛɛ naa.”—Adafitswaa woloŋmalɔ, Jean-Claude Souléry.

‘Henumɔi ni aŋkroaŋkroi náa akɛ amɛnyɛɛɛ amɛfã amɛhe lɛ haa amɛnuɔ he akɛ daimonioi ahewalɛ ko ni yeɔ mɔ nɔ miiná amɛnɔ hewalɛ.’—Yinɔsaneŋmalɔ, Josef Barton.

YIWALƐ tutuamɔi ni naa wa ni yɔɔ gbeyei ni ba yɛ September 11, 2001 lɛ, ha mɛi babaoo susu nibii ahe kɛtee shɔŋŋ diɛŋtsɛ. Beni Michael Prowse ŋmaa nii yɛ England Financial Times lɛ mli lɛ, ekɛɛ akɛ: “Kooloo ko kooloo ko bɛ ni baafee loo baanyɛ afee enii yɛ nɛkɛ yiwalɛ gbɛ nɛɛ nɔ.” Niŋmaa ko ni je kpo yɛ New York Times lɛ mli lɛ tsɔɔ mli akɛ, yɛ gbɛjianɔ ni áto kɛha tutuamɔ lɛ he susumɔ sɛɛ lɛ, “ehe miihia akɛ aaasusu hetsɛ ni naa wa ni kɛ tutuamɔ lɛ ba lɛ hu he. Eji hetsɛ ni naa wa fe tawuu mli nifeemɔi ni afɔɔ feemɔ, ni bɛ husui, ni leee yelikɛfuamɔ ko kwraa lɛ.”

Mɛi ni hiɛ hemɔkɛyelii srɔtoi fɛɛ susu he kɛtee shɔŋŋ diɛŋtsɛ akɛ ekolɛ eeenyɛ efee akɛ hewalɛ fɔŋ ko miitsu nii lo. Jarayelɔ ko ni jɛ Sarajevo ni kɛ ehiŋmɛi na wekui amli hetsɛ ni tee nɔ yɛ Bosnia lɛ jaje akɛ: “Yɛ Bosnia ta lɛ sɛɛ afi mli lɛ, mihe miye akɛ Satan miikudɔ nɔ fɛɛ nɔ. Enɛ ji sɛkɛyeli diɛŋtsɛ.”

Beni abi yinɔsaneŋmalɔ Jean Delumeau kɛji eheɔ eyeɔ akɛ Abonsam yɛ lɛ, eha hetoo akɛ: “Te aaafee tɛŋŋ maje efɔŋfeemɔ he hewalɛ lɛ he ŋwane yɛ be mli ni miina nɔ ni yaa nɔ, kɛ nɔ ni etee nɔ kɛjɛ beni afɔ mi aahu kɛbashi ŋmɛnɛ: Jeŋ ta ni ji enyɔ, ni sa mɛi ni fa fe akpekpei 40 ahe; Auschwitz kɛ gbele nsrai amli; seshi shishi bulemɔ yɛ Cambodia; Ceauşescu yiwalɛ nɔyeli ni shwie lá shi; niseniianiifeemɔ gbɛ ni atsɔɔ nɔ ayeɔ mɛi anɔ yɛ je lɛŋ hei babaoo lɛ. Gbeyei nibii ni ato naa lɛ bɛ naagbee. . . . No hewɔ lɛ, miheɔ miyeɔ akɛ wɔsane ja akɛ wɔɔtsɛ nɛkɛ nifeemɔi nɛɛ akɛ ‘abonsamii anifeemɔi,’ jeee akɛ Abonsam ni yɔɔ aklontoi kɛ naji ni ajara mli shi moŋ Abonsam ko ni ji esha he mumɔ kɛ hewalɛ fɔŋ ni náa mɛi anɔ hewalɛ ni miitsu nii yɛ je lɛ mli lɛ he okadi.”

Taakɛ Jean Delumeau ji lɛ, mɛi babaoo buɔ nibii ni yɔɔ gbeyei ni yaa nɔ ŋmɛnɛ yɛ adesai ashihilɛi amli lɛ akɛ “abonsamii anifeemɔi,” kɛjɛ weku kɔkɔrɔɔ lɛ mli aahu kɛyashi majimaji ateŋ. Shi mɛni enɛ tsɔɔ? Ani esa ákɛ akɛ nɛkɛ nibii ni yɔɔ gbeyei nɛɛ afɔ̃ esha he hewalɛi ni anaaa lɛ nɔ, loo ákɛ yiŋtoo fɔji he hewalɛi yɛ ni miitsu nii kɛmiiná adesai anɔ hewalɛ ní amɛfee awuiyeli nibii ni naa wa ni tekeɔ adesai eshai ni amɛfeɔ daa lɛ nɔ? Ani efɔŋ lumɔ ko—Satan Abonsam—ji mɔ ni eto nɛkɛ mumɔi nɛɛ ahe gbɛjianɔ?

[He ni Mfoniri ni yɔɔ baafa 3 lɛ Jɛ]

Children: U.S. Coast Guard photo