‘Okɛ Nilee Asusu Owɔsɛɛ He’

“Adesai ateŋ mɛi ni fa kɛ amɛwala shihilɛ mli klɛŋklɛŋ afii lɛ tsuɔ nii ni amɛkɛhaa amɛnaagbee afii lɛ feɔ mɔbɔ.” Nakai ji bɔ ni Jean de La Bruyère, ni ji afii ohai 17 lɛ mli French niŋmalɔ lɛ kɛɛ. Yɛ anɔkwale mli lɛ, ekolɛ oblanuu loo oblayoo ko ni nyɛɛɛ akpɛ eyiŋ baashashao shi yɛ nihalamɔi ni kã ehiɛ lɛ amli, ni ebaanu tsui ni enyɔɔɔ mɔ mli kɛ nijiaŋwujee he. Yɛ gbɛ kroko nɔ lɛ, ekolɛ oblanuu loo oblayoo kuɛŋtilɔ ko baakã he ekɔ gbɛ ni nilee bɛ mli, ni no haŋ ená miishɛɛ yɛ shihilɛ mli wɔsɛɛ ko. Yɛ fɛɛ mli lɛ, eshai ni kɔɔ nɔ ni ja feemɔ he ni akuɔ hiɛ afɔ̃ɔ nɔ loo efɔŋ ni afeɔ lɛ he lɛ baanyɛ ekɛ mɔ aya amanehulu kpele mli.

Mɛɛ gbɛ nɔ aaatsɔ atsi he kɛjɛ nibii ni tamɔ nɛkɛ ni baa lɛ he lɛ? Beni Nyɔŋmɔ Wiemɔ lɛ bɔɔ kɔkɔ eshiɔ yiŋ ni anyɛɛɛ akpɛ yɛ oblahiiaŋ loo oblayeiaŋ he lɛ, ewo oblahii kɛ oblayei ŋaa akɛ: “Asaŋ kaimɔ obɔlɔ lɛ yɛ oblahiiaŋ gbii lɛ amli, be mli ni gbii fɔji lɛ nako aba, ni afii ni obaakɛɛ yɛ amɛhe akɛ: ‘Mináaa amɛhe miishɛɛ’ lɛ, nako ashɛ lɛ.” (Jajelɔ 12:1) Kɛ́ oji oblanuu loo oblayoo lɛ, too gbɛjianɔ kpakpa ni okɛkase ‘Obɔlɔ Kpeteŋkpele’ lɛ he nii amrɔ nɛɛ beni odako lɛ.

Belɛ, mɛɛ gbɛ nɔ Biblia lɛ yeɔ ebuaa oblahii kɛ oblayei koni amɛtsi amɛhe kɛjɛ gbekɛbiiashi kwashiafeemɔ lɛ he yɛ? Ekɛɔ akɛ: “Bó ŋaawoo toi, ni okpɛlɛ tsɔsemɔ, koni wɔsɛɛ ni ole nii.” (Abɛi 19:20) Biblia lɛ tsɔɔ faŋŋ hu akɛ, nilee ni Nyɔŋmɔ gbeyeishemɔ yɔɔ mli ni akpoɔ, yɛ hiɛ ni akuɔ afɔ̃ɔ nɔ loo atuatsemɔ yɛ oblahiiaŋ loo oblayeiaŋ loo yɛ afi fɛɛ afi ni mɔ ko eye lɛ mli lɛ kɛ naagba ni mli wa baa. (Abɛi 13:18) Nɔ ni tamɔɔɔ nakai lɛ, nɔ ni jɛɔ ŋwɛi gbɛtsɔɔmɔi atoiboo mli baa ji “gbii asɛɛjɛkɛmɔ kɛ wala afii kɛ hejɔlɛ,” shihilɛ ko ni haa mɔ tsui nyɔɔ emli.—Abɛi 3:2.