Sanebimɔi ni Jɛ Kanelɔi Adɛŋ

Ani eji futufutu hemɔkɛyeli henɔ ko ákɛ abaahe jamɔ kuu kroko ko tsũ, ni atsake lɛ afee lɛ Maŋtsɛyeli Asa?

Bei pii lɛ, Yehowa Odasefoi kpoɔ sharamɔ ni tamɔ nɛkɛ ní amɛkɛ jamɔi krokomɛi aaaná. Ni kɛlɛ, ekolɛ jarayeli ni tamɔ nɛkɛ lɛ etsɔɔɔ nifeemɔ ni tsɔɔ futufutu hemɔkɛyeli. Ekolɛ abaanyɛ abu no akɛ nitsumɔŋ nifeemɔ ko ni afeɔ lɛ shikome pɛ. Yehowa Odasefoi asafo lɛ kɛ jamɔ kuu kroko ko efeee ekome koni amɛmã jamɔhe ko ni amɛyi enyɔ lɛ fɛɛ amɛkɛtsu nii.

Mɛɛ nifeemɔ tsɔɔ futufutu hemɔkɛyeli yɛ Yehowa hiɛ? Susumɔ bɔfo Paulo gbɛtsɔɔmɔ lɛ he okwɛ: “Nyɛkɛ mɛi ni heee yeee lɛ akagbalaa kɔŋtso kome ni yeee egbɔ! Ejaakɛ mɛɛ bɔɔ jalɛ kɛ mlatɔmɔ yɔɔ? aloo mɛɛ yeli la kɛ duŋ yɔɔ? Ni mɛɛ gbeekpamɔ Kristo kɛ Belial yɔɔ? aloo mɛɛ nijaa mɔ ni heɔ yeɔ kɛ mɔ ni heee yeee yɔɔ? Ni asaŋ mɛɛ ekomefeemɔ Nyɔŋmɔ sɔlemɔwe kɛ amagai yɔɔ? . . . No hewɔ lɛ Yehowa kɛɛ, nyɛjea amɛteŋ, ni nyɛtsea nyɛhe, ni nyɛkataa muji nɔ ko he, ni mahere nyɛ atuu.” (2 Korintobii 6:14-17) Mɛni Paulo kɛ wiemɔi “bɔɔ” kɛ “gbeekpamɔ” lɛ tsɔɔ?

Eka shi faŋŋ akɛ bɔɔ ni Paulo tsĩ tã lɛ kɔɔ jamɔ kɛ mumɔŋ nifeemɔi ni akɛ wɔŋjalɔi kɛ mɛi ni heee yeee feɔ lɛ he. Ebɔ Korintobii lɛ kɔkɔ yɛ ‘daimonioi akpɔlɔ nɔ niyeli’ he. (1 Korintobii 10:20, 21) No hewɔ lɛ, nifeemɔ ni tsɔɔ futufutu hemɔkɛyeli lɛ ji jamɔŋ gbɛjianɔtoi krokomɛi ni akɛ amɛ feɔ ekome kɛjáa loo ni akɛ amɛ bɔɔ mumɔŋ naanyo. (2 Mose 20:5; 23:13; 34:12) Kɛ́ ahe tsũ ko ni tsutsu ko lɛ jamɔ gbɛjianɔtoo ko kɛtsuɔ nii lɛ, yiŋtoo titri ni yɔɔ sɛɛ ji koni nine ashɛ tsũ ko ni he miihia kɛha Maŋtsɛyeli Asa nɔ. Dani akɛbaatsu nii akɛ Maŋtsɛyeli Asa lɛ, ajieɔ apasa jamɔ he nibii fɛɛ kɛjɛɔ mli. Akɛni asaa tsũ lɛ nɛkɛ hewɔ lɛ, ajɔɔ nɔ ahaa Yehowa kɛ yiŋtoo ákɛ akɛbaajá ekome too. Gbeekpamɔ loo naanyobɔɔ ko bɛ anɔkwa jamɔ kɛ apasa jamɔ teŋ.

Yɛ nihemɔ ni tamɔ nɛkɛ he susumɔ fitsofitso mli lɛ, esa akɛ aba sharamɔ ni aaakã akɛ kuu kroko lɛ teŋ lɛ shi, ni esa akɛ ekɔ nihemɔ lɛ pɛ he. Esa akɛ Kristofoi asafo lɛ mli bii lɛ aha Paulo kɔkɔbɔɔ ákɛ akɛ ‘mɛi ni heee yeee lɛ akagbala kɔŋtso kome ni yeee egbɔ’ lɛ ahi amɛjwɛŋmɔ mli. Eyɛ mli akɛ wɔnuuu he akɛ wɔnɔ kwɔ fe mɛi ni hiɛ hemɔkɛyeli kroko lɛ moŋ, shi wɔkpoɔ amɛkɛ naanyobɔɔ loo ni amɛaagbala wɔ amɛwo amɛjamɔ lɛ mli. *

Ni kɛji asafo ko aaahai jamɔ gbɛjianɔtoo ko tsũ hu? Bei pii lɛ, haimɔ haa akɛ jamɔ gbɛjianɔtoo kroko lɛ mli bii sharaa be fɛɛ be, ni esa akɛ akwa enɛ. Kɛji abaahai tsũ ni tamɔ nɛkɛ kɛha gbi kome nifeemɔ po lɛ, esa akɛ onukpai akuu lɛ asusu sanebimɔi ni nyiɛ sɛɛ nɛɛ ahe, akɛ: Ani amagai kɛ jamɔŋ okadii baahi tsũ lɛ mli loo ehewɔŋ? Te mɛi ni yɔɔ akutso lɛ mli lɛ baasusu tsũ lɛ ni wɔkɛaatsu nii lɛ he amɛha tɛŋŋ? Ani tsũ nɛɛ ni wɔkɛaatsu nii lɛ baatɔtɔ mɔ ko nane yɛ asafo lɛ mli? (Mateo 18:6; 1 Korintobii 8:7-13) Onukpai lɛ ŋmɛɔ saji nɛɛ amɛkwɛɔ, ni amɛkpɛɔ yiŋ yɛ no naa. Esa akɛ amɛsusu amɛ diɛŋtsɛ amɛhenilee kɛ asafo muu lɛ fɛɛ nɔ lɛ hu he, beni amɛsusuɔ kɛji esa akɛ ahe tsũ ni tamɔ nɛkɛ ni atsake lɛ akɛfee Maŋtsɛyeli Asa lɛ he.

[Shishigbɛ niŋmaa]

[Mfoniri ni yɔɔ baafa 27]

Ahé tsũ nɛɛ, ni tsutsu ko lɛ eji kpeehe lɛ, ni atsake lɛ afee lɛ Maŋtsɛyeli Asa