Mɛni Hewɔ Ewa Waa akɛ Aaakpa Fai?

YƐ July 2000 lɛ, California State Legislature (California Maŋ Mlawolɔi) ni yɔɔ United States lɛ wo mla ni ato he gbɛjianɔ koni akɛtsu nii ni eha mɛi aye amɛhe kɛjɛ shwamɔ he, kɛji amɛjie musuŋshaa su kpo amɛtsɔɔ mɔ aŋkro ko ni pila yɛ oshara ni amɛ diɛŋtsɛ lɛ eko nina amɛ lɛ mli lɛ. Mɛni hewɔ awo mla lɛ? Ayɔse akɛ, kɛ oshara ko ha mɛi pila loo ekpata nii ahiɛ lɛ, bei babaoo lɛ mɛi shashaoɔ shi akɛ amɛaakpa fai kɛ gbeyeishemɔ akɛ ekolɛ abaanu shishi yɛ saneyelihe akɛ eji fɔyeli nɔkpɛlɛmɔ. Yɛ gbɛ kroko nɔ lɛ, ekolɛ mɛi ni nuɔ he akɛ esa akɛ akpa amɛ fai amrɔ nɔŋŋ lɛ amli baawo la, ni ekolɛ oshara ko ni mli waaa lɛ baatsɔ sane naataamɔ ni mli wa.

Eji anɔkwale akɛ, ehe ehiaaa ni okpa oshara ko ni jeee otɔmɔ ni lɛ he fai. Ni ekolɛ bei komɛi baashɛ ni gbɛ ni nilee yɔɔ mli lɛ ji ni osusu nɔ ni obaawie lɛ he jogbaŋŋ. Blema abɛ ko kɛɔ akɛ: “Wiemɔ babaoo yɔɔ nɛɛ, nɔtɔmɔ kpaaa yɛ mli; shi mɔ ni mɔɔ enaabu mli lɛ, nilelɔ ni.” (Abɛi 10:19; 27:12) Fɛɛ sɛɛ lɛ, obaanyɛ ojie mlihilɛ kpo ni oye obua.

Shi kɛlɛ, ani ejeee anɔkwale akɛ mɛi babaoo efɔ̃ɔ faikpamɔ, kɛ́ ekɔɔɔ samamɔi  ahe po? Ekolɛ ŋa ko baaye ŋkɔmɔ yɛ shia akɛ, ‘Miwu kpaaa fai kɔkɔɔkɔ yɛ nɔ ko nɔ ko he.’ Ekolɛ nitsumɔ mli hiɛnyiɛlɔ ko baaye ŋkɔmɔ yɛ nitsumɔhe akɛ, ‘Minitsulɔi lɛ ekpɛlɛɛɛ amɛtɔmɔi anɔ, ni ewa waa diɛŋtsɛ akɛ amɛaakɛɛ akɛ amɛshwa amɛhe.’ Ekolɛ tsɔɔlɔ ko baabɔ amaniɛ yɛ skul akɛ, ‘Atsɔseee gbekɛbii koni amɛkɛɛ ofainɛ.’

Yiŋtoo kome hewɔ ni ekolɛ mɔ ko shashaoɔ shi akɛ eeekpa fai lɛ ji gbeyei ni esheɔ akɛ abaakpoo lɛ. Akɛni ehaoɔ yɛ susumɔ ni esusuɔ akɛ asumɔŋ esane lɛ he hewɔ lɛ, ekolɛ ejieŋ bɔ ni enuɔ he ehaa diɛŋtsɛ lɛ kpo. Eji anɔkwale akɛ, ekolɛ mɔ ni aye lɛ awui lɛ baajie mɔ ni ye lɛ awui lɛ kwraa kɛjɛ egbɛ nɔ, ni ebaaha efee nɔ ni wa waa akɛ abaasaa amɛteŋ.

Ekolɛ mɛi krokomɛi ahenumɔi ahe susumɔ ni bɛ lɛ ji yiŋtoo kroko hewɔ ni mɛi komɛi shashaoɔ shi akɛ amɛaakpa fai lɛ. Ekolɛ amɛbaamu sane naa akɛ, ‘Faikpamɔ tsakeŋ tɔmɔ agbo ni mitɔ momo lɛ.’ Ni kɛlɛ, mɛi komɛi shashaoɔ shi akɛ amɛaakɛɛ akɛ amɛshwa amɛhe, yɛ nibii ni ekolɛ eeenyɛ ejɛ mli kɛba lɛ hewɔ. Amɛyiŋ feɔ amɛ akɛ, ‘Ani akɛ sɔ̃ lɛ baafɔ minɔ ni aha mawo he nyɔmɔ?’ Shi kɛlɛ, tɔmɔ ni aaakpɛlɛ nɔ lɛ he gbɛtsii nii ni fe fɛɛ lɛ ji henɔwomɔ. Ekolɛ mɔ ni henɔwomɔ haa ewaa waa kɛhaa lɛ akɛ eeekɛɛ akɛ, “Mishwa mihe” lɛ baamu sane naa diɛŋtsɛ akɛ, ‘Misumɔɔɔ ni woo ni miyɔɔ lɛ aŋmɛɛ mi kɛtsɔ tɔmɔ agbo ni mitɔ ni makpɛlɛ nɔ lɛ nɔ. No baaba gbɛhe ni miyɔɔ lɛ shi.’

Ekɔɔɔ he eko yiŋtoo fɛɛ yiŋtoo ni hɔ sɛɛ lɛ, ewaa kɛhaa mɛi babaoo akɛ amɛaakpa fai. Shi ani ehe hiaa kwraa akɛ akpa fai? Mɛni ji sɛɛnamɔi ni yɔɔ faikpamɔ he?

[Mfoniri ni yɔɔ baafa 3]

“Atsɔseee gbekɛbii koni amɛkɛɛ ofainɛ”

[Mfoniri ni yɔɔ baafa 3]

“Minitsulɔi lɛ ekpɛlɛɛɛ amɛtɔmɔi anɔ”

[Mfoniri ni yɔɔ baafa 3]

“Miwu kpaaa fai kɔkɔɔkɔ”