Wala Shihilɛ He Sane

Wɔtee Nɔ Wɔhi Shi yɛ Wɔnitsumɔ lɛ Mli

TAAKƐ HERMANN BRUDER GBA

Nɔ ni mahala lɛ waaa: ákɛ masɔmɔ afii enumɔ yɛ France Asraafoi Akuu ni Yɔɔ Maŋsɛɛ lɛ mli loo abaawo mi tsuŋ be ko yɛ Moroccobii atsuŋwoohe ko mli. Nyɛhaa matsɔɔ nyɛ bɔ ni fee ni mibaje jaramɔ shihilɛ ni tamɔ nɛkɛ mli.

AFƆ mi yɛ Oppenau, Germany, yɛ afi 1911 lɛ mli, afii etɛ pɛ mli dani Jeŋ Ta I lɛ je shishi. Mifɔlɔi, Joseph kɛ Frida Bruder yɛ bihii kɛ biyei 17. Mi ji amɛbi ni ji 13 nɔ.

Saji ni mikaiɔ kɛjɛ migbekɛbiiashi waa ji, ní miikwɛ asraafoi akuu ko ni miishi ako kɛnyiɛ wɔ maŋtiase lɛ mli gbɛjegbɛ wulu lɛ nɔ. Akɛni gbee ni amɛkɛ shiɔ ako ni yɔɔ miishɛɛ lɛ gbala mi hewɔ lɛ, minyiɛ lalɔi lɛ asɛɛ kɛtee nitsumɔhe lɛ yɛ be ni sa mli koni mayana Ataa kɛ mɛi krokomɛi ni amɛwo asraafoi atade ni amɛmiikwɔ oketeke lɛ. Beni oketeke lɛ shiɔ lɛ, yei komɛi ni damɔ kpoku lɛ nɔ lɛ bɔi yaafo. No sɛɛ etsɛɛɛ lɛ, wɔ osɔfo lɛ ha maŋshiɛmɔ kakadaŋŋ ko yɛ sɔlemɔwe lɛ, ni etsɛ hii ejwɛ ni egboi beni amɛfãa jakumaŋ lɛ he lɛ agbɛi etsɔɔ. Etsɔɔ mli akɛ: “Amrɔ nɛɛ amɛyɛ ŋwɛi.” Nɔ̃ nyɔ yoo ko ni damɔ mimasɛi lɛ nɔ.

Asara atridii lóo Ataa beni esɔmɔɔ yɛ Russiabii ahusu lɛ naa lɛ. Ebashɛ shia ni egbɔjɔ waa ni amrɔ lɛ nɔŋŋ lɛ, ahe lɛ afɔ̃ helatsamɔhe ni yɔɔ maŋ lɛ mli lɛ. Osɔfo lɛ jie yi akɛ: “Yaa sɔlemɔtsu ni bɛŋkɛ gɔɔ lɛ ni oyakɛɛ Wɔtsɛ ni yɔɔ ŋwɛi shii 50 kɛ Ajɔɔ Maria shii 50 yɛ jɛmɛ. Kɛkɛ lɛ, otsɛ baaná hewalɛ.” Mikɛ eŋaawoo lɛ tsu nii, shi Ataa gbo enɔjetsɛremɔ. Kɛha gbekɛ nuu tete po lɛ, ta lɛ ji niiashikpamɔ ko ni yɔɔ dɔlɛ waa.

 Bɔ ni Fee ni Mina Anɔkwale Lɛ

Ewa akɛ abaaná nitsumɔ yɛ Germany yɛ be mli ni tai lɛ yaa nɔ lɛ. Shi kɛlɛ, beni mishi skul yɛ afi 1928 mli sɛɛ lɛ, mibɔ mɔdɛŋ miná nitsumɔ akɛ abɔɔ mli nitsulɔ yɛ Basel, Switzerland.

Taakɛ Ataa ji lɛ, mi ji Katoliknyo ni etuu ehe eha ejamɔ lɛ waa. Oti ni ma mihiɛ ji ni mayasɔmɔ akɛ Capuchin mɔ-kome shihilɔ yɛ India. Beni minyɛmi nuu Richard ni nakai beaŋ lɛ eji Yehowa Odasefoi lɛ ateŋ mɔ kome lɛ nu nɛkɛ yiŋtoi nɛɛ ahe lɛ, efã gbɛ krɛdɛɛ kɛba Switzerland koni ebabɔ mɔdɛŋ ni eje minijiaŋ wui. Ebɔ mi kɔkɔ yɛ oshara ni yɔɔ hekɛnɔfɔɔ ni anáa yɛ gbɔmɛi amli, titri lɛ osɔfoi lɛ ahe, ni ewo mi hewalɛ koni makane Biblia lɛ ni mikɛ mihe afɔ̃ no pɛ nɔ. Yɛ yiŋkɔshikɔshifeemɔ lɛ fɛɛ sɛɛ lɛ, mihé Kpaŋmɔ Hee lɛ eko ni mije ekanemɔ shishi. Fiofio lɛ, ebafee faŋŋ kɛha mi akɛ hemɔkɛyelii ni miyɔɔ lɛ ateŋ babaoo kɛ Biblia lɛ mli tsɔɔmɔi lɛ kpãaa gbee.

Gbi Hɔgbaa ko yɛ afi 1933 mli, beni miyɔɔ Richard shia yɛ Germany lɛ, ekɛ mi tsɔɔ gbalashihilɛ mli hefatalɔi komɛi ni amɛji Yehowa Odasefoi. Beni amɛná amɛle akɛ miikane Biblia lɛ, amɛha mi wolo bibioo ko ni gbɛi ji The Crisis * lɛ. Aaafee nyɔɔŋteŋ tɔŋŋ dani mikpa wolo lɛ kanemɔ. Miná nɔmimaa akɛ mina anɔkwale lɛ!

Yehowa Odasefoi ni yɔɔ Basel lɛ baha mi Studies in the Scriptures * wolokpoi lɛ enyɔ, kɛ woji tɛtrɛbii kɛ woji krokomɛi hu. Akɛni miná nɔ ni mikaneɔ lɛ he miishɛɛ hewɔ lɛ, miyanina osɔfo lɛ ni mibi koni eha ajie migbɛi kɛjɛ sɔlemɔ lɛ woji amli. Osɔfo lɛ mlifu waa ni ebɔ mi kɔkɔ akɛ ebaafee oshara akɛ maŋmɛɛ mihemɔkɛyeli lɛ he. Yɛ anɔkwale mli lɛ, miŋmɛɛko mihemɔkɛyeli lɛ he. Enɛ ji klɛŋklɛŋ kwraa ni mitaoɔ anɔkwa hemɔkɛyeli lɛ yɛ mishihilɛ mli.

Nyɛmimɛi ni yɔɔ Basel lɛ miito gbɛjianɔ nakai otsi lɛ koni aya shiɛmɔ yɛ husu lɛ sɛɛ kɛbote France maŋ lɛ mli. Nyɛmimɛi hii lɛ ateŋ mɔ kome jɛ mlijɔlɛ mli etsɔɔ mli eha mi akɛ miyaŋ eko ejaakɛ nyɛsɛɛ nɛɛ nɔŋŋ mikɛ asafo lɛ bɔi bɔɔ. Minijiaŋ ejeee wui, shi mitsɔɔ bɔ ni mishweɔ waa diɛŋtsɛ ni maje shiɛmɔ shishi lɛ mli. Beni ekɛ onukpa kroko ko egba he sane sɛɛ lɛ, eha mi shikpɔŋkuku ko yɛ Switzerland. Hɔgbaa leebi maŋkpa lɛ, mita mi baisikel nɔ kɛshi kɛtee akrowa bibioo ko ni bɛŋkɛ Basel lɛ mli, ní mihiɛ woji 4, woji tɛtrɛbii 28, kɛ woji bibii yɛ mi shiɛmɔyaa baagi lɛ mli. Akrowa lɛ mli bii lɛ ateŋ mɛi pii etee sɔlemɔ beni miyashɛ shi lɛ. Yɛ fɛɛ sɛɛ po lɛ, beni atswaa ŋmɛji 11 lɛ, nɔ fɛɛ nɔ eta yɛ mi shiɛmɔyaa baagi lɛ mli.

Beni mikɛɛ nyɛmimɛi lɛ akɛ miisumɔ akɛ abaptisi mi lɛ, amɛkɛ mi wie kɛ hiɛdɔɔ ni amɛbi sanebimɔi ni haa mɔ susuɔ nii ahe ni kɔɔ anɔkwale lɛ he. Mihiɛ sɔ ekãa ni amɛyɔɔ kɛ anɔkwa ni amɛyeɔ Yehowa kɛ egbɛjianɔtoo lɛ waa. Akɛni eji fɛibe hewɔ lɛ, nyɛmi nuu ko baptisi mi yɛ hejuunɔ mli yɛ onukpa ko shia. Mikaiɔ akɛ minu miishɛɛ kpele ni minyɛŋ matsɔɔ mli kɛ mligbɛ hewalɛ kpele ko he. Enɛ ba yɛ afi 1934 lɛ mli.

Nitsumɔ yɛ Kingdom Farm

Yɛ afi 1936 lɛ mli lɛ, minu akɛ Yehowa Odasefoi ehé shikpɔŋ ko yɛ Switzerland. Mikɛ mihe ha koni matsu nii akɛ abɔɔ mli nitsulɔ. Eji miishɛɛ kɛha mi akɛ afɔ̃ mi nine koni mibatsu nii yɛ Kingdom Farm yɛ Steffisburg, aaafee kilomitai 30 kɛjɛ Bern. Miyeɔ mibuaa mɛi krokomɛi hu yɛ amɛnitsumɔ mli yɛ ŋmɔ lɛ mli be fɛɛ be ni hegbɛ aaaba. Betel tsɔɔ mi bɔ ni ehe hiaa ni aná ekomefeemɔ mumɔ.

 Miishɛɛ ni fe fɛɛ ni miná yɛ afii ni miye yɛ Betel lɛ ji kwɛmɔ ni Nyɛminuu Rutherford bakwɛ ŋmɔ lɛ yɛ afi 1936 mli lɛ. Beni ena wɔ amoo ŋmɔ lɛ dalɛ kɛ bɔ ni ŋmɔshi nibii lɛ ewo jogbaŋŋ lɛ, eŋmɔ ni etsɔɔ bɔ ni etsui enyɔ emli eha. Mɛɛ nyɛmi nuu ni asumɔɔ esane eji nɛkɛ!

Beni mikɛ nɔ ni fa fe afii etɛ sɔmɔɔ yɛ ŋmɔ lɛ mli lɛ, akane wolo ko ni jɛ Yehowa Odasefoi ajeŋ muu fɛɛ nitsumɔhe yitso ni yɔɔ United States lɛ beni wɔyeɔ leebi niyenii lɛ. Wolo lɛ ma bɔ ni shiɛmɔ nitsumɔ lɛ he hiaa waa ha lɛ nɔ mi ni ekɛ ninefɔɔ ha mɔ fɛɛ mɔ ni miisumɔ koni eyasɔmɔ yɛ maŋsɛɛ akɛ gbɛgbalɔ lɛ. Mikɛ mihe ha ni shishashaomɔ ko kwraa bɛ mli. Mitsumɔ lɛ ba yɛ May afi 1939 mli—Brazil!

Yɛ nakai beaŋ lɛ, miiya nikasemɔ yɛ Thun Asafo ni bɛŋkɛ Kingdom Farm lɛ mli. Daa Hɔgbaa lɛ, wɔteŋ mɛi komɛi feɔ ekome akɛ kuu kɛyaa shiɛmɔ yɛ Alps Gɔji lɛ anɔ, ni eheɔ ŋmɛlɛtswai enyɔ kɛjɛ Thun kɛmiiyaa jɛmɛ kɛji akɛ baisikel miiya. Margaritha Steiner ji kuu lɛ mli bii ateŋ mɔ kome. Amrɔ nɔŋŋ ni susumɔ ko ba mijwɛŋmɔ mli: Ani jeee enyɔnyɔɔnyɔ Yesu tsu ekaselɔi lɛ? Beni mitsĩ tã kɛkɛ mitsɔɔ Margaritha akɛ aha mi nitsumɔ yɛ Brazil lɛ, etsĩ bɔ ni lɛ diɛŋtsɛ lɛ eshweɔ akɛ ebaasɔmɔ yɛ he ni hiamɔ lɛ da yɛ lɛ tã. Wɔbote gbalashihilɛ mli yɛ July 31, 1939.

Naatsii ko ni Akpaaa Gbɛ

Wɔkɛ lɛlɛ ko miifã gbɛ kɛjɛ Le Havre, France, yɛ August afi 1939 lɛ naagbee gbɛ, kɛmiiya Santos, Brazil. No mli lɛ wɔnáaa he ni tsũi ni yɔɔ ni mɛi enyɔ wɔɔ mli lɛ ateŋ eko kwraa. no hewɔ lɛ ehe bahia ni wɔhi tsũi komekomei srɔtoi enyɔ mli yɛ wɔgbɛfaa lɛ mli. Beni wɔyaa lɛ, atswa adafi akɛ Great Britain kɛ France efã ta amɛshi Germany. Germany gbɛfalɔi akuu ko ni amɛyibɔ ji mɛi 30 lɛ here enɛ nɔ kɛtsɔ Germany jakumaŋ lala lɛ lamɔ nɔ. Enɛ wo amlaku lɛ mlila aahu akɛ etsake gbɛ ni kulɛ ebaatsɔ nɔ lɛ ni eyakpeleke shi yɛ Safi, Morocco. Gbɛfalɔi ni hiɛ Germany gbɛfaa he woji lɛ yɛ minitii enumɔ ni amɛkɛbaayi shi yɛ lɛlɛ lɛ mli. Wɔ hu wɔfata he.

Atsĩ wɔnaa gbi kome yɛ polisifoi lɛ anitsumɔhe lɛ kɛkɛ ni abua wɔnaa awo bɔɔs momo ko ni egbɔjɔ mli ni akɛ wɔ tee tsuŋwoohe ko yɛ Marrakech, ni jɛkɛmɔ shɛɔ aaafee kilomitai 140 lɛ. Gbii ni mli wawai nyiɛ sɛɛ kɛba. Wɔ tsuŋwoohei lɛ eyi fe nine ni emli ewo duŋ. Daa nɛɛ niiasɛɛyaahe—ni ji bu ni atsa ni mɔ fɛɛ mɔ yaa niiaŋ ewoɔ mli lɛ—eyi. Aha wɔteŋ mɔ fɛɛ mɔ kotoku mujimuji ko koni ekã nɔ, ni gbɛkɛnaashi lɛ, obishii bakpeɔ wɔnantui. Ahaa wɔ niyenii shii enyɔ yɛ gbi kome mli yɛ tsɛŋsi ni mli ebɔ ŋkanale mli.

Asraafonyo ko kɛɛ mi akɛ, abaaŋmɛɛ mihe kɛji mikpɛlɛ akɛ mikɛ afii enumɔ baasɔmɔ yɛ France Asraafoi Akuu ni yɔɔ Maŋsɛɛ lɛ mli. Kpoomɔ ni mikpoo lɛ ha akɛ mi yawo nɔ ni abaanyɛ atsɔɔ mli pɛ akɛ bu diŋ lɛ mli ŋmɛlɛtswai 24. Mikɛ be ni miye yɛ biɛ lɛ titri sɔle.

Yɛ gbii kpaanyɔ sɛɛ lɛ, tsuŋwoohe lɛ nɔkwɛlɔi lɛ ŋmɛ mi gbɛ ní mana Margaritha ekoŋŋ. Etã loo waa diɛŋtsɛ, ni efo yɔɔ ni ehiii lɛ kpatamɔ. Mifee bɔ ni manyɛ koni mikɛha lɛ tsui. Abibii wɔ saji ni ajie wɔ kɛwo oketeke ko mli kɛtee Casablanca, he ni aŋmɛɛ Margaritha he yɛ lɛ. Akɛ mi tee tsuŋwoohe ko ni kɛ Port Lyautey (amrɔ nɛɛ Kenitra), ni jɛkɛmɔ feɔ aaafee kilomitai 180 lɛ mli. Swissbii anɔkwɛlɔ lɛ wo Margaritha ŋaa koni eku esɛɛ kɛya Switzerland, shi ekɛ anɔkwayeli kpoo akɛ eyaŋ kɛji akɛ mifataaa he. Yɛ nyɔji enyɔ ni mikɛhi Port Lyautey lɛ mli lɛ, eshiɔ Casablanca ni ebasaraa mi, ni ebahaa mi niyenii daa gbi.

Yehowa Odasefoi jie wolo ko ni yitso ji Kreuzzug gegen das Christentum (Ta ni Awuɔ Ashiɔ Kristojamɔ) lɛ kpo yɛ afi ni tsɔ hiɛ lɛ mli, koni amɛkɛgbala maŋbii lɛ ajwɛŋmɔ kɛba Odasefoi lɛ ahe ni amɛkɛwooo Nazi nɔyeli lɛ mli lɛ nɔ. Beni miyɔɔ tsuŋwoohe lɛ mli lɛ, Yehowa Odasefoi anitsumɔhe nine ni yɔɔ Bern lɛ ŋma wolo amɛyaha France nɔyeli lɛ mli onukpai lɛ, ni amɛkɛ wolo lɛ ekome wo mli bɔni afee ni amɛkɛtsɔɔ akɛ wɔjeee Nazibii. Margaritha hu tsu nitsumɔ ko ni sa kadimɔ waa, kɛtsɔ nɔyeli lɛ mli onukpai aŋɔɔ ni eyaa ni ebɔɔ mɔdɛŋ akɛ eeekɔne amɛyiŋ akɛ wɔlé nɔ ni yaa nɔ lɛ he nɔ ko lɛ nɔ. Naagbee lɛ, yɛ afi 1939 naagbee mli lɛ, aŋmɛ wɔ gbɛ ni wɔshi Morocco.

 Beni wɔyakwɔ lɛlɛ kɛmiiya Brazil ekoŋŋ lɛ sɛɛ ni wɔná wɔle akɛ Germany ŋshɔ shishi lɛji lɛ miitutua lɛji ni tsɔɔ Atlantic ŋshɔ lɛ hiɛ gbɛ̀i lɛ anɔ lɛ, ni ákɛ amɛkɛ amɛhiɛ eka wɔ. Eyɛ mli akɛ lɛlɛ mli ni wɔyɔɔ, ni ji Jamaique lɛ ji jarayeli lɛlɛ moŋ, shi tui mamɔ ehiɛ kɛ esɛɛ fɛɛ. Kɛ je tsɛre lɛ, lɛlɛ kudɔlɔ lɛ kɛwɔ lɔgɔɔ shi, ni etswiaa tuŋtɛi kɛtsaraa nɔ. Yɛ gbɛkɛ mli lɛ, wɔgbeɔ wɔkanei lɛ bɔni afee ni Germanybii lɛ akayoo wɔ. Kwɛ bɔ ni wɔná miishɛɛ wɔha, beni yɛ nɔ ni fe nyɔji enumɔ ni wɔkɛshi Europa lɛ sɛɛ lɛ, wɔyakpeleke shi yɛ Santos, Brazil yɛ February 6, 1940 lɛ mli lɛ!

Awo Wɔ Tsuŋ Ekoŋŋ

Wɔ klɛŋklɛŋ nitsumɔ ni aha wɔ ji Montenegro, ni ji maŋ ko ni yɔɔ Brazilbii amaŋ ni ji Rio Grande do Sul lɛ mli lɛ. Eka shi faŋŋ akɛ atswa sɔlemɔ lɛ mli onukpai lɛ adafi yɛ wɔbaa lɛ he. Beni wɔkɛ ŋmɛlɛtswai enyɔ pɛ eshiɛ lɛ, polisifoi lɛ bamɔmɔ wɔ ni amɛhé wɔ gramafon plɛtei ni Biblia shiɛmɔ wiemɔi yɔɔ nɔ, wɔwoji lɛ fɛɛ, kɛ wɔbaagii ni akɛ afukpɔŋɔ hewolo fee ni wɔhé yɛ Morocco lɛ po yɛ wɔdɛŋ. Osɔfo ko kɛ maŋsɔɔlɔ ko ni wieɔ Germany wiemɔ lɛ yɛ polisifoi anitsumɔ he lɛ amɛmiimɛ wɔ. Amɛbo toi beni polisifoi anukpa lɛ tswa Nyɛminuu Rutherford wiemɔi lɛ ateŋ ekome ni yɔɔ wɔ gramafon ni lɛ hu ehé yɛ wɔdɛŋ lɛ nɔ lɛ. Eka shi faŋŋ akɛ Nyɛminuu Rutherford wiemɔ lɛ yɛ faŋŋ ni emli kã shi hu! Beni ashɛ he ko ni atsĩ Vatican lɛ tã pɛ lɛ, osɔfo lɛ mlifu trukaa ni eje kpo.

Yɛ Santa Maria osɔfonukpa lɛ nibimɔ naa lɛ, polisifoi lɛ jie wɔ kɛtee Pôrto Alegre, ni ji maŋtiase lɛ mli. Etsɛɛɛ ni aŋmɛɛ Margaritha he, ni eyabi yelikɛbuamɔ kɛjɛ Swissbii anɔkwɛlɔ ni yɔɔ maŋsɛɛ lɛ nitsumɔhe lɛ. Swissbii anɔkwɛlɔ lɛ wo lɛ ŋaa akɛ eku esɛɛ kɛya Switzerland. Shikome ekoŋŋ lɛ, ekpoo akɛ ebaashi mi. Margaritha efee hefatalɔ anɔkwafo diɛŋtsɛ be fɛɛ be. Gbii 30 sɛɛ lɛ, abibii mi saji ni aŋmɛɛ mihe. Polisifoi lɛ kɛ nihalamɔ ko fɔ̃ wɔhiɛ: nyɛshia maŋ lɛ mli yɛ biɛ minitii nyɔŋma mli, kɛjeee nakai lɛ “nyɛbaana nɔ ko nyɛsa nyɛnaa.” Yɛ nitsumɔhe yitso lɛ ŋaawoo naa lɛ, wɔshi kɛtee Rio de Janeiro.

“Ofainɛ Kanemɔ Nɔ ni Yɔɔ Wolo Nɛɛ nɔ Lɛ”

Yɛ Brazil shiɛmɔ nitsumɔ lɛ shishijee ni bɛ miishɛɛ lɛ fɛɛ sɛɛ lɛ, kwɛ bɔ ni wɔmli fili wɔ ha! Yɛ fɛɛ sɛɛ lɛ, wɔyɛ wala mli, wɔbaagii lɛ amli eyi obɔ kɛ woji ekoŋŋ, ni wɔyɛ Rio de Janeiro maŋ  muu lɛ fɛɛ ni wɔbaashiɛ wɔha. Shi te wɔɔfee tɛŋŋ wɔkɛ Portugal wiemɔ lɛ he nilee fioo ni wɔyɔɔ lɛ aaashiɛ lɛ? Kɛtsɔ odaseyeli wolo nɔ. “Por favor, leia este cartão” (“Ofainɛ kanemɔ nɔ ni yɔɔ wolo nɛɛ nɔ lɛ”) ji klɛŋklɛŋ Portugal wiemɔ ni wɔkase ni wɔkɛtsu nii yɛ shiɛmɔ nitsumɔ lɛ mli. Ni kwɛ omanye ni wolo lɛ ha wɔye! Yɛ nyɔŋ kome pɛ mli lɛ, wɔja woji wuji ni fe 1,000. Mɛi ni he wɔ Biblia kasemɔ woji lɛ ateŋ mɛi babaoo mɔ anɔkwale lɛ mli yɛ sɛɛ mli. Yɛ anɔkwale mli lɛ, wɔwoji lɛ ye odase ni mɔɔ shi jogbaŋŋ babaoo fe bɔ ni kulɛ wɔbaanyɛ wɔfee. Enɛ ha minu bɔ ni wɔwoji lɛ ni wɔkɛaawo mɛi ni yɔɔ wiemɔ lɛ he miishɛɛ lɛ adɛŋ lɛ he hiaa ha lɛ shishi.

Yɛ nakai beaŋ lɛ, Rio de Janeiro ji Brazil maŋtiase, ni mɛi titri ni bo wɔ shɛɛ sane lɛ toi jogbaŋŋ ji mɛi ni yɔɔ tsũi ni nɔyeli lɛ mamɔ lɛ mli lɛ. Miná hegbɛ kɛye maŋsɔɔlɔ ni kwɛɔ shika nɔ lɛ kɛ maŋsɔɔlɔ ni kwɛɔ asraafoi anitsumɔ nɔ lɛ odase. Yɛ nɛkɛ bei nɛɛ amli lɛ, mina Yehowa mumɔ lɛ ni miitsu nii he odaseyeli ni yɔɔ faŋŋ.

Gbi ko beni mishiɛɔ yɛ gwabɔɔhe ko ni yɔɔ Rio maŋte lɛ mli lɛ, miyabote Mɔɔ Kɛha Jalɛsaneyelihe lɛ mli. Mileee bɔ ni fee ni miyabote tsũ ko ni hii ni wo atadei diji, ni etamɔ nɔ ni amɛmiifee yara lɛ yɔɔ mli lɛ ateŋ. Mibɛŋkɛ nuu anunyam gbɔmɔ ko ni mikɛ midaseyeli wolo lɛ ha lɛ. Jeee yarafeemɔ ni. Yɛ anɔkwale mli lɛ, miyabote kojomɔhe ko beni saneyeli ko yaa nɔ lɛ, ni kojolɔ lɛ ji mɔ ni mikɛ wieɔ lɛ. Beni eŋmɔɔ lɛ, efee okadi ko kɛtsɔɔ ehebulɔi lɛ ni amɛná tsui. Ekɛ miishɛɛ hé Children * wolo lɛ ekome ni eye too. Beni mijeɔ kpo lɛ, hebulɔi lɛ ateŋ mɔ kome tsɔɔ mi niŋmaa ko ni yɔɔ faŋŋ yɛ shinaa lɛ naa akɛ: Proibida a entrada de pessoas estranhas (Mɛi ni Afɔ̃ko Amɛ Nine Baaa Biɛ).

Shikpɔŋkuku kroko ni wo yibii ji lɛjiamaamɔhe lɛ. Gbi ko lɛ, mikɛ amlaku ko kpe ni ehé woji lɛ eko yɛ midɛŋ dani eshi kɛtee wuo. Sɛɛ mli lɛ, wɔkɛ lɛ kpe yɛ kpee ko shishi. Eweku muu lɛ fɛɛ emɔ anɔkwale lɛ mli, ni lɛ diɛŋtsɛ lɛ eeeya ehiɛ jogbaŋŋ. No ha wɔná miishɛɛ waa.

Ni kɛlɛ, wɔnáaa nɔ fɛɛ nɔ mlɛo. Wɔ nyɔji ekpaa gbɛŋmɛɛ wolo lɛ bagbo, ni wɔnane shishi tu ni abaatswa lɛ baafee naagba kɛha wɔ. Beni wɔŋma wolo kɛyaha nitsumɔhe yitso lɛ sɛɛ lɛ, wɔnine shɛ ekãawoo wolo ko nɔ kɛjɛ Nyɛminuu Rutherford ŋɔɔ, ní miiwo wɔ hewalɛ koni wɔŋmɛ wɔtsui shi, ní eetsɔɔ wɔ bɔ ni wɔtsu he nii wɔha. Wɔ shwelɛ ji ni wɔhi shi yɛ Brazil, ni yɛ mlalelɔ ko yelikɛbuamɔ naa lɛ, yɛ naagbee mli lɛ wɔnine shɛ gbɛŋmɛɛ wolo ni baaha wɔhi jɛmɛ daa lɛ nɔ yɛ afi 1945.

Nitsumɔ ko ni Sɛɛ Tsɛɔ

Shi kɛlɛ, dani no aaaba lɛ, wɔfɔ wɔbinuu Jonathan yɛ afi 1941, Rut yɛ afi 1943, kɛ Esther yɛ afi 1945 mli. Bɔni afee ni wɔnyɛ wɔtsu wɔweku ni daa lɛ hiamɔ nii ahe nii lɛ, ehe bahia ni maná heloonaa nitsumɔ. Margaritha tee nɔ etsu be-fɛɛ shiɛmɔ nitsumɔ lɛ kɛyashi wɔfɔ wɔbi ni ji etɛ lɛ.

Kɛjɛ shishijee mli lɛ, wɔtsu nii akɛ weku yɛ shiɛmɔ nitsumɔ lɛ mli yɛ maŋ lɛ kponɔgbɛ gwabɔɔhei lɛ, oketekei amaamɔhei, yɛ gbɛjegbɛi anɔ, kɛ yɛ hei ni atsuɔ nitsumɔi yɛ. Hɔɔ gbɛkɛ lɛ, wɔjaa Buu-Mɔɔ lɛ kɛ Awake! lɛ kutuu akɛ weku, ni enɛ ji miishɛɛ bei titri.

Gbekɛ fɛɛ gbekɛ yɛ daa gbi nitsumɔi ni ebaatsu yɛ shia. Jonathan ji mɔ ni kwɛɔ koni stof lɛ  kɛ kpata lɛ shi afee falefale. Gbekɛbii yei lɛ sáa friji lɛ mli, amɛbɛɔ kpo lɛ nɔ, ni amɛtsumɔɔ wɔ aspaaterei lɛ ahe. Enɛ ye bua amɛ ni amɛfee mɛi ni yɔɔ gbɛjianɔtoo kɛ mɛi ni nyɛɔ amɛtsuɔ nii ahe nii. Ŋmɛnɛ lɛ, wɔbii lɛ ji mɛi ni tsuɔ nii waa ni kwraa amɛshiai kɛ amɛnibii jogbaŋŋ, ni no haa mi kɛ Margaritha mii shɛɔ wɔhe waa.

Wɔkpaa gbɛ hu akɛ gbekɛbii lɛ baaba amɛjeŋ jogbaŋŋ yɛ kpeei ashishi. Amɛnuɔ nu glase kome ni amɛyaa nushwiemɔhe lɛ dani kpeei lɛ jeɔ shishi. Beni kpee lɛ yaa nɔ lɛ, Jonathan táa mibɛku, ni Rut táa mininejurɔ nɔ, kɛkɛ lɛ Margaritha etsá nɔ, kɛ Esther hu etá eninejurɔ gbɛ. Enɛ ye ebua amɛ koni amɛjwɛŋmɔ ahi nɔ ni yaa nɔ lɛ nɔ, ni amɛye mumɔŋ niyenii kɛjɛ amɛgbekɛbiiashi.

Yehowa miijɔɔ wɔmɔdɛŋbɔi lɛ anɔ. Wɔbii lɛ fɛɛ miiya nɔ amɛkɛ anɔkwayeli miisɔmɔ Yehowa, ni amɛkɛ amɛhe miiwo shiɛmɔ nitsumɔ lɛ mli kɛ miishɛɛ. Amrɔ nɛɛ Jonathan miisɔmɔ akɛ onukpa yɛ Novo Méier Asafo ni yɔɔ Rio de Janeiro lɛ mli.

Beni shɛɔ afi 1970 afii lɛ amli lɛ, no mli lɛ, wɔbii lɛ fɛɛ ebote gbalashihilɛ mli ni amɛshi shia, no hewɔ lɛ mikɛ Margartiha kpɛ wɔyiŋ akɛ wɔbaafã kɛyasɔmɔ yɛ hei ni hiamɔ lɛ da yɛ lɛ. He ni wɔyato shi yɛ klɛŋklɛŋ ji Pocos Caldas ni yɔɔ Minas Gerais Maŋtiase lɛ mli, ni yɛ nakai beaŋ lɛ amɛyɔɔ kuu fioo ko ni Maŋtsɛyeli shiɛlɔi 19 yɔɔ mli lɛ. Minijiaŋ je wui beni mina amɛkpeehe lɛ klɛŋklɛŋ kwraa lɛ—tsũ ni yɔɔ tsũ ko shishi ni samfɛji bɛ he, ni nibii babaoo yɛ he ni ehe miihia ni asaa. Amrɔ nɔŋŋ lɛ, wɔbɔi he ko ni hi jogbaŋŋ kɛha Maŋtsɛyeli Asa lɛ taomɔ, ni etsɛɛɛ ni wɔná tsũ fɛfɛo ko ni yɔɔ he ko ni hi. Mɛɛ srɔtofeemɔ po no kɛba nɛkɛ! Afii ejwɛ kɛ fã sɛɛ lɛ, shiɛlɔi lɛ ayibɔ tee hiɛ kɛyashɛ 155. Yɛ afi 1989 lɛ, wɔshi kɛtee Araruama ni yɔɔ Rio de Janeiro lɛ mli, he ni wɔkɛ afii nɛɛhu sɔmɔ yɛ lɛ. Yɛ nɛkɛ bei nɛɛ amli lɛ, wɔná asafoi enyɔ shishi ni ato lɛ mli gbɛfaŋnɔ.

Awo Wɔ Nyɔmɔ yɛ Nitsumɔ ni Wɔtee nɔ Wɔtsu lɛ Hewɔ

Yɛ afi 1998 mli lɛ, gbɔmɔtsoŋ hewalɛnamɔ mli naagbai kɛ shwelɛ akɛ wɔbaahi wɔbii lɛ amasɛi lɛ ha wɔshi kɛtee São Goncalo ni yɔɔ Rio de Janeiro lɛ mli. Miisɔmɔ lolo akɛ asafoŋ onukpa yɛ jɛmɛ. Wɔfeɔ nɔ fɛɛ nɔ ni wɔɔnyɛ koni wɔkɛ wɔhe awo shiɛmɔ nitsumɔ lɛ mli. Margaritha náa odase ni eyeɔ mɛi ni yɔɔ shwapo wulu ko ni bɛŋkɛ wɔ lɛ he miishɛɛ, ni asafo lɛ ejɛ mlihilɛ mli eto shikpɔŋkuku ko ni bɛŋkɛ wɔshia lɛ eha wɔ, ni no haa efeɔ mlɛo kɛhaa wɔ akɛ wɔɔshiɛ yɛ bɔ ni wɔgbɔmɔtsoŋ hewalɛnamɔ ŋmɛɔ wɔ gbɛ lɛ naa.

Amrɔ nɛɛ, mi kɛ Margaritha kɛ nɔ ni fe afii 60 ehi shi akɛ tsuji ni ejɔɔ amɛhe nɔ amɛha Yehowa. Wɔ diɛŋtsɛ wɔyoo akɛ, “nɔyelɔi jio hewalɛi jio, nii ni yɔɔ nɛɛ jio, nii ni baaba lɛ jio, ŋwɛi jio shishi jio, aloo nii ni abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ni yɔɔ Kristo Yesu, wɔ-Nuŋtsɔ lɛ, mli lɛ mli.” (Romabii 8:38, 39) Ni mɛɛ miishɛɛ po eji nɛkɛ akɛ wɔɔye “tooi krokomɛi” ni yɔɔ naanɔ wala yɛ shikpɔŋ ni eye emuu ni Nyɔŋmɔ adebɔɔ nii ni yɔɔ fɛo ebɔle he lɛ he hiɛnɔkamɔ ni yɔɔ naakpɛɛ lɛ anaabuamɔ lɛ he odase nɛkɛ! (Yohane 10:16) Beni wɔbashɛ Rio de Janeiro yɛ afi 1940 mli lɛ, no mli lɛ eyɛ asafo kome kɛ emli shiɛlɔi 28 pɛ. Ŋmɛnɛ lɛ, ayɛ asafoi aaafee 250 kɛ Maŋtsɛyeli shiɛlɔi ni fe 20,000 yɛ jɛmɛ.

Bei shɛɔ ni wɔbaanyɛ wɔku wɔsɛɛ kɛya wɔ wekumɛi aŋɔɔ yɛ Europa. Shi nitsumɔ ni Yehowa kɛha wɔ lɛ yɛ biɛ, yɛ Brazil. Kwɛ bɔ ni wɔyɔɔ miishɛɛ akɛ wɔtee nɔ wɔtsu nitsumɔ ni akɛha wɔ lɛ!

[Shishigbɛ niŋmai]

[Mfoniri ni yɔɔ baafa 21]

Yɛ Kingdom Farm, yɛ Steffisburg, Switzerland, yɛ afi 1930 naagbee gbɛ (Mi miyɔɔ abɛku gbɛ shɔŋŋ lɛ)

[Mfoniri ni yɔɔ baafa 23]

Beni eshwɛ fioo ni wɔyookpeemɔ be lɛ baashɛ, yɛ afi 1939

[Mfoniri ni yɔɔ baafa 23]

Casablanca yɛ afi 1940 afii lɛ amli

[Mfoniri ni yɔɔ baafa 23]

Wɔmiishiɛ akɛ weku

[Mfoniri ni yɔɔ baafa 24]

Shiɛmɔ nitsumɔ lɛ ni wɔkɛ wɔhe woɔ mli daa ŋmɛnɛ