Yijiemɔ He Miihia Wɔ Fɛɛ

EJI miishɛɛ gbi kɛha gbekɛ yoo bibioo lɛ. Eyɛ mli akɛ ehe bahia ni ajaje lɛ yɛ bei komɛi amli moŋ, shi eba ejeŋ jogbaŋŋ diɛŋtsɛ yɛ nɛkɛ gbi pɔtɛɛ nɛɛ nɔ. Shi kɛlɛ, nakai gbɛkɛ beni akɛ gbekɛ yoo bibioo lɛ eyafɔ̃ saa nɔ lɛ, enyɛ nu ni eefo. Beni abi lɛ nɔ hewɔ ni ehao lɛ, ekɛ yaafonui yikɔ akɛ: “Ani mibako mijeŋ jogbaŋŋ ŋmɛnɛ?”

Nakai sanebimɔ lɛ gbá enyɛ naa waa diɛŋtsɛ. Be fɛɛ be lɛ, ejajeɔ ebiyoo lɛ amrɔ nɔŋŋ. Shi yɛ gbi nɛɛ nɔ lɛ, yɛ yɔsemɔ ni eyɔse bɔ ni ebiyoo bibioo lɛ ebɔ mɔdɛŋ waa akɛ eeeba ejeŋ jogbaŋŋ lɛ fɛɛ sɛɛ lɛ, eku ehiɛ eshwie hiɛsɔɔ wiemɔ kome po ni eeewie etsɔɔ lɛ lɛ nɔ.

Jeee gbekɛbii yei bibii pɛ ji mɛi ni yijiemɔ kɛ hewalɛwoo he hiaa amɛ. Ehe miihia wɔ fɛɛ—tamɔ bɔ pɛ ni ŋaawoo kɛ jajemɔ he hiaa wɔ lɛ.

Te wɔnuɔ he wɔhaa tɛŋŋ kɛ́ ajɛ tsuiŋ ajie wɔ yi lɛ? Ani ehaaa wɔtsui anya ni eha wɔná miishɛɛ gbi muu lɛ fɛɛ? Eka shi faŋŋ akɛ wɔnaa akɛ mɔ ko yɔse, ni mɔ ko susuɔ wɔhe. Emaa nɔ mi ehaa wɔ akɛ, nɔ ni wɔfee lɛ he yɛ sɛɛnamɔ waa, ni ekanyaa wɔ koni wɔtsu nii waa ekoŋŋ yɛ wɔsɛɛ be mli. Ebɛ naakpɛɛ akɛ, bei pii lɛ, anɔkwa yijiemɔ gbalaa wɔ kɛbɛŋkɛɔ mɔ ni ŋɔɔ be ni ekɛkɛɔ wɔ nɔ ko ni woɔ mɔ hewalɛ lɛ.—Abɛi 15:23.

Yesu Kristo hiɛ sɔ bɔ ni ehe hiaa ni akɛ yijiemɔ aha lɛ. Yɛ talentai abɛbua lɛ mli lɛ, nuŋtsɔ (ni feɔ Yesu diɛŋtsɛ he mfoniri) lɛ kɛ miishɛɛ jie anɔkwa tsuji lɛ ateŋ mɔ fɛɛ mɔ yi, beni ekɛɛ akɛ: “Ahekoo, tsulɔ kpakpa kɛ anɔkwafo” lɛ! Kwɛ bɔ ni ehaa mɔ tsui nyaa! Eyɛ mli akɛ amɛyɛ nyɛmɔi kɛ nitsumɔi ni yɔɔ srɔtoisrɔtoi kwraa moŋ, shi amɛná yijiemɔ kome too lɛ nɔŋŋ.—Mateo 25:19-23.

No hewɔ lɛ, nyɛhaa wɔkaia nakai gbekɛ yoo bibioo lɛ nyɛ lɛ. Ehe ehiaaa ni wɔmɛ koni mɛi krokomɛi afo dani wɔjie amɛyi. Yɛ no najiaŋ lɛ, wɔbaanyɛ wɔtao gbɛ̀i ni wɔɔtsɔ nɔ wɔjie mɛi ayi. Eji anɔkwale akɛ, wɔyɛ yiŋtoo kpakpa ni wɔɔdamɔ nɔ wɔkɛ anɔkwayeli ajie mɔ yi yɛ hegbɛ fɛɛ hegbɛ ni wɔɔná lɛ mli.