“Nyɛbaa Miŋɔɔ, . . ni Maha Nyɛ Hejɔɔmɔ”

‘Nyɛlɛa Nyɔŋmɔ Asafoku Lɛ’

“Nyɛfee klalo be fɛɛ be akɛ nyɛaabo wɔ toi, ní nyɛkɛ wɔ awie Biblia mli wiemɔi ni kanyaa wɔmumɔ.”—Pamela.

“Wɔmiida nyɛ shi yɛ nɔ fɛɛ nɔ ni nyɛfeɔ nyɛhaa wɔ lɛ hewɔ. Yɛ anɔkwale mli lɛ, enáa hewalɛ kpakpa yɛ wɔnɔ.”—Robert.

NƆ KO tsirɛ Pamela kɛ Robert ni amɛŋma hiɛsɔɔ wiemɔi nɛɛ amɛyaha Kristofoi onukpai ni yɔɔ amɛ asafoi srɔtoi lɛ amli lɛ. Nyɔŋmɔ tsuji lɛ ateŋ mɛi krokomɛi ni yɔɔ jeŋ fɛɛ lɛ hu daa shi yɛ sɛɛfimɔ kɛ kwɛmɔ ni yaa nɔ be fɛɛ be ni amɛnine shɛɔ nɔ kɛjɛɔ mɛi ni ‘lɛɔ Nyɔŋmɔ asafoku lɛ’ aŋɔɔ lɛ hewɔ. (1 Petro 5:2) Yɛ anɔkwale mli lɛ, Yehowa webii daa shi yɛ nibii babaoo ni onukpai lɛ feɔ haa amɛ, kɛ gbɛ ni amɛtsɔɔ nɔ amɛfeɔ amɛhaa amɛ lɛ ahe.

‘Amɛyɛ Babaoo Tsumɔ’

Atuu gbɛnaa nii babaoo awo Kristofoi onukpai lɛ adɛŋ. (Luka 12:48) Amɛtoɔ wiemɔi ahe gbɛjianɔ kɛha asafoŋ kpeei, ni amɛkɛ amɛhe woɔ Nyɔŋmɔ Maŋtsɛyeli lɛ he sanekpakpa lɛ shiɛmɔ mli yɛ faŋŋ. Nɔ ni fata amɛnitsumɔi ahe ji nanemɛi heyelilɔi asaramɔ. Onukpai lɛ tuuɔ be amɛhaa mɛi ni ehe hiaa ni agbala jwɛŋmɔ kɛya amɛnɔ yɛ gbɛ krɛdɛɛ nɔ lɛ—mɛi ni egbɔlɔ lɛ kɛ mɛi krokomɛi—ni amɛfeɔ enɛɛmɛi fɛɛ ni amɛkuuu amɛhiɛ amɛshwieee amɛ diɛŋtsɛ amɛwekui lɛ amumɔŋ kɛ heloonaa hilɛ-kɛ-hamɔ nɔ. (Hiob 29:12-15; 1 Timoteo 3:4, 5; 5:8) Onukpai komɛi yeɔ buaa koni akɛmamɔ Maŋtsɛyeli Asai. Mɛi krokomɛi sɔmɔɔ akɛ Hospital Liaison Committee lɛ mli bii, loo akɛ Patient Visitation Groups (Helatsɛmɛi Asaramɔ Kui) lɛ mli bii. Ni amɛteŋ mɛi babaoo jɛɔ amɛsuɔmɔ mli amɛkɛ amɛhe haa koni amɛtsu nii yɛ kpeei bibii kɛ kpeei wuji ashishi. Hɛɛ, onukpai lɛ yɛ ‘babaoo tsumɔ yɛ Nuŋtsɔ lɛ nitsumɔ lɛ mli.’ (1 Korintobii 15:58) Ebɛ naakpɛɛ mɔ akɛ mɛi ni atuu amɛ awo amɛdɛŋ koni amɛkwɛ amɛnɔ lɛ ahiɛ sɔɔ onukpai nɛɛ ni tsuɔ nii waa lɛ!—1 Tesalonikabii 5:12, 13.

Onukpai ni yasaraa nanemɛi Kristofoi yɛ amɛshiai amli loo yɛ he kroko be fɛɛ be, koni amɛwo amɛ hewalɛ yɛ mumɔŋ lɛ ji hewalɛwoo jɛɛhe. Thomas, ni da akɛ mɔ ni bɛ tsɛ lɛ kɛɛ akɛ: “Eji minine shɛɛɛ suɔmɔ kɛ hewalɛwoo nɔ kɛjɛɛɛ onukpai lɛ aŋɔɔ kulɛ, mikpaaa shi akɛ masɔmɔ Yehowa akɛ be-fɛɛ sɔɔlɔ ŋmɛnɛ.” Oblahii kɛ oblayei babaoo ni atsɔse amɛ yɛ fɔlɔ kome wekui amli lɛ kpɛlɛ nɔ akɛ yelikɛbuamɔ ni amɛnine shɛ nɔ kɛjɛ onukpai lɛ aŋɔɔ lɛ ye ebua amɛ ni amɛná amɛkɛ Nyɔŋmɔ teŋ wekukpaa.

Mɛi ni egbɔlɔ ni yɔɔ asafo lɛ mli lɛ ahiɛ sɔɔ saramɔ ni ayasaraa amɛ lɛ hu. Beni onukpai enyɔ yasara  maŋsɛɛ sanekpakpa shiɛlɔi gbalashihilɛ mli hefatalɔi ni eye kɛjɛ afii 80 kɛyaa lɛ sɛɛ lɛ, amɛŋma akɛ: “Wɔmiisumɔ ni wɔtsɔɔ hiɛsɔɔ ni wɔyɔɔ kɛha nyɛ saramɔ ni yɔɔ miishɛɛ waa lɛ. Beni nyɛshi lɛ, wɔsaa wɔkane ŋmalɛi ni nyɛkɛ wɔ susu he lɛ ekoŋŋ. Wɔhiɛ kpaŋ nyɛ hewalɛwoo wiemɔi lɛ anɔ kɔkɔɔkɔ.” Yoo okulafo ko ni eye afii 70 lɛ ŋma kɛyaha onukpai lɛ akɛ: “Misɔleɔ mihaa Yehowa kɛha yelikɛbuamɔ, ni etsu nyɛ onukpai enyɔ nɛɛ kɛba mishia. Nyɛ saramɔ lɛ ji jɔɔmɔ ni jɛ Yehowa ŋɔɔ!” Ani oná saramɔ ni onukpai ni yɔɔ asafo ni oyɔɔ mli lɛ mli lɛ basara bo lɛ he sɛɛ nyɛsɛɛ nɛɛ? Yɛ anɔkwale mli lɛ, wɔ fɛɛ wɔhiɛ sɔɔ mɔdɛŋ ni amɛbɔɔ yɛ lɛ̀ ni amɛlɛɔ asafoku lɛ ni yɔɔ amɛkwɛmɔ shishi lɛ hewɔ!

Nɔkwɛlɔi ni Kaseɔ Nyɔŋmɔ kɛ Kristo

Yehowa ji Nɔkwɛlɔ ni yɔɔ suɔmɔ. (Lala 23:1-4; Yeremia 31:10; 1 Petro 2:25) Yesu Kristo hu ji Nɔkwɛlɔ ni kwɛɔ wɔmumɔŋ hiamɔ nii anɔ ni sa kadimɔ. Yɛ anɔkwale mli lɛ, atsɛɔ lɛ akɛ “tookwɛlɔ kpakpa,” ‘tookwɛlɔ kpeteŋkpele’ kɛ “tookwɛlɔ nukpa.” (Yohane 10:11; Hebribii 13:20; 1 Petro 5:4) Te Yesu kɛ mɛi ni miisumɔ ni amɛtsɔ ekaselɔi lɛ ye ha tɛŋŋ? Ekɛ ninefɔɔ ni miishɛɛ yɔɔ mli ha amɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ.”—Mateo 11:28.

Onukpai ni yɔɔ ŋmɛnɛ lɛ hu bɔɔ mɔdɛŋ ni amɛfee hejɔɔmɔ kɛ hebuu jɛɛhe kɛha asafoku lɛ. Hii nɛɛ “tamɔ abobaahe yɛ kɔɔyɔɔ naa kɛ teemɔhe yɛ nyɔŋmɔnɛmɔ naa, tamɔ faai yɛ ŋã kpataa nɔ loo tɛsaa kpele ko ni haa hɔ̃ɔŋ yɛ shikpɔŋ gbiŋ nɔ.” (Yesaia 32:2) Hebulɔi ni yɔɔ mlihilɛ ni tamɔ nɛkɛ lɛ haa anáa hejɔɔmɔ, asafoku lɛ buɔ amɛ, ni amɛnáa Nyɔŋmɔ nɔkpɛlɛmɔ.—Filipibii 2:29; 1 Timoteo 5:17.

Sɛɛfimɔ Kpele ni Jɛ Amɛŋamɛi Aŋɔɔ

Nyɔŋmɔ webii daa shi yɛ Kristofoi onukpai kɛ suɔmɔ sɛɛfimɔ ni hii nɛɛ náa kɛjɛɔ amɛŋamɛi aŋɔɔ lɛ hewɔ. Bei pii lɛ, ákɛ aaafee sɛɛfilɔ lɛ biɔ afɔleshaai yɛ yei ni tamɔ nɛkɛ gbɛfaŋ. Bei komɛi lɛ, amɛhiɔ shia beni amɛwumɛi miitsu asafoŋ saji ahe nii loo amɛmiisara nyɛmimɛi. Bei komɛi lɛ, atsiɔ gbɛjianɔi ni aje gbɛ ato lɛ atoɔ, yɛ naagba ko ni ete shi yɛ asafo lɛ mli ni ehe hiaa akɛ atsu he nii amrɔ nɔŋŋ lɛ hewɔ. Michelle kɛɛ akɛ: “Kɛ́ eba lɛ nakai po lɛ, kɛji mina bɔ ni miwu bɛ dekã kwraa yɛ hesaamɔ kɛha asafoŋ kpeei, loo yɛ nyɛmimɛi lɛ asaramɔ mli lɛ, mihaa ehiɔ mijwɛŋmɔ mli akɛ eetsu Yehowa nitsumɔ, ni mibɔɔ mɔdɛŋ fɛɛ ni manyɛ koni mikɛfi esɛɛ.”

Cheryl, ni lɛ hu onukpa ko kɛ lɛ ebote gbalashihilɛ mli lɛ kɛɛ akɛ: “Mile akɛ esa akɛ nyɛmimɛi hii kɛ yei ni yɔɔ asafo lɛ mli lɛ aná onukpai ni amɛkɛ amɛ awie, ni miisumɔ ni amɛnu he akɛ amɛbaanyɛ amɛba miwu ŋɔɔ be fɛɛ be ni ehe hiaa amɛ.” Yei sɛɛfilɔi tamɔ Michelle kɛ Cheryl jɛɔ amɛsuɔmɔ mli amɛshãa afɔlei bɔni afee ni amɛwumɛi anyɛ akwɛ Nyɔŋmɔ tooi lɛ anɔ. Hiɛ sɔɔ onukpai lɛ aŋamɛi yɛ amɛ sɛɛfimɔ mumɔ lɛ hewɔ.

Ni kɛlɛ, esaaa akɛ onukpa ni bɛ dekã lɛ kuɔ ehiɛ efɔ̃ɔ eŋa kɛ ebii lɛ amumɔŋ kɛ hiamɔ nii krokomɛi anɔ. Esa akɛ onukpa ni ebote gbalashihilɛ mli lɛ afee mɔ ni “kpa ko bɛ ehe, ni eji mɔ ni yɔɔ ŋa kome, ní yɔɔ bii ni heɔ yeɔ ní awieee amɛhe akɛ nyenyeŋtswibɔlɔi loo toigbolɔi ji amɛ.” (Tito 1:6) Esa akɛ ekwɛ eweku lɛ nɔ yɛ Nyɔŋmɔ gbeyeishemɔ gbɛ ni Ŋmalɛ lɛ biɔ yɛ Kristofoi nɔkwɛlɔi adɛŋ lɛ nɔ.—1 Timoteo 3:1-7.

Kɛha onukpa ni bɛ dekã lɛ, ŋa sɛɛfilɔ jara wa naakpa! Nakai ji bɔ ni onukpai ni susuɔ nii ahe lɛ nuɔ he amɛhaa. Etamɔ bɔ pɛ ni Biblia lɛ kɛɛ lɛ akɛ: “Ani mɔ ko ená ŋa kpakpa? Mɔ lɛ ená nɔkpakpa.” (Abɛi 18:22, NW) Onukpai ni tamɔ nɛkɛ jieɔ tsuiŋ hiɛsɔɔ kpo amɛtsɔɔ amɛŋamɛi lɛ yɛ amɛwiemɔ kɛ nifeemɔ mli. Kɛfata sɔlemɔ ni hiɛdɔɔ yɔɔ mli kɛ nikasemɔ ni yɔɔ miishɛɛ ni amɛfeɔ ekome kɛfeɔ lɛ he lɛ, Kristofoi gbalashihilɛ mli hefatalɔi nɛɛ toɔ be koni amɛkɛná nibii tamɔ shisharamɔ yɛ ŋshɔnaa, yɛ kooi amli, loo yɛ abɔɔ ko mli lɛ mli miishɛɛ. Hɛɛ, onukpai náa suɔmɔ kwɛmɔ ni amɛkɛhaa amɛŋamɛi lɛ he miishɛɛ.—1 Petro 3:7.

Onukpai ni lɛɔ Nyɔŋmɔ asafoku lɛ ni pɛsɛmkunya bɛ mli lɛ ji mumɔŋ hejɔɔmɔ ko kɛha Yehowa webii. Yɛ anɔkwale mli lɛ, amɛji “gbɔmɛi ateŋ nikeenii,” jɔɔmɔ ko kɛha asafo lɛ!—Efesobii 4:8, 11-13, NW.