Akɛha yɛ Meele Kudɔlɔ lɛ Okpɔlɔ lɛ He
Akɛha yɛ Meele Kudɔlɔ lɛ Okpɔlɔ lɛ He
GBƆMƐI ni he yɔɔ miishɛɛ, niyenii ni ŋɔɔ, kɛ sanegbaa ni yɔɔ miishɛɛ haa niyeli yɛ meele kudɔlɔ lɛ okpɔlɔ lɛ he bafeɔ nɔ ni yɔɔ miishɛɛ beni akɛ meele fãa gbɛ lɛ. Shi sanegbaa ko ni tee nɔ yɛ Meele Kudɔlɔ Robert G. Smith okpɔlɔ lɛ he, yɛ White Star Line meele lɛ mli lɛ ha ayɔse mumɔŋ okpɔlɔŋmɛɛ ko.—Yesaia 25:6.
Yɛ afi 1894 beni Robert eye afii 24 lɛ, ekwɛ gbɛfaa meele ni ji Kinclune of Dundee lɛ nɔ, ni efã eklɛŋklɛŋ gbɛ kɛmiiya je lɛŋ hei srɔtoi lɛ. Sɛɛ mli lɛ, etsu nii akɛ meele kudɔlɔ yɛ White Star meelei tamɔ Cedric, Cevic, kɛ Runic lɛ amli. * Beni Robert jɛ New York ni eefo Atlantik lɛ kɛmiiya Liverpool, England yɛ meelei nɛɛ ateŋ ekome mli lɛ, efɔ̃ Charles Taze Russell nine kɛba meele kudɔlɔ lɛ okpɔlɔ lɛ he. Sane ni Russell kɛ Robert gba lɛ tée miishɛɛ ni eyɔɔ yɛ Biblia mli shɛɛ sane lɛ he lɛ shi, ni bɔni afee ni enyɛ ekase babaoo lɛ, ekɛ mlifilimɔ ŋɔ Studies in the Scriptures woji lɛ eko kɛjɛ Russell dɛŋ.
Russell tee nɔ ekɛ lɛ gba sane kɛtsɔ woloŋmaa nɔ, ni enɛ hewɔ lɛ, miishɛɛ ni Robert yɔɔ yɛ Biblia mli shɛɛ sane lɛ he lɛ mli bawa. Robert gba eŋa nilee hee ni ená lɛ. Etsɛɛɛ tsɔ ni amɛyi enyɔ lɛ fɛɛ amɛbatsɔmɔ Biblia Kaselɔi ni yɔɔ ekãa, taakɛ ale Yehowa Odasefoi yɛ nakai beaŋ lɛ. Sɛɛ mli lɛ Robert ná hegbɛ akɛ ebaaha Biblia mli wiemɔi. Ákɛ nɔkwɛmɔnɔ lɛ, yɛ Brisbane yɛ Australia lɛ, ewie “Gilead Tsofa Lɛ” he ni etsɔɔ bɔ ni Nyɔŋmɔ Wiemɔ lɛ hiɛ shɛɛ sane ko ni ji “tsabaa kɛha shikpɔŋ lɛ nɔ haomɔi fɛɛ” lɛ mli. Yɛ England lɛ, eŋa kɛ ebii bibii lɛ ye ebua yɛ “Photo Drama of Creation” lɛ jiemɔ mli, ni amɛtswaa Russell wiemɔi ni amɔmɔ awo kpãai anɔ lɛ beni ajieɔ mfonirii lɛ atsɔɔ lɛ.
Robert shi Maŋtsɛyeli anɔkwale ni enine shɛ nɔ lɛ eha ebii lɛ akɛ gboshinii. Ŋmɛnɛ, yɛ yinɔbii enumɔ sɛɛ lɛ, eweku lɛ mli bii 18 bɛ dekã kwraa kɛ sanekpakpa lɛ shiɛmɔ kɛ mɛi krokomɛi hamɔ, ni etsɔɔ hiɛsɔɔ ni amɛyɔɔ kɛha nɔ ni akɛha yɛ meele kudɔlɔ lɛ okpɔlɔ lɛ he lɛ.
Yehowa Odasefoi miiye kɛmiibua mɛi ni yɔɔ je lɛŋ fɛɛ lɛ koni amɛkase Biblia mli shɛɛ sane ni Meele Kudɔlɔ Smith ná he miishɛɛ lɛ kɛtsɔ amɛwoji kɛ amɛ Biblia nitsɔɔmɔ nitsumɔ lɛ nɔ. Bo hu obaanyɛ ole nɔ ni bafee nɔ ni yɔɔ miishɛɛ waa yɛ meele kudɔlɔ lɛ okpɔlɔ lɛ he lɛ.
[Shishigbɛ niŋmaa]
^ kk. 3 Meele Kudɔlɔ E. J. Smith (amɛjeee helooŋ nyɛmimɛi) ji nɔkwɛlɔ ni kudɔ nakai meele lɛ henɔ ni ji Titanic, ni ná oshara yɛ eklɛŋklɛŋ gbɛfaa lɛ mli lɛ.
[Mfoniri ni yɔɔ baafa 8]
Robert G. Smith
[Mfoniri ni yɔɔ baafa 8]
Charles T. Russell