Be ni Hi Fe Fɛɛ ni Akɛaahi Wala Mli

KƐ OKƐ shihilɛi ni kaa mɔ kpe lɛ, ani oshweɔ “gbii kpakpai ni eho lɛ”? Belɛ susumɔ nilelɔ Maŋtsɛ Salomo wiemɔi akɛ: “Kaakɛɛ akɛ: Mɛɛba ni tsutsu gbii lɛ hi fe enɛɛmɛi nɛɛ? ejaakɛ jeee nilee okɛbiɔ enɛ nɛɛ” lɛ ahe okwɛ.—Jajelɔ 7:10.

Mɛni hewɔ Salomo wo nɛkɛ ŋaa nɛɛ? Ejaakɛ ele akɛ jwɛŋmɔ kpakpa ni aaaná yɛ be ni eho lɛ he lɛ ji yelikɛbuamɔ ni hi jogbaŋŋ ni baaha anyɛ akpee ŋmɛnɛŋmɛnɛ shihilɛi ni ehiii lɛ anaa yɛ omanyeyeli mli. Ekolɛ mɛi ni shweɔ “gbii kpakpai ni eho lɛ” ahiɛ baakpa nɔ kwraa akɛ nakai gbii lɛ hu amli eyi obɔ kɛ naagbai kɛ haomɔi, ni ákɛ shihilɛ jeee nɔ ni hi tsɔ̃. Ekolɛ blema nibii komɛi hi jogbaŋŋ, shi etamɔ nɔ ni eka shi faŋŋ akɛ ekrokomɛi jeee nakai. Taakɛ bɔ ni Salomo yɔse lɛ, nilee ko bɛ mli ákɛ akɛ hiɛ aaafɔ̃ be ni eho lɛ nɔ yɛ gbɛ ni ejaaa nɔ, akɛni eka shi faŋŋ akɛ wɔnyɛŋ wɔtsake bɔ ni shihilɛ etamɔ eha lɛ hewɔ.

Ani ebaanyɛ efee oshara ákɛ abaaná shwelɛ ni mli wa kɛha be ni eho lɛ? Hɛɛ, kɛji ehaaa wɔnyɛ wɔŋmɛ pɛpɛɛpɛ ni wɔtsake wɔhe wɔwo ŋmɛnɛŋmɛnɛ shihilɛ lɛ mli, loo etsĩ wɔnaa yɛ miishɛɛ ni wɔkɛaayɔse be mli ni wɔyɔɔ lɛ kɛ hiɛnɔkamɔ ni baanyɛ atsɔ wɔnɔ̃ lɛ.

Yɛ anɔkwale mli lɛ, amrɔ nɛɛ ji be ni hi fe fɛɛ ni esa akɛ akɛaahi wala mli, ekɔɔɔ he eko je lɛŋ naagbai ni miiwo wu lɛ fɛɛ sɛɛ. Mɛni hewɔ? Ejaakɛ wɔmiibɛŋkɛ Nyɔŋmɔ yiŋtoo ni kɔɔ wɔ shikpɔŋ nɛɛ kɛ jɔɔmɔi ni yɔɔ e-Maŋtsɛyeli ni baaye nɔ yɛ toiŋjɔlɛ mli lɛ mlibaa he. Biblia lɛ woɔ shi akɛ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:4) Kɛkɛ lɛ, beni shihilɛi ehi jogbaŋŋ lɛ, mɔ ko mɔ ko naŋ yiŋtoo ni eeedamɔ nɔ eshwe “gbii kpakpai ni eho lɛ.”