Ha Fe Onyɛmɔ

“NYƐBAANYƐ nyɛtsɛ mi nibalɔ; no gbaaa minaa. Miiba shika maha Yesu.” Nakai Protestant osɔfo lɛ wiemɔi ni jieɔ teemɔŋ sane kpo lɛ maa naataamɔ ni yaa nɔ yɛ jamɔŋ oniatsumɔ mli lɛ nɔ mi. Etamɔ nɔ ni shika pii ji nɔ̃ pɛ ni haa jamɔi ni ato shishi lɛ nyɛɔ amɛhiɔ shi. Esa akɛ awo mɛi nyɔmɔ, amamɔ sɔlemɔtsui ni akwɛ nɔ, akɛ shika afĩ sanekpakpa shiɛmɔ he tafaai asɛɛ. Te aaafee tɛŋŋ aná shika ni he hiaa nɛɛ?

Kɛha sɔlemɔi babaoo lɛ, no ji mlijaa nyɔŋma mli ekome lɛ. * Shiɛlɔ Norman Robertson kɛɛ akɛ: “Mlijaa nyɔŋma mli ekome hamɔ ji gbɛ ni Nyɔŋmɔ tsɔɔ nɔ ekɛ shika fĩɔ E-maŋtsɛyeli lɛ sɛɛ yɛ shikpɔŋ lɛ nɔ. Eji Eshika helɛtemɔ gbɛjianɔtoo ni yeɔ ebuaa koni ashiɛ Sanekpakpa lɛ.” Ákɛ mɔ ni hiɛ gbooo akɛ eeekai esɛɛnyiɛlɔi lɛ amɛgbɛnaa nii akɛ amɛha nii lɛ he lɛ, ekɛ nɔmimaa wie akɛ: ‘Mlijaa nyɔŋma mli ekome lɛ jeee nɔ ko ni ofeɔ akɛni obaanyɛ ofee hewɔ. Eji toiboo nifeemɔ. Kɛji ohaaa mlijaa nyɔŋma mli ekome lɛ, eji Nyɔŋmɔ kitai ni ojeɔ gbɛ okuɔ mli. Eji Nyɔŋmɔ shika ni oye.’—Tithing—God’s Financial Plan.

Eka shi faŋŋ akɛ, okpɛlɛɔ nɔ akɛ esa akɛ nihamɔ afee Kristofonyo jamɔ fã. Shi kɛlɛ, ani onaa shika ni abiɔ daa lɛ akɛ eji naagba, ekolɛ nɔ ni woɔ mɔ mli la? Brazil Nyɔŋmɔ jamɔ he nilelɔ Inácio Strieder folɔ sɔlemɔi lɛ anaa yɛ mlijaa nyɔŋma mli ekome lɛ ní amɛkɛtsuɔ nii koni “amɛkɛtsu amɛgbɛjianɔtoo mli naagbai ahe nii” lɛ hewɔ, ni etsɛ enɛɛmɛi akɛ “nɔ ni mla eŋmɛɛɛ gbɛ, nifeemɔ ni esaaa, kɛ nɔ ni egba afã yɛ Nyɔŋmɔ jamɔ he nilee he.” Etsɔɔ mli akɛ, “mɛi ni bɛ nitsumɔ, yei okulafoi, mɛi ni yɔɔ tsũi ni bɛ hiŋmɛi nɔ amli, kɛ mɛi ni nyɛɛɛ asusu nii ahe kɛya shɔŋŋ lɛ muɔ sane naa akɛ Nyɔŋmɔ ekpoo amɛ, ni ákɛ anyɛɔ amɛnɔ ni amɛkɛ pii aha ‘shiɛlɔ lɛ’ aahu akɛ hɔmɔ yeɔ amɛwekui.”

Ekolɛ obaabi akɛ: ‘Ani sɔlemɔi ni biɔ mlijaa nyɔŋma mli ekome lɛ kɛ Ŋmalɛ lɛ miitsu nii yɛ gbɛ ni ja nɔ? Aloo ekolɛ jamɔi komɛi kɛ toigbalamɔ ni Nyɔŋmɔ kɛbaaba lɛ he gbeyeishemɔ ni ayɔɔ lɛ miiye amɛjamɔŋ bii lɛ ahe nii? Yɛ anɔkwale mli lɛ, ani Nyɔŋmɔ biɔ ni wɔha fe wɔnyɛmɔ, taakɛ mɛi komɛi kɛɔ lɛ?’

[Shishigbɛ niŋmaa]