Sanebimɔi ni Jɛ Kanelɔi Adɛŋ

Ani esa akɛ wɔmu sane naa yɛ Kpojiemɔ 20:8 lɛ naa akɛ, mɛi ayibɔ ni Satan baalaka yɛ naagbee kaa lɛ mli lɛ ayi baafa babaoo?

Kpojiemɔ 20:8 tsɔɔ naagbee tutuamɔ ni Satan kɛbaaba mɛi ni yɔɔ shikpɔŋ nɔ yɛ afii akpe nɔyeli lɛ naagbee yɛ Mesia Maŋtsɛyeli lɛ mli lɛ anɔ lɛ mli. Beni kuku lɛ wieɔ Satan he lɛ, ekɛɛ akɛ: “Eeeje kpo, ni eyashishiu jeŋmaji lɛ ni yɔɔ shikpɔŋ koji ejwɛ lɛ mli lɛ, Gog ni jɛ Magog lɛ, koni ebua amɛnaa kɛkpe ni amɛya ta; mɛi ayibɔ ni tamɔ ŋshɔnaa shia” lɛ.

Yɛ hiɛyaai ni aná yɛ jeŋ nilee gbɛ̀i ni atsɔɔ nɔ akɛfeɔ nibii kɛ yɛ ŋaalee dadei ahe nitsumɔ mli lɛ fɛɛ sɛɛ lɛ, akã he alé “ŋshɔnaa shia” yifalɛ loo eyibɔ. No hewɔ lɛ, abaanyɛ akɛɛ akɛ wiemɔ lɛ damɔ shi kɛha yibɔ ko ni aleee, ni anyɛŋ naa atsɔɔ. Shi ani no tsɔɔ yibɔ ko ni fa babaoo, ni feɔ mɔ hiɛ yaa, ni fa kɛteke nɔ po, loo eji nɔ ni aleee, ní fɛɛ sɛɛ lɛ efa waa kɛkɛ?

Akɛ wiemɔ “tamɔ ŋshɔnaa shia” lɛ tsuɔ nii yɛ Biblia lɛ mli yɛ gbɛ̀i pii anɔ. Ákɛ nɔkwɛmɔnɔ lɛ, wɔkaneɔ yɛ 1 Mose 41:49 akɛ: “Yosef bua abele naa eto babaoo diɛŋtsɛ taakɛ ŋshɔnaa shia, kɛyashi beyinɔ ni efɔ̃ɔ kanemɔ; ejaakɛ ebɛ yikulɛ.” Yɛ biɛ lɛ, aama eyibɔ ni anyɛɛɛ akane lɛ nɔ mi. Nakai nɔŋŋ Yehowa jaje akɛ: “Bɔ ni anyɛŋ akane ŋwɛi asafo lɛ, loo asusu ŋshɔnaa shia lɛ, nakai maha mitsulɔ David seshi lɛ afa.” Taakɛ bɔ ni eka shi faŋŋ akɛ anyɛŋ akane ŋwɛi ŋulamii kɛ ŋshɔnaa shia lɛ, nakai nɔŋŋ hu eka shi faŋŋ akɛ Yehowa baaha eshiwoo ni ekaha David lɛ aba mli.—Yeremia 33:22.

Bei babaoo lɛ, wiemɔ “ŋshɔnaa shia” lɛ kɔɔ nɔ ko ni fa waa kɛ yibɔ loo dalɛ ko ni sa jogbaŋŋ he. Ebafee naagba kpele kɛha Israelbii lɛ yɛ Gilgal yɛ Filistibii asraafoi ni bua amɛhenaa yɛ Mikmash, ni “tamɔ ŋshɔnaa shia” lɛ hewɔ. (1 Samuel 13:5, 6; Kojolɔi 7:12) Ni “Nyɔŋmɔ hã Salomo nilee kɛ niiashishinumɔ babaoo diɛŋtsɛ kɛ jwɛŋmɔ ni mli lɛɛ, tamɔ ŋshɔnaa shia.” (1 Maŋtsɛmɛi 5:9) Eyɛ mli akɛ nibii ni awie yɛ shihilɛ lɛ eko fɛɛ eko he lɛ kɔɔ fa ni efa babaoo he moŋ, shi fɛɛ sɛɛ lɛ husu yɛ he.

“Ŋshɔnaa shia” baanyɛ adamɔ shi hu kɛha yibɔ ko ni aleee, ní ekɔɔɔ fa ni efa babaoo lɛ he. Yehowa kɛɛ Abraham akɛ: “Hewɔ lɛ jɔɔmɔ majɔɔo, ni fa maha oseshi afa tamɔ ŋwɛi ŋulamii kɛ ŋshɔnaa shia.” (1 Mose 22:17) Beni Yehowa saa etiɔ nɛkɛ shiwoo nɛɛ mli ehaa Abraham nabi Yakob lɛ, ekɛ wiemɔ “shikpɔŋ mulu,” ní Yakob saa ewie he akɛ “ŋshɔnaa shia” lɛ tsu nii. (1 Mose 28:14; 32:13) Taakɛ bɔ ni nibii ba ha lɛ, kɛ́ ajie Yesu Kristo kɛjɛ mli lɛ, Abraham “seshi” lɛ yibɔ bafeɔ 144,000, ní Yesu tsɛ́ amɛ akɛ “asafoku bibioo” lɛ.—Luka 12:32; Galatabii 3:16, 29; Kpojiemɔ 7:4; 14:1, 3.

Mɛni wɔkaseɔ kɛjɛɔ nɔkwɛmɔnii nɛɛ amli? Ákɛ, wiemɔ ni ji, “tamɔ ŋshɔnaa shia” lɛ etsɔɔɔ be fɛɛ be akɛ nɔ ko ni husu bɛ he, yibɔ ko ni fa kɛteke nɔ; loo ni akɛaatsu nii be fɛɛ be kɛtsɔɔ nɔ ko ni da waa loo ehaa mɔ hiɛ feɔ lɛ yaa. Bei babaoo lɛ, edamɔɔ shi kɛhaa yibɔ ko ni aleee shi moŋ efa bɔ ni sa. No hewɔ lɛ, nilee yɛ mli akɛ aaahe aye akɛ atuatselɔi asafoku ni baafi Satan sɛɛ yɛ enaagbee tutuamɔ ni ekɛaaba Nyɔŋmɔ webii anɔ lɛ efeŋ nɔ ni baafa kɛteke nɔ, shi moŋ amɛbaafee yibɔ ni fa loo ni da bɔ ni sa ni baanyɛ ekɛ hegbeyeiwoo aba. Shi kɛlɛ, amrɔ nɛɛ, yibɔ lɛ kã he eji nɔ ni aleee.