“Osane Ja, Wala Ŋɔɔ Waa!”

ANI obaasumɔ ni okase yiŋtoo diɛŋtsɛ ni yɔɔ wala sɛɛ? Magdalena ni eye afii 18 ni ji Yehowa Odasefoi lɛ ateŋ mɔ kome ni yɔɔ Szczecin, Poland lɛ ye ebua Katarzyna ni ji enɔtsamɔ skul klasnyo lɛ ní efee nakai pɛpɛɛpɛ. Katarzyna ji mɔ ko ni heɔ eyeɔ akɛ Nyɔŋmɔ bɛ, shi beni Magdalena kɛ lɛ gba Biblia lɛ he sane lɛ, ejie anɔkwa miishɛɛ kpo.

Eyɛ mli akɛ Katarzyna hiɛ sɔ nɔ ni Magdalena kɛlɛ susu he kɛjɛ Biblia lɛ mli lɛ moŋ, shi enyɛɛɛ ekpɛlɛ nɔ kwraa kɛmɔ shi. Gbi ko beni Katarzyna kɛ Magdalena wieɔ mɛi ni ji anɔkwa nanemɛi ahe lɛ, Katarzyna kɛɛ lɛ akɛ: “Oyɛ Biblia lɛ; ole shishitoo mlai ni okɛaatsu nii kɛná nanemɛi kɛ hei ni obaaná amɛ yɛ. Shi yɛ mɛi ni kɛ hoo kwraa lɛ, amrɔ nɛɛ amɛnyɛɛɛ amɛkpɛlɛ nakai shishitoo mlai anɔ lɛ agbɛfaŋ hu?”

Katarzyna tsake beni efã gbɛ kɛtee London, England lɛ. Eyasara Yehowa Odasefoi anitsumɔhe nine ni yɔɔ jɛmɛ lɛ, ni mlihilɛ kpo ni ajie atsɔɔ lɛ lɛ ta etsui mli. Ehiɛ sɔ nifeemɔi bibii tamɔ shinaa ni agbele aha lɛ kɛ miishɛɛ kpo ni ajie yɛ ewiemɔi ahe lɛ.

Beni skul afi hee lɛ je shishi yɛ September 2001 lɛ mli lɛ, Katarzyna kpɛ eyiŋ akɛ ebaakpɛlɛ daa Biblia nikasemɔ nɔ. Eetswa hiɛsɔɔ ni eyɔɔ kɛha Biblia shishitoo mlai lɛ eema shi, ni ekɛbɔi nitsumɔ yɛ edaa gbi shihilɛ mli. Nyɛsɛɛ nɛɛ, ekɛ hekɛnɔfɔɔ kɛɛ Magdalena akɛ: “Minuɔ he tamɔ nɔ ni miije wala hee ko shishi.” Ekɛ lɛ wie kuku kɛtsɔ tɛlifoŋ ni kpãa bɛ sɛɛ hu nɔ akɛ: “Miida bo shi jogbaŋŋ diɛŋtsɛ kɛha wɔŋmɛnɛ nikasemɔ lɛ! Osane ja, wala ŋɔɔ waa! Esa jogbaŋŋ akɛ wɔɔle mɔ ni esa akɛ wɔda lɛ shi yɛ enɛ he.”