Akai Yehowa Odasefoi ni Agbe Amɛ Lɛ

YƐ March 7, 2002 lɛ, ajie mama ni hà kaimɔ tɛ ko nɔ lɛ yɛ Körmend maŋ lɛ mli yɛ Hungary anaigbɛ. Akɛkai Yehowa Odasefoi etɛ ni Nazibii lɛ gbe amɛ yɛ afi 1945 lɛ agbele.

Akɛ kaimɔ tɛ lɛ ekpɛtɛ ŋmɛnɛŋmɛnɛ beaŋ lagbee nitsumɔhe yitso ni yɔɔ Hunyadi Gbɛjegbɛ lɛ masɛi lɛ gbogbo lɛ he, he ni agbe gbɔmɛi yɛ mɛi krokomɛi ahiɛ yɛ lɛ. Ajɔɔ kaimɔ tɛ lɛ nɔ koni akɛkai ‘Kristofoi ni agbe amɛ yɛ March 1945 akɛni amɛhenilee eŋmɛɛɛ amɛ gbɛ ni amɛkɛ amɛhe awo asraafoi anifeemɔ mli lɛ hewɔ. Antal Hőnisch (afi 1911-1945), Bertalan Szabó (afi 1921-1945), János Zsondor (afi 1923-1945), 2002, Yehowa Odasefoi.’

Beni agbe amɛ lɛ, no sɛɛ nyɔji enyɔ pɛ kɛkɛ ni Jeŋ Ta II lɛ ba naagbee. Mɛni hewɔ agbe nɛkɛ Kristofoi nɛɛ? Hungary adafitswaa wolo Vas Népe tsɔɔ mli akɛ: “Beni Hitler ŋɔ nɔyeli hewalɛ yɛ Germany sɛɛ lɛ, jeee Yudafoi lɛ pɛ ajie hiɛ aka amɛ kɛha yiwaa kɛ piŋmɔ, yiwalɛ nsaraŋ kɛ gbele kɛ́ amɛkwáaa amɛjamɔŋ hemɔkɛyeli lɛ, shi Yehowa Odasefoi anɔkwafoi lɛ hu. . . . Yɛ March 1945 lɛ, nɔyeli lɛ kɛ awuiyeli ni naa wa waa ba yɛ Hungary anaigbɛ fã lɛ. . . . Awuiyeli nifeemɔ lɛ eko ji ni atswa Yehowa Odasefoi lɛ anane shi tu, ni agbe amɛ.”

Ajara gbɛjianɔtoo ni kɔɔ kaimɔ tɛ lɛ he lɛ mli awo fãi enyɔ mli. Klɛŋklɛŋ nɔ lɛ ba yɛ Batthyány Castle shwɛmɔhe lɛ, he ni mɛi ni fata wielɔi lɛ ahe yɛ jɛmɛ ji Woloŋlelɔ Kpanaa Szabolcs Szita, ni ji Holocaust Documentation Center ni yɔɔ Budapest lɛ nɔ onukpa; László Donáth, ni ji Parliament’s Committee for Human Rights, Minority and Religious Affairs lɛ mlinyo; kɛ Kálmán Komjáthy, ni ji mɔ ni na gbɔmɔgbeei lɛ, ni amrɔ nɛɛ, eji maŋ lɛ yinɔsaneŋmalɔ lɛ. Mɛi ni fa fe 500 ni ba lɛ nyiɛ kɛkpa maŋ lɛ mli fɛɛ kɛha gbɛjianɔtoo lɛ fã ni ji enyɔ lɛ—kaimɔ tɛ lɛ nɔ mama lɛ ni Mayor József Honfi ni jɛ Körmend lɛ baajie.

Ján Žondor (János Zsondor) wo enyɛmimɛi hii kɛ yei Kristofoi lɛ hewalɛ yɛ woloŋmaa ni etsɔɔ nɔ ekɛ amɛ yeɔ shɛɛ lɛ mli akɛ amɛkaye awerɛho. Eŋma akɛ: “Nɔ ni yɔɔ mijwɛŋmɔ mli lolo ji Yohane wiemɔi ni yɔɔ Kpojiemɔ 2:10 lɛ akɛ: ‘Feemɔ anɔkwafo kɛyashi gbele mli.’ . . . Nyɛkɛa shiabii lɛ akɛ amɛkaye awerɛho, ejaakɛ miigbo yɛ anɔkwale lɛ hewɔ shi jeee akɛ awuiyelɔ.”

[Mfoniri ni yɔɔ baafa 32]

Bertalan Szabó

[Mfoniri ni yɔɔ baafa 32]

Antal Hőnisch

[Mfoniri ni yɔɔ baafa 32]

Ján Žondor