Te Ohemɔkɛyeli lɛ Mli Wa Ha Tɛŋŋ?
Te Ohemɔkɛyeli lɛ Mli Wa Ha Tɛŋŋ?
“Hemɔkɛyeli mli nyɛdamɔ shi yɛ.”—2 KORINTOBII 1:24.
1, 2. Mɛni hewɔ esa akɛ wɔná hemɔkɛyeli, ni te eeefee tɛŋŋ emli awa?
YEHOWA tsuji le akɛ esa akɛ amɛná hemɔkɛyeli ni mli wa. Yɛ anɔkwale mli lɛ, “kɛ hemɔkɛyeli bɛ lɛ, anyɛŋ Nyɔŋmɔ hiɛ asa.” (Hebribii 11:6) No hewɔ lɛ, esa akɛ wɔjɛ nilee mli wɔsɔle wɔbi mumɔ krɔŋkrɔŋ lɛ kɛ hemɔkɛyeli, ní ji eyibii ni asumɔɔ lɛ fã lɛ. (Luka 11:13; Galatabii 5:22, 23) Kɛ́ wɔkase nanemɛi heyelilɔi ahemɔkɛyeli lɛ, no hu baanyɛ awaje nakai su lɛ yɛ wɔmli.—2 Timoteo 1:5; Hebribii 13:7.
2 Kɛ́ wɔkã he wɔtiu gbɛ ni Nyɔŋmɔ Wiemɔ lɛ etsɔɔ Kristofoi fɛɛ lɛ sɛɛ lɛ, no lɛ wɔhemɔkɛyeli lɛ mli baawa. Wɔbaanyɛ wɔná hemɔkɛyeli ni mli wa kɛji wɔkane Biblia lɛ daa ni wɔkase Ŋmalɛi lɛ jogbaŋŋ kɛtsɔ woji ni jɛɔ “tsulɔ anɔkwafo” lɛ ŋɔɔ kɛbaa lɛ ayelikɛbuamɔ nɔ. (Luka 12:42-44; Yoshua 1:7, 8) Wɔkɛ wɔhemɔkɛyeli lɛ woɔ wɔhe hewalɛ kɛji wɔtee Kristofoi akpeei, kpeei bibii, kɛ kpeei wuji daa lɛ. (Romabii 1:11, 12; Hebribii 10:24, 25) Ni awoɔ wɔhemɔkɛyeli lɛ mli hewalɛ kɛji wɔkɛ mɛi krokomɛi gba sane yɛ sɔɔmɔ nitsumɔ lɛ mli.—Lala 145:10-13; Romabii 10:11-15.
3. Yɛ nɔ ni kɔɔ hemɔkɛyeli he lɛ, mɛɛ yelikɛbuamɔ wɔnáa kɛjɛɔ Kristofoi onukpai ni yɔɔ suɔmɔ lɛ adɛŋ?
3 Kristofoi onukpai ni yɔɔ suɔmɔ lɛ yeɔ amɛbuaa wɔ ni wɔtswaa wɔhemɔkɛyeli lɛ wɔmaa shi kɛtsɔ Ŋmalɛ mli ŋaawoo kɛ hewalɛwoo ni amɛkɛhaa wɔ lɛ nɔ. Amɛhiɛ jwɛŋmɔ ni tamɔ bɔfo Paulo nɔ lɛ nɔŋŋ, mɔ ni kɛɛ Korintobii lɛ akɛ: “Nyɛ miishɛɛ lɛ he nitsumɔ hefatalɔi ji wɔ, ejaakɛ hemɔkɛyeli mli nyɛdamɔ shi yɛ.” (2 Korintobii 1:23, 24) Shishitsɔɔmɔ kroko kaneɔ akɛ: “Wɔkɛ nyɛ miitsu nii koni wɔha nyɛná miishɛɛ, ejaakɛ nyɛhemɔkɛyeli lɛ mli wa.” (Contemporary English Version) Jalɔ hiɔ shi yɛ hemɔkɛyeli mli. Eji anɔkwale akɛ, mɔ kroko nyɛŋ ajie hemɔkɛyeli kpo aha wɔ loo eha wɔtsɔmɔ anɔkwafoi ni hiɛɔ amɛ emuuyeli mli. Yɛ enɛ gbɛfaŋ lɛ, ‘esa akɛ wɔtere wɔ diɛŋtsɛ wɔjatsu.’—Galatabii 3:11; 6:5.
4. Ŋmalɛ naa amaniɛbɔɔ ni kɔɔ Nyɔŋmɔ tsuji anɔkwafoi ahe lɛ baanyɛ aye abua koni wɔhemɔkɛyeli lɛ mli awa yɛ mɛɛ gbɛ nɔ?
4 Ŋmalɛi lɛ amli eyi obɔ kɛ mɛi ni ná hemɔkɛyeli lɛ ahe saji. Ekolɛ wɔle amɛnifeemɔi ni sa kadimɔ lɛ babaoo, shi hemɔkɛyeli ni amɛjie lɛ kpo gbi fɛɛ gbi kɛ ekolɛ yɛ amɛwala be kakadaŋŋ lɛ mli lɛ hu? Kɛ́ wɔsusu bɔ ni fee ni amɛjie nɛkɛ su nɛɛ kpo yɛ shihilɛ ni tamɔ wɔ diɛŋtsɛ wɔnɔ lɛ mli lɛ he amrɔ nɛɛ lɛ, ebaanyɛ eye ebua wɔ koni wɔwo wɔhemɔkɛyeli lɛ mli hewalɛ.
Hemɔkɛyeli Woɔ Wɔ Hewalɛ
5. Mɛɛ Ŋmalɛ naa odaseyeli yɔɔ ni tsɔɔ akɛ, hemɔkɛyeli kanyaa wɔ koni wɔkɛ ekãa ajaje Nyɔŋmɔ wiemɔ lɛ?
5 Hemɔkɛyeli wajeɔ wɔ ni ehaa wɔkɛ ekãa jajeɔ Nyɔŋmɔ wiemɔ lɛ. Henok kɛ ekãa gba ŋwɛi fɔbuu kojomɔ etsɔɔ. Ekɛɛ akɛ: “Naa, [Yehowa, NW] lɛ miiba kɛ ekrɔŋkrɔŋbii akpei-nyɔŋmanyɔŋmai abɔ, ni ebakojo mɛi fɛɛ, ni eeekã nɔshafeelɔi lɛ yɛ amɛnishai anitsumɔi fɛɛ ni amɛtsu lɛ kɛ wiemɔi wawaai fɛɛ ni eshafeelɔi Nyɔŋmɔ kwalɔi ewie yɛ ehe lɛ hewɔ.” (Yuda 14, 15) Eka shi faŋŋ akɛ, beni Henok henyɛlɔi ni leee Nyɔŋmɔ lɛ nu nakai wiemɔi lɛ, amɛsumɔ ni amɛgbe lɛ. Ni kɛlɛ, ekɛ ekãa wie yɛ hemɔkɛyeli mli ni Nyɔŋmɔ “ŋɔ lɛ” kɛtsɔ ewala sɛɛ ni efo lɛ nɔ, ekolɛ koni ekaha enu gbele piŋmɔi ahe. (1 Mose 5:24; Hebribii 11:5) Wɔnine shɛɛɛ nakai naakpɛɛ nii lɛ eko nɔ, shi Yehowa boɔ wɔsɔlemɔi lɛ atoi bɔni afee ni wɔnyɛ wɔkɛ hemɔkɛyeli kɛ ekãa ajaje ewiemɔ lɛ.—Bɔfoi lɛ Asaji 4:24-31.
6. Hemɔkɛyeli kɛ ekãa ni Nyɔŋmɔ kɛhaa lɛ ye ebua Noa yɛ mɛɛ gbɛ nɔ?
6 Hemɔkɛyeli nɔ tsɔ ni Noa ‘kpɛ adeka kɛha ewe lɛ yiwalaheremɔ.’ (Hebribii 11:7; 1 Mose 6:13-22) Noa ji “jalɛ shiɛlɔ” hu, ní kɛ ekãa jaje Nyɔŋmɔ kɔkɔbɔɔ lɛ eha eyinɔbii lɛ. (2 Petro 2:5) Ekolɛ, amɛye eshɛɛ sane ni kɔɔ Nu Afua ni baa lɛ he fɛo, taakɛ bɔ ni mɛi komɛi po yeɔ wɔhe fɛo kɛji wɔkɛ Ŋmalɛ naa odaseyeli tsɔɔ akɛ etsɛŋ ni abaakpata ŋmɛnɛŋmɛnɛ beaŋ nibii agbɛjianɔtoo lɛ hiɛ lɛ. (2 Petro 3:3-12) Shi kɛlɛ, taakɛ Henok kɛ Noa ji lɛ, wɔbaanyɛ wɔkɛ nakai shɛɛ sane lɛ aha yɛ hemɔkɛyeli kɛ ekãa ni Nyɔŋmɔ kɛha wɔ lɛ hewɔ.
Hemɔkɛyeli Haa Wɔtoɔ Wɔtsui Shi
7. Abraham kɛ mɛi krokomɛi jie hemɔkɛyeli kɛ tsuishitoo kpo yɛ mɛɛ gbɛ nɔ?
7 Hemɔkɛyeli kɛ tsuishitoo he miihia wɔ, titri lɛ yɛ be mli ni wɔmɛɔ gbɛjianɔtoo fɔŋ nɛɛ naagbee lɛ. Mɔ ni fata mɛi ni “tsɔɔ hemɔkɛyeli kɛ tsuishitoo nɔ náa shiwoi” lɛ ahe ji Nyɔŋmɔ gbeyeishelɔ blematsɛ Abraham. (Hebribii 6:11, 12) Hemɔkɛyeli ha eshi maŋ ni ji Ur, kɛ emli nibii kpakpai lɛ fɛɛ, ni ebatsɔ gbɔ yɛ gbɔi ashikpɔŋ ni Nyɔŋmɔ ewo shi yɛ he eha lɛ nɔ. Isak kɛ Yakob nine shɛ nakai shiwoo lɛ nɔŋŋ nɔ. Shi kɛlɛ, “hemɔkɛyeli mli mɛnɛɛmɛi fɛɛ gboi yɛ, tsɛ amɛnine shɛko nii ni awo shi lɛ anɔ.” Hemɔkɛyeli ha ‘amɛtao maŋ ni hi fe no, ni ji ŋwɛi nɔ lɛ.’ No hewɔ lɛ, Nyɔŋmɔ “esaa maŋ eto amɛ.” (Hebribii 11:8-16) Hɛɛ, Abraham, Isak, kɛ Yakob—kɛ amɛŋamɛi ni sheɔ Nyɔŋmɔ gbeyei lɛ—kɛ tsuishitoo mɛ Nyɔŋmɔ ŋwɛi Maŋtsɛyeli, ní abaajɛ mli átee amɛ shi kɛba wala mli yɛ shikpɔŋ nɔ lɛ.
8. Abraham, Isak, kɛ Yakob jie tsuishitoo kɛ hemɔkɛyeli kpo yɛ mɛni fɛɛ sɛɛ?
8 Abraham, Isak, kɛ Yakob hemɔkɛyeli gbɔjɔɔɔ. Amɛnine shɛɛɛ Shiwoo Shikpɔŋ lɛ nɔ, ni amɛnaaa ni jeŋmaji lɛ fɛɛ diɛŋtsɛ miijɔɔ amɛhe kɛtsɔ Abraham seshi lɛ nɔ. (1 Mose 15:5-7; 22:15-18) Eyɛ mli akɛ ‘maŋ ni Nyɔŋmɔ to’ lɛ efeŋ nɔ ni yɔɔ diɛŋtsɛ kɛyashi afii ohai abɔ komɛi baaho moŋ, shi hii nɛɛ tee nɔ amɛjie hemɔkɛyeli kɛ tsuishitoo kpo yɛ amɛwala shihilɛi amli fɛɛ. Eji anɔkwale akɛ, esa akɛ wɔfee nakai nɔŋŋ bianɛ akɛni Mesia Maŋtsɛyeli lɛ ji nɔ ko ni yɔɔ diɛŋtsɛ yɛ ŋwɛi lɛ hewɔ.—Lala 42:6, 12; 43:5.
Hemɔkɛyeli Haa Wɔnine Shɛɔ Otii ni Hi Fe Fɛɛ Nɔ
9. Mɛɛ hewalɛ hemɔkɛyeli náa yɛ otii ni mamɔ wɔhiɛ lɛ nɔ?
9 Blematsɛmɛi anɔkwafoi lɛ ekaseee Kanaanbii ajeŋba ni ekpɔtɔ lɛ, ejaakɛ otii ni mamɔ amɛhiɛ lɛ anɔ kwɔlɔ kwraa fe nomɛi. Nakai nɔŋŋ hemɔkɛyeli haa wɔ mumɔŋ otii ní haa wɔnyɛɔ wɔkpeeɔ nyɔ ní wɔɔnyɔ kɛbote jeŋ ni kã mɔ fɔŋ, ni ji Satan Abonsam hewalɛ mli lɛ naa.—1 Yohane 2:15-17; 5:19.
10. Te wɔfeɔ tɛŋŋ wɔleɔ akɛ Yosef tiu otii ni nɔ kwɔlɔ kwraa fe gbɛi ni eeehe yɛ je lɛ mli lɛ asɛɛ?
10 Yɛ ŋwɛi gbɛtsɔɔmɔ naa lɛ, Yakob binuu Yosef sɔmɔ akɛ Mizraim niyenii anɔkwɛlɔ, shi jeee oti ni ma ehiɛ ji ni ebatsɔ gbɔmɔ wulu yɛ je nɛŋ. Akɛni Yosef ni eye afii 110 lɛ yɔɔ hemɔkɛyeli yɛ Yehowa shiwoi lɛ amlibaa mli hewɔ lɛ, ekɛɛ enyɛmimɛi lɛ akɛ: “Mi lɛ, mibagbo; shi Nyɔŋmɔ aaabasara nyɛ kɛ̃, ni eeejie nyɛ kɛaajɛ shikpɔŋ nɛɛ nɔ kɛaatee shikpɔŋ ni ekã Abraham kɛ Isak kɛ Yakob kita yɛ he lɛ nɔ.” Yosef bi koni afu lɛ yɛ shiwoo shikpɔŋ lɛ nɔ. Beni egbo lɛ, awo lɛ tsofa ni akɛ lɛ wo gbonyo adeka mli yɛ Mizraim. Shi beni akpɔ Israelbii lɛ kɛjɛ Mizraim nomŋɔɔ mli lɛ, gbalɔ Mose ha aloo Yosef wui lɛ koni ayafu yɛ Shiwoo Shikpɔŋ lɛ nɔ. (1 Mose 50:22-26; 2 Mose 13:19) Esa akɛ hemɔkɛyeli ni tamɔ Yosef nɔ lɛ atsirɛ wɔ koni wɔtiu otii ni nɔ kwɔlɔ kwraa fe gbɛi ni wɔɔhe yɛ je lɛ mli lɛ sɛɛ.—1 Korintobii 7:29-31.
11. Mɛɛ gbɛ nɔ Mose tsɔɔ yɛ akɛ eyɛ mumɔŋ otii?
11 Mose ‘hala akɛ ekɛ Nyɔŋmɔ maŋ lɛ baana amanehulu fe nɔ ni eeeye esha mli ŋɔɔmɔ be fioo’ akɛ Mizraim odehei aweku lɛ mlinyo ni le woloŋ jogbaŋŋ. (Hebribii 11:23-26; Bɔfoi lɛ Asaji 7:20-22) Enɛ ha je lɛŋ anunyam kɛ ekolɛ, yara fɛfɛo ko ni aaafee kɛ fuu adeka ni awula lɛ jogbaŋŋ yɛ Mizraimbii afuuhe ko ni ehe gbɛi lɛ mli lɛ je edɛŋ. Shi mɛɛ sɛɛnamɔ yɔɔ he kɛji akɛto hegbɛ ni aaaná akɛ aaatsɔ “Nyɔŋmɔ gbɔmɔ,” Mla kpaŋmɔ lɛ teŋdamɔlɔ, Yehowa gbalɔ, kɛ Biblia ŋmalɔ lɛ he? (Ezra 3:2) Ani heloonaa nitsumɔ mli hiɛyaa ji nɔ ni otaoɔ, aloo hemɔkɛyeli eha oná mumɔŋ otii ni nɔ kwɔlɔ?
Hemɔkɛyeli Haa Anáa Shihilɛ ni Shishinumɔ Yɔɔ He
12. Mɛɛ hewalɛ hemɔkɛyeli ná yɛ Rahab shihilɛ nɔ?
12 Hemɔkɛyeli haaa gbɔmɛi aná otii ni fe fɛɛ lɛ kɛkɛ, shi moŋ amɛnáa shihilɛ ni shishinumɔ yɔɔ mli hu. Ekolɛ, Rahab ni jɛ Yeriko lɛ na akɛ sɛɛnamɔ ko bɛ eshihilɛ akɛ ajwamaŋ lɛ he. Ni kɛlɛ, kwɛ bɔ ni enɛ tsake ehã beni ená hemɔkɛyeli lɛ! “[Hemɔkɛyeli] nitsumɔi amli ajɛ abu” lɛ “bem, beni ehere [Israelbii] bɔfoi lɛ atuu ni ejie amɛ gbɛ kɛtsɔ gbɛ kroko nɔ lɛ,” ni no hewɔ lɛ, Kanaanbii ni ji amɛhenyɛlɔi lɛ nyɛɛɛ ana he ni amɛtsɔ lɛ. (Yakobo 2:24-26) Akɛni Rahab yɔse akɛ Yehowa ji anɔkwa Nyɔŋmɔ lɛ hewɔ lɛ, ejie hemɔkɛyeli kpo kɛtsɔ ehoshwibɔɔ shihilɛ ni ekpoo lɛ nɔ. (Yoshua 2:9-11; Hebribii 11:30, 31) Ekɛ Yehowa tsulɔ bote gbalashihilɛ mli, jeee Kanaannyo ni heee yeee. (5 Mose 7:3, 4; 1 Korintobii 7:39) Rahab ná hegbɛ kpele akɛ eeetsɔ Mesia lɛ blemanyɛ. (1 Kronika 2:3-15; Rut 4:20-22; Mateo 1:5, 6) Taakɛ mɛi krokomɛi, ni amɛteŋ mɛi komɛi eshi amɛjeŋba shara shihilɛ lɛ ji lɛ, enine baashɛ nyɔmɔwoo kroko hu nɔ—shitee kɛmiiba wala mli yɛ paradeiso shikpɔŋ nɔ.
13. David fee esha yɛ Batsheba hewɔ yɛ mɛɛ gbɛ nɔ, shi mɛɛ su ejie lɛ kpo?
13 Beni Rahab shi eshihilɛ gbɛ akɛ eshafeelɔ lɛ sɛɛ lɛ, eka shi faŋŋ akɛ, eba ejeŋ jogbaŋŋ. Shi kɛlɛ, mɛi komɛi ni kɛ be kpalaŋŋ ejɔɔ amɛhe nɔ amɛha Nyɔŋmɔ lɛ fee esha ni hiɛdɔɔ yɔɔ mli. Maŋtsɛ David kɛ Batsheba fite gbala, ni eha agbe ewu yɛ ta mli, kɛkɛ ni eŋɔ yoo lɛ akɛ eŋa. (2 Samuel 11:1-27) Beni David shwaa ehe yɛ awerɛhoyeli ni mli wa mli lɛ, ekpa Yehowa fai akɛ: “Kaaŋɔ o-Mumɔ krɔŋkrɔŋ lɛ kɛmiijɛ mimli!” Nyɔŋmɔ mumɔ lɛ ejeee David mli. Eyɛ hemɔkɛyeli akɛ, mɔbɔnalɛ ni Yehowa yɔɔ hewɔ lɛ, ekpoŋ “tsui ní werɛ eho ehe” yɛ esha hewɔ lɛ. (Lala 51:13, 19; 103:10-14) Yɛ hemɔkɛyeli ni David kɛ Batsheba ná lɛ hewɔ lɛ, akɛ hegbɛ akɛ amɛaatsɔmɔ Mesia lɛ weku mli bii lɛ wo amɛ nyɔmɔ.—1 Kronika 3:5; Mateo 1:6, 16; Luka 3:23, 31.
Yelikɛbuamɔ He Nɔmimaa Kanyaa Hemɔkɛyeli
14. Mɛɛ nɔmimaa Gideon nine shɛ nɔ, ni ekolɛ nɛkɛ sane nɛɛ baanyɛ asa wɔhemɔkɛyeli he yɛ mɛɛ gbɛ nɔ?
14 Eyɛ mli akɛ wɔnyiɛɔ yɛ hemɔkɛyeli mli moŋ, shi ekolɛ bei komɛi lɛ yelikɛbuamɔ ni jɛ ŋwɛi he nɔmimaa he baahia wɔ. Enɛ bafee anɔkwale yɛ Kojolɔ Gideon gbɛfaŋ, mɔ ni ‘tsɔ hemɔkɛyeli nɔ eye maŋtsɛyelii anɔ kunim’ lɛ. (Hebribii 11:32, 33) Beni Midianbii lɛ kɛ amɛhefatalɔi lɛ tutua Israel lɛ, Nyɔŋmɔ mumɔ lɛ bayi Gideon nɔ. Akɛni eesumɔ ni ená nɔmimaa akɛ Yehowa kɛ lɛ yɛ hewɔ lɛ, ekɛ kaai ni kɔɔ toogwantɛŋ he wolo ni akɛbaafɔ ŋmãashaahe jenamɔ lɛ he jwɛŋmɔ ha. Yɛ klɛŋklɛŋ kaa lɛ mli lɛ, bɔ́ fɔ toowolo lɛ pɛ, yɛ be mli ni shikpɔŋ lɛ egbi. Shihilɛ lɛ tsake yɛ kaa ni ji enyɔ lɛ mli. Akɛni yelikɛbuamɔi nɛɛ kanya Gideon ni kwɛɔ ehe nɔ jogbaŋŋ lɛ hewɔ lɛ, efee nii yɛ hemɔkɛyeli mli ni ekpata Israel henyɛlɔi lɛ ahiɛ. (Kojolɔi 6:33-40; 7:19-25) Kɛ́ wɔtao nii anɔmimaa beni wɔkɛ yiŋkpɛɛ feemɔ ko ekpe lɛ, no etsɔɔɔ akɛ wɔbɛ hemɔkɛyeli. Kɛ́ wɔmiifee yiŋkpɛi lɛ, wɔtsɔɔ akɛ wɔyɛ hemɔkɛyeli diɛŋtsɛ kɛji wɔkwɛ Biblia lɛ mli kɛ Kristofoi awoji amli ni wɔsɔle wɔbi mumɔ krɔŋkrɔŋ lɛ gbɛtsɔɔmɔ lɛ.—Romabii 8:26, 27.
15. Kɛ́ wɔsusu Barak hemɔkɛyeli lɛ he lɛ, ebaaye ebua wɔ yɛ mɛɛ gbɛ nɔ?
15 Akɛ nɔmimaa ni akɛha yɛ hewalɛwoo gbɛfaŋ lɛ kanya Kojolɔ Barak hemɔkɛyeli. Gbalɔyoo Debora wo lɛ hewalɛ koni eŋɔ hegbɛ lɛ ni ekɛha Israelbii lɛ aye amɛhe kɛjɛ Kanaan Maŋtsɛ Yabin nyɔŋyeli shishi. Yɛ hemɔkɛyeli kɛ nɔmimaa ni Barak ná yɛ ŋwɛi sɛɛfimɔ naa lɛ, enyiɛ gbɔmɛi 10,000 ni esako amɛhe jogbaŋŋ lɛ ahiɛ kɛtee ta, ni amɛye Yabin asraafoi ni fa kwraa fe lɛ ni Sisera nyiɛ amɛhiɛ lɛ nɔ kunim. Aye nakai kunimyeli lɛ he gbi jurɔ yɛ lala ni ŋɔɔ ni Debora kɛ Barak fo lɛ mli. (Kojolɔi 4:1–5:31) Debora wo Barak hewalɛ koni efee enii akɛ Israel hiɛnyiɛlɔ ni Nyɔŋmɔ ehala, ni eji Yehowa tsuji lɛ ateŋ mɔ kome ní kɛtsɔ hemɔkɛyeli nɔ lɛ ‘ewo mɛikpɔji ata lɛ foi’ lɛ. (Hebribii 11:34) Kɛ́ wɔsusu bɔ ni Nyɔŋmɔ jɔɔ Barak beni efee enii yɛ hemɔkɛyeli mli lɛ he lɛ, ebaatsirɛ wɔ koni wɔfee nii kɛji wɔmiishashao shi akɛ wɔɔtsu nitsumɔ ko ni kaa mɔ yɛ Yehowa sɔɔmɔ mli he nii lɛ.
Hemɔkɛyeli Woɔ Toiŋjɔlɛ He Hewalɛ
16. Mɛɛ nɔkwɛmɔnɔ kpakpa Abraham fee efɔ shi yɛ toiŋjɔlɛ ni etao yɛ ekɛ Lot teŋ lɛ mli?
16 Taakɛ bɔ ni hemɔkɛyeli yeɔ ebuaa wɔ ni wɔtsuɔ nitsumɔi ni wa yɛ Nyɔŋmɔ sɔɔmɔ lɛ mli lɛ, nakai nɔŋŋ ewoɔ toiŋjɔlɛ kɛ dioofeemɔ he hewalɛ hu. Abraham ni eda lɛ ha ewɔfase gbekɛ Lot hala shikpɔŋ he ni hi fe fɛɛ lɛ beni amɛtookwɛlɔi lɛ bé ní ehe bahia ni amɛgbala mli lɛ. (1 Mose 13:7-12) Ekolɛ Abraham sɔle yɛ hemɔkɛyeli mli koni Nyɔŋmɔ aye abua lɛ ni etsu naagba nɛɛ he nii. Yɛ nɔ najiaŋ ni eeeha lɛ diɛŋtsɛ esuɔmɔnaa nii aba klɛŋklɛŋ lɛ, etsu nibii ahe nii yɛ toiŋjɔlɛ mli. Kɛ́ wɔna akɛ béi ko eba wɔkɛ wɔnyɛmi Kristofonyo ko teŋ lɛ, nyɛhaa wɔsɔlea yɛ hemɔkɛyeli mli ni ‘wɔtao hejɔlɛ,’ ni wɔha Abraham nɔkwɛmɔnɔ ni kɔɔ niiahesusumɔ ni suɔmɔ yɔɔ mli he lɛ ahi wɔjwɛŋmɔ mli.—1 Petro 3:10-12.
17. Mɛni hewɔ wɔbaanyɛ wɔkɛɛ akɛ asaa nɔ ni tamɔ béi ni kã Paulo, Barnaba, kɛ Marko teŋ lɛ yɛ toiŋjɔlɛ gbɛ nɔ lɛ?
17 Susumɔ bɔ ni Kristofoi ashishitoo mlai ni akɛaatsu nii yɛ hemɔkɛyeli mli lɛ baanyɛ aye abua wɔ koni wɔtiu toiŋjɔlɛ sɛɛ lɛ he okwɛ. Beni Paulo baaje emaŋsɛɛ sanekpakpa shiɛmɔ nitsumɔ ni ji enyɔ lɛ shishi lɛ, Barnaba kpɛlɛ jwɛŋmɔ ni ekɛba akɛ amɛku sɛɛ amɛyasara asafoi ni yɔɔ Kipro kɛ Asia Bibioo lɛ nɔ. Shi kɛlɛ, Barnaba miisumɔ ni enyɛkwɛbi Marko afata amɛhe. Paulo ekpɛlɛɛɛ ejaakɛ Marko shi amɛ yɛ Pamfilia. ‘Etsɔ béi,’ ni nɛkɛ béi nɛɛ gbala amɛteŋ. Barnaba ŋɔ Marko efata ehe kɛtee Kipro, ni Paulo hala Sila akɛ ehefatalɔ ni “etsɔ Siria kɛ Kilikia eyawo asafoi lɛ ahewalɛ.” (Bɔfoi lɛ Asaji 15:36-41) Beni be shwie mli lɛ, asaa nakai béi lɛ, ejaakɛ no mli lɛ Marko kɛ Paulo yɛ Roma ni bɔfo lɛ wie ehe ekpakpa. (Kolosebii 4:10; Filemon 23, 24) Beni Paulo yɔɔ tsuŋwoo mli yɛ Roma aaafee afi 65 Ŋ.B. lɛ, ekɛɛ Timoteo akɛ: “Ŋɔɔ Marko ni okɛ lɛ aba, ejaakɛ ehi ha mi yɛ sɔɔmɔ lɛ hewɔ.” (2 Timoteo 4:11) Eka shi faŋŋ akɛ Paulo fee ekɛ Barnaba kɛ Marko teŋ sane lɛ ehemɔkɛyeli he sɔlemɔi, ni enɛ kɛ miishɛɛ ni kɛ “Nyɔŋmɔ hejɔlɛ” lɛ yɔɔ tsakpaa lɛ ba.—Filipibii 4:6, 7.
18. Mɛni ekolɛ eba yɛ Evodia kɛ Sintika teŋ?
18 Eji anɔkwale akɛ, akɛni wɔyeee emuu hewɔ lɛ, “wɔ fɛɛ wɔtɔɔ babaoo.” (Yakobo 3:2) Béi ko te shi yɛ Kristofoi yei enyɔ, ní Paulo wie yɛ amɛhe akɛ: “Miiwo Evodia ŋaa, ni miiwo Sintika hu ŋaa, akɛ amɛjwɛŋmɔ afee ekome yɛ Nuŋtsɔ lɛ mli. . . . Oye obua yei nɛɛ ní kɛ mi pele sanekpakpa lɛ he lɛ” teŋ. (Filipibii 4:1-3) Eeenyɛ efee akɛ nɛkɛ yei ni sheɔ Nyɔŋmɔ gbeyei nɛɛ saa amɛteŋ naagba lɛ yɛ toiŋjɔlɛ mli kɛtsɔ ŋaawoo tamɔ nɔ ni aŋma yɛ Mateo 5:23, 24 lɛ kɛ nitsumɔ nɔ. Ŋmalɛ mli shishitoo mlai ni wɔkɛaatsu nii yɛ hemɔkɛyeli mli lɛ baaye abua babaoo ni wɔtiu toiŋjɔlɛ sɛɛ ŋmɛnɛ.
Hemɔkɛyeli Haa Wɔnyɛɔ Wɔtoɔ Wɔtsui Shi
19. Mɛɛ shihilɛ ni kaa mɔ gbɔjɔɔɔ Isak kɛ Rebeka hemɔkɛyeli lɛ kɔkɔɔkɔ lɛ?
19 Hemɔkɛyeli baanyɛ aha wɔto wɔtsui shi yɛ haomɔ beaŋ. Ekolɛ, wɔhao ejaakɛ wɔweku lɛ mlinyo ko ni abaptisi lɛ lɛ egbo Nyɔŋmɔ nɔ toi ni ekɛ mɔ ni heee yeee ebote gbalashihilɛ mli. (1 Korintobii 7:39) Isak kɛ Rebeka hao ejaakɛ amɛbinuu Esau kɛ yei ni sheee Nyɔŋmɔ gbeyei lɛ yabote gbalashihilɛ mli. Eŋamɛi ni ji Hitbii lɛ ji ‘amɛmumɔ nidɔɔnii’—aahu akɛ Rebeka kɛɛ akɛ: “Mijeŋ hilɛ eje mitsine yɛ Hetbiyei lɛ ahewɔ. Kɛji Yakob wɛ Hetbiyei ni tamɔ mɛnɛɛmɛi ni ji shikpɔŋ nɛɛ nɔ biyei lɛ eko lɛ, te mahi jeŋ makɛɛ tɛŋŋ?” (1 Mose 26:34, 35; 27:46) Ni kɛlɛ, nɛkɛ shihilɛ ni kaa mɔ nɛɛ gbɔjɔɔɔ Isak kɛ Rebeka hemɔkɛyeli lɛ kɔkɔɔkɔ. Eba akɛ wɔɔhiɛ wɔhemɔkɛyeli lɛ mli kpɛŋŋ kɛji shihilɛi ni mli wawai bafee kaa kɛha wɔ.
20. Mɛɛ hemɔkɛyeli he nɔkwɛmɔnii wɔyɔɔ yɛ Rut kɛ Naomi he?
20 Yudanyo ji okulafo Naomi ni egbɔ lɛ, ni ele akɛ Yuda yei komɛi baafɔ bihii ni baafee Mesia lɛ blematsɛmɛi. Shi kɛlɛ, yɛ anɔkwale ni eji akɛ ebihii lɛ egboi akɛ mɛi ni bɛ bii, ni lɛ hu efo fɔmɔ lɛ hewɔ lɛ, nyɛ ni eeenyɛ efee akɛ eweku lɛ baanyɛ afata Mesia wekukpaa lɛ he lɛ wa waa diɛŋtsɛ. Ni kɛlɛ, eshaayoo okulafo Rut batsɔ Boaz ni eda lɛ ŋa, efɔ binuu eha lɛ, ni ebatsɔ Yesu, ni ji Mesia lɛ blemanyɛ! (1 Mose 49:10, 33; Rut 1:3-5; 4:13-22; Mateo 1:1, 5) Naomi kɛ Rut hemɔkɛyeli ni amɛyɔɔ lɛ ye fimɔ lɛ nɔ, ni eha amɛná miishɛɛ. Wɔ hu wɔbaaná miishɛɛ babaoo kɛji wɔhiɛ hemɔkɛyeli mli yɛ fimɔ be mli.
21. Mɛni hemɔkɛyeli feɔ kɛhaa wɔ, ni mɛni esa akɛ efee wɔfaishitswaa?
21 Eyɛ mli akɛ wɔleee nɔ ni baaba wɔnɔ wɔ́ akɛ aŋkroaŋkroi moŋ, shi wɔbaanyɛ wɔtsɔ hemɔkɛyeli nɔ wɔkpee kaa fɛɛ kaa naa. Hemɔkɛyeli haa wɔfeɔ ekãa ni wɔtoɔ wɔtsui shi. Ehaa wɔnáa otii ni nɔ kwɔlɔ fe fɛɛ kɛ shihilɛ ni shishinumɔ yɔɔ mli. Hemɔkɛyeli haa wɔnáa wɔkɛ mɛi krokomɛi ateŋ wekukpaa kpakpa ni ehaa amɛyeɔ fimɔ nɔ. No hewɔ lɛ, eba akɛ wɔɔtsɔmɔ “mɛi ni kɛ hemɔkɛyeli náa amɛsusuma yiwalaheremɔ lɛ ateŋ mɛi komɛi.” (Hebribii 10:39) Yɛ hewalɛ ni wɔ suɔmɔ Nyɔŋmɔ, ni ji Yehowa yɔɔ lɛ mli lɛ, nyɛhaa wɔyaa nɔ wɔjiea hemɔkɛyeli ni mli wa kpo.
Te Obaaha Hetoo Oha Tɛŋŋ?
• Mɛɛ Ŋmalɛ naa odaseyeli yɔɔ ni tsɔɔ akɛ hemɔkɛyeli baanyɛ aha wɔfee ekãa?
• Mɛni hewɔ wɔbaanyɛ wɔkɛɛ akɛ hemɔkɛyeli haa wɔnáa shihilɛ ni shishinumɔ yɔɔ he lɛ?
• Hemɔkɛyeli woɔ toiŋjɔlɛ he hewalɛ yɛ mɛɛ gbɛ nɔ?
• Mɛɛ odaseyeli yɔɔ ni tsɔɔ akɛ hemɔkɛyeli nyɛɔ ehaa wɔtoɔ wɔtsui shi yɛ fimɔ be mli?
[Nikasemɔ lɛ he Sanebimɔi]
[Mfonirii ni yɔɔ baafa 16]
Hemɔkɛyeli ha Noa kɛ Henok ná ekãa ni amɛjaje Yehowa shɛɛ saji lɛ
[Mfonirii ni yɔɔ baafa 17]
Hemɔkɛyeli ni tamɔ Mose nɔ lɛ tsirɛɔ wɔ ni wɔtiuɔ mumɔŋ otii asɛɛ
[Mfonirii ni yɔɔ baafa 18]
Ŋwɛi yelikɛbuamɔ he nɔmimaa ni Barak, Debora, kɛ Gideon ná lɛ waje hemɔkɛyeli ni amɛyɔɔ lɛ