Anɔkwayeli—Ehi, Shi Ani No Kɛkɛ Fa?

ANI asumɔɔ anɔkwayeli yɛ wɔdaa gbi shihilɛ mli lɛɛlɛŋ? Wiemɔ komekomei ashishitsɔɔmɔ wolo ko tsɔɔ “anɔkwayeli” shishi akɛ, “heyeli kɛmiijɛ osatofeemɔ he; lakamɔ ni alakaaa mɔ; jalɛ; krɔŋŋfeemɔ.” Eyɛ faŋŋ akɛ, nɛkɛ su nɛɛ he yɛ sɛɛnamɔ ejaakɛ ewajeɔ wekukpaa ni kã wɔkɛ mɛi krokomɛi ateŋ lɛ. Bɔfo Paulo wo ŋaa akɛ: “Nyɛboa nyɛ heloo gbɛfaŋ nuŋtsɔmɛi lɛ atoi yɛ nibii fɛɛ mli, jeee kɛ hiɛaŋ sɔɔmɔ, tamɔ mɛi ni taoɔ gbɔmɛi ahiɛnyam, shi moŋ yɛ tsui krɔŋŋ mli akɛ mɛi ni sheɔ Nyɔŋmɔ gbeyei.” (Kolosebii 3:22) Namɔ náŋ he miishɛɛ akɛ eeená anɔkwafo ni tamɔ nɛkɛ atsu nii aha lɛ? Ŋmɛnɛ, mɛi ni yeɔ anɔkwa lɛ baanyɛ aná hegbɛ ni hi akɛ amɛaaná nitsumɔ amɛtsu ni ejeŋ amɛdɛŋ.

Shi kɛlɛ, nɔ ni haa anáa anɔkwayeli he miishɛɛ waa lɛ ji bɔ ni esaa wɔkɛ Nyɔŋmɔ teŋ wekukpaa lɛ he ehaa lɛ. Beni blema Israelbii lɛ ye mlai kɛ gbii juji lɛ anɔ jogbaŋŋ lɛ, amɛná Nyɔŋmɔ jɔɔmɔ mli ŋɔɔmɔ. Beni Paulo wieɔ asafo lɛ hetsemɔ he lɛ, ewo Kristofoi hewalɛ akɛ: “Nyɛhaa wɔyea Hehoo gbi jurɔ lɛ, jeee kɛ masha momo, ni asaŋ jeee kɛ efɔŋ loo nɔshafeemɔ masha, shi moŋ kɛ anɔkwale kɛ anɔkwayeli akpiti ŋmiiŋmi.” (1 Korintobii 5:8) Bɔni afee ni Nyɔŋmɔ akpɛlɛ wɔjamɔ lɛ nɔ lɛ, jeee akɛ esa akɛ aná anɔkwayeli he miishɛɛ kɛkɛ, shi ehe miihia hu. Kɛlɛ, kadimɔ akɛ anɔkwayeli kɛkɛ faaa. Esa akɛ akɛ anɔkwale afata he.

Ekolɛ mɛi ni fee Titanic lɛlɛ lɛ kɛ emli gbɛfalɔi lɛ hé amɛye yɛ anɔkwale mli akɛ lɛlɛ agbo nɛɛ nyɛŋ ashiu. Ni kɛlɛ, yɛ lɛlɛ lɛ klɛŋklɛŋ gbɛfaa yɛ afi 1912 lɛ mli lɛ, eyashi ais kpɔ ko, ni gbɔmɛi 1,517 awala ŋmɛɛ amɛ. Ekolɛ Yudafoi komɛi ni hi shi yɛ klɛŋklɛŋ afii oha lɛ mli lɛ hé gbɛ ni amɛtsɔɔ nɔ amɛjáa Nyɔŋmɔ lɛ amɛye yɛ anɔkwale mli, shi ekãa ni amɛfeɔ lɛ “jeee nilee naa.” (Romabii 10:2) Bɔni afee ni Nyɔŋmɔ akpɛlɛ wɔnɔ lɛ, esa akɛ anɔkwa hemɔkɛyeli ni wɔyɔɔ lɛ adamɔ saji ni ja nɔ. Yehowa Odasefoi ni yɔɔ okutso lɛ mli lɛ yɛ he miishɛɛ akɛ amɛaaye amɛbua bo koni opɛi nɔ ni fata Nyɔŋmɔ ni ooosɔmɔ lɛ yɛ anɔkwayeli kɛ anɔkwale mli lɛ he lɛ mli.