He ni Wɔɔhe Nyɔŋmɔ ko ni Ekolɛ Wɔleee Lɛ lɛ Wɔye

GBƆMƐI ni yɔɔ Germany lɛ ateŋ mɛi etɛ fɛɛ etɛ mli mɛi enyɔ heɔ Nyɔŋmɔ nɔ amɛyeɔ. Kɛlɛ, beni abibii amɛteŋ mɛi ni fa fe akpe koni amɛtsɔɔ bɔ ni Nyɔŋmɔ ni amɛheɔ enɔ amɛyeɔ lɛ ji ha lɛ mli lɛ, etamɔ nɔ ni mɔ fɛɛ mɔ kɛ hetoo ko ni yɔɔ srɔto ha. Adafitswaa wolo ni ji FOCUS lɛ bɔ amaniɛ akɛ: “Germanybii lɛ yɛ aŋkroaŋkro susumɔi ni yɔɔ srɔto kwraa yɛ Nyɔŋmɔ he taakɛ gbɔmɛi lɛ diɛŋtsɛ ji lɛ.” Yɛ be mli ni ajieɔ hemɔkɛyeli ni aaaná yɛ Nyɔŋmɔ mli lɛ yi lɛ, ani ejeee mɔbɔ sane akɛ aaahe enɔ aye ní aleee nɔ̃ Nyɔŋmɔ ni eji?

Anaa nɛkɛ yiŋkɔshikɔshifeemɔ ni kɔɔ bɔ ni Nyɔŋmɔ ji loo nɔ̃ mɔ ni eji nɛɛ he lɛ kɛtekeɔ Germany husui lɛ; eyɛ Europa hei krokomɛi hu. Niiamlipɛimɔ ko ni afee yɛ Austria, Britain, kɛ Netherlands lɛ jie gbeekpamɔ ni egbɛ eshwã ni ayɔɔ akɛ Nyɔŋmɔ ji “hewalɛ ko ni nɔ kwɔ waa loo teemɔŋ nɔ ko ni anyɛŋ atsɔɔ shishi” lɛ kpo. Yɛ oblahii kɛ oblayei ateŋ titri, kɛ yɛ mɛi ni heɔ enɔ amɛyeɔ lɛ tete po ateŋ lɛ, ani eji mɔ ko ni ehe sane lɛ ji teemɔŋ sane.

Ani Bo Diɛŋtsɛ lɛ Ole Nyɔŋmɔ?

Srɔtofeemɔ kpele ko yɛ mɔ ko ni aaale ehe sane kɛ le ni aaale lɛ diɛŋtsɛ lɛ he. Ní aaale mɔ ko he sane—maŋtsɛ ko ni yɔɔ he ko shɔŋŋ, akaŋshilɔ kpanaa, sini mli gbɔmɔ ko ni ale lɛ waa—lɛ tsɔɔ kpɛlɛmɔ kɛkɛ ni aaakpɛlɛ nɔ akɛ eyɛ shihilɛ mli. Shi kɛlɛ, ní aaale mɔ ko diɛŋtsɛ lɛ tsɔɔ babaoo fe nakai. Nɔ ni fata enɛ he ji nakai mɔ lɛ su, jeŋba, henumɔi, nibii ni esumɔɔ kɛ nibii ni esumɔɔɔ, kɛ egbɛjianɔtoo kɛha wɔsɛɛ be ní aaale. Ní aaale mɔ ko diɛŋtsɛ lɛ gbeleɔ gbɛ kɛhaa wekukpaa ni bɛŋkɛ kpaakpa ni akɛ lɛ aaaná.

Mɛi aŋkroaŋkroi akpei ohai abɔ emu sane naa akɛ nilee fioo ko pɛ kɛkɛ ni aaaná yɛ Nyɔŋmɔ he—aloo ehe sane ni aaale kɛkɛ lɛ—faaa. Amɛtee hiɛ babaoo fe nakai kɛtsɔ le ni amɛná amɛle Nyɔŋmɔ jogbaŋŋ kɛmɔ shi lɛ nɔ. Ani efee nɔ ni sɛɛnamɔ yɔɔ he kɛha amɛ? Nuu ko ni atsɛɔ lɛ Paul, ni yɔɔ Germany kooyigbɛ ní be ko ni eho lɛ eyɔɔ Nyɔŋmɔ mli hemɔkɛyeli bɔ ni sa kɛkɛ lɛ, kpɛ eyiŋ akɛ lɛ diɛŋtsɛ ebaale Lɛ jogbaŋŋ kɛmɔ shi. Paul tsɔɔ mli akɛ: “Le ni aaaná ale Nyɔŋmɔ jogbaŋŋ lɛ heɔ be kɛ mɔdɛŋbɔɔ, shi sɛɛnamɔi fɛɛ ni jɛɔ mli baa lɛ fa babaoo. Wekukpaa ni bɛŋkɛ kpaakpa ni akɛ Bɔlɔ lɛ aaaná lɛ haa daa gbi shihilɛ feɔ nɔ ni hi jogbaŋŋ.”

Ani be kɛ mɔdɛŋbɔɔ ni he hiaa koni aná ale Nyɔŋmɔ jogbaŋŋ kɛmɔ shi lɛ he yɛ sɛɛnamɔ? Ofainɛ kanemɔ sane ni nyiɛ sɛɛ lɛ.

[Wiemɔ ni akɔ ni akɛmiitsu nii ni yɔɔ baafa 3]

Srɔtofeemɔ kpele ko yɛ mɔ ko ni aaale ehe sane kɛ le ni aaale lɛ diɛŋtsɛ lɛ he